Utshovঅধ্যায় 149
149.1
সংজয় উবাচ
দৃষ্ট্বা ঘটোত্কচং রাজন্সূতপুত্ররথং প্রতি
প্রয়ান্তং ত্বরয়া যুক্তং জিঘাংসুং কর্ণমাহবে
149.2
অব্রবীত্তব পুত্রস্তু দুঃশাসনমিদং বচঃ
এতদ্রক্ষো রণে তূর্ণং দৃষ্ট্বা কর্ণস্য বিক্রমম্
149.3
অভিয়াতি দ্রুতং কর্ণং তদ্বারয় মহারথম্
বৃতঃ সৈন্যেন মহতা যাহি যত্র মহাবলঃ
149.4
কর্ণো বৈকর্তনো যুদ্ধে রাক্ষসেন যুয়ুত্সতি
রক্ষ কর্ণং রণে যত্তো বৃতঃ সৈন্যেন মানদ
149.5
এতস্মিন্নন্তরে রাজঞ্জটাসুরসুতো বলী
দুর্যোধনমুপাগম্য প্রাহ প্রহরতাং বরঃ
149.6
দুর্যোধন তবামিত্রান্প্রখ্যাতান্যুদ্ধদুর্মদান্
পাণ্ডবান্হন্তুমিচ্ছামি ত্বয়াজ্ঞপ্তঃ সহানুগান্
149.7
জটাসুরো মম পিতা রক্ষসামগ্রণীঃ পুরা
প্রয়ুজ্য কর্ম রক্ষোঘ্নং ক্ষুদ্রৈঃ পার্থৈর্নিপাতিতঃ
তস্যাপচিতিমিচ্ছামি ত্বদ্দিষ্টো গন্তুমীশ্বর
149.8
তমব্রবীত্ততো রাজা প্রীয়মাণঃ পুনঃ পুনঃ
দ্রোণকর্ণাদিভিঃ সার্ধং পর্যাপ্তোঽহং দ্বিষদ্বধে
ত্বং তু গচ্ছ ময়াজ্ঞপ্তো জহি যুদ্ধং ঘটোত্কচম্
149.9
তথেত্যুক্ত্বা মহাকায়ঃ সমাহূয় ঘটোত্কচম্
জটাসুরির্ভৈমসেনিং নানাশস্ত্রৈরবাকিরৎ
149.10
অলংবলং চ কর্ণং চ কুরুসৈন্যং চ দুস্তরম্
হৈডিম্বঃ প্রমমাথৈকো মহাবাতোঽম্বুদানিব
149.11
ততো মায়াময়ং দৃষ্ট্বা রথং তূর্ণমলংবলঃ
ঘটোত্কচং শরব্রাতৈর্নানালিঙ্গৈঃ সমার্দয়ৎ
149.12
বিদ্ধ্বা চ বহুভির্বাণৈর্ভৈমসেনিমলংবলঃ
ব্যদ্রাবয়চ্ছরব্রাতৈঃ পাণ্ডবানামনীকিনীম্
149.13
তেন বিদ্রাব্যমাণানি পাণ্ডুসৈন্যানি মারিষ
নিশীথে বিপ্রকীর্যন্ত বাতনুন্না ঘনা ইব
149.14
ঘটোত্কচশরৈর্নুন্না তথৈব কুরুবাহিনী
নিশীথে প্রাদ্রবদ্রাজন্নুত্সৃজ্যোল্কাঃ সহস্রশঃ
149.15
অলংবলস্ততঃ ক্রুদ্ধো ভৈমসেনিং মহামৃধে
আজঘ্নে নিশিতৈর্বাণৈস্তোত্ত্রৈরিব মহাদ্বিপম্
149.16
তিলশস্তস্য তদ্যানং সূতং সর্বায়ুধানি চ
ঘটোত্কচঃ প্রচিচ্ছেদ প্রাণদচ্চাতিদারুণম্
149.17
ততঃ কর্ণং শরব্রাতৈঃ কুরূনন্যান্সহস্রশঃ
অলংবলং চাভ্যবর্ষন্মেঘো মেরুমিবাচলম্
149.18
ততঃ সংচুক্ষুভে সৈন্যং কুরূণাং রাক্ষসার্দিতম্
উপর্যুপরি চান্যোন্যং চতুরঙ্গং মমর্দ হ
149.19
জটাসুরির্মহারাজ বিরথো হতসারথিঃ
ঘটোত্কচং রণে ক্রুদ্ধো মুষ্টিনাভ্যহনদ্দৃঢম্
149.20
মুষ্টিনাভিহতস্তেন প্রচচাল ঘটোত্কচঃ
ক্ষিতিকম্পে যথা শৈলঃ সবৃক্ষগণগুল্মবান্
149.21
ততঃ স পরিঘাভেন দ্বিট্সংঘঘ্নেন বাহুনা
জটাসুরিং ভৈমসেনিরবধীন্মুষ্টিনা ভৃশম্
149.22
তং প্রমথ্য ততঃ ক্রুদ্ধস্তূর্ণং হৈডিম্বিরাক্ষিপৎ
দোর্ভ্যামিন্দ্রধ্বজাভাভ্যাং নিষ্পিপেষ মহীতলে
149.23
অলংবলোঽপি বিক্ষিপ্য সমুত্ক্ষিপ্য চ রাক্ষসম্
ঘটোত্কচং রণে রোষান্নিষ্পিপেষ মহীতলে
149.24
তয়োঃ সমভবদ্যুদ্ধং গর্জতোরতিকায়য়োঃ
ঘটোত্কচালংবলয়োস্তুমুলং লোমহর্ষণম্
149.25
বিশেষয়ন্তাবন্যোন্যং মায়াভিরতিমায়িনৌ
যুয়ুধাতে মহাবীর্যাবিন্দ্রবৈরোচনাবিব
149.26
পাবকাম্বুনিধী ভূত্বা পুনর্গরুডতক্ষকৌ
পুনর্মেঘমহাবাতৌ পুনর্বজ্রমহাচলৌ
পুনঃ কুঞ্জরশার্দূলৌ পুনঃ স্বর্ভানুভাস্করৌ
149.27
এবং মায়াশতসৃজাবন্যোন্যবধকাঙ্ক্ষিণৌ
ভৃশং চিত্রময়ুধ্যেতামলংবলঘটোত্কচৌ
149.28
পরিঘৈশ্চ গদাভিশ্চ প্রাসমুদ্গরপট্টিশৈঃ
মুসলৈঃ পর্বতাগ্রৈশ্চ তাবন্যোন্যং নিজঘ্নতুঃ
149.29
হয়াভ্যাং চ গজাভ্যাং চ পদাতিরথিনৌ পুনঃ
যুয়ুধাতে মহামায়ৌ রাক্ষসপ্রবরৌ যুধি
149.30
ততো ঘটোত্কচো রাজন্নলংবলবধেপ্সয়া
উত্পপাত ভৃশং ক্রুদ্ধঃ শ্যেনবন্নিপপাত হ
149.31
গৃহীত্বা চ মহাকায়ং রাক্ষসেন্দ্রমলংবলম্
উদ্যম্য ন্যবধীদ্ভূমৌ ময়ং বিষ্ণুরিবাহবে
149.32
ততো ঘটোত্কচঃ খড্গমুদ্গৃহ্যাদ্ভুতদর্শনম্
চকর্ত কায়াদ্ধি শিরো ভীমং বিকৃতদর্শনম্
149.33
তচ্ছিরো রুধিরাভ্যক্তং গৃহ্য কেশেষু রাক্ষসঃ
ঘটোত্কচো যয়াবাশু দুর্যোধনরথং প্রতি
149.34
অভ্যেত্য চ মহাবাহুঃ স্ময়মানঃ স রাক্ষসঃ
রথেঽস্য নিক্ষিপ্য শিরো বিকৃতাননমূর্ধজম্
প্রাণদদ্ভৈরবং নাদং প্রাবৃষীব বলাহকঃ
149.35
অব্রবীচ্চ ততো রাজন্দুর্যোধনমিদং বচঃ
এষ তে নিহতো বন্ধুস্ত্বয়া দৃষ্টোঽস্য বিক্রমঃ
পুনর্দ্রষ্টাসি কর্ণস্য নিষ্ঠামেতাং তথাত্মনঃ
149.36
এবমুক্ত্বা ততঃ প্রায়াত্কর্ণং প্রতি জনেশ্বর
কিরঞ্শরশতাংস্তীক্ষ্ণান্বিমুঞ্চন্কর্ণমূর্ধনি
149.37
ততঃ সমভবদ্যুদ্ধং ঘোররূপং ভয়ানকম্
বিস্মাপনং মহারাজ নররাক্ষসয়োর্মৃধে