Utshovঅধ্যায় 152
152.1
সংজয় উবাচ
তমাগতমভিপ্রেক্ষ্য ভীমকর্মাণমাহবে
হর্ষমাহারয়াং চক্রুঃ কুরবঃ সর্ব এব তে
152.2
তথৈব তব পুত্রাস্তে দুর্যোধনপুরোগমাঃ
অপ্লবাঃ প্লবমাসাদ্য তর্তুকামা ইবার্ণবম্
152.3
পুনর্জাতমিবাত্মানং মন্বানাঃ পার্থিবাস্তদা
অলায়ুধং রাক্ষসেন্দ্রং স্বাগতেনাভ্যপূজয়ন্
152.4
তস্মিংস্ত্বমানুষে যুদ্ধে বর্তমানে ভয়াবহে
কর্ণরাক্ষসয়োর্নক্তং দারুণপ্রতিদর্শনে
152.5
উপপ্রৈক্ষন্ত পাঞ্চালাঃ স্ময়মানাঃ সরাজকাঃ
তথৈব তাবকা রাজন্ঘূর্ণমানাস্ততস্ততঃ
152.6
চুক্রুশুর্নেদমস্তীতি দ্রোণদ্রৌণিকৃপাদয়ঃ
তত্কর্ম দৃষ্ট্বা সংভ্রান্তা হৈডিম্বস্য রণাজিরে
152.7
সর্বমাবিগ্নমভবদ্ধাহাভূতমচেতনম্
তব সৈন্যং মহারাজ নিরাশং কর্ণজীবিতে
152.8
দুর্যোধনস্তু সংপ্রেক্ষ্য কর্ণমার্তিং পরাং গতম্
অলায়ুধং রাক্ষসেন্দ্রমাহূয়েদমথাব্রবীৎ
152.9
এষ বৈকর্তনঃ কর্ণো হৈডিম্বেন সমাগতঃ
কুরুতে কর্ম সুমহদ্যদস্যৌপয়িকং মৃধে
152.10
পশ্যৈতান্পার্থিবাঞ্শূরান্নিহতান্ভৈমসেনিনা
নানাশস্ত্রৈরভিহতান্পাদপানিব দন্তিনা
152.11
তবৈষ ভাগঃ সমরে রাজমধ্যে ময়া কৃতঃ
তবৈবানুমতে বীর তং বিক্রম্য নিবর্হয়
152.12
পুরা বৈকর্তনং কর্ণমেষ পাপো ঘটোত্কচঃ
মায়াবলমুপাশ্রিত্য কর্শয়ত্যরিকর্শনঃ
152.13
এবমুক্তঃ স রাজ্ঞা তু রাক্ষসস্তীব্রবিক্রমঃ
তথেত্যুক্ত্বা মহাবাহুর্ঘটোত্কচমুপাদ্রবৎ
152.14
ততঃ কর্ণং সমুত্সৃজ্য ভৈমসেনিরপি প্রভো
প্রত্যমিত্রমুপায়ান্তং মর্দয়ামাস মার্গণৈঃ
152.15
তয়োঃ সমভবদ্যুদ্ধং ক্রুদ্ধয়ো রাক্ষসেন্দ্রয়োঃ
মত্তয়োর্বাশিতাহেতোর্দ্বিপয়োরিব কাননে
152.16
রক্ষসা বিপ্রমুক্তস্তু কর্ণোঽপি রথিনাং বরঃ
অভ্যদ্রবদ্ভীমসেনং রথেনাদিত্যবর্চসা
152.17
তমায়ান্তমনাদৃত্য দৃষ্ট্বা গ্রস্তং ঘটোত্কচম্
অলায়ুধেন সমরে সিংহেনেব গবাং পতিম্
152.18
রথেনাদিত্যবপুষা ভীমঃ প্রহরতাং বরঃ
কিরঞ্শরৌঘান্প্রয়য়াবলায়ুধরথং প্রতি
152.19
তমায়ান্তমভিপ্রেক্ষ্য স তদালায়ুধঃ প্রভো
ঘটোত্কচং সমুত্সৃজ্য ভীমসেনং সমাহ্বয়ৎ
152.20
তং ভীমঃ সহসাভ্যেত্য রাক্ষসান্তকরঃ প্রভো
সগণং রাক্ষসেন্দ্রং তং শরবর্ষৈরবাকিরৎ
152.21
তথৈবালায়ুধো রাজঞ্শিলাধৌতৈরজিহ্মগৈঃ
অভ্যবর্ষত কৌন্তেয়ং পুনঃ পুনররিংদমঃ
152.22
তথা তে রাক্ষসাঃ সর্বে ভীমসেনমুপাদ্রবন্
নানাপ্রহরণা ভীমাস্ত্বত্সুতানাং জয়ৈষিণঃ
152.23
স তাড্যমানো বলিভির্ভীমসেনো মহাবলঃ
পঞ্চভিঃ পঞ্চভিঃ সর্বাংস্তানবিধ্যচ্ছিতৈঃ শরৈঃ
152.24
তে বধ্যমানা ভীমেন রাক্ষসাঃ খরয়োনয়ঃ
বিনেদুস্তুমুলান্নাদান্দুদ্রুবুশ্চ দিশো দশ
152.25
তাংস্ত্রাস্যমানান্ভীমেন দৃষ্ট্বা রক্ষো মহাবলম্
অভিদুদ্রাব বেগেন শরৈশ্চৈনমবাকিরৎ
152.26
তং ভীমসেনঃ সমরে তীক্ষ্ণাগ্রৈরক্ষিণোচ্ছরৈঃ
অলায়ুধস্তু তানস্তান্ভীমেন বিশিখান্রণে
চিচ্ছেদ কাংশ্চিত্সমরে ত্বরয়া কাংশ্চিদগ্রহীৎ
152.27
স তং দৃষ্ট্বা রাক্ষসেন্দ্রং ভীমো ভীমপরাক্রমঃ
গদাং চিক্ষেপ বেগেন বজ্রপাতোপমাং তদা
152.28
তামাপতন্তীং বেগেন গদাং জ্বালাকুলাং ততঃ
গদয়া তাডয়ামাস সা গদা ভীমমাব্রজৎ
152.29
স রাক্ষসেন্দ্রং কৌন্তেয়ঃ শরবর্ষৈরবাকিরৎ
তানপ্যস্যাকরোন্মোঘান্রাক্ষসো নিশিতৈঃ শরৈঃ
152.30
তে চাপি রাক্ষসাঃ সর্বে সৈনিকা ভীমরূপিণঃ
শাসনাদ্রাক্ষসেন্দ্রস্য নিজঘ্নূ রথকুঞ্জরান্
152.31
পাঞ্চালাঃ সৃঞ্জয়াশ্চৈব বাজিনঃ পরমদ্বিপাঃ
ন শান্তিং লেভিরে তত্র রক্ষসৈর্ভৃশপীডিতাঃ
152.32
তং তু দৃষ্ট্বা মহাঘোরং বর্তমানং মহাহবে
অব্রবীত্পুরুষশ্রেষ্ঠো ধনংজয়মিদং বচঃ
152.33
পশ্য ভীমং মহাবাহো রাক্ষসেন্দ্রবশং গতম্
পদবীমস্য গচ্ছ ত্বং মা বিচারয় পাণ্ডব
152.34
ধৃষ্টদ্যুম্নঃ শিখণ্ডী চ যুধামন্যূত্তমৌজসৌ
সহিতা দ্রৌপদেয়াশ্চ কর্ণং যান্তু মহারথাঃ
152.35
নকুলঃ সহদেবশ্চ যুয়ুধানশ্চ বীর্যবান্
ইতরান্রাক্ষসান্ঘ্নন্তু শাসনাত্তব পাণ্ডব
152.36
ত্বমপীমাং মহাবাহো চমূং দ্রোণপুরস্কৃতাম্
বারয়স্ব নরব্যাঘ্র মহদ্ধি ভয়মাগতম্
152.37
এবমুক্তে তু কৃষ্ণেন যথোদ্দিষ্টা মহারথাঃ
জগ্মুর্বৈকর্তনং কর্ণং রাক্ষসাংশ্চেতরান্রণে
152.38
অথ পূর্ণায়তোত্সৃষ্টৈঃ শরৈরাশীবিষোপমৈঃ
ধনুশ্চিচ্ছেদ ভীমস্য রাক্ষসেন্দ্রঃ প্রতাপবান্
152.39
হয়াংশ্চাস্য শিতৈর্বাণৈঃ সারথিং চ মহাবলঃ
জঘান মিষতঃ সংখ্যে ভীমসেনস্য ভারত
152.40
সোঽবতীর্য রথোপস্থাদ্ধতাশ্বো হতসারথিঃ
তস্মৈ গুর্বীং গদাং ঘোরাং স বিনদ্যোত্সসর্জ হ
152.41
ততস্তাং ভীমনির্ঘোষামাপতন্তীং মহাগদাম্
গদয়া রাক্ষসো ঘোরো নিজঘান ননাদ চ
152.42
তদ্দৃষ্ট্বা রাক্ষসেন্দ্রস্য ঘোরং কর্ম ভয়াবহম্
ভীমসেনঃ প্রহৃষ্টাত্মা গদামাশু পরামৃশৎ
152.43
তয়োঃ সমভবদ্যুদ্ধং তুমুলং নররক্ষসোঃ
গদানিপাতসংহ্রাদৈর্ভুবং কম্পয়তোর্ভৃশম্
152.44
গদাবিমুক্তৌ তৌ ভূয়ঃ সমাসাদ্যেতরেতরম্
মুষ্টিভির্বজ্রসংহ্রাদৈরন্যোন্যমভিজঘ্নতুঃ
152.45
রথচক্রৈর্যুগৈরক্ষৈরধিষ্ঠানৈরুপস্করৈঃ
যথাসন্নমুপাদায় নিজঘ্নতুরমর্ষণৌ
152.46
তৌ বিক্ষরন্তৌ রুধিরং সমাসাদ্যেতরেতরম্
মত্তাবিব মহানাগাবকৃষ্যেতাং পুনঃ পুনঃ
152.47
তমপশ্যদ্ধৃষীকেশঃ পাণ্ডবানাং হিতে রতঃ
স ভীমসেনরক্ষার্থং হৈডিম্বং প্রত্যচোদয়ৎ