Utshovঅধ্যায় 153
153.1
সংজয় উবাচ
সংপ্রেক্ষ্য সমরে ভীমং রক্ষসা গ্রস্তমন্তিকাৎ
বাসুদেবোঽব্রবীদ্বাক্যং ঘটোত্কচমিদং তদা
153.2
পশ্য ভীমং মহাবাহো রক্ষসা গ্রস্তমন্তিকাৎ
পশ্যতাং সর্বসৈন্যানাং তব চৈব মহাদ্যুতে
153.3
স কর্ণং ত্বং সমুত্সৃজ্য রাক্ষসেন্দ্রমলায়ুধম্
জহি ক্ষিপ্রং মহাবাহো পশ্চাত্কর্ণং বধিষ্যসি
153.4
স বার্ষ্ণেয়বচঃ শ্রুত্বা কর্ণমুত্সৃজ্য বীর্যবান্
যুয়ুধে রাক্ষসেন্দ্রেণ বকভ্রাত্রা ঘটোত্কচঃ
তয়োঃ সুতুমুলং যুদ্ধং বভূব নিশি রক্ষসোঃ
153.5
অলায়ুধস্য যোধাংস্তু রাক্ষসান্ভীমদর্শনান্
বেগেনাপততঃ শূরান্প্রগৃহীতশরাসনান্
153.6
আত্তায়ুধঃ সুসংক্রুদ্ধো যুয়ুধানো মহারথঃ
নকুলঃ সহদেবশ্চ চিচ্ছিদুর্নিশিতৈঃ শরৈঃ
153.7
সর্বাংশ্চ সমরে রাজন্কিরীটী ক্ষত্রিয়র্ষভান্
পরিচিক্ষেপ বীভত্সুঃ সর্বতঃ প্রক্ষিপঞ্শরান্
153.8
কর্ণশ্চ সমরে রাজন্ব্যদ্রাবয়ত পার্থিবান্
ধৃষ্টদ্যুম্নশিখণ্ড্যাদীন্পাঞ্চালানাং মহারথান্
153.9
তান্বধ্যমানান্দৃষ্ট্বা তু ভীমো ভীমপরাক্রমঃ
অভ্যয়াত্ত্বরিতঃ কর্ণং বিশিখান্বিকিরন্রণে
153.10
ততস্তেঽপ্যায়য়ুর্হত্বা রাক্ষসান্যত্র সূতজঃ
নকুলঃ সহদেবশ্চ সাত্যকিশ্চ মহারথঃ
তে কর্ণং যোধয়ামাসুঃ পাঞ্চালা দ্রোণমেব চ
153.11
অলায়ুধস্তু সংক্রুদ্ধো ঘটোত্কচমরিংদমম্
পরিঘেণাতিকায়েন তাডয়ামাস মূর্ধনি
153.12
স তু তেন প্রহারেণ ভৈমসেনির্মহাবলঃ
ঈষন্মূর্ছান্বিতোঽঽত্মানং সংস্তম্ভয়ত বীর্যবান্
153.13
ততো দীপ্তাগ্নিসংকাশাং শতঘণ্টামলংকৃতাম্
চিক্ষেপ সমরে তস্মৈ গদাং কাঞ্চনভূষণাম্
153.14
সা হয়ান্সারথিং চৈব রথং চাস্য মহাস্বনা
চূর্ণয়ামাস বেগেন বিসৃষ্টা ভীমকর্মণা
153.15
স ভগ্নহয়চক্রাক্ষো বিশীর্ণধ্বজকূবরঃ
উত্পপাত রথাত্তূর্ণং মায়ামাস্থায় রাক্ষসীম্
153.16
স সমাস্থায় মায়াং তু ববর্ষ রুধিরং বহু
বিদ্যুদ্বিভ্রাজিতং চাসীত্তিমিরাভ্রাকুলং নভঃ
153.17
ততো বজ্রনিপাতাশ্চ সাশনিস্তনয়িত্নবঃ
মহাংশ্চটচটাশব্দস্তত্রাসীদ্ধি মহাহবে
153.18
তাং প্রেক্ষ্য বিহিতাং মায়াং রাক্ষসো রাক্ষসেন তু
ঊর্ধ্বমুত্পত্য হৈডিম্বস্তাং মায়াং মায়য়াবধীৎ
153.19
সোঽভিবীক্ষ্য হতাং মায়াং মায়াবী মায়য়ৈব হি
অশ্মবর্ষং সুতুমুলং বিসসর্জ ঘটোত্কচে
153.20
অশ্মবর্ষং স তদ্ঘোরং শরবর্ষেণ বীর্যবান্
দিশো বিধ্বংসয়ামাস তদদ্ভুতমিবাভবৎ
153.21
ততো নানাপ্রহরণৈরন্যোন্যমভিবর্ষতাম্
আয়সৈঃ পরিঘৈঃ শূলৈর্গদামুসলমুদ্গরৈঃ
153.22
পিনাকৈঃ করবালৈশ্চ তোমরপ্রাসকম্পনৈঃ
নারাচৈর্নিশিতৈর্ভল্লৈঃ শরৈশ্চক্রৈঃ পরশ্বধৈঃ
153.23
অয়োগুডৈর্ভিণ্ডিপালৈর্গোশীর্ষোলূখলৈরপি
উত্পাট্য চ মহাশাখৈর্বিবিধৈর্জগতীরুহৈঃ
153.24
শমীপীলুকরীরৈশ্চ শম্যাকৈশ্চৈব ভারত
ইঙ্গুদৈর্বদরীভিশ্চ কোবিদারৈশ্চ পুষ্পিতৈঃ
153.25
পলাশৈররিমেদৈশ্চ প্লক্ষন্যগ্রোধপিপ্পলৈঃ
মহদ্ভিঃ সমরে তস্মিন্নন্যোন্যমভিজঘ্নতুঃ
153.26
বিবিধৈঃ পর্বতাগ্রৈশ্চ নানাধাতুভিরাচিতৈঃ
তেষাং শব্দো মহানাসীদ্বজ্রাণাং ভিদ্যতামিব
153.27
যুদ্ধং তদভবদ্ঘোরং ভৈম্যলায়ুধয়োর্নৃপ
হরীন্দ্রয়োর্যথা রাজন্বালিসুগ্রীবয়োঃ পুরা
153.28
তৌ যুদ্ধ্বা বিবিধৈর্ঘোরৈরায়ুধৈর্বিশিখৈস্তথা
প্রগৃহ্য নিশিতৌ খড্গাবন্যোন্যমভিজঘ্নতুঃ
153.29
তাবন্যোন্যমভিদ্রুত্য কেশেষু সুমহাবলৌ
ভুজাভ্যাং পর্যগৃহ্ণীতাং মহাকায়ৌ মহাবলৌ
153.30
তৌ ভিন্নগাত্রৌ প্রস্বেদং সুস্রুবাতে জনাধিপ
রুধিরং চ মহাকায়াবভিবৃষ্টাবিবাচলৌ
153.31
অথাভিপত্য বেগেন সমুদ্ভ্রাম্য চ রাক্ষসম্
বলেনাক্ষিপ্য হৈডিম্বশ্চকর্তাস্য শিরো মহৎ
153.32
সোঽপহৃত্য শিরস্তস্য কুণ্ডলাভ্যাং বিভূষিতম্
তদা সুতুমুলং নাদং ননাদ সুমহাবলঃ
153.33
হতং দৃষ্ট্বা মহাকায়ং বকজ্ঞাতিমরিংদমম্
পাঞ্চালাঃ পাণ্ডবাশ্চৈব সিংহনাদান্বিনেদিরে
153.34
ততো ভেরীসহস্রাণি শঙ্খানাময়ুতানি চ
অবাদয়ন্পাণ্ডবেয়াস্তস্মিন্রক্ষসি পাতিতে
153.35
অতীব সা নিশা তেষাং বভূব বিজয়াবহা
বিদ্যোতমানা বিবভৌ সমন্তাদ্দীপমালিনী
153.36
অলায়ুধস্য তু শিরো ভৈমসেনির্মহাবলঃ
দুর্যোধনস্য প্রমুখে চিক্ষেপ গতচেতনম্
153.37
অথ দুর্যোধনো রাজা দৃষ্ট্বা হতমলায়ুধম্
বভূব পরমোদ্বিগ্নঃ সহ সৈন্যেন ভারত
153.38
তেন হ্যস্য প্রতিজ্ঞাতং ভীমসেনমহং যুধি
হন্তেতি স্বয়মাগম্য স্মরতা বৈরমুত্তমম্
153.39
ধ্রুবং স তেন হন্তব্য ইত্যমন্যত পার্থিবঃ
জীবিতং চিরকালায় ভ্রাতৄণাং চাপ্যমন্যত
153.40
স তং দৃষ্ট্বা বিনিহতং ভীমসেনাত্মজেন বৈ
প্রতিজ্ঞাং ভীমসেনস্য পূর্ণামেবাভ্যমন্যত