Utshovঅধ্যায় 135
135.1
সংজয় উবাচ
দুর্যোধনেনৈবমুক্তো দ্রৌণিরাহবদুর্মদঃ
প্রত্যুবাচ মহাবাহো যথা বদসি কৌরব
135.2
প্রিয়া হি পাণ্ডবা নিত্যং মম চাপি পিতুশ্চ মে
তথৈবাবাং প্রিয়ৌ তেষাং ন তু যুদ্ধে কুরূদ্বহ
শক্তিতস্তাত যুধ্যামস্ত্যক্ত্বা প্রাণানভীতবৎ
135.3
অহং কর্ণশ্চ শল্যশ্চ কৃপো হার্দিক্য এব চ
নিমেষাত্পাণ্ডবীং সেনাং ক্ষপয়েম নৃপোত্তম
135.4
তে চাপি কৌরবীং সেনাং নিমেষার্ধাত্কুরূদ্বহ
ক্ষপয়েয়ুর্মহাবাহো ন স্যাম যদি সংয়ুগে
135.5
যুধ্যতাং পাণ্ডবাঞ্শক্ত্যা তেষাং চাস্মান্যুয়ুত্সতাম্
তেজস্তু তেজ আসাদ্য প্রশমং যাতি ভারত
135.6
অশক্যা তরসা জেতুং পাণ্ডবানামনীকিনী
জীবত্সু পাণ্ডুপুত্রেষু তদ্ধি সত্যং ব্রবীমি তে
135.7
আত্মার্থং যুধ্যমানাস্তে সমর্থাঃ পাণ্ডুনন্দনাঃ
কিমর্থং তব সৈন্যানি ন হনিষ্যন্তি ভারত
135.8
ত্বং হি লুব্ধতমো রাজন্নিকৃতিজ্ঞশ্চ কৌরব
সর্বাতিশঙ্কী মানী চ ততোঽস্মানতিশঙ্কসে
135.9
অহং তু যত্নমাস্থায় ত্বদর্থে ত্যক্তজীবিতঃ
এষ গচ্ছামি সংগ্রামং ত্বত্কৃতে কুরুনন্দন
135.10
যোত্স্যেঽহং শত্রুভিঃ সার্ধং জেষ্যামি চ বরান্বরান্
পাঞ্চালৈঃ সহ যোত্স্যামি সোমকৈঃ কেকয়ৈস্তথা
পাণ্ডবেয়ৈশ্চ সংগ্রামে ত্বত্প্রিয়ার্থমরিংদম
135.11
অদ্য মদ্বাণনির্দগ্ধাঃ পাঞ্চালাঃ সোমকাস্তথা
সিংহেনেবার্দিতা গাবো বিদ্রবিষ্যন্তি সর্বতঃ
135.12
অদ্য ধর্মসুতো রাজা দৃষ্ট্বা মম পরাক্রমম্
অশ্বত্থামময়ং লোকং মংস্যতে সহ সোমকৈঃ
135.13
আগমিষ্যতি নির্বেদং ধর্মপুত্রো যুধিষ্ঠিরঃ
দৃষ্ট্বা বিনিহতান্সংখ্যে পাঞ্চালান্সোমকৈঃ সহ
135.14
যে মাং যুদ্ধেঽভিয়োত্স্যন্তি তান্হনিষ্যামি ভারত
ন হি তে বীর মুচ্যেরন্মদ্বাহ্বন্তরমাগতাঃ
135.15
এবমুক্ত্বা মহাবাহুঃ পুত্রং দুর্যোধনং তব
অভ্যবর্তত যুদ্ধায় দ্রাবয়ন্সর্বধন্বিনঃ
চিকীর্ষুস্তব পুত্রাণাং প্রিয়ং প্রাণভৃতাং বরঃ
135.16
ততোঽব্রবীত্সকৈকেয়ান্পাঞ্চালান্গৌতমীসুতঃ
প্রহরধ্বমিতঃ সর্বে মম গাত্রে মহারথাঃ
স্থিরীভূতাশ্চ যুধ্যধ্বং দর্শয়ন্তোঽস্ত্রলাঘবম্
135.17
এবমুক্তাস্তু তে সর্বে শস্ত্রবৃষ্টিমপাতয়ন্
দ্রৌণিং প্রতি মহারাজ জলং জলধরা ইব
135.18
তান্নিহত্য শরান্দ্রৌণির্দশ বীরানপোথয়ৎ
প্রমুখে পাণ্ডুপুত্রাণাং ধৃষ্টদ্যুম্নস্য চাভিভো
135.19
তে হন্যমানাঃ সমরে পাঞ্চালাঃ সৃঞ্জয়াস্তথা
পরিত্যজ্য রণে দ্রৌণিং ব্যদ্রবন্ত দিশো দশ
135.20
তান্দৃষ্ট্বা দ্রবতঃ শূরান্পাঞ্চালান্সহসোমকান্
ধৃষ্টদ্যুম্নো মহারাজ দ্রৌণিমভ্যদ্রবদ্যুধি
135.21
ততঃ কাঞ্চনচিত্রাণাং সজলাম্বুদনাদিনাম্
বৃতঃ শতেন শূরাণাং রথানামনিবর্তিনাম্
135.22
পুত্রঃ পাঞ্চালরাজস্য ধৃষ্টদ্যুম্নো মহারথঃ
দ্রৌণিমিত্যব্রবীদ্বাক্যং দৃষ্ট্বা যোধান্নিপাতিতান্
135.23
আচার্যপুত্র দুর্বুদ্ধে কিমন্যৈর্নিহতৈস্তব
সমাগচ্ছ ময়া সার্ধং যদি শূরোঽসি সংয়ুগে
অহং ত্বাং নিহনিষ্যামি তিষ্ঠেদানীং মমাগ্রতঃ
135.24
ততস্তমাচার্যসুতং ধৃষ্টদ্যুম্নঃ প্রতাপবান্
মর্মভিদ্ভিঃ শরৈস্তীক্ষ্ণৈর্জঘান ভরতর্ষভ
135.25
তে তু পঙ্ক্তীকৃতা দ্রৌণিং শরা বিবিশুরাশুগাঃ
রুক্মপুঙ্খাঃ প্রসন্নাগ্রাঃ সর্বকায়াবদারণাঃ
মধ্বর্থিন ইবোদ্দামা ভ্রমরাঃ পুষ্পিতং দ্রুমম্
135.26
সোঽতিবিদ্ধো ভৃশং ক্রুদ্ধঃ পদাক্রান্ত ইবোরগঃ
মানী দ্রৌণিরসংভ্রান্তো বাণপাণিরভাষত
135.27
ধৃষ্টদ্যুম্ন স্থিরো ভূত্বা মুহূর্তং প্রতিপালয়
যাবত্ত্বাং নিশিতৈর্বাণৈঃ প্রেষয়ামি যমক্ষয়ম্
135.28
দ্রৌণিরেবমথাভাষ্য পার্ষতং পরবীরহা
ছাদয়ামাস বাণৌঘৈঃ সমন্তাল্লঘুহস্তবৎ
135.29
স ছাদ্যমানঃ সমরে দ্রৌণিনা যুদ্ধদুর্মদঃ
দ্রৌণিং পাঞ্চালতনয়ো বাগ্ভিরাতর্জয়ত্তদা
135.30
ন জানীষে প্রতিজ্ঞাং মে বিপ্রোত্পত্তিং তথৈব চ
দ্রোণং হত্বা কিল ময়া হন্তব্যস্ত্বং সুদুর্মতে
ততস্ত্বাহং ন হন্ম্যদ্য দ্রোণে জীবতি সংয়ুগে
135.31
ইমাং তু রজনীং প্রাপ্তামপ্রভাতাং সুদুর্মতে
নিহত্য পিতরং তেঽদ্য ততস্ত্বামপি সংয়ুগে
নেষ্যামি মৃত্যুলোকায়েত্যেবং মে মনসি স্থিতম্
135.32
যস্তে পার্থেষু বিদ্বেষো যা ভক্তিঃ কৌরবেষু চ
তাং দর্শয় স্থিরো ভূত্বা ন মে জীবন্বিমোক্ষ্যসে
135.33
যো হি ব্রাহ্মণ্যমুত্সৃজ্য ক্ষত্রধর্মরতো দ্বিজঃ
স বধ্যঃ সর্বলোকস্য যথা ত্বং পুরুষাধম
135.34
ইত্যুক্তঃ পরুষং বাক্যং পার্ষতেন দ্বিজোত্তমঃ
ক্রোধমাহারয়ত্তীব্রং তিষ্ঠ তিষ্ঠেতি চাব্রবীৎ
135.35
নির্দহন্নিব চক্ষুর্ভ্যাং পার্ষতং সোঽভ্যবৈক্ষত
ছাদয়ামাস চ শরৈর্নিঃশ্বসন্পন্নগো যথা
135.36
স ছাদ্যমানঃ সমরে দ্রৌণিনা রাজসত্তম
সর্বপাঞ্চালসেনাভিঃ সংবৃতো রথসত্তমঃ
135.37
নাকম্পত মহাবাহুঃ স্বধৈর্যং সমুপাশ্রিতঃ
সায়কাংশ্চৈব বিবিধানশ্বত্থাম্নি মুমোচ হ
135.38
তৌ পুনঃ সংন্যবর্তেতাং প্রাণদ্যূতপরে রণে
নিবারয়ন্তৌ বাণৌঘৈঃ পরস্পরমমর্ষিণৌ
উত্সৃজন্তৌ মহেষ্বাসৌ শরবৃষ্টীঃ সমন্ততঃ
135.39
দ্রৌণিপার্ষতয়োর্যুদ্ধং ঘোররূপং ভয়ানকম্
দৃষ্ট্বা সংপূজয়ামাসুঃ সিদ্ধচারণবাতিকাঃ
135.40
শরৌঘৈঃ পূরয়ন্তৌ তাবাকাশং প্রদিশস্তথা
অলক্ষ্যৌ সময়ুধ্যেতাং মহত্কৃত্বা শরৈস্তমঃ
135.41
নৃত্যমানাবিব রণে মণ্ডলীকৃতকার্মুকৌ
পরস্পরবধে যত্তৌ পরস্পরজয়ৈষিণৌ
135.42
অয়ুধ্যেতাং মহাবাহূ চিত্রং লঘু চ সুষ্ঠু চ
সংপূজ্যমানৌ সমরে যোধমুখ্যৈঃ সহস্রশঃ
135.43
তৌ প্রয়ুদ্ধৌ রণে দৃষ্ট্বা বনে বন্যৌ গজাবিব
উভয়োঃ সেনয়োর্হর্ষস্তুমুলঃ সমপদ্যত
135.44
সিংহনাদরবাশ্চাসন্দধ্মুঃ শঙ্খাংশ্চ মারিষ
বাদিত্রাণ্যভ্যবাদ্যন্ত শতশোঽথ সহস্রশঃ
135.45
তস্মিংস্তু তুমুলে যুদ্ধে ভীরূণাং ভয়বর্ধনে
মুহূর্তমিব তদ্যুদ্ধং সমরূপং তদাভবৎ
135.46
ততো দ্রৌণির্মহারাজ পার্ষতস্য মহাত্মনঃ
ধ্বজং ধনুস্তথা ছত্রমুভৌ চ পার্ষ্ণিসারথী
সূতমশ্বাংশ্চ চতুরো নিহত্যাভ্যদ্রবদ্রণে
135.47
পাঞ্চালাংশ্চৈব তান্সর্বান্বাণৈঃ সংনতপর্বভিঃ
ব্যদ্রাবয়দমেয়াত্মা শতশোঽথ সহস্রশঃ
135.48
ততঃ প্রবিব্যথে সেনা পাণ্ডবী ভরতর্ষভ
দৃষ্ট্বা দ্রৌণের্মহত্কর্ম বাসবস্যেব সংয়ুগে
135.49
শতেন চ শতং হত্বা পাঞ্চালানাং মহারথঃ
ত্রিভিশ্চ নিশিতৈর্বাণৈর্হত্বা ত্রীন্বৈ মহারথান্
135.50
দ্রৌণির্দ্রুপদপুত্রস্য ফল্গুনস্য চ পশ্যতঃ
নাশয়ামাস পাঞ্চালান্ভূয়িষ্ঠং যে ব্যবস্থিতাঃ
135.51
তে বধ্যমানাঃ পাঞ্চালাঃ সমরে সহ সৃঞ্জয়ৈঃ
অগচ্ছন্দ্রৌণিমুত্সৃজ্য বিপ্রকীর্ণরথধ্বজাঃ
135.52
স জিত্বা সমরে শত্রূন্দ্রোণপুত্রো মহারথঃ
ননাদ সুমহানাদং তপান্তে জলদো যথা
135.53
স নিহত্য বহূঞ্শূরানশ্বত্থামা ব্যরোচত
যুগান্তে সর্বভূতানি ভস্ম কৃত্বেব পাবকঃ
135.54
সংপূজ্যমানো যুধি কৌরবেয়ৈ;র্বিজিত্য সংখ্যেঽরিগণান্সহস্রশঃ
ব্যরোচত দ্রোণসুতঃ প্রতাপবা;ন্যথা সুরেন্দ্রোঽরিগণান্নিহত্য