Utshovঅধ্যায় 146
146.1
সংজয় উবাচ
ততস্তে প্রাদ্রবন্সর্বে ত্বরিতা যুদ্ধদুর্মদাঃ
অমৃষ্যমাণাঃ সংরব্ধা যুয়ুধানরথং প্রতি
146.2
তে রথৈঃ কল্পিতৈ রাজন্হেমরূপ্যবিভূষিতৈঃ
সাদিভিশ্চ গজৈশ্চৈব পরিবব্রুঃ স্ম সাত্বতম্
146.3
অথৈনং কোষ্ঠকীকৃত্য সর্বতস্তে মহারথাঃ
সিংহনাদাংস্তদা চক্রুস্তর্জয়ন্তঃ স্ম সাত্যকিম্
146.4
তেঽভ্যবর্ষঞ্শরৈস্তীক্ষ্ণৈঃ সাত্যকিং সত্যবিক্রমম্
ত্বরমাণা মহাবীর্যা মাধবস্য বধৈষিণঃ
146.5
তান্দৃষ্ট্বা পততস্তূর্ণং শৈনেয়ঃ পরবীরহা
প্রত্যগৃহ্ণান্মহাবাহুঃ প্রমুঞ্চন্বিশিখান্বহূন্
146.6
তত্র বীরো মহেষ্বাসঃ সাত্যকির্যুদ্ধদুর্মদঃ
নিচকর্ত শিরাংস্যুগ্রৈঃ শরৈঃ সংনতপর্বভিঃ
146.7
হস্তিহস্তান্হয়গ্রীবান্বাহূনপি চ সায়ুধান্
ক্ষুরপ্রৈঃ পাতয়ামাস তাবকানাং স মাধবঃ
146.8
পতিতৈশ্চামরৈশ্চৈব শ্বেতচ্ছত্রৈশ্চ ভারত
বভূব ধরণী পূর্ণা নক্ষত্রৈর্দ্যৌরিব প্রভো
146.9
তেষাং তু যুয়ুধানেন যুধ্যতাং যুধি ভারত
বভূব তুমুলঃ শব্দঃ প্রেতানামিব ক্রন্দতাম্
146.10
তেন শব্দেন মহতা পূরিতাসীদ্বসুংধরা
রাত্রিঃ সমভবচ্চৈব তীব্ররূপা ভয়াবহা
146.11
দীর্যমাণং বলং দৃষ্ট্বা যুয়ুধানশরাহতম্
শ্রুত্বা চ বিপুলং নাদং নিশীথে লোমহর্ষণম্
146.12
সুতস্তবাব্রবীদ্রাজন্সারথিং রথিনাং বরঃ
যত্রৈষ শব্দস্তত্রাশ্বাংশ্চোদয়েতি পুনঃ পুনঃ
146.13
তেন সংচোদ্যমানস্তু ততস্তাংস্তুরগোত্তমান্
সূতঃ সংচোদয়ামাস যুয়ুধানরথং প্রতি
146.14
ততো দুর্যোধনঃ ক্রুদ্ধো দৃঢধন্বা জিতক্লমঃ
শীঘ্রহস্তশ্চিত্রয়োধী যুয়ুধানমুপাদ্রবৎ
146.15
ততঃ পূর্ণায়তোত্সৃষ্টৈর্মাংসশোণিতভোজনৈঃ
দুর্যোধনং দ্বাদশভির্মাধবঃ প্রত্যবিধ্যত
146.16
দুর্যোধনস্তেন তথা পূর্বমেবার্দিতঃ শরৈঃ
শৈনেয়ং দশভির্বাণৈঃ প্রত্যবিধ্যদমর্ষিতঃ
146.17
ততঃ সমভবদ্যুদ্ধমাকুলং ভরতর্ষভ
পাঞ্চালানাং চ সর্বেষাং ভারতানাং চ দারুণম্
146.18
শৈনেয়স্তু রণে ক্রুদ্ধস্তব পুত্রং মহারথম্
সায়কানামশীত্যা তু বিব্যাধোরসি ভারত
146.19
ততোঽস্য বাহান্সমরে শরৈর্নিন্যে যমক্ষয়ম্
সারথিং চ রথাত্তূর্ণং পাতয়ামাস পত্রিণা
146.20
হতাশ্বে তু রথে তিষ্ঠন্পুত্রস্তব বিশাং পতে
মুমোচ নিশিতান্বাণাঞ্শৈনেয়স্য রথং প্রতি
146.21
শরান্পঞ্চাশতস্তাংস্তু শৈনেয়ঃ কৃতহস্তবৎ
চিচ্ছেদ সমরে রাজন্প্রেষিতাংস্তনয়েন তে
146.22
অথাপরেণ ভল্লেন মুষ্টিদেশে মহদ্ধনুঃ
চিচ্ছেদ রভসো যুদ্ধে তব পুত্রস্য মারিষ
146.23
বিরথো বিধনুষ্কশ্চ সর্বলোকেশ্বরঃ প্রভুঃ
আরুরোহ রথং তূর্ণং ভাস্বরং কৃতবর্মণঃ
146.24
দুর্যোধনে পরাবৃত্তে শৈনেয়স্তব বাহিনীম্
দ্রাবয়ামাস বিশিখৈর্নিশামধ্যে বিশাং পতে
146.25
শকুনিশ্চার্জুনং রাজন্পরিবার্য সমন্ততঃ
রথৈরনেকসাহস্রৈর্গজৈশ্চৈব সহস্রশঃ
তথা হয়সহস্রৈশ্চ তুমুলং সর্বতোঽকরোৎ
146.26
তে মহাস্ত্রাণি দিব্যানি বিকিরন্তোঽর্জুনং প্রতি
অর্জুনং যোধয়ন্তি স্ম ক্ষত্রিয়াঃ কালচোদিতাঃ
146.27
তান্যর্জুনঃ সহস্রাণি রথবারণবাজিনাম্
প্রত্যবারয়দায়স্তঃ প্রকুর্বন্বিপুলং ক্ষয়ম্
146.28
ততস্তু সমরে শূরঃ শকুনিঃ সৌবলস্তদা
বিব্যাধ নিশিতৈর্বাণৈরর্জুনং প্রহসন্নিব
146.29
পুনশ্চৈব শতেনাস্য সংরুরোধ মহারথম্
তমর্জুনস্তু বিংশত্যা বিব্যাধ যুধি ভারত
146.30
অথেতরান্মহেষ্বাসাংস্ত্রিভিস্ত্রিভিরবিধ্যত
সংবার্য তান্বাণগণৈর্যুধি রাজন্ধনংজয়ঃ
অবধীত্তাবকান্যোধান্বজ্রপাণিরিবাসুরান্
146.31
ভুজৈশ্ছিন্নৈর্মহারাজ শরীরৈশ্চ সহস্রশঃ
সমাস্তীর্ণা ধরা তত্র বভৌ পুষ্পৈরিবাচিতা
146.32
স বিদ্ধ্বা শকুনিং ভূয়ঃ পঞ্চভির্নতপর্বভিঃ
উলূকং ত্রিভিরাজঘ্নে ত্রিভিরেব মহায়সৈঃ
146.33
তমুলূকস্তথা বিদ্ধ্বা বাসুদেবমতাডয়ৎ
ননাদ চ মহানাদং পূরয়ন্বসুধাতলম্
146.34
অর্জুনস্তু দ্রুতং গত্বা শকুনের্ধনুরাচ্ছিনৎ
নিন্যে চ চতুরো বাহান্যমস্য সদনং প্রতি
146.35
ততো রথাদবপ্লুত্য সৌবলো ভরতর্ষভ
উলূকস্য রথং তূর্ণমারুরোহ বিশাং পতে
146.36
তাবেকরথমারূঢৌ পিতাপুত্রৌ মহারথৌ
পার্থং সিষিচতুর্বাণৈর্গিরিং মেঘাবিবোত্থিতৌ
146.37
তৌ তু বিদ্ধ্বা মহারাজ পাণ্ডবো নিশিতৈঃ শরৈঃ
বিদ্রাবয়ংস্তব চমূং শতশো ব্যধমচ্ছরৈঃ
146.38
অনিলেন যথাভ্রাণি বিচ্ছিন্নানি সমন্ততঃ
বিচ্ছিন্নানি তথা রাজন্বলান্যাসন্বিশাং পতে
146.39
তদ্বলং ভরতশ্রেষ্ঠ বধ্যমানং তথা নিশি
প্রদুদ্রাব দিশঃ সর্বা বীক্ষমাণং ভয়ার্দিতম্
146.40
উত্সৃজ্য বাহান্সমরে চোদয়ন্তস্তথাপরে
সংভ্রান্তাঃ পর্যধাবন্ত তস্মিংস্তমসি দারুণে
146.41
বিজিত্য সমরে যোধাংস্তাবকান্ভরতর্ষভ
দধ্মতুর্মুদিতৌ শঙ্খৌ বাসুদেবধনংজয়ৌ
146.42
ধৃষ্টদ্যুম্নো মহারাজ দ্রোণং বিদ্ধ্বা ত্রিভিঃ শরৈঃ
চিচ্ছেদ ধনুষস্তূর্ণং জ্যাং শরেণ শিতেন হ
146.43
তন্নিধায় ধনুর্নীডে দ্রোণঃ ক্ষত্রিয়মর্দনঃ
আদদেঽন্যদ্ধনুঃ শূরো বেগবত্সারবত্তরম্
146.44
ধৃষ্টদ্যুম্নং ততো দ্রোণো বিদ্ধ্বা সপ্তভিরাশুগৈঃ
সারথিং পঞ্চভির্বাণৈ রাজন্বিব্যাধ সংয়ুগে
146.45
তং নিবার্য শরৈস্তূর্ণং ধৃষ্টদ্যুম্নো মহারথঃ
ব্যধমত্কৌরবীং সেনাং শতশোঽথ সহস্রশঃ
146.46
বধ্যমানে বলে তস্মিংস্তব পুত্রস্য মারিষ
প্রাবর্তত নদী ঘোরা শোণিতৌঘতরঙ্গিণী
146.47
উভয়োঃ সেনয়োর্মধ্যে নরাশ্বদ্বিপবাহিনী
যথা বৈতরণী রাজন্যমরাষ্ট্রপুরং প্রতি
146.48
দ্রাবয়িত্বা তু তত্সৈন্যং ধৃষ্টদ্যুম্নঃ প্রতাপবান্
অত্যরাজত তেজস্বী শক্রো দেবগণেষ্বিব
146.49
অথ দধ্মুর্মহাশঙ্খান্ধৃষ্টদ্যুম্নশিখণ্ডিনৌ
যমৌ চ যুয়ুধানশ্চ পাণ্ডবশ্চ বৃকোদরঃ
146.50
জিত্বা রথসহস্রাণি তাবকানাং মহারথাঃ
সিংহনাদরবাংশ্চক্রুঃ পাণ্ডবা জিতকাশিনঃ
146.51
পশ্যতস্তব পুত্রস্য কর্ণস্য চ মদোত্কটাঃ
তথা দ্রোণস্য শূরস্য দ্রৌণেশ্চৈব বিশাং পতে