Utshovঅধ্যায় 154
154.1
সংজয় উবাচ
নিহত্যালায়ুধং রক্ষঃ প্রহৃষ্টাত্মা ঘটোত্কচঃ
ননাদ বিবিধান্নাদান্বাহিন্যাঃ প্রমুখে স্থিতঃ
154.2
তস্য তং তুমুলং শব্দং শ্রুত্বা কুঞ্জরকম্পনম্
তাবকানাং মহারাজ ভয়মাসীত্সুদারুণম্
154.3
অলায়ুধবিষক্তং তু ভৈমসেনিং মহাবলম্
দৃষ্ট্বা কর্ণো মহাবাহুঃ পাঞ্চালান্সমুপাদ্রবৎ
154.4
দশভির্দশভির্বাণৈর্ধৃষ্টদ্যুম্নশিখণ্ডিনৌ
দৃঢৈঃ পূর্ণায়তোত্সৃষ্টৈর্বিভেদ নতপর্বভিঃ
154.5
ততঃ পরমনারাচৈর্যুধামন্যূত্তমৌজসৌ
সাত্যকিং চ রথোদারং কম্পয়ামাস মার্গণৈঃ
154.6
তেষামভ্যস্যতাং তত্র সর্বেষাং সব্যদক্ষিণম্
মণ্ডলান্যেব চাপানি ব্যদৃশ্যন্ত জনাধিপ
154.7
তেষাং জ্যাতলনির্ঘোষো রথনেমিস্বনশ্চ হ
মেঘানামিব ঘর্মান্তে বভূব তুমুলো নিশি
154.8
জ্যানেমিঘোষস্তনয়িত্নুমান্বৈ; ধনুস্তডিন্মণ্ডলকেতুশৃঙ্গঃ
শরৌঘবর্ষাকুলবৃষ্টিমাংশ্চ; সংগ্রামমেঘঃ স বভূব রাজন্
154.9
তদুদ্ধতং শৈল ইবাপ্রকম্প্যো; বর্ষং মহচ্ছৈলসমানসারঃ
বিধ্বংসয়ামাস রণে নরেন্দ্র; বৈকর্তনঃ শত্রুগণাবমর্দী
154.10
ততোঽতুলৈর্বজ্রনিপাতকল্পৈঃ; শিতৈঃ শরৈঃ কাঞ্চনচিত্রপুঙ্খৈঃ
শত্রূন্ব্যপোহত্সমরে মহাত্মা; বৈকর্তনঃ পুত্রহিতে রতস্তে
154.11
সংছিন্নভিন্নধ্বজিনশ্চ কেচি;ত্কেচিচ্ছরৈরর্দিতভিন্নদেহাঃ
কেচিদ্বিসূতা বিহয়াশ্চ কেচি;দ্বৈকর্তনেনাশু কৃতা বভূবুঃ
154.12
অবিন্দমানাস্ত্বথ শর্ম সংখ্যে; যৌধিষ্ঠিরং তে বলমন্বপদ্যন্
তান্প্রেক্ষ্য ভগ্নান্বিমুখীকৃতাংশ্চ; ঘটোত্কচো রোষমতীব চক্রে
154.13
আস্থায় তং কাঞ্চনরত্নচিত্রং; রথোত্তমং সিংহ ইবোন্ননাদ
বৈকর্তনং কর্ণমুপেত্য চাপি; বিব্যাধ বজ্রপ্রতিমৈঃ পৃষত্কৈঃ
154.14
তৌ কর্ণিনারাচশিলীমুখৈশ্চ; নালীকদণ্ডৈশ্চ সবত্সদন্তৈঃ
বরাহকর্ণৈঃ সবিষাণশৃঙ্গৈঃ; ক্ষুরপ্রবর্ষৈশ্চ বিনেদতুঃ খম্
154.15
তদ্বাণধারাবৃতমন্তরিক্ষং; তির্যগ্গতাভিঃ সমরে ররাজ
সুবর্ণপুঙ্খজ্বলিতপ্রভাভি;র্বিচিত্রপুষ্পাভিরিব স্রজাভিঃ
154.16
সমং হি তাবপ্রতিমপ্রভাবা;বন্যোন্যমাজঘ্নতুরুত্তমাস্ত্রৈঃ
তয়োর্হি বীরোত্তময়োর্ন কশ্চি;দ্দদর্শ তস্মিন্সমরে বিশেষম্
154.17
অতীব তচ্চিত্রমতীব রূপং; বভূব যুদ্ধং রবিভীমসূন্বোঃ
সমাকুলং শস্ত্রনিপাতঘোরং; দিবীব রাহ্বংশুমতোঃ প্রতপ্তম্
154.18
ঘটোত্কচো যদা কর্ণং ন বিশেষয়তে নৃপ
তদা প্রাদুশ্চকারোগ্রমস্ত্রমস্ত্রবিদাং বরঃ
154.19
তেনাস্ত্রেণ হয়ান্পূর্বং হত্বা কর্ণস্য রাক্ষসঃ
সারথিং চৈব হৈডিম্বঃ ক্ষিপ্রমন্তরধীয়ত
154.20
ধৃতরাষ্ট্র উবাচ
তথা হ্যন্তর্হিতে তস্মিন্কূটয়োধিনি রাক্ষসে
মামকৈঃ প্রতিপন্নং যত্তন্মমাচক্ষ্ব সংজয়
154.21
সংজয় উবাচ
অন্তর্হিতং রাক্ষসং তং বিদিত্বা; সংপ্রাক্রোশন্কুরবঃ সর্ব এব
কথং নায়ং রাক্ষসঃ কূটয়োধী; হন্যাত্কর্ণং সমরেঽদৃশ্যমানঃ
154.22
ততঃ কর্ণো লঘুচিত্রাস্ত্রয়োধী; সর্বা দিশো ব্যাবৃণোদ্বাণজালৈঃ
ন বৈ কিংচিদ্ব্যাপতত্তত্র ভূতং; তমোভূতে সায়কৈরন্তরিক্ষে
154.23
ন চাদদানো ন চ সংদধানো; ন চেষুধী স্পৃশমানঃ করাগ্রৈঃ
অদৃশ্যদ্বৈ লাঘবাত্সূতপুত্রঃ; সর্বং বাণৈশ্ছাদয়ানোঽন্তরিক্ষম্
154.24
ততো মায়াং বিহিতামন্তরিক্ষে; ঘোরাং ভীমাং দারুণাং রাক্ষসেন
সংপশ্যামো লোহিতাভ্রপ্রকাশাং; দেদীপ্যন্তীমগ্নিশিখামিবোগ্রাম্
154.25
ততস্তস্যা বিদ্যুতঃ প্রাদুরাস;ন্নুল্কাশ্চাপি জ্বলিতাঃ কৌরবেন্দ্র
ঘোষশ্চান্যঃ প্রাদুরাসীত্সুঘোরঃ; সহস্রশো নদতাং দুন্দুভীনাম্
154.26
ততঃ শরাঃ প্রাপতন্রুক্মপুঙ্খাঃ; শক্ত্যঃ প্রাসা মুসলান্যায়ুধানি
পরশ্বধাস্তৈলধৌতাশ্চ খড্গাঃ; প্রদীপ্তাগ্রাঃ পট্টিশাস্তোমরাশ্চ
154.27
ময়ূখিনঃ পরিঘা লোহবদ্ধা; গদাশ্চিত্রাঃ শিতধারাশ্চ শূলাঃ
গুর্ব্যো গদা হেমপট্টাবনদ্ধাঃ; শতঘ্ন্যশ্চ প্রাদুরাসন্সমন্তাৎ
154.28
মহাশিলাশ্চাপতংস্তত্র তত্র; সহস্রশঃ সাশনয়ঃ সবজ্রাঃ
চক্রাণি চানেকশতক্ষুরাণি; প্রাদুর্বভূবুর্জ্বলনপ্রভাণি
154.29
তাং শক্তিপাষাণপরশ্বধানাং; প্রাসাসিবজ্রাশনিমুদ্গরাণাম্
বৃষ্টিং বিশালাং জ্বলিতাং পতন্তীং; কর্ণঃ শরৌঘৈর্ন শশাক হন্তুম্
154.30
শরাহতানাং পততাং হয়ানাং; বজ্রাহতানাং পততাং গজানাম্
শিলাহতানাং চ মহারথানাং; মহান্নিনাদঃ পততাং বভূব
154.31
সুভীমনানাবিধশস্ত্রপাতৈ;র্ঘটোত্কচেনাভিহতং সমন্তাৎ
দৌর্যোধনং তদ্বলমার্তরূপ;মাবর্তমানং দদৃশে ভ্রমন্তম্
154.32
হাহাকৃতং সংপরিবর্তমানং; সংলীয়মানং চ বিষণ্ণরূপম্
তে ত্বার্যভাবাত্পুরুষপ্রবীরাঃ; পরাঙ্মুখা ন বভূবুস্তদানীম্
154.33
তাং রাক্ষসীং ঘোরতরাং সুভীমাং; বৃষ্টিং মহাশস্ত্রময়ীং পতন্তীম্
দৃষ্ট্বা বলৌঘাংশ্চ নিপাত্যমানা;ন্মহদ্ভয়ং তব পুত্রান্বিবেশ
154.34
শিবাশ্চ বৈশ্বানরদীপ্তজিহ্বাঃ; সুভীমনাদাঃ শতশো নদন্ত্যঃ
রক্ষোগণান্নর্দতশ্চাভিবীক্ষ্য; নরেন্দ্রয়োধা ব্যথিতা বভূবুঃ
154.35
তে দীপ্তজিহ্বাননতীক্ষ্ণদংষ্ট্রা; বিভীষণাঃ শৈলনিকাশকায়াঃ
নভোগতাঃ শক্তিবিষক্তহস্তা; মেঘা ব্যমুঞ্চন্নিব বৃষ্টিমার্গম্
154.36
তৈরাহতাস্তে শরশক্তিশূলৈ;র্গদাভিরুগ্রৈঃ পরিঘৈশ্চ দীপ্তৈঃ
বজ্রৈঃ পিনাকৈরশনিপ্রহারৈ;শ্চক্রৈঃ শতঘ্ন্যুন্মথিতাশ্চ পেতুঃ
154.37
হুডা ভুশুণ্ড্যোঽশ্মগুডাঃ শতঘ্ন্যঃ; স্থূণাশ্চ কার্ষ্ণায়সপট্টনদ্ধাঃ
অবাকিরংস্তব পুত্রস্য সৈন্যং; তথা রৌদ্রং কশ্মলং প্রাদুরাসীৎ
154.38
নিষ্কীর্ণান্ত্রা বিহতৈরুত্তমাঙ্গৈঃ; সংভগ্নাঙ্গাঃ শেরতে তত্র শূরাঃ
ভিন্না হয়াঃ কুঞ্জরাশ্চাবভগ্নাঃ; সংচূর্ণিতাশ্চৈব রথাঃ শিলাভিঃ
154.39
এবং মহচ্ছস্ত্রবর্ষং সৃজন্ত;স্তে যাতুধানা ভুবি ঘোররূপাঃ
মায়াঃ সৃষ্টাস্তত্র ঘটোত্কচেন; নামুঞ্চন্বৈ যাচমানং ন ভীতম্
154.40
তস্মিন্ঘোরে কুরুবীরাবমর্দে; কালোত্সৃষ্টে ক্ষত্রিয়াণামভাবে
তে বৈ ভগ্নাঃ সহসা ব্যদ্রবন্ত; প্রাক্রোশন্তঃ কৌরবাঃ সর্ব এব
154.41
পলায়ধ্বং কুরবো নৈতদস্তি; সেন্দ্রা দেবা ঘ্নন্তি নঃ পাণ্ডবার্থে
তথা তেষাং মজ্জতাং ভারতানাং; ন স্ম দ্বীপস্তত্র কশ্চিদ্বভূব
154.42
তস্মিন্সংক্রন্দে তুমুলে বর্তমানে; সৈন্যে ভগ্নে লীয়মানে কুরূণাম্
অনীকানাং প্রবিভাগেঽপ্রকাশে; ন জ্ঞায়ন্তে কুরবো নেতরে বা
154.43
নির্মর্যাদে বিদ্রবে ঘোররূপে; সর্বা দিশঃ প্রেক্ষমাণাঃ স্ম শূন্যাঃ
তাং শস্ত্রবৃষ্টিমুরসা গাহমানং; কর্ণং চৈকং তত্র রাজন্নপশ্যম্
154.44
ততো বাণৈরাবৃণোদন্তরিক্ষং; দিব্যাং মায়াং যোধয়ন্রাক্ষসস্য
হ্রীমান্কুর্বন্দুষ্করমার্যকর্ম; নৈবামুহ্যত্সংয়ুগে সূতপুত্রঃ
154.45
ততো ভীতাঃ সমুদৈক্ষন্ত কর্ণং; রাজন্সর্বে সৈন্ধবা বাহ্লিকাশ্চ
অসংমোহং পূজয়ন্তোঽস্য সংখ্যে; সংপশ্যন্তো বিজয়ং রাক্ষসস্য
154.46
তেনোত্সৃষ্টা চক্রয়ুক্তা শতঘ্নী; সমং সর্বাংশ্চতুরোঽশ্বাঞ্জঘান
তে জানুভির্জগতীমন্বপদ্য;ন্গতাসবো নির্দশনাক্ষিজিহ্বাঃ
154.47
ততো হতাশ্বাদবরুহ্য বাহা;দন্তর্মনাঃ কুরুষু প্রাদ্রবত্সু
দিব্যে চাস্ত্রে মায়য়া বধ্যমানে; নৈবামুহ্যচ্চিন্তয়ন্প্রাপ্তকালম্
154.48
ততোঽব্রুবন্কুরবঃ সর্ব এব; কর্ণং দৃষ্ট্বা ঘোররূপাং চ মায়াম্
শক্ত্যা রক্ষো জহি কর্ণাদ্য তূর্ণং; নশ্যন্ত্যেতে কুরবো ধার্তরাষ্ট্রাঃ
154.49
করিষ্যতঃ কিং চ নো ভীমপার্থৌ; তপন্তমেনং জহি রক্ষো নিশীথে
যো নঃ সংগ্রামাদ্ঘোররূপাদ্বিমুচ্যে;ত্স নঃ পার্থান্সমরে যোধয়েত
154.50
তস্মাদেনং রাক্ষসং ঘোররূপং; জহি শক্ত্যা দত্তয়া বাসবেন
মা কৌরবাঃ সর্ব এবেন্দ্রকল্পা; রাত্রীমুখে কর্ণ নেশুঃ সয়োধাঃ
154.51
স বধ্যমানো রক্ষসা বৈ নিশীথে; দৃষ্ট্বা রাজন্নশ্যমানং বলং চ
মহচ্চ শ্রুত্বা নিনদং কৌরবাণাং; মতিং দধ্রে শক্তিমোক্ষায় কর্ণঃ
154.52
স বৈ ক্রুদ্ধঃ সিংহ ইবাত্যমর্ষী; নামর্ষয়ত্প্রতিঘাতং রণে তম্
শক্তিং শ্রেষ্ঠাং বৈজয়ন্তীমসহ্যাং; সমাদদে তস্য বধং চিকীর্ষন্
154.53
যাসৌ রাজন্নিহিতা বর্ষপূগা;ন্বধায়াজৌ সত্কৃতা ফল্গুনস্য
যাং বৈ প্রাদাত্সূতপুত্রায় শক্রঃ; শক্তিং শ্রেষ্ঠাং কুণ্ডলাভ্যাং নিমায়
154.54
তাং বৈ শক্তিং লেলিহানাং প্রদীপ্তাং; পাশৈর্যুক্তামন্তকস্যেব রাত্রিম্
মৃত্যোঃ স্বসারং জ্বলিতামিবোল্কাং; বৈকর্তনঃ প্রাহিণোদ্রাক্ষসায়
154.55
তামুত্তমাং পরকায়াপহন্ত্রীং; দৃষ্ট্বা সৌতের্বাহুসংস্থাং জ্বলন্তীম্
ভীতং রক্ষো বিপ্রদুদ্রাব রাজ;ন্কৃত্বাত্মানং বিন্ধ্যপাদপ্রমাণম্
154.56
দৃষ্ট্বা শক্তিং কর্ণবাহ্বন্তরস্থাং; নেদুর্ভূতান্যন্তরিক্ষে নরেন্দ্র
ববুর্বাতাস্তুমুলাশ্চাপি রাজ;ন্সনির্ঘাতা চাশনির্গাং জগাম
154.57
সা তাং মায়াং ভস্ম কৃত্বা জ্বলন্তী; ভিত্ত্বা গাঢং হৃদয়ং রাক্ষসস্য
ঊর্ধ্বং যয়ৌ দীপ্যমানা নিশায়াং; নক্ষত্রাণামন্তরাণ্যাবিশন্তী
154.58
যুদ্ধ্বা চিত্রৈর্বিবিধৈঃ শস্ত্রপূগৈ;র্দিব্যৈর্বীরো মানুষৈ রাক্ষসৈশ্চ
নদন্নাদান্বিবিধান্ভৈরবাংশ্চ; প্রাণানিষ্টাংস্ত্যাজিতঃ শক্রশক্ত্যা
154.59
ইদং চান্যচ্চিত্রমাশ্চর্যরূপং; চকারাসৌ কর্ম শত্রুক্ষয়ায়
তস্মিন্কালে শক্তিনির্ভিন্নমর্মা; বভৌ রাজন্মেঘশৈলপ্রকাশঃ
154.60
ততোঽন্তরিক্ষাদপতদ্গতাসুঃ; স রাক্ষসেন্দ্রো ভুবি ভিন্নদেহঃ
অবাক্শিরাঃ স্তব্ধগাত্রো বিজিহ্বো; ঘটোত্কচো মহদাস্থায় রূপম্
154.61
স তদ্রূপং ভৈরবং ভীমকর্মা; ভীমং কৃত্বা ভৈমসেনিঃ পপাত
হতোঽপ্যেবং তব সৈন্যেকদেশ;মপোথয়ত্কৌরবান্ভীষয়াণঃ
154.62
ততো মিশ্রাঃ প্রাণদন্সিংহনাদৈ;র্ভের্যঃ শঙ্খা মুরজাশ্চানকাশ্চ
দগ্ধাং মায়াং নিহতং রাক্ষসং চ; দৃষ্ট্বা হৃষ্টাঃ প্রাণদন্কৌরবেয়াঃ
154.63
ততঃ কর্ণঃ কুরুভিঃ পূজ্যমানো; যথা শক্রো বৃত্রবধে মরুদ্ভিঃ
অন্বারূঢস্তব পুত্রং রথস্থং; হৃষ্টশ্চাপি প্রাবিশত্স্বং স সৈন্যম্