অধ্যায় 151

151.1

সংজয় উবাচ
তস্মিংস্তথা বর্তমানে কর্ণরাক্ষসয়োর্মৃধে
অলায়ুধো রাক্ষসেন্দ্রো বীর্যবানভ্যবর্তত

মহত্যা সেনয়া যুক্তঃ সুয়োধনমুপাগমৎ
রাক্ষসানাং বিরূপাণাং সহস্রৈঃ পরিবারিতঃ
নানারূপধরৈর্বীরৈঃ পূর্ববৈরমনুস্মরন্

তস্য জ্ঞাতির্হি বিক্রান্তো ব্রাহ্মণাদো বকো হতঃ
কির্মীরশ্চ মহাতেজা হিডিম্বশ্চ সখা তথা

স দীর্ঘকালাধ্যুষিতং পূর্ববৈরমনুস্মরন্
বিজ্ঞায়ৈতন্নিশায়ুদ্ধং জিঘাংসুর্ভীমমাহবে

স মত্ত ইব মাতঙ্গঃ সংক্রুদ্ধ ইব চোরগঃ
দুর্যোধনমিদং বাক্যমব্রবীদ্যুদ্ধলালসঃ

বিদিতং তে মহারাজ যথা ভীমেন রাক্ষসাঃ
হিডিম্ববককির্মীরা নিহতা মম বান্ধবাঃ

পরামর্শশ্চ কন্যায়া হিডিম্বায়াঃ কৃতঃ পুরা
কিমন্যদ্রাক্ষসানন্যানস্মাংশ্চ পরিভূয় হ

তমহং সগণং রাজন্সবাজিরথকুঞ্জরম্
হৈডিম্বং চ সহামাত্যং হন্তুমভ্যাগতঃ স্বয়ম্

অদ্য কুন্তীসুতান্সর্বান্বাসুদেবপুরোগমান্
হত্বা সংভক্ষয়িষ্যামি সর্বৈরনুচরৈঃ সহ
নিবারয় বলং সর্বং বয়ং যোত্স্যাম পাণ্ডবান্

তস্য তদ্বচনং শ্রুত্বা হৃষ্টো দুর্যোধনস্তদা
প্রতিপূজ্যাব্রবীদ্বাক্যং ভ্রাতৃভিঃ পরিবারিতঃ

ত্বাং পুরস্কৃত্য সগণং বয়ং যোত্স্যামহে পরান্
ন হি বৈরান্তমনসঃ স্থাস্যন্তি মম সৈনিকাঃ

এবমস্ত্বিতি রাজানমুক্ত্বা রাক্ষসপুংগবঃ
অভ্যয়াত্ত্বরিতো ভীমং সহিতঃ পুরুষাশনৈঃ

দীপ্যমানেন বপুষা রথেনাদিত্যবর্চসা
তাদৃশেনৈব রাজেন্দ্র যাদৃশেন ঘটোত্কচঃ

তস্যাপ্যতুলনির্ঘোষো বহুতোরণচিত্রিতঃ
ঋক্ষচর্মাবনদ্ধাঙ্গো নল্বমাত্রো মহারথঃ

তস্যাপি তুরগাঃ শীঘ্রা হস্তিকায়াঃ খরস্বনাঃ
শতং যুক্তা মহাকায়া মাংসশোণিতভোজনাঃ

তস্যাপি রথনির্ঘোষো মহামেঘরবোপমঃ
তস্যাপি সুমহচ্চাপং দৃঢজ্যং বলবত্তরম্

তস্যাপ্যক্ষসমা বাণা রুক্মপুঙ্খাঃ শিলাশিতাঃ
সোঽপি বীরো মহাবাহুর্যথৈব স ঘটোত্কচঃ

তস্যাপি গোমায়ুবডাভিগুপ্তো; বভূব কেতুর্জ্বলনার্কতুল্যঃ
স চাপি রূপেণ ঘটোত্কচস্য; শ্রীমত্তমো ব্যাকুলদীপিতাস্যঃ

দীপ্তাঙ্গদো দীপ্তকিরীটমালী; বদ্ধস্রগুষ্ণীষনিবদ্ধখড্গঃ
গদী ভুশুণ্ডী মুসলী হলী চ; শরাসনী বারণতুল্যবর্ষ্মা

রথেন তেনানলবর্চসা চ; বিদ্রাবয়ন্পাণ্ডববাহিনীং তাম্
ররাজ সংখ্যে পরিবর্তমানো; বিদ্যুন্মালী মেঘ ইবান্তরিক্ষে

তে চাপি সর্বে প্রবরা নরেন্দ্রা; মহাবলা বর্মিণশ্চর্মিণশ্চ
হর্ষান্বিতা যুয়ুধুস্তত্র রাজ;ন্সমন্ততঃ পাণ্ডবয়োধবীরাঃ