Utshovঅধ্যায় 148
148.1
সংজয় উবাচ
ততঃ কর্ণো রণে দৃষ্ট্বা পার্ষতং পরবীরহা
আজঘানোরসি শরৈর্দশভির্মর্মভেদিভিঃ
148.2
প্রতিবিব্যাধ তং তূর্ণং ধৃষ্টদ্যুম্নোঽপি মারিষ
পঞ্চভিঃ সায়কৈর্হৃষ্টস্তিষ্ঠ তিষ্ঠেতি চাব্রবীৎ
148.3
তাবন্যোন্যং শরৈঃ সংখ্যে সংছাদ্য সুমহারথৌ
পুনঃ পূর্ণায়তোত্সৃষ্টৈর্বিব্যধাতে পরস্পরম্
148.4
ততঃ পাঞ্চালমুখ্যস্য ধৃষ্টদ্যুম্নস্য সংয়ুগে
সারথিং চতুরশ্চাশ্বান্কর্ণো বিব্যাধ সায়কৈঃ
148.5
কার্মুকপ্রবরং চাস্য প্রচিচ্ছেদ শিতৈঃ শরৈঃ
সারথিং চাস্য ভল্লেন রথনীডাদপাতয়ৎ
148.6
ধৃষ্টদ্যুম্নস্তু বিরথো হতাশ্বো হতসারথিঃ
গৃহীত্বা পরিঘং ঘোরং কর্ণস্যাশ্বানপীপিষৎ
148.7
বিদ্ধশ্চ বহুভিস্তেন শরৈরাশীবিষোপমৈঃ
ততো যুধিষ্ঠিরানীকং পদ্ভ্যামেবান্ববর্তত
আরুরোহ রথং চাপি সহদেবস্য মারিষ
148.8
কর্ণস্যাপি রথে বাহানন্যান্সূতো ন্যয়োজয়ৎ
শঙ্খবর্ণান্মহাবেগান্সৈন্ধবান্সাধুবাহিনঃ
148.9
লব্ধলক্ষ্যস্তু রাধেয়ঃ পাঞ্চালানাং মহারথান্
অভ্যপীডয়দায়স্তঃ শরৈর্মেঘ ইবাচলান্
148.10
সা পীড্যমানা কর্ণেন পাঞ্চালানাং মহাচমূঃ
সংপ্রাদ্রবত্সুসংত্রস্তা সিংহেনেবার্দিতা মৃগী
148.11
পতিতাস্তুরগেভ্যশ্চ গজেভ্যশ্চ মহীতলে
রথেভ্যশ্চ নরাস্তূর্ণমদৃশ্যন্ত ততস্ততঃ
148.12
ধাবমানস্য যোধস্য ক্ষুরপ্রৈঃ স মহামৃধে
বাহূ চিচ্ছেদ বৈ কর্ণঃ শিরশ্চৈব সকুণ্ডলম্
148.13
ঊরূ চিচ্ছেদ চান্যস্য গজস্থস্য বিশাং পতে
বাজিপৃষ্ঠগতস্যাপি ভূমিষ্ঠস্য চ মারিষ
148.14
নাজ্ঞাসিষুর্ধাবমানা বহবশ্চ মহারথাঃ
সংছিন্নান্যাত্মগাত্রাণি বাহনানি চ সংয়ুগে
148.15
তে বধ্যমানাঃ সমরে পাঞ্চালাঃ সৃঞ্জয়ৈঃ সহ
তৃণপ্রস্পন্দনাচ্চাপি সূতপুত্রং স্ম মেনিরে
148.16
অপি স্বং সমরে যোধং ধাবমানং বিচেতসঃ
কর্ণমেবাভ্যমন্যন্ত ততো ভীতা দ্রবন্তি তে
148.17
তান্যনীকানি ভগ্নানি দ্রবমাণানি ভারত
অভ্যদ্রবদ্দ্রুতং কর্ণঃ পৃষ্ঠতো বিকিরঞ্শরান্
148.18
অবেক্ষমাণাস্তেঽন্যোন্যং সুসংমূঢা বিচেতসঃ
নাশক্নুবন্নবস্থাতুং কাল্যমানা মহাত্মনা
148.19
কর্ণেনাভ্যাহতা রাজন্পাঞ্চালাঃ পরমেষুভিঃ
দ্রোণেন চ দিশঃ সর্বা বীক্ষমাণাঃ প্রদুদ্রুবুঃ
148.20
ততো যুধিষ্ঠিরো রাজা স্বসৈন্যং প্রেক্ষ্য বিদ্রুতম্
অপয়ানে মতিং কৃত্বা ফল্গুনং বাক্যমব্রবীৎ
148.21
পশ্য কর্ণং মহেষ্বাসং ধনুষ্পাণিমবস্থিতম্
নিশীথে দারুণে কালে তপন্তমিব ভাস্করম্
148.22
কর্ণসায়কনুন্নানাং ক্রোশতামেষ নিস্বনঃ
অনিশং শ্রূয়তে পার্থ ত্বদ্বন্ধূনামনাথবৎ
148.23
যথা বিসৃজতশ্চাস্য সংদধানস্য চাশুগান্
পশ্যামি জয়বিক্রান্তং ক্ষপয়িষ্যতি নো ধ্রুবম্
148.24
যদত্রানন্তরং কার্যং প্রাপ্তকালং প্রপশ্যসি
কর্ণস্য বধসংয়ুক্তং তত্কুরুষ্ব ধনংজয়
148.25
এবমুক্তো মহাবাহুঃ পার্থঃ কৃষ্ণমথাব্রবীৎ
ভীতঃ কুন্তীসুতো রাজা রাধেয়স্যাতিবিক্রমাৎ
148.26
এবং গতে প্রাপ্তকালং কর্ণানীকে পুনঃ পুনঃ
ভবান্ব্যবস্যতাং ক্ষিপ্রং দ্রবতে হি বরূথিনী
148.27
দ্রোণসায়কনুন্নানাং ভগ্নানাং মধুসূদন
কর্ণেন ত্রাস্যমানানামবস্থানং ন বিদ্যতে
148.28
পশ্যামি চ তথা কর্ণং বিচরন্তমভীতবৎ
দ্রবমাণান্রথোদারান্কিরন্তং বিশিখৈঃ শিতৈঃ
148.29
নৈতদস্যোত্সহে সোঢুং চরিতং রণমূর্ধনি
প্রত্যক্ষং বৃষ্ণিশার্দূল পাদস্পর্শমিবোরগঃ
148.30
স ভবানত্র যাত্বাশু যত্র কর্ণো মহারথঃ
অহমেনং বধিষ্যামি মাং বৈষ মধুসূদন
148.31
বাসুদেব উবাচ
পশ্যামি কর্ণং কৌন্তেয় দেবরাজমিবাহবে
বিচরন্তং নরব্যাঘ্রমতিমানুষবিক্রমম্
148.32
নৈতস্যান্যোঽস্তি সমরে প্রত্যুদ্যাতা ধনংজয়
ঋতে ত্বাং পুরুষব্যাঘ্র রাক্ষসাদ্বা ঘটোত্কচাৎ
148.33
ন তু তাবদহং মন্যে প্রাপ্তকালং তবানঘ
সমাগমং মহাবাহো সূতপুত্রেণ সংয়ুগে
148.34
দীপ্যমানা মহোল্কেব তিষ্ঠত্যস্য হি বাসবী
ত্বদর্থং হি মহাবাহো রৌদ্ররূপং বিভর্তি চ
148.35
ঘটোত্কচস্তু রাধেয়ং প্রত্যুদ্যাতু মহাবলঃ
স হি ভীমেন বলিনা জাতঃ সুরপরাক্রমঃ
148.36
তস্মিন্নস্ত্রাণি দিব্যানি রাক্ষসান্যাসুরাণি চ
সততং চানুরক্তো বো হিতৈষী চ ঘটোত্কচঃ
বিজেষ্যতি রণে কর্ণমিতি মে নাত্র সংশয়ঃ
148.37
সংজয় উবাচ
এবমুক্ত্বা মহাবাহুঃ পার্থং পুষ্করলোচনঃ
আজুহাবাথ তদ্রক্ষঃ তচ্চাসীত্প্রাদুরগ্রতঃ
148.38
কবচী স শরী খড্গী সধন্বা চ বিশাং পতে
অভিবাদ্য ততঃ কৃষ্ণং পাণ্ডবং চ ধনংজয়ম্
অব্রবীত্তং তদা হৃষ্টস্ত্বয়মস্ম্যনুশাধি মাম্
148.39
ততস্তং মেঘসংকাশং দীপ্তাস্যং দীপ্তকুণ্ডলম্
অভ্যভাষত হৈডিম্বং দাশার্হঃ প্রহসন্নিব
148.40
ঘটোত্কচ বিজানীহি যত্ত্বাং বক্ষ্যামি পুত্রক
প্রাপ্তো বিক্রমকালোঽয়ং তব নান্যস্য কস্যচিৎ
148.41
স ভবান্মজ্জমানানাং বন্ধূনাং ত্বং প্লবো যথা
বিবিধানি তবাস্ত্রাণি সন্তি মায়া চ রাক্ষসী
148.42
পশ্য কর্ণেন হৈডিম্ব পাণ্ডবানামনীকিনী
কাল্যমানা যথা গাবঃ পালেন রণমূর্ধনি
148.43
এষ কর্ণো মহেষ্বাসো মতিমান্দৃঢবিক্রমঃ
পাণ্ডবানামনীকেষু নিহন্তি ক্ষত্রিয়র্ষভান্
148.44
কিরন্তঃ শরবর্ষাণি মহান্তি দৃঢধন্বিনঃ
ন শক্নুবন্ত্যবস্থাতুং পীড্যমানাঃ শরার্চিষা
148.45
নিশীথে সূতপুত্রেণ শরবর্ষেণ পীডিতাঃ
এতে দ্রবন্তি পাঞ্চালাঃ সিংহস্যেব ভয়ান্মৃগাঃ
148.46
এতস্যৈবং প্রবৃদ্ধস্য সূতপুত্রস্য সংয়ুগে
নিষেদ্ধা বিদ্যতে নান্যস্ত্বদৃতে ভীমবিক্রম
148.47
স ত্বং কুরু মহাবাহো কর্ম যুক্তমিহাত্মনঃ
মাতুলানাং পিতৄণাং চ তেজসোঽস্ত্রবলস্য চ
148.48
এতদর্থং হি হৈডিম্ব পুত্রানিচ্ছন্তি মানবাঃ
কথং নস্তারয়েদ্দুঃখাত্স ত্বং তারয় বান্ধবান্
148.49
তব হ্যস্ত্রবলং ভীমং মায়াশ্চ তব দুস্তরাঃ
সংগ্রামে যুধ্যমানস্য সততং ভীমনন্দন
148.50
পাণ্ডবানাং প্রভগ্নানাং কর্ণেন শিতসায়কৈঃ
মজ্জতাং ধার্তরাষ্ট্রেষু ভব পারং পরংতপ
148.51
রাত্রৌ হি রাক্ষসা ভূয়ো ভবন্ত্যমিতবিক্রমাঃ
বলবন্তঃ সুদুর্ধর্ষাঃ শূরা বিক্রান্তচারিণঃ
148.52
জহি কর্ণং মহেষ্বাসং নিশীথে মায়য়া রণে
পার্থা দ্রোণং বধিষ্যন্তি ধৃষ্টদ্যুম্নপুরোগমাঃ
148.53
কেশবস্য বচঃ শ্রুত্বা বীভত্সুরপি রাক্ষসম্
অভ্যভাষত কৌরব্য ঘটোত্কচমরিংদমম্
148.54
ঘটোত্কচ ভবাংশ্চৈব দীর্ঘবাহুশ্চ সাত্যকিঃ
মতৌ মে সর্বসৈন্যেষু ভীমসেনশ্চ পাণ্ডবঃ
148.55
স ভবান্যাতু কর্ণেন দ্বৈরথং যুধ্যতাং নিশি
সাত্যকিঃ পৃষ্ঠগোপস্তে ভবিষ্যতি মহারথঃ
148.56
জহি কর্ণং রণে শূরং সাত্বতেন সহায়বান্
যথেন্দ্রস্তারকং পূর্বং স্কন্দেন সহ জঘ্নিবান্
148.57
ঘটোত্কচ উবাচ
অলমেবাস্মি কর্ণায় দ্রোণায়ালং চ সত্তম
অন্যেষাং ক্ষত্রিয়াণাং চ কৃতাস্ত্রাণাং মহাত্মনাম্
148.58
অদ্য দাস্যামি সংগ্রামং সূতপুত্রায় তং নিশি
যং জনাঃ সংপ্রবক্ষ্যন্তি যাবদ্ভূমির্ধরিষ্যতি
148.59
ন চাত্র শূরান্মোক্ষ্যামি ন ভীতান্ন কৃতাঞ্জলীন্
সর্বানেব বধিষ্যামি রাক্ষসং ধর্মমাস্থিতঃ
148.60
সংজয় উবাচ
এবমুক্ত্বা মহাবাহুর্হৈডিম্বঃ পরবীরহা
অভ্যয়াত্তুমুলে কর্ণং তব সৈন্যং বিভীষয়ন্
148.61
তমাপতন্তং সংক্রুদ্ধং দীপ্তাস্যমিব পন্নগম্
অভ্যস্যন্পরমেষ্বাসঃ প্রতিজগ্রাহ সূতজঃ
148.62
তয়োঃ সমভবদ্যুদ্ধং কর্ণরাক্ষসয়োর্নিশি
গর্জতো রাজশার্দূল শক্রপ্রহ্রাদয়োরিব