Utshovঅধ্যায় 145
145.1
সংজয় উবাচ
তস্মিন্সুতুমুলে যুদ্ধে বর্তমানে ভয়াবহে
ধৃষ্টদ্যুম্নো মহারাজ দ্রোণমেবাভ্যবর্তত
145.2
সংমৃজানো ধনুঃ শ্রেষ্ঠং জ্যাং বিকর্ষন্পুনঃ পুনঃ
অভ্যবর্তত দ্রোণস্য রথং রুক্মবিভূষিতম্
145.3
ধৃষ্টদ্যুম্নং তদায়ান্তং দ্রোণস্যান্তচিকীর্ষয়া
পরিবব্রুর্মহারাজ পাঞ্চালাঃ পাণ্ডবৈঃ সহ
145.4
তথা পরিবৃতং দৃষ্ট্বা দ্রোণমাচার্যসত্তমম্
পুত্রাস্তে সর্বতো যত্তা ররক্ষুর্দ্রোণমাহবে
145.5
বলার্ণবৌ ততস্তৌ তু সমেয়াতাং নিশামুখে
বাতোদ্ধূতৌ ক্ষুব্ধসত্ত্বৌ ভৈরবৌ সাগরাবিব
145.6
ততো দ্রোণং মহারাজ পাঞ্চাল্যঃ পঞ্চভিঃ শরৈঃ
বিব্যাধ হৃদয়ে তূর্ণং সিংহনাদং ননাদ চ
145.7
তং দ্রোণঃ পঞ্চবিংশত্যা বিদ্ধ্বা ভারত সংয়ুগে
চিচ্ছেদান্যেন ভল্লেন ধনুরস্য মহাপ্রভম্
145.8
ধৃষ্টদ্যুম্নস্তু নির্বিদ্ধো দ্রোণেন ভরতর্ষভ
উত্সসর্জ ধনুস্তূর্ণং সংদশ্য দশনচ্ছদম্
145.9
ততঃ ক্রুদ্ধো মহারাজ ধৃষ্টদ্যুম্নঃ প্রতাপবান্
আদদেঽন্যদ্ধনুঃ শ্রেষ্ঠং দ্রোণস্যান্তচিকীর্ষয়া
145.10
বিকৃষ্য চ ধনুশ্চিত্রমাকর্ণাত্পরবীরহা
দ্রোণস্যান্তকরং ঘোরং ব্যসৃজত্সায়কং ততঃ
145.11
স বিসৃষ্টো বলবতা শরো ঘোরো মহামৃধে
ভাসয়ামাস তত্সৈন্যং দিবাকর ইবোদিতঃ
145.12
তং দৃষ্ট্বা তু শরং ঘোরং দেবগন্ধর্বমানবাঃ
স্বস্ত্যস্তু সমরে রাজন্দ্রোণায়েত্যব্রুবন্বচঃ
145.13
তং তু সায়কমপ্রাপ্তমাচার্যস্য রথং প্রতি
কর্ণো দ্বাদশধা রাজংশ্চিচ্ছেদ কৃতহস্তবৎ
145.14
স ছিন্নো বহুধা রাজন্সূতপুত্রেণ মারিষ
নিপপাত শরস্তূর্ণং নিকৃত্তঃ কর্ণসায়কৈঃ
145.15
ছিত্ত্বা তু সমরে বাণং শরৈঃ সংনতপর্বভিঃ
ধৃষ্টদ্যুম্নং রণে কর্ণো বিব্যাধ দশভিঃ শরৈঃ
145.16
পঞ্চভির্দ্রোণপুত্রস্তু স্বয়ং দ্রোণশ্চ সপ্তভিঃ
শল্যশ্চ নবভির্বাণৈস্ত্রিভির্দুঃশাসনস্তথা
145.17
দুর্যোধনশ্চ বিংশত্যা শকুনিশ্চাপি পঞ্চভিঃ
পাঞ্চাল্যং ত্বরিতাবিধ্যন্সর্ব এব মহারথাঃ
145.18
স বিদ্ধঃ সপ্তভির্বীরৈর্দ্রোণত্রাণার্থমাহবে
সর্বানসংভ্রমাদ্রাজন্প্রত্যবিধ্যত্ত্রিভিস্ত্রিভিঃ
দ্রোণং দ্রৌণিং চ কর্ণং চ বিব্যাধ তব চাত্মজম্
145.19
তে বিদ্ধ্বা ধন্বিনা তেন ধৃষ্টদ্যুম্নং পুনর্মৃধে
বিব্যধুঃ পঞ্চভিস্তূর্ণমেকৈকো রথিনাং বরঃ
145.20
দ্রুমসেনস্তু সংক্রুদ্ধো রাজন্বিব্যাধ পত্রিণা
ত্রিভিশ্চান্যৈঃ শরৈস্তূর্ণং তিষ্ঠ তিষ্ঠেতি চাব্রবীৎ
145.21
স তু তং প্রতিবিব্যাধ ত্রিভিস্তীক্ষ্ণৈরজিহ্মগৈঃ
স্বর্ণপুঙ্খৈঃ শিলাধৌতৈঃ প্রাণান্তকরণৈর্যুধি
145.22
ভল্লেনান্যেন তু পুনঃ সুবর্ণোজ্জ্বলকুণ্ডলম্
উন্মমাথ শিরঃ কায়াদ্দ্রুমসেনস্য বীর্যবান্
145.23
তচ্ছিরো ন্যপতদ্ভূমৌ সংদষ্টৌষ্ঠপুটং রণে
মহাবাতসমুদ্ধূতং পক্বং তালফলং যথা
145.24
তাংশ্চ বিদ্ধ্বা পুনর্বীরান্বীরঃ সুনিশিতৈঃ শরৈঃ
রাধেয়স্যাচ্ছিনদ্ভল্লৈঃ কার্মুকং চিত্রয়োধিনঃ
145.25
ন তু তন্মমৃষে কর্ণো ধনুষশ্ছেদনং তথা
নিকর্তনমিবাত্যুগ্রো লাঙ্গূলস্য যথা হরিঃ
145.26
সোঽন্যদ্ধনুঃ সমাদায় ক্রোধরক্তেক্ষণঃ শ্বসন্
অভ্যবর্ষচ্ছরৌঘৈস্তং ধৃষ্টদ্যুম্নং মহাবলম্
145.27
দৃষ্ট্বা তু কর্ণং সংরব্ধং তে বীরাঃ ষড্রথর্ষভাঃ
পাঞ্চাল্যপুত্রং ত্বরিতাঃ পরিবব্রুর্জিঘাংসয়া
145.28
ষণ্ণাং যোধপ্রবীরাণাং তাবকানাং পুরস্কৃতম্
মৃত্যোরাস্যমনুপ্রাপ্তং ধৃষ্টদ্যুম্নমমংস্মহি
145.29
এতস্মিন্নেব কালে তু দাশার্হো বিকিরঞ্শরান্
ধৃষ্টদ্যুম্নং পরাক্রান্তং সাত্যকিঃ প্রত্যপদ্যত
145.30
তমায়ান্তং মহেষ্বাসং সাত্যকিং যুদ্ধদুর্মদম্
রাধেয়ো দশভির্বাণৈঃ প্রত্যবিধ্যদজিহ্মগৈঃ
145.31
তং সাত্যকির্মহারাজ বিব্যাধ দশভিঃ শরৈঃ
পশ্যতাং সর্ববীরাণাং মা গাস্তিষ্ঠেতি চাব্রবীৎ
145.32
স সাত্যকেস্তু বলিনঃ কর্ণস্য চ মহাত্মনঃ
আসীত্সমাগমো ঘোরো বলিবাসবয়োরিব
145.33
ত্রাসয়ংস্তলঘোষেণ ক্ষত্রিয়ান্ক্ষত্রিয়র্ষভঃ
রাজীবলোচনং কর্ণং সাত্যকিঃ প্রত্যবিধ্যত
145.34
কম্পয়ন্নিব ঘোষেণ ধনুষো বসুধাং বলী
সূতপুত্রো মহারাজ সাত্যকিং প্রত্যয়োধয়ৎ
145.35
বিপাঠকর্ণিনারাচৈর্বত্সদন্তৈঃ ক্ষুরৈরপি
কর্ণঃ শরশতৈশ্চাপি শৈনেয়ং প্রত্যবিধ্যত
145.36
তথৈব যুয়ুধানোঽপি বৃষ্ণীনাং প্রবরো রথঃ
অভ্যবর্ষচ্ছরৈঃ কর্ণং তদ্যুদ্ধমভবত্সমম্
145.37
তাবকাশ্চ মহারাজ কর্ণপুত্রশ্চ দংশিতঃ
সাত্যকিং বিব্যধুস্তূর্ণং সমন্তান্নিশিতৈঃ শরৈঃ
145.38
অস্ত্রৈরস্ত্রাণি সংবার্য তেষাং কর্ণস্য চাভিভো
অবিধ্যত্সাত্যকিঃ ক্রুদ্ধো বৃষসেনং স্তনান্তরে
145.39
তেন বাণেন নির্বিদ্ধো বৃষসেনো বিশাং পতে
ন্যপতত্স রথে মূঢো ধনুরুত্সৃজ্য বীর্যবান্
145.40
ততঃ কর্ণো হতং মত্বা বৃষসেনং মহারথঃ
পুত্রশোকাভিসংতপ্তঃ সাত্যকিং প্রত্যপীডয়ৎ
145.41
পীড্যমানস্তু কর্ণেন যুয়ুধানো মহারথঃ
বিব্যাধ বহুভিঃ কর্ণং ত্বরমাণঃ পুনঃ পুনঃ
145.42
স কর্ণং দশভির্বিদ্ধ্বা বৃষসেনং চ সপ্তভিঃ
সহস্তাবাপধনুষী তয়োশ্চিচ্ছেদ সাত্বতঃ
145.43
তাবন্যে ধনুষী সজ্যে কৃত্বা শত্রুভয়ংকরে
যুয়ুধানমবিধ্যেতাং সমন্তান্নিশিতৈঃ শরৈঃ
145.44
বর্তমানে তু সংগ্রামে তস্মিন্বীরবরক্ষয়ে
অতীব শুশ্রুবে রাজন্গাণ্ডীবস্য মহাস্বনঃ
145.45
শ্রুত্বা তু রথনির্ঘোষং গাণ্ডীবস্য চ নিস্বনম্
সূতপুত্রোঽব্রবীদ্রাজন্দুর্যোধনমিদং বচঃ
145.46
এষ সর্বাঞ্শিবীন্হত্বা মুখ্যশশ্চ নরর্ষভান্
পৌরবাংশ্চ মহেষ্বাসান্গাণ্ডীবনিনদো মহান্
145.47
শ্রূয়তে রথঘোষশ্চ বাসবস্যেব নর্দতঃ
করোতি পাণ্ডবো ব্যক্তং কর্মৌপয়িকমাত্মনঃ
145.48
এষা বিদীর্যতে রাজন্বহুধা ভারতী চমূঃ
বিপ্রকীর্ণান্যনীকানি নাবতিষ্ঠন্তি কর্হিচিৎ
145.49
বাতেনেব সমুদ্ধূতমভ্রজালং বিদীর্যতে
সব্যসাচিনমাসাদ্য ভিন্না নৌরিব সাগরে
145.50
দ্রবতাং যোধমুখ্যানাং গাণ্ডীবপ্রেষিতৈঃ শরৈঃ
বিদ্ধানাং শতশো রাজঞ্শ্রূয়তে নিনদো মহান্
নিশীথে রাজশার্দূল স্তনয়িত্নোরিবাম্বরে
145.51
হাহাকাররবাংশ্চৈব সিংহনাদাংশ্চ পুষ্কলান্
শৃণু শব্দান্বহুবিধানর্জুনস্য রথং প্রতি
145.52
অয়ং মধ্যে স্থিতোঽস্মাকং সাত্যকিঃ সাত্বতাধমঃ
ইহ চেল্লভ্যতে লক্ষ্যং কৃত্স্নাঞ্জেষ্যামহে পরান্
145.53
এষ পাঞ্চালরাজস্য পুত্রো দ্রোণেন সংগতঃ
সর্বতঃ সংবৃতো যোধৈ রাজন্পুরুষসত্তমৈঃ
145.54
সাত্যকিং যদি হন্যামো ধৃষ্টদ্যুম্নং চ পার্ষতম্
অসংশয়ং মহারাজ ধ্রুবো নো বিজয়ো ভবেৎ
145.55
সৌভদ্রবদিমৌ বীরৌ পরিবার্য মহারথৌ
প্রয়তামো মহারাজ নিহন্তুং বৃষ্ণিপার্ষতৌ
145.56
সব্যসাচী পুরোঽভ্যেতি দ্রোণানীকায় ভারত
সংসক্তং সাত্যকিং জ্ঞাত্বা বহুভিঃ কুরুপুংগবৈঃ
145.57
তত্র গচ্ছন্তু বহবঃ প্রবরা রথসত্তমাঃ
যাবত্পার্থো ন জানাতি সাত্যকিং বহুভির্বৃতম্
145.58
তে ত্বরধ্বং যথা শূরাঃ শরাণাং মোক্ষণে ভৃশম্
যথা তূর্ণং ব্রজত্যেষ পরলোকায় মাধবঃ
145.59
কর্ণস্য মতমাজ্ঞায় পুত্রস্তে প্রাহ সৌবলম্
যথেন্দ্রঃ সমরে রাজন্প্রাহ বিষ্ণুং যশস্বিনম্
145.60
বৃতঃ সহস্রৈর্দশভির্গজানামনিবর্তিনাম্
রথৈশ্চ দশসাহস্রৈর্বৃতো যাহি ধনংজয়ম্
145.61
দুঃশাসনো দুর্বিষহঃ সুবাহুর্দুষ্প্রধর্ষণঃ
এতে ত্বামনুয়াস্যন্তি পত্তিভির্বহুভির্বৃতাঃ
145.62
জহি কৃষ্ণৌ মহাবাহো ধর্মরাজং চ মাতুল
নকুলং সহদেবং চ ভীমসেনং চ ভারত
145.63
দেবানামিব দেবেন্দ্রে জয়াশা মে ত্বয়ি স্থিতা
জহি মাতুল কৌন্তেয়ানসুরানিব পাবকিঃ
145.64
এবমুক্তো যয়ৌ পার্থান্পুত্রেণ তব সৌবলঃ
মহত্যা সেনয়া সার্ধং তব পুত্রৈস্তথা বিভো
145.65
প্রিয়ার্থং তব পুত্রাণাং দিধক্ষুঃ পাণ্ডুনন্দনান্
ততঃ প্রববৃতে যুদ্ধং তাবকানাং পরৈঃ সহ
145.66
প্রয়াতে সৌবলে রাজন্পাণ্ডবানামনীকিনীম্
বলেন মহতা যুক্তঃ সূতপুত্রস্তু সাত্বতম্
145.67
অভ্যয়াত্ত্বরিতং যুদ্ধে কিরঞ্শরশতান্বহূন্
তথৈব পাণ্ডবাঃ সর্বে সাত্যকিং পর্যবারয়ন্
145.68
মহদ্যুদ্ধং তদাসীত্তু দ্রোণস্য নিশি ভারত
ধৃষ্টদ্যুম্নেন শূরেণ পাঞ্চালৈশ্চ মহাত্মনঃ