UtshovChapter 154
154.1
संजय उवाच
निहत्यालायुधं रक्षः प्रहृष्टात्मा घटोत्कचः
ननाद विविधान्नादान्वाहिन्याः प्रमुखे स्थितः
Sanjaya uvacha
Nihatyalayudham rakshah prahrishtatma ghatotkachah
Nanada vividhannadanvahinyah pramukhe sthitah
154.2
तस्य तं तुमुलं शब्दं श्रुत्वा कुञ्जरकम्पनम्
तावकानां महाराज भयमासीत्सुदारुणम्
Tasya tam tumulam shabdam shrutva kunjarakampanam
Tavakanam maharaja bhayamasitsudarunam
154.3
अलायुधविषक्तं तु भैमसेनिं महाबलम्
दृष्ट्वा कर्णो महाबाहुः पाञ्चालान्समुपाद्रवत्
Alayudhavishaktam tu bhaimasenim mahabalam
Drishtva karno mahabahuh panchalansamupadravat
154.4
दशभिर्दशभिर्बाणैर्धृष्टद्युम्नशिखण्डिनौ
दृढैः पूर्णायतोत्सृष्टैर्बिभेद नतपर्वभिः
Dashabhirdashabhirbanairdhrishtadyumnashikhandinau
Dridhaih purnayatotsrishtairbibheda nataparvabhih
154.5
ततः परमनाराचैर्युधामन्यूत्तमौजसौ
सात्यकिं च रथोदारं कम्पयामास मार्गणैः
Tatah paramanarachairyudhamanyuttamaujasau
Satyakim cha rathodaram kampayamasa marganaih
154.6
तेषामभ्यस्यतां तत्र सर्वेषां सव्यदक्षिणम्
मण्डलान्येव चापानि व्यदृश्यन्त जनाधिप
Teshamabhyasyatam tatra sarvesham savyadakshinam
Mandalanyeva chapani vyadrishyanta janadhipa
154.7
तेषां ज्यातलनिर्घोषो रथनेमिस्वनश्च ह
मेघानामिव घर्मान्ते बभूव तुमुलो निशि
Tesham jyatalanirghosho rathanemisvanashcha ha
Meghanamiva gharmante babhuva tumulo nishi
154.8
ज्यानेमिघोषस्तनयित्नुमान्वै; धनुस्तडिन्मण्डलकेतुशृङ्गः
शरौघवर्षाकुलवृष्टिमांश्च; संग्राममेघः स बभूव राजन्
Jyanemighoshastanayitnumanvai; dhanustadinmandalaketushringah
Sharaughavarshakulavrishtimanshcha; sangramameghah sa babhuva rajan
154.9
तदुद्धतं शैल इवाप्रकम्प्यो; वर्षं महच्छैलसमानसारः
विध्वंसयामास रणे नरेन्द्र; वैकर्तनः शत्रुगणावमर्दी
Taduddhatam shaila ivaprakampyo; varsham mahachchhailasamanasarah
Vidhvansayamasa rane narendra; vaikartanah shatruganavamardi
154.10
ततोऽतुलैर्वज्रनिपातकल्पैः; शितैः शरैः काञ्चनचित्रपुङ्खैः
शत्रून्व्यपोहत्समरे महात्मा; वैकर्तनः पुत्रहिते रतस्ते
Tatotulairvajranipatakalpaih; shitaih sharaih kanchanachitrapunkhaih
Shatrunvyapohatsamare mahatma; vaikartanah putrahite rataste
154.11
संछिन्नभिन्नध्वजिनश्च केचि;त्केचिच्छरैरर्दितभिन्नदेहाः
केचिद्विसूता विहयाश्च केचि;द्वैकर्तनेनाशु कृता बभूवुः
Sanchhinnabhinnadhvajinashcha kechi;tkechichchharairarditabhinnadehah
Kechidvisuta vihayashcha kechi;dvaikartanenashu krita babhuvuh
154.12
अविन्दमानास्त्वथ शर्म संख्ये; यौधिष्ठिरं ते बलमन्वपद्यन्
तान्प्रेक्ष्य भग्नान्विमुखीकृतांश्च; घटोत्कचो रोषमतीव चक्रे
Avindamanastvatha sharma sankhye; yaudhishthiram te balamanvapadyan
Tanprekshya bhagnanvimukhikritanshcha; ghatotkacho roshamativa chakre
154.13
आस्थाय तं काञ्चनरत्नचित्रं; रथोत्तमं सिंह इवोन्ननाद
वैकर्तनं कर्णमुपेत्य चापि; विव्याध वज्रप्रतिमैः पृषत्कैः
Asthaya tam kanchanaratnachitram; rathottamam sinha ivonnanada
Vaikartanam karnamupetya chapi; vivyadha vajrapratimaih prishatkaih
154.14
तौ कर्णिनाराचशिलीमुखैश्च; नालीकदण्डैश्च सवत्सदन्तैः
वराहकर्णैः सविषाणशृङ्गैः; क्षुरप्रवर्षैश्च विनेदतुः खम्
Tau karninarachashilimukhaishcha; nalikadandaishcha savatsadantaih
Varahakarnaih savishanashringaih; kshurapravarshaishcha vinedatuh kham
154.15
तद्बाणधारावृतमन्तरिक्षं; तिर्यग्गताभिः समरे रराज
सुवर्णपुङ्खज्वलितप्रभाभि;र्विचित्रपुष्पाभिरिव स्रजाभिः
Tadbanadharavritamantariksham; tiryaggatabhih samare raraja
Suvarnapunkhajvalitaprabhabhi;rvichitrapushpabhiriva srajabhih
154.16
समं हि तावप्रतिमप्रभावा;वन्योन्यमाजघ्नतुरुत्तमास्त्रैः
तयोर्हि वीरोत्तमयोर्न कश्चि;द्ददर्श तस्मिन्समरे विशेषम्
Samam hi tavapratimaprabhava;vanyonyamajaghnaturuttamastraih
Tayorhi virottamayorna kashchi;ddadarsha tasminsamare vishesham
154.17
अतीव तच्चित्रमतीव रूपं; बभूव युद्धं रविभीमसून्वोः
समाकुलं शस्त्रनिपातघोरं; दिवीव राह्वंशुमतोः प्रतप्तम्
Ativa tachchitramativa rupam; babhuva yuddham ravibhimasunvoh
Samakulam shastranipataghoram; diviva rahvanshumatoh prataptam
154.18
घटोत्कचो यदा कर्णं न विशेषयते नृप
तदा प्रादुश्चकारोग्रमस्त्रमस्त्रविदां वरः
Ghatotkacho yada karnam na visheshayate nripa
Tada pradushchakarogramastramastravidam varah
154.19
तेनास्त्रेण हयान्पूर्वं हत्वा कर्णस्य राक्षसः
सारथिं चैव हैडिम्बः क्षिप्रमन्तरधीयत
Tenastrena hayanpurvam hatva karnasya rakshasah
Sarathim chaiva haidimbah kshipramantaradhiyata
154.20
धृतराष्ट्र उवाच
तथा ह्यन्तर्हिते तस्मिन्कूटयोधिनि राक्षसे
मामकैः प्रतिपन्नं यत्तन्ममाचक्ष्व संजय
Dhritarashtra uvacha
Tatha hyantarhite tasminkutayodhini rakshase
Mamakaih pratipannam yattanmamachakshva sanjaya
154.21
संजय उवाच
अन्तर्हितं राक्षसं तं विदित्वा; संप्राक्रोशन्कुरवः सर्व एव
कथं नायं राक्षसः कूटयोधी; हन्यात्कर्णं समरेऽदृश्यमानः
Sanjaya uvacha
Antarhitam rakshasam tam viditva; samprakroshankuravah sarva eva
Katham nayam rakshasah kutayodhi; hanyatkarnam samaredrishyamanah
154.22
ततः कर्णो लघुचित्रास्त्रयोधी; सर्वा दिशो व्यावृणोद्बाणजालैः
न वै किंचिद्व्यापतत्तत्र भूतं; तमोभूते सायकैरन्तरिक्षे
Tatah karno laghuchitrastrayodhi; sarva disho vyavrinodbanajalaih
Na vai kinchidvyapatattatra bhutam; tamobhute sayakairantarikshe
154.23
न चाददानो न च संदधानो; न चेषुधी स्पृशमानः कराग्रैः
अदृश्यद्वै लाघवात्सूतपुत्रः; सर्वं बाणैश्छादयानोऽन्तरिक्षम्
Na chadadano na cha sandadhano; na cheshudhi sprishamanah karagraih
Adrishyadvai laghavatsutaputrah; sarvam banaishchhadayanontariksham
154.24
ततो मायां विहितामन्तरिक्षे; घोरां भीमां दारुणां राक्षसेन
संपश्यामो लोहिताभ्रप्रकाशां; देदीप्यन्तीमग्निशिखामिवोग्राम्
Tato mayam vihitamantarikshe; ghoram bhimam darunam rakshasena
Sampashyamo lohitabhraprakasham; dedipyantimagnishikhamivogram
154.25
ततस्तस्या विद्युतः प्रादुरास;न्नुल्काश्चापि ज्वलिताः कौरवेन्द्र
घोषश्चान्यः प्रादुरासीत्सुघोरः; सहस्रशो नदतां दुन्दुभीनाम्
Tatastasya vidyutah pradurasa;nnulkashchapi jvalitah kauravendra
Ghoshashchanyah pradurasitsughorah; sahasrasho nadatam dundubhinam
154.26
ततः शराः प्रापतन्रुक्मपुङ्खाः; शक्त्यः प्रासा मुसलान्यायुधानि
परश्वधास्तैलधौताश्च खड्गाः; प्रदीप्ताग्राः पट्टिशास्तोमराश्च
Tatah sharah prapatanrukmapunkhah; shaktyah prasa musalanyayudhani
Parashvadhastailadhautashcha khadgah; pradiptagrah pattishastomarashcha
154.27
मयूखिनः परिघा लोहबद्धा; गदाश्चित्राः शितधाराश्च शूलाः
गुर्व्यो गदा हेमपट्टावनद्धाः; शतघ्न्यश्च प्रादुरासन्समन्तात्
Mayukhinah parigha lohabaddha; gadashchitrah shitadharashcha shulah
Gurvyo gada hemapattavanaddhah; shataghnyashcha pradurasansamantat
154.28
महाशिलाश्चापतंस्तत्र तत्र; सहस्रशः साशनयः सवज्राः
चक्राणि चानेकशतक्षुराणि; प्रादुर्बभूवुर्ज्वलनप्रभाणि
Mahashilashchapatanstatra tatra; sahasrashah sashanayah savajrah
Chakrani chanekashatakshurani; pradurbabhuvurjvalanaprabhani
154.29
तां शक्तिपाषाणपरश्वधानां; प्रासासिवज्राशनिमुद्गराणाम्
वृष्टिं विशालां ज्वलितां पतन्तीं; कर्णः शरौघैर्न शशाक हन्तुम्
Tam shaktipashanaparashvadhanam; prasasivajrashanimudgaranam
Vrishtim vishalam jvalitam patantim; karnah sharaughairna shashaka hantum
154.30
शराहतानां पततां हयानां; वज्राहतानां पततां गजानाम्
शिलाहतानां च महारथानां; महान्निनादः पततां बभूव
Sharahatanam patatam hayanam; vajrahatanam patatam gajanam
Shilahatanam cha maharathanam; mahanninadah patatam babhuva
154.31
सुभीमनानाविधशस्त्रपातै;र्घटोत्कचेनाभिहतं समन्तात्
दौर्योधनं तद्बलमार्तरूप;मावर्तमानं ददृशे भ्रमन्तम्
Subhimananavidhashastrapatai;rghatotkachenabhihatam samantat
Dauryodhanam tadbalamartarupa;mavartamanam dadrishe bhramantam
154.32
हाहाकृतं संपरिवर्तमानं; संलीयमानं च विषण्णरूपम्
ते त्वार्यभावात्पुरुषप्रवीराः; पराङ्मुखा न बभूवुस्तदानीम्
Hahakritam samparivartamanam; sanliyamanam cha vishannarupam
Te tvaryabhavatpurushapravirah; paranmukha na babhuvustadanim
154.33
तां राक्षसीं घोरतरां सुभीमां; वृष्टिं महाशस्त्रमयीं पतन्तीम्
दृष्ट्वा बलौघांश्च निपात्यमाना;न्महद्भयं तव पुत्रान्विवेश
Tam rakshasim ghorataram subhimam; vrishtim mahashastramayim patantim
Drishtva balaughanshcha nipatyamana;nmahadbhayam tava putranvivesha
154.34
शिवाश्च वैश्वानरदीप्तजिह्वाः; सुभीमनादाः शतशो नदन्त्यः
रक्षोगणान्नर्दतश्चाभिवीक्ष्य; नरेन्द्रयोधा व्यथिता बभूवुः
Shivashcha vaishvanaradiptajihvah; subhimanadah shatasho nadantyah
Rakshoganannardatashchabhivikshya; narendrayodha vyathita babhuvuh
154.35
ते दीप्तजिह्वाननतीक्ष्णदंष्ट्रा; विभीषणाः शैलनिकाशकायाः
नभोगताः शक्तिविषक्तहस्ता; मेघा व्यमुञ्चन्निव वृष्टिमार्गम्
Te diptajihvananatikshnadanshtra; vibhishanah shailanikashakayah
Nabhogatah shaktivishaktahasta; megha vyamunchanniva vrishtimargam
154.36
तैराहतास्ते शरशक्तिशूलै;र्गदाभिरुग्रैः परिघैश्च दीप्तैः
वज्रैः पिनाकैरशनिप्रहारै;श्चक्रैः शतघ्न्युन्मथिताश्च पेतुः
Tairahataste sharashaktishulai;rgadabhirugraih parighaishcha diptaih
Vajraih pinakairashanipraharai;shchakraih shataghnyunmathitashcha petuh
154.37
हुडा भुशुण्ड्योऽश्मगुडाः शतघ्न्यः; स्थूणाश्च कार्ष्णायसपट्टनद्धाः
अवाकिरंस्तव पुत्रस्य सैन्यं; तथा रौद्रं कश्मलं प्रादुरासीत्
Huda bhushundyoshmagudah shataghnyah; sthunashcha karshnayasapattanaddhah
Avakiranstava putrasya sainyam; tatha raudram kashmalam pradurasit
154.38
निष्कीर्णान्त्रा विहतैरुत्तमाङ्गैः; संभग्नाङ्गाः शेरते तत्र शूराः
भिन्ना हयाः कुञ्जराश्चावभग्नाः; संचूर्णिताश्चैव रथाः शिलाभिः
Nishkirnantra vihatairuttamangaih; sambhagnangah sherate tatra shurah
Bhinna hayah kunjarashchavabhagnah; sanchurnitashchaiva rathah shilabhih
154.39
एवं महच्छस्त्रवर्षं सृजन्त;स्ते यातुधाना भुवि घोररूपाः
मायाः सृष्टास्तत्र घटोत्कचेन; नामुञ्चन्वै याचमानं न भीतम्
Evam mahachchhastravarsham srijanta;ste yatudhana bhuvi ghorarupah
Mayah srishtastatra ghatotkachena; namunchanvai yachamanam na bhitam
154.40
तस्मिन्घोरे कुरुवीरावमर्दे; कालोत्सृष्टे क्षत्रियाणामभावे
ते वै भग्नाः सहसा व्यद्रवन्त; प्राक्रोशन्तः कौरवाः सर्व एव
Tasminghore kuruviravamarde; kalotsrishte kshatriyanamabhave
Te vai bhagnah sahasa vyadravanta; prakroshantah kauravah sarva eva
154.41
पलायध्वं कुरवो नैतदस्ति; सेन्द्रा देवा घ्नन्ति नः पाण्डवार्थे
तथा तेषां मज्जतां भारतानां; न स्म द्वीपस्तत्र कश्चिद्बभूव
Palayadhvam kuravo naitadasti; sendra deva ghnanti nah pandavarthe
Tatha tesham majjatam bharatanam; na sma dvipastatra kashchidbabhuva
154.42
तस्मिन्संक्रन्दे तुमुले वर्तमाने; सैन्ये भग्ने लीयमाने कुरूणाम्
अनीकानां प्रविभागेऽप्रकाशे; न ज्ञायन्ते कुरवो नेतरे वा
Tasminsankrande tumule vartamane; sainye bhagne liyamane kurunam
Anikanam pravibhageprakashe; na gyayante kuravo netare va
154.43
निर्मर्यादे विद्रवे घोररूपे; सर्वा दिशः प्रेक्षमाणाः स्म शून्याः
तां शस्त्रवृष्टिमुरसा गाहमानं; कर्णं चैकं तत्र राजन्नपश्यम्
Nirmaryade vidrave ghorarupe; sarva dishah prekshamanah sma shunyah
Tam shastravrishtimurasa gahamanam; karnam chaikam tatra rajannapashyam
154.44
ततो बाणैरावृणोदन्तरिक्षं; दिव्यां मायां योधयन्राक्षसस्य
ह्रीमान्कुर्वन्दुष्करमार्यकर्म; नैवामुह्यत्संयुगे सूतपुत्रः
Tato banairavrinodantariksham; divyam mayam yodhayanrakshasasya
Hrimankurvandushkaramaryakarma; naivamuhyatsanyuge sutaputrah
154.45
ततो भीताः समुदैक्षन्त कर्णं; राजन्सर्वे सैन्धवा बाह्लिकाश्च
असंमोहं पूजयन्तोऽस्य संख्ये; संपश्यन्तो विजयं राक्षसस्य
Tato bhitah samudaikshanta karnam; rajansarve saindhava bahlikashcha
Asammoham pujayantosya sankhye; sampashyanto vijayam rakshasasya
154.46
तेनोत्सृष्टा चक्रयुक्ता शतघ्नी; समं सर्वांश्चतुरोऽश्वाञ्जघान
ते जानुभिर्जगतीमन्वपद्य;न्गतासवो निर्दशनाक्षिजिह्वाः
Tenotsrishta chakrayukta shataghni; samam sarvanshchaturoshvanjaghana
Te janubhirjagatimanvapadya;ngatasavo nirdashanakshijihvah
154.47
ततो हताश्वादवरुह्य वाहा;दन्तर्मनाः कुरुषु प्राद्रवत्सु
दिव्ये चास्त्रे मायया वध्यमाने; नैवामुह्यच्चिन्तयन्प्राप्तकालम्
Tato hatashvadavaruhya vaha;dantarmanah kurushu pradravatsu
Divye chastre mayaya vadhyamane; naivamuhyachchintayanpraptakalam
154.48
ततोऽब्रुवन्कुरवः सर्व एव; कर्णं दृष्ट्वा घोररूपां च मायाम्
शक्त्या रक्षो जहि कर्णाद्य तूर्णं; नश्यन्त्येते कुरवो धार्तराष्ट्राः
Tatobruvankuravah sarva eva; karnam drishtva ghorarupam cha mayam
Shaktya raksho jahi karnadya turnam; nashyantyete kuravo dhartarashtrah
154.49
करिष्यतः किं च नो भीमपार्थौ; तपन्तमेनं जहि रक्षो निशीथे
यो नः संग्रामाद्घोररूपाद्विमुच्ये;त्स नः पार्थान्समरे योधयेत
Karishyatah kim cha no bhimaparthau; tapantamenam jahi raksho nishithe
Yo nah sangramadghorarupadvimuchye;tsa nah parthansamare yodhayeta
154.50
तस्मादेनं राक्षसं घोररूपं; जहि शक्त्या दत्तया वासवेन
मा कौरवाः सर्व एवेन्द्रकल्पा; रात्रीमुखे कर्ण नेशुः सयोधाः
Tasmadenam rakshasam ghorarupam; jahi shaktya dattaya vasavena
Ma kauravah sarva evendrakalpa; ratrimukhe karna neshuh sayodhah
154.51
स वध्यमानो रक्षसा वै निशीथे; दृष्ट्वा राजन्नश्यमानं बलं च
महच्च श्रुत्वा निनदं कौरवाणां; मतिं दध्रे शक्तिमोक्षाय कर्णः
Sa vadhyamano rakshasa vai nishithe; drishtva rajannashyamanam balam cha
Mahachcha shrutva ninadam kauravanam; matim dadhre shaktimokshaya karnah
154.52
स वै क्रुद्धः सिंह इवात्यमर्षी; नामर्षयत्प्रतिघातं रणे तम्
शक्तिं श्रेष्ठां वैजयन्तीमसह्यां; समाददे तस्य वधं चिकीर्षन्
Sa vai kruddhah sinha ivatyamarshi; namarshayatpratighatam rane tam
Shaktim shreshtham vaijayantimasahyam; samadade tasya vadham chikirshan
154.53
यासौ राजन्निहिता वर्षपूगा;न्वधायाजौ सत्कृता फल्गुनस्य
यां वै प्रादात्सूतपुत्राय शक्रः; शक्तिं श्रेष्ठां कुण्डलाभ्यां निमाय
Yasau rajannihita varshapuga;nvadhayajau satkrita phalgunasya
Yam vai pradatsutaputraya shakrah; shaktim shreshtham kundalabhyam nimaya
154.54
तां वै शक्तिं लेलिहानां प्रदीप्तां; पाशैर्युक्तामन्तकस्येव रात्रिम्
मृत्योः स्वसारं ज्वलितामिवोल्कां; वैकर्तनः प्राहिणोद्राक्षसाय
Tam vai shaktim lelihanam pradiptam; pashairyuktamantakasyeva ratrim
Mrityoh svasaram jvalitamivolkam; vaikartanah prahinodrakshasaya
154.55
तामुत्तमां परकायापहन्त्रीं; दृष्ट्वा सौतेर्बाहुसंस्थां ज्वलन्तीम्
भीतं रक्षो विप्रदुद्राव राज;न्कृत्वात्मानं विन्ध्यपादप्रमाणम्
Tamuttamam parakayapahantrim; drishtva sauterbahusanstham jvalantim
Bhitam raksho vipradudrava raja;nkritvatmanam vindhyapadapramanam
154.56
दृष्ट्वा शक्तिं कर्णबाह्वन्तरस्थां; नेदुर्भूतान्यन्तरिक्षे नरेन्द्र
ववुर्वातास्तुमुलाश्चापि राज;न्सनिर्घाता चाशनिर्गां जगाम
Drishtva shaktim karnabahvantarastham; nedurbhutanyantarikshe narendra
Vavurvatastumulashchapi raja;nsanirghata chashanirgam jagama
154.57
सा तां मायां भस्म कृत्वा ज्वलन्ती; भित्त्वा गाढं हृदयं राक्षसस्य
ऊर्ध्वं ययौ दीप्यमाना निशायां; नक्षत्राणामन्तराण्याविशन्ती
Sa tam mayam bhasma kritva jvalanti; bhittva gadham hridayam rakshasasya
Urdhvam yayau dipyamana nishayam; nakshatranamantaranyavishanti
154.58
युद्ध्वा चित्रैर्विविधैः शस्त्रपूगै;र्दिव्यैर्वीरो मानुषै राक्षसैश्च
नदन्नादान्विविधान्भैरवांश्च; प्राणानिष्टांस्त्याजितः शक्रशक्त्या
Yuddhva chitrairvividhaih shastrapugai;rdivyairviro manushai rakshasaishcha
Nadannadanvividhanbhairavanshcha; prananishtanstyajitah shakrashaktya
154.59
इदं चान्यच्चित्रमाश्चर्यरूपं; चकारासौ कर्म शत्रुक्षयाय
तस्मिन्काले शक्तिनिर्भिन्नमर्मा; बभौ राजन्मेघशैलप्रकाशः
Idam chanyachchitramashcharyarupam; chakarasau karma shatrukshayaya
Tasminkale shaktinirbhinnamarma; babhau rajanmeghashailaprakashah
154.60
ततोऽन्तरिक्षादपतद्गतासुः; स राक्षसेन्द्रो भुवि भिन्नदेहः
अवाक्शिराः स्तब्धगात्रो विजिह्वो; घटोत्कचो महदास्थाय रूपम्
Tatontarikshadapatadgatasuh; sa rakshasendro bhuvi bhinnadehah
Avakshirah stabdhagatro vijihvo; ghatotkacho mahadasthaya rupam
154.61
स तद्रूपं भैरवं भीमकर्मा; भीमं कृत्वा भैमसेनिः पपात
हतोऽप्येवं तव सैन्येकदेश;मपोथयत्कौरवान्भीषयाणः
Sa tadrupam bhairavam bhimakarma; bhimam kritva bhaimasenih papata
Hatopyevam tava sainyekadesha;mapothayatkauravanbhishayanah
154.62
ततो मिश्राः प्राणदन्सिंहनादै;र्भेर्यः शङ्खा मुरजाश्चानकाश्च
दग्धां मायां निहतं राक्षसं च; दृष्ट्वा हृष्टाः प्राणदन्कौरवेयाः
Tato mishrah pranadansinhanadai;rbheryah shankha murajashchanakashcha
Dagdham mayam nihatam rakshasam cha; drishtva hrishtah pranadankauraveyah
154.63
ततः कर्णः कुरुभिः पूज्यमानो; यथा शक्रो वृत्रवधे मरुद्भिः
अन्वारूढस्तव पुत्रं रथस्थं; हृष्टश्चापि प्राविशत्स्वं स सैन्यम्
Tatah karnah kurubhih pujyamano; yatha shakro vritravadhe marudbhih
Anvarudhastava putram rathastham; hrishtashchapi pravishatsvam sa sainyam