Utshovঅধ্যায় 150
150.1
ধৃতরাষ্ট্র উবাচ
যত্র বৈকর্তনঃ কর্ণো রাক্ষসশ্চ ঘটোত্কচঃ
নিশীথে সমসজ্জেতাং তদ্যুদ্ধমভবত্কথম্
150.2
কীদৃশং চাভবদ্যুদ্ধং তস্য ঘোরস্য রক্ষসঃ
রথশ্চ কীদৃশস্তস্য মায়াঃ সর্বায়ুধানি চ
150.3
কিংপ্রমাণা হয়াস্তস্য রথকেতুর্ধনুস্তথা
কীদৃশং বর্ম চৈবাস্য কণ্ঠত্রাণং চ কীদৃশম্
পৃষ্টস্ত্বমেতদাচক্ষ্ব কুশলো হ্যসি সংজয়
150.4
সংজয় উবাচ
লোহিতাক্ষো মহাকায়স্তাম্রাস্যো নিম্নিতোদরঃ
ঊর্ধ্বরোমা হরিশ্মশ্রুঃ শঙ্কুকর্ণো মহাহনুঃ
150.5
আকর্ণাদ্দারিতাস্যশ্চ তীক্ষ্ণদংষ্ট্রঃ করালবান্
সুদীর্ঘতাম্রজিহ্বোষ্ঠো লম্বভ্রূঃ স্থূলনাসিকঃ
150.6
নীলাঙ্গো লোহিতগ্রীবো গিরিবর্ষ্মা ভয়ংকরঃ
মহাকায়ো মহাবাহুর্মহাশীর্ষো মহাবলঃ
150.7
বিকচঃ পরুষস্পর্শো বিকটোদ্বদ্ধপিণ্ডিকঃ
স্থূলস্ফিগ্গূঢনাভিশ্চ শিথিলোপচয়ো মহান্
150.8
তথৈব হস্তাভরণী মহামায়োঽঙ্গদী তথা
উরসা ধারয়ন্নিষ্কমগ্নিমালাং যথাচলঃ
150.9
তস্য হেমময়ং চিত্রং বহুরূপাঙ্গশোভিতম্
তোরণপ্রতিমং শুভ্রং কিরীটং মূর্ধ্ন্যশোভত
150.10
কুণ্ডলে বালসূর্যাভে মালাং হেমময়ীং শুভাম্
ধারয়ন্বিপুলং কাংস্যং কবচং চ মহাপ্রভম্
150.11
কিঙ্কিণীশতনির্ঘোষং রক্তধ্বজপতাকিনম্
ঋক্ষচর্মাবনদ্ধাঙ্গং নল্বমাত্রং মহারথম্
150.12
সর্বায়ুধবরোপেতমাস্থিতো ধ্বজমালিনম্
অষ্টচক্রসমায়ুক্তং মেঘগম্ভীরনিস্বনম্
150.13
তত্র মাতঙ্গসংকাশা লোহিতাক্ষা বিভীষণাঃ
কামবর্ণজবা যুক্তা বলবন্তোঽবহন্হয়াঃ
150.14
রাক্ষসোঽস্য বিরূপাক্ষঃ সূতো দীপ্তাস্যকুণ্ডলঃ
রশ্মিভিঃ সূর্যরশ্ম্যাভৈঃ সংজগ্রাহ হয়ান্রণে
স তেন সহিতস্তস্থাবরুণেন যথা রবিঃ
150.15
সংসক্ত ইব চাভ্রেণ যথাদ্রির্মহতা মহান্
দিবস্পৃক্সুমহান্কেতুঃ স্যন্দনেঽস্য সমুচ্ছ্রিতঃ
রক্তোত্তমাঙ্গঃ ক্রব্যাদো গৃধ্রঃ পরমভীষণঃ
150.16
বাসবাশনিনির্ঘোষং দৃঢজ্যমভিবিক্ষিপন্
ব্যক্তং কিষ্কুপরীণাহং দ্বাদশারত্নি কার্মুকম্
150.17
রথাক্ষমাত্রৈরিষুভিঃ সর্বাঃ প্রচ্ছাদয়ন্দিশঃ
তস্যাং বীরাপহারিণ্যাং নিশায়াং কর্ণমভ্যয়াৎ
150.18
তস্য বিক্ষিপতশ্চাপং রথে বিষ্টভ্য তিষ্ঠতঃ
অশ্রূয়ত ধনুর্ঘোষো বিস্ফূর্জিতমিবাশনেঃ
150.19
তেন বিত্রাস্যমানানি তব সৈন্যানি ভারত
সমকম্পন্ত সর্বাণি সিন্ধোরিব মহোর্ময়ঃ
150.20
তমাপতন্তং সংপ্রেক্ষ্য বিরূপাক্ষং বিভীষণম্
উত্স্ময়ন্নিব রাধেয়স্ত্বরমাণোঽভ্যবারয়ৎ
150.21
ততঃ কর্ণোঽভ্যয়াদেনমস্যন্নস্যন্তমন্তিকাৎ
মাতঙ্গ ইব মাতঙ্গং যূথর্ষভ ইবর্ষভম্
150.22
স সংনিপাতস্তুমুলস্তয়োরাসীদ্বিশাং পতে
কর্ণরাক্ষসয়ো রাজন্নিন্দ্রশম্বরয়োরিব
150.23
তৌ প্রগৃহ্য মহাবেগে ধনুষী ভীমনিস্বনে
প্রাচ্ছাদয়েতামন্যোন্যং তক্ষমাণৌ মহেষুভিঃ
150.24
ততঃ পূর্ণায়তোত্সৃষ্টৈঃ শরৈঃ সংনতপর্বভিঃ
ন্যবারয়েতামন্যোন্যং কাংস্যে নির্ভিদ্য বর্মণী
150.25
তৌ নখৈরিব শার্দূলৌ দন্তৈরিব মহাদ্বিপৌ
রথশক্তিভিরন্যোন্যং বিশিখৈশ্চ ততক্ষতুঃ
150.26
সংছিন্দন্তৌ হি গাত্রাণি সংদধানৌ চ সায়কান্
ধক্ষ্যমাণৌ শরব্রাতৈর্নোদীক্ষিতুমশক্নুতাম্
150.27
তৌ তু বিক্ষতসর্বাঙ্গৌ রুধিরৌঘপরিপ্লুতৌ
ব্যভ্রাজেতাং যথা বারিপ্রস্রুতৌ গৈরিকাচলৌ
150.28
তৌ শরাগ্রবিভিন্নাঙ্গৌ নির্ভিন্দন্তৌ পরস্পরম্
নাকম্পয়েতামন্যোন্যং যতমানৌ মহাদ্যুতী
150.29
তত্প্রবৃত্তং নিশায়ুদ্ধং চিরং সমমিবাভবৎ
প্রাণয়োর্দীব্যতো রাজন্কর্ণরাক্ষসয়োর্মৃধে
150.30
তস্য সংদধতস্তীক্ষ্ণাঞ্শরাংশ্চাসক্তমস্যতঃ
ধনুর্ঘোষেণ বিত্রস্তাঃ স্বে পরে চ তদাভবন্
ঘটোত্কচং যদা কর্ণো বিশেষয়তি নো নৃপ
150.31
ততঃ প্রাদুষ্করোদ্দিব্যমস্ত্রমস্ত্রবিদাং বরঃ
কর্ণেন বিহিতং দৃষ্ট্বা দিব্যমস্ত্রং ঘটোত্কচঃ
প্রাদুশ্চক্রে মহামায়াং রাক্ষসঃ পাণ্ডুনন্দনঃ
150.32
শূলমুদ্গরধারিণ্যা শৈলপাদপহস্তয়া
রক্ষসাং ঘোররূপাণাং মহত্যা সেনয়া বৃতঃ
150.33
তমুদ্যতমহাচাপং দৃষ্ট্বা তে ব্যথিতা নৃপাঃ
ভূতান্তকমিবায়ান্তং কালদণ্ডোগ্রধারিণম্
150.34
ঘটোত্কচপ্রমুক্তেন সিংহনাদেন ভীষিতাঃ
প্রসুস্রুবুর্গজা মূত্রং বিব্যথুশ্চ নরা ভৃশম্
150.35
ততোঽশ্মবৃষ্টিরত্যুগ্রা মহত্যাসীত্সমন্ততঃ
অর্ধরাত্রেঽধিকবলৈর্বিমুক্তা রক্ষসাং বলৈঃ
150.36
আয়সানি চ চক্রাণি ভুশুণ্ড্যঃ শক্তিতোমরাঃ
পতন্ত্যবিরলাঃ শূলাঃ শতঘ্ন্যঃ পট্টিশাস্তথা
150.37
তদুগ্রমতিরৌদ্রং চ দৃষ্ট্বা যুদ্ধং নরাধিপাঃ
পুত্রাশ্চ তব যোধাশ্চ ব্যথিতা বিপ্রদুদ্রুবুঃ
150.38
তত্রৈকোঽস্ত্রবলশ্লাঘী কর্ণো মানী ন বিব্যথে
ব্যধমচ্চ শরৈর্মায়াং ঘটোত্কচবিনির্মিতাম্
150.39
মায়ায়াং তু প্রহীণায়ামমর্ষাত্স ঘটোত্কচঃ
বিসসর্জ শরান্ঘোরান্সূতপুত্রং ত আবিশন্
150.40
ততস্তে রুধিরাভ্যক্তা ভিত্ত্বা কর্ণং মহাহবে
বিবিশুর্ধরণীং বাণাঃ সংক্রুদ্ধা ইব পন্নগাঃ
150.41
সূতপুত্রস্তু সংক্রুদ্ধো লঘুহস্তঃ প্রতাপবান্
ঘটোত্কচমতিক্রম্য বিভেদ দশভিঃ শরৈঃ
150.42
ঘটোত্কচো বিনির্ভিন্নঃ সূতপুত্রেণ মর্মসু
চক্রং দিব্যং সহস্রারমগৃহ্ণাদ্ব্যথিতো ভৃশম্
150.43
ক্ষুরান্তং বালসূর্যাভং মণিরত্নবিভূষিতম্
চিক্ষেপাধিরথেঃ ক্রুদ্ধো ভৈমসেনির্জিঘাংসয়া
150.44
প্রবিদ্ধমতিবেগেন বিক্ষিপ্তং কর্ণসায়কৈঃ
অভাগ্যস্যেব সংকল্পস্তন্মোঘমপতদ্ভুবি
150.45
ঘটোত্কচস্তু সংক্রুদ্ধো দৃষ্ট্বা চক্রং নিপাতিতম্
কর্ণং প্রাচ্ছাদয়দ্বাণৈঃ স্বর্ভানুরিব ভাস্করম্
150.46
সূতপুত্রস্ত্বসংভ্রান্তো রুদ্রোপেন্দ্রেন্দ্রবিক্রমঃ
ঘটোত্কচরথং তূর্ণং ছাদয়ামাস পত্রিভিঃ
150.47
ঘটোত্কচেন ক্রুদ্ধেন গদা হেমাঙ্গদা তদা
ক্ষিপ্তা ভ্রাম্য শরৈঃ সাপি কর্ণেনাভ্যাহতাপতৎ
150.48
ততোঽন্তরিক্ষমুত্পত্য কালমেঘ ইবোন্নদন্
প্রববর্ষ মহাকায়ো দ্রুমবর্ষং নভস্তলাৎ
150.49
ততো মায়াবিনং কর্ণো ভীমসেনসুতং দিবি
মার্গণৈরভিবিব্যাধ ঘনং সূর্য ইবাংশুভিঃ
150.50
তস্য সর্বান্হয়ান্হত্বা সংছিদ্য শতধা রথম্
অভ্যবর্ষচ্ছরৈঃ কর্ণঃ পর্জন্য ইব বৃষ্টিমান্
150.51
ন চাস্যাসীদনির্ভিন্নং গাত্রে দ্ব্যঙ্গুলমন্তরম্
সোঽদৃশ্যত মুহূর্তেন শ্বাবিচ্ছললিতো যথা
150.52
ন হয়ান্ন রথং তস্য ন ধ্বজং ন ঘটোত্কচম্
দৃষ্টবন্তঃ স্ম সমরে শরৌঘৈরভিসংবৃতম্
150.53
স তু কর্ণস্য তদ্দিব্যমস্ত্রমস্ত্রেণ শাতয়ন্
মায়ায়ুদ্ধেন মায়াবী সূতপুত্রময়োধয়ৎ
150.54
সোঽয়োধয়ত্তদা কর্ণং মায়য়া লাঘবেন চ
অলক্ষ্যমাণোঽথ দিবি শরজালেষু সংপতন্
150.55
ভৈমসেনির্মহামায়ো মায়য়া কুরুসত্তম
প্রচকার মহামায়াং মোহয়ন্নিব ভারত
150.56
স স্ম কৃত্বা বিরূপাণি বদনান্যশুভাননঃ
অগ্রসত্সূতপুত্রস্য দিব্যান্যস্ত্রাণি মায়য়া
150.57
পুনশ্চাপি মহাকায়ঃ সংছিন্নঃ শতধা রণে
গতসত্ত্বো নিরুত্সাহঃ পতিতঃ খাদ্ব্যদৃশ্যত
হতং তং মন্যমানাঃ স্ম প্রাণদন্কুরুপুংগবাঃ
150.58
অথ দেহৈর্নবৈরন্যৈর্দিক্ষু সর্বাস্বদৃশ্যত
পুনশ্চাপি মহাকায়ঃ শতশীর্ষঃ শতোদরঃ
150.59
ব্যদৃশ্যত মহাবাহুর্মৈনাক ইব পর্বতঃ
অঙ্গুষ্ঠমাত্রো ভূত্বা চ পুনরেব স রাক্ষসঃ
সাগরোর্মিরিবোদ্ধূতস্তির্যগূর্ধ্বমবর্তত
150.60
বসুধাং দারয়িত্বা চ পুনরপ্সু ন্যমজ্জত
অদৃশ্যত তদা তত্র পুনরুন্মজ্জিতোঽন্যতঃ
150.61
সোঽবতীর্য পুনস্তস্থৌ রথে হেমপরিষ্কৃতে
ক্ষিতিং দ্যাং চ দিশশ্চৈব মায়য়াবৃত্য দংশিতঃ
150.62
গত্বা কর্ণরথাভ্যাশং বিচলত্কুণ্ডলাননঃ
প্রাহ বাক্যমসংভ্রান্তঃ সূতপুত্রং বিশাং পতে
150.63
তিষ্ঠেদানীং ন মে জীবন্সূতপুত্র গমিষ্যসি
যুদ্ধশ্রদ্ধামহং তেঽদ্য বিনেষ্যামি রণাজিরে
150.64
ইত্যুক্ত্বা রোষতাম্রাক্ষং রক্ষঃ ক্রূরপরাক্রমম্
উত্পপাতান্তরিক্ষং চ জহাস চ সুবিস্বরম্
কর্ণমভ্যাহনচ্চৈব গজেন্দ্রমিব কেসরী
150.65
রথাক্ষমাত্রৈরিষুভিরভ্যবর্ষদ্ঘটোত্কচঃ
রথিনামৃষভং কর্ণং ধারাভিরিব তোয়দঃ
শরবৃষ্টিং চ তাং কর্ণো দূরপ্রাপ্তামশাতয়ৎ
150.66
দৃষ্ট্বা চ বিহতাং মায়াং কর্ণেন ভরতর্ষভ
ঘটোত্কচস্ততো মায়াং সসর্জান্তর্হিতঃ পুনঃ
150.67
সোঽভবদ্গিরিরিত্যুচ্চঃ শিখরৈস্তরুসংকটৈঃ
শূলপ্রাসাসিমুসলজলপ্রস্রবণো মহান্
150.68
তমঞ্জনচয়প্রখ্যং কর্ণো দৃষ্ট্বা মহীধরম্
প্রপাতৈরায়ুধান্যুগ্রাণ্যুদ্বহন্তং ন চুক্ষুভে
150.69
স্ময়ন্নিব ততঃ কর্ণো দিব্যমস্ত্রমুদীরয়ৎ
ততঃ সোঽস্ত্রেণ শৈলেন্দ্রো বিক্ষিপ্তো বৈ ব্যনশ্যত
150.70
ততঃ স তোয়দো ভূত্বা নীলঃ সেন্দ্রায়ুধো দিবি
অশ্মবৃষ্টিভিরত্যুগ্রঃ সূতপুত্রমবাকিরৎ
150.71
অথ সংধায় বায়ব্যমস্ত্রমস্ত্রবিদাং বরঃ
ব্যধমত্কালমেঘং তং কর্ণো বৈকর্তনো বৃষা
150.72
স মার্গণগণৈঃ কর্ণো দিশঃ প্রচ্ছাদ্য সর্বশঃ
জঘানাস্ত্রং মহারাজ ঘটোত্কচসমীরিতম্
150.73
ততঃ প্রহস্য সমরে ভৈমসেনির্মহাবলঃ
প্রাদুশ্চক্রে মহামায়াং কর্ণং প্রতি মহারথম্
150.74
স দৃষ্ট্বা পুনরায়ান্তং রথেন রথিনাং বরম্
ঘটোত্কচমসংভ্রান্তং রাক্ষসৈর্বহুভির্বৃতম্
150.75
সিংহশার্দূলসদৃশৈর্মত্তদ্বিরদবিক্রমৈঃ
গজস্থৈশ্চ রথস্থৈশ্চ বাজিপৃষ্ঠগতৈস্তথা
150.76
নানাশস্ত্রধরৈর্ঘোরৈর্নানাকবচভূষণৈঃ
বৃতং ঘটোত্কচং ক্রূরৈর্মরুদ্ভিরিব বাসবম্
দৃষ্ট্বা কর্ণো মহেষ্বাসো যোধয়ামাস রাক্ষসম্
150.77
ঘটোত্কচস্ততঃ কর্ণং বিদ্ধ্বা পঞ্চভিরাশুগৈঃ
ননাদ ভৈরবং নাদং ভীষয়ন্সর্বপার্থিবান্
150.78
ভূয়শ্চাঞ্জলিকেনাথ সমার্গণগণং মহৎ
কর্ণহস্তস্থিতং চাপং চিচ্ছেদাশু ঘটোত্কচঃ
150.79
অথান্যদ্ধনুরাদায় দৃঢং ভারসহং মহৎ
ব্যকর্ষত বলাত্কর্ণ ইন্দ্রায়ুধমিবোচ্ছ্রিতম্
150.80
ততঃ কর্ণো মহারাজ প্রেষয়ামাস সায়কান্
সুবর্ণপুঙ্খাঞ্শত্রুঘ্নান্খচরান্রাক্ষসান্প্রতি
150.81
তদ্বাণৈরর্দিতং যূথং রক্ষসাং পীনবক্ষসাম্
সিংহেনেবার্দিতং বন্যং গজানামাকুলং কুলম্
150.82
বিধম্য রাক্ষসান্বাণৈঃ সাশ্বসূতগজান্বিভুঃ
দদাহ ভগবান্বহ্নির্ভূতানীব যুগক্ষয়ে
150.83
স হত্বা রাক্ষসীং সেনাং শুশুভে সূতনন্দনঃ
পুরেব ত্রিপুরং দগ্ধ্বা দিবি দেবো মহেশ্বরঃ
150.84
তেষু রাজসহস্রেষু পাণ্ডবেয়েষু মারিষ
নৈনং নিরীক্ষিতুমপি কশ্চিচ্ছক্নোতি পার্থিব
150.85
ঋতে ঘটোত্কচাদ্রাজন্রাক্ষসেন্দ্রান্মহাবলাৎ
ভীমবীর্যবলোপেতাত্ক্রুদ্ধাদ্বৈবস্বতাদিব
150.86
তস্য ক্রুদ্ধস্য নেত্রাভ্যাং পাবকঃ সমজায়ত
মহোল্কাভ্যাং যথা রাজন্সার্চিষঃ স্নেহবিন্দবঃ
150.87
তলং তলেন সংহত্য সংদশ্য দশনচ্ছদম্
রথমাস্থায় চ পুনর্মায়য়া নির্মিতং পুনঃ
150.88
যুক্তং গজনিভৈর্বাহৈঃ পিশাচবদনৈঃ খরৈঃ
স সূতমব্রবীত্ক্রুদ্ধঃ সূতপুত্রায় মা বহ
150.89
স যয়ৌ ঘোররূপেণ রথেন রথিনাং বরঃ
দ্বৈরথং সূতপুত্রেণ পুনরেব বিশাং পতে
150.90
স চিক্ষেপ পুনঃ ক্রুদ্ধঃ সূতপুত্রায় রাক্ষসঃ
অষ্টচক্রাং মহাঘোরামশনিং রুদ্রনির্মিতাম্
150.91
তামবপ্লুত্য জগ্রাহ কর্ণো ন্যস্য রথে ধনুঃ
চিক্ষেপ চৈনাং তস্যৈব স্যন্দনাত্সোঽবপুপ্লুবে
150.92
সাশ্বসূতধ্বজং যানং ভস্ম কৃত্বা মহাপ্রভা
বিবেশ বসুধাং ভিত্ত্বা সুরাস্তত্র বিসিস্মিয়ুঃ
150.93
কর্ণং তু সর্বভূতানি পূজয়ামাসুরঞ্জসা
যদবপ্লুত্য জগ্রাহ দেবসৃষ্টাং মহাশনিম্
150.94
এবং কৃত্বা রণে কর্ণ আরুরোহ রথং পুনঃ
ততো মুমোচ নারাচান্সূতপুত্রঃ পরংতপঃ
150.95
অশক্যং কর্তুমন্যেন সর্বভূতেষু মানদ
যদকার্ষীত্তদা কর্ণঃ সংগ্রামে ভীমদর্শনে
150.96
স হন্যমানো নারাচৈর্ধারাভিরিব পর্বতঃ
গন্ধর্বনগরাকারঃ পুনরন্তরধীয়ত
150.97
এবং স বৈ মহামায়ো মায়য়া লাঘবেন চ
অস্ত্রাণি তানি দিব্যানি জঘান রিপুসূদনঃ
150.98
নিহন্যমানেষ্বস্ত্রেষু মায়য়া তেন রক্ষসা
অসংভ্রান্তস্ততঃ কর্ণস্তদ্রক্ষঃ প্রত্যয়ুধ্যত
150.99
ততঃ ক্রুদ্ধো মহারাজ ভৈমসেনির্মহাবলঃ
চকার বহুধাত্মানং ভীষয়াণো নরাধিপান্
150.100
ততো দিগ্ভ্যঃ সমাপেতুঃ সিংহব্যাঘ্রতরক্ষবঃ
অগ্নিজিহ্বাশ্চ ভুজগা বিহগাশ্চাপ্যয়োমুখাঃ
150.101
স কীর্যমাণো নিশিতৈঃ কর্ণচাপচ্যুতৈঃ শরৈঃ
নগরাদ্রিবনপ্রখ্যস্তত্রৈবান্তরধীয়ত
150.102
রাক্ষসাশ্চ পিশাচাশ্চ যাতুধানাঃ শলাবৃকাঃ
তে কর্ণং ভক্ষয়িষ্যন্তঃ সর্বতঃ সমুপাদ্রবন্
অথৈনং বাগ্ভিরুগ্রাভিস্ত্রাসয়াং চক্রিরে তদা
150.103
উদ্যতৈর্বহুভির্ঘোরৈরায়ুধৈঃ শোণিতোক্ষিতৈঃ
তেষামনেকৈরেকৈকং কর্ণো বিব্যাধ চাশুগৈঃ
150.104
প্রতিহত্য তু তাং মায়াং দিব্যেনাস্ত্রেণ রাক্ষসীম্
আজঘান হয়ানস্য শরৈঃ সংনতপর্বভিঃ
150.105
তে ভগ্না বিকৃতাঙ্গাশ্চ ছিন্নপৃষ্ঠাশ্চ সায়কৈঃ
বসুধামন্বপদ্যন্ত পশ্যতস্তস্য রক্ষসঃ
150.106
স ভগ্নমায়ো হৈডিম্বঃ কর্ণং বৈকর্তনং ততঃ
এষ তে বিদধে মৃত্যুমিত্যুক্ত্বান্তরধীয়ত