Utshovঅধ্যায় 147
147.1
সংজয় উবাচ
বিদ্রুতং স্ববলং দৃষ্ট্বা বধ্যমানং মহাত্মভিঃ
ক্রোধেন মহতাবিষ্টঃ পুত্রস্তব বিশাং পতে
147.2
অভ্যেত্য সহসা কর্ণং দ্রোণং চ জয়তাং বরম্
অমর্ষবশমাপন্নো বাক্যজ্ঞো বাক্যমব্রবীৎ
147.3
ভবদ্ভ্যামিহ সংগ্রামো ক্রুদ্ধাভ্যাং সংপ্রবর্তিতঃ
আহবে নিহতং দৃষ্ট্বা সৈন্ধবং সব্যসাচিনা
147.4
নিহন্যমানাং পাণ্ডূনাং বলেন মম বাহিনীম্
ভূত্বা তদ্বিজয়ে শক্তাবশক্তাবিব পশ্যতঃ
147.5
যদ্যহং ভবতোস্ত্যাজ্যো ন বাচ্যোঽস্মি তদৈব হি
আবাং পাণ্ডুসুতান্সংখ্যে জেষ্যাব ইতি মানদৌ
147.6
তদৈবাহং বচঃ শ্রুত্বা ভবদ্ভ্যামনুসংমতম্
কৃতবান্পাণ্ডবৈঃ সার্ধং বৈরং যোধবিনাশনম্
147.7
যদি নাহং পরিত্যাজ্যো ভবদ্ভ্যাং পুরুষর্ষভৌ
যুধ্যেতামনুরূপেণ বিক্রমেণ সুবিক্রমৌ
147.8
বাক্প্রতোদেন তৌ বীরৌ প্রণুন্নৌ তনয়েন তে
প্রাবর্তয়েতাং তৌ যুদ্ধং ঘট্টিতাবিব পন্নগৌ
147.9
ততস্তৌ রথিনাং শ্রেষ্ঠৌ সর্বলোকধনুর্ধরৌ
শৈনেয়প্রমুখান্পার্থানভিদুদ্রুবতূ রণে
147.10
তথৈব সহিতাঃ পার্থাঃ স্বেন সৈন্যেন সংবৃতাঃ
অভ্যবর্তন্ত তৌ বীরৌ নর্দমানৌ মুহুর্মুহুঃ
147.11
অথ দ্রোণো মহেষ্বাসো দশভিঃ শিনিপুংগবম্
অবিধ্যত্ত্বরিতং ক্রুদ্ধঃ সর্বশস্ত্রভৃতাং বরঃ
147.12
কর্ণশ্চ দশভির্বাণৈঃ পুত্রশ্চ তব সপ্তভিঃ
দশভির্বৃষসেনশ্চ সৌবলশ্চাপি সপ্তভিঃ
এতে কৌরব সংক্রন্দে শৈনেয়ং পর্যবারয়ন্
147.13
দৃষ্ট্বা চ সমরে দ্রোণং নিঘ্নন্তং পাণ্ডবীং চমূম্
বিব্যধুঃ সোমকাস্তূর্ণং সমন্তাচ্ছরবৃষ্টিভিঃ
147.14
ততো দ্রোণোঽহরত্প্রাণান্ক্ষত্রিয়াণাং বিশাং পতে
রশ্মিভির্ভাস্করো রাজংস্তমসামিব ভারত
147.15
দ্রোণেন বধ্যমানানাং পাঞ্চালানাং বিশাং পতে
শুশ্রুবে তুমুলঃ শব্দঃ ক্রোশতামিতরেতরম্
147.16
পুত্রানন্যে পিতৄনন্যে ভ্রাতৄনন্যে চ মাতুলান্
ভাগিনেয়ান্বয়স্যাংশ্চ তথা সংবন্ধিবান্ধবান্
উত্সৃজ্যোত্সৃজ্য গচ্ছন্তি ত্বরিতা জীবিতেপ্সবঃ
147.17
অপরে মোহিতা মোহাত্তমেবাভিমুখা যয়ুঃ
পাণ্ডবানাং রণে যোধাঃ পরলোকং তথাপরে
147.18
সা তথা পাণ্ডবী সেনা বধ্যমানা মহাত্মভিঃ
নিশি সংপ্রাদ্রবদ্রাজন্নুত্সৃজ্যোল্কাঃ সহস্রশঃ
147.19
পশ্যতো ভীমসেনস্য বিজয়স্যাচ্যুতস্য চ
যময়োর্ধর্মপুত্রস্য পার্ষতস্য চ পশ্যতঃ
147.20
তমসা সংবৃতে লোকে ন প্রাজ্ঞায়ত কিংচন
কৌরবাণাং প্রকাশেন দৃশ্যন্তে তু দ্রুতাঃ পরে
147.21
দ্রবমাণং তু তত্সৈন্যং দ্রোণকর্ণৌ মহারথৌ
জঘ্নতুঃ পৃষ্ঠতো রাজন্কিরন্তৌ সায়কান্বহূন্
147.22
পাঞ্চালেষু প্রভগ্নেষু দীর্যমাণেষু সর্বশঃ
জনার্দনো দীনমনাঃ প্রত্যভাষত ফল্গুনম্
147.23
দ্রোণকর্ণৌ মহেষ্বাসাবেতৌ পার্ষতসাত্যকী
পাঞ্চালাংশ্চৈব সহিতৌ জঘ্নতুঃ সায়কৈর্ভৃশম্
147.24
এতয়োঃ শরবর্ষেণ প্রভগ্না নো মহারথাঃ
বার্যমাণাপি কৌন্তেয় পৃতনা নাবতিষ্ঠতে
147.25
এতাবাবাং সর্বসৈন্যৈর্ব্যূঢৈঃ সম্যগুদায়ুধৈঃ
দ্রোণং চ সূতপুত্রং চ প্রয়তাবঃ প্রবাধিতুম্
147.26
এতৌ হি বলিনৌ শূরৌ কৃতাস্ত্রৌ জিতকাশিনৌ
উপেক্ষিতৌ বলং ক্রুদ্ধৌ নাশয়েতাং নিশামিমাম্
এষ ভীমোঽভিয়াত্যুগ্রঃ পুনরাবর্ত্য বাহিনীম্
147.27
বৃকোদরং তথায়ান্তং দৃষ্ট্বা তত্র জনার্দনঃ
পুনরেবাব্রবীদ্রাজন্হর্ষয়ন্নিব পাণ্ডবম্
147.28
এষ ভীমো রণশ্লাঘী বৃতঃ সোমকপাণ্ডবৈঃ
রুষিতোঽভ্যেতি বেগেন দ্রোণকর্ণৌ মহাবলৌ
147.29
এতেন সহিতো যুধ্য পাঞ্চালৈশ্চ মহারথৈঃ
আশ্বাসনার্থং সর্বেষাং সৈন্যানাং পাণ্ডুনন্দন
147.30
ততস্তৌ পুরুষব্যাঘ্রাবুভৌ মাধবপাণ্ডবৌ
দ্রোণকর্ণৌ সমাসাদ্য ধিষ্ঠিতৌ রণমূর্ধনি
147.31
ততস্তত্পুনরাবৃত্তং যুধিষ্ঠিরবলং মহৎ
ততো দ্রোণশ্চ কর্ণশ্চ পরান্মমৃদতুর্যুধি
147.32
স সংপ্রহারস্তুমুলো নিশি প্রত্যভবন্মহান্
যথা সাগরয়ো রাজংশ্চন্দ্রোদয়বিবৃদ্ধয়োঃ
147.33
তত উত্সৃজ্য পাণিভ্যঃ প্রদীপাংস্তব বাহিনী
যুয়ুধে পাণ্ডবৈঃ সার্ধমুন্মত্তবদহঃক্ষয়ে
147.34
রজসা তমসা চৈব সংবৃতে ভৃশদারুণে
কেবলং নামগোত্রেণ প্রায়ুধ্যন্ত জয়ৈষিণঃ
147.35
অশ্রূয়ন্ত হি নামানি শ্রাব্যমাণানি পার্থিবৈঃ
প্রহরদ্ভির্মহারাজ স্বয়ংবর ইবাহবে
147.36
নিঃশব্দমাসীত্সহসা পুনঃ শব্দো মহানভূৎ
ক্রুদ্ধানাং যুধ্যমানানাং জয়তাং জীয়তামপি
147.37
যত্র যত্র স্ম দৃশ্যন্তে প্রদীপাঃ কুরুসত্তম
তত্র তত্র স্ম তে শূরা নিপতন্তি পতংগবৎ
147.38
তথা সংয়ুধ্যমানানাং বিগাঢাভূন্মহানিশা
পাণ্ডবানাং চ রাজেন্দ্র কৌরবাণাং চ সর্বশঃ