Utshovঅধ্যায় 134
134.1
সংজয় উবাচ
তথা পরুষিতং দৃষ্ট্বা সূতপুত্রেণ মাতুলম্
খড্গমুদ্যম্য বেগেন দ্রৌণিরভ্যপতদ্দ্রুতম্
134.2
অশ্বত্থামোবাচ
কর্ণ পশ্য সুদুর্বুদ্ধে তিষ্ঠেদানীং নরাধম
এষ তেঽদ্য শিরঃ কায়াদুদ্ধরামি সুদুর্মতে
134.3
সংজয় উবাচ
তমুত্পতন্তং বেগেন রাজা দুর্যোধনঃ স্বয়ম্
ন্যবারয়ন্মহারাজ কৃপশ্চ দ্বিপদাং বরঃ
134.4
কর্ণ উবাচ
শূরোঽয়ং সমরশ্লাঘী দুর্মতিশ্চ দ্বিজাধমঃ
আসাদয়তু মদ্বীর্যং মুঞ্চেমং কুরুসত্তম
134.5
অশ্বত্থামোবাচ
তবৈতত্ক্ষম্যতেঽস্মাভিঃ সূতাত্মজ সুদুর্মতে
দর্পমুত্সিক্তমেতত্তে ফল্গুনো নাশয়িষ্যতি
134.6
দুর্যোধন উবাচ
অশ্বত্থামন্প্রসীদস্ব ক্ষন্তুমর্হসি মানদ
কোপঃ খলু ন কর্তব্যঃ সূতপুত্রে কথংচন
134.7
ত্বয়ি কর্ণে কৃপে দ্রোণে মদ্ররাজেঽথ সৌবলে
মহত্কার্যং সমায়ত্তং প্রসীদ দ্বিজসত্তম
134.8
এতে হ্যভিমুখাঃ সর্বে রাধেয়েন যুয়ুত্সবঃ
আয়ান্তি পাণ্ডবা ব্রহ্মন্নাহ্বয়ন্তঃ সমন্ততঃ
134.9
সংজয় উবাচ
কর্ণোঽপি রথিনাং শ্রেষ্ঠশ্চাপমুদ্যম্য বীর্যবান্
কৌরবাগ্র্যৈঃ পরিবৃতঃ শক্রো দেবগণৈরিব
পর্যতিষ্ঠত তেজস্বী স্ববাহুবলমাশ্রিতঃ
134.10
ততঃ প্রববৃতে যুদ্ধং কর্ণস্য সহ পাণ্ডবৈঃ
সংরব্ধস্য মহারাজ সিংহনাদবিনাদিতম্
134.11
ততস্তে পাণ্ডবা রাজন্পাঞ্চালাশ্চ যশস্বিনঃ
দৃষ্ট্বা কর্ণং মহাবাহুমুচ্চৈঃ শব্দমথানদন্
134.12
অয়ং কর্ণঃ কুতঃ কর্ণস্তিষ্ঠ কর্ণ মহারণে
যুধ্যস্ব সহিতোঽস্মাভির্দুরাত্মন্পুরুষাধম
134.13
অন্যে তু দৃষ্ট্বা রাধেয়ং ক্রোধরক্তেক্ষণাব্রুবন্
হন্যতাময়মুত্সিক্তঃ সূতপুত্রোঽল্পচেতনঃ
134.14
সর্বৈঃ পার্থিবশার্দূলৈর্নানেনার্থোঽস্তি জীবতা
অত্যন্তবৈরী পার্থানাং সততং পাপপূরুষঃ
134.15
এষ মূলং হ্যনর্থানাং দুর্যোধনমতে স্থিতঃ
হতৈনমিতি জল্পন্তঃ ক্ষত্রিয়াঃ সমুপাদ্রবন্
134.16
মহতা শরবর্ষেণ ছাদয়ন্তো মহারথাঃ
বধার্থং সূতপুত্রস্য পাণ্ডবেয়েন চোদিতাঃ
134.17
তাংস্তু সর্বাংস্তথা দৃষ্ট্বা ধাবমানান্মহারথান্
ন বিব্যথে সূতপুত্রো ন চ ত্রাসমগচ্ছত
134.18
দৃষ্ট্বা নগরকল্পং তমুদ্ধূতং সৈন্যসাগরম্
পিপ্রীষুস্তব পুত্রাণাং সংগ্রামেষ্বপরাজিতঃ
134.19
সায়কৌঘেন বলবান্ক্ষিপ্রকারী মহাবলঃ
বারয়ামাস তত্সৈন্যং সমন্তাদ্ভরতর্ষভ
134.20
ততস্তু শরবর্ষেণ পার্থিবাস্তমবারয়ন্
ধনূংষি তে বিধুন্বানাঃ শতশোঽথ সহস্রশঃ
অয়োধয়ন্ত রাধেয়ং শক্রং দৈত্যগণা ইব
134.21
শরবর্ষং তু তত্কর্ণঃ পার্থিবৈঃ সমুদীরিতম্
শরবর্ষেণ মহতা সমন্তাদ্ব্যকিরত্প্রভো
134.22
তদ্যুদ্ধমভবত্তেষাং কৃতপ্রতিকৃতৈষিণাম্
যথা দেবাসুরে যুদ্ধে শক্রস্য সহ দানবৈঃ
134.23
তত্রাদ্ভুতমপশ্যাম সূতপুত্রস্য লাঘবম্
যদেনং সমরে যত্তা নাপ্নুবন্ত পরে যুধি
134.24
নিবার্য চ শরৌঘাংস্তান্পার্থিবানাং মহারথঃ
যুগেষ্বীষাসু ছত্রেষু ধ্বজেষু চ হয়েষু চ
আত্মনামাঙ্কিতান্বাণান্রাধেয়ঃ প্রাহিণোচ্ছিতান্
134.25
ততস্তে ব্যাকুলীভূতা রাজানঃ কর্ণপীডিতাঃ
বভ্রমুস্তত্র তত্রৈব গাবঃ শীতার্দিতা ইব
134.26
হয়ানাং বধ্যমানানাং গজানাং রথিনাং তথা
তত্র তত্রাভ্যবেক্ষামঃ সংঘান্কর্ণেন পাতিতান্
134.27
শিরোভিঃ পতিতৈ রাজন্বাহুভিশ্চ সমন্ততঃ
আস্তীর্ণা বসুধা সর্বা শূরাণামনিবর্তিনাম্
134.28
হতৈশ্চ হন্যমানৈশ্চ নিষ্টনদ্ভিশ্চ সর্বশঃ
বভূবায়োধনং রৌদ্রং বৈবস্বতপুরোপমম্
134.29
ততো দুর্যোধনো রাজা দৃষ্ট্বা কর্ণস্য বিক্রমম্
অশ্বত্থামানমাসাদ্য তদা বাক্যমুবাচ হ
134.30
যুধ্যতেঽসৌ রণে কর্ণো দংশিতঃ সর্বপার্থিবৈঃ
পশ্যৈতাং দ্রবতীং সেনাং কর্ণসায়কপীডিতাম্
কার্ত্তিকেয়েন বিধ্বস্তামাসুরীং পৃতনামিব
134.31
দৃষ্ট্বৈতাং নির্জিতাং সেনাং রণে কর্ণেন ধীমতা
অভিয়াত্যেষ বীভত্সুঃ সূতপুত্রজিঘাংসয়া
134.32
তদ্যথা পশ্যমানানাং সূতপুত্রং মহারথম্
ন হন্যাত্পাণ্ডবঃ সংখ্যে তথা নীতির্বিধীয়তাম্
134.33
ততো দ্রৌণিঃ কৃপঃ শল্যো হার্দিক্যশ্চ মহারথঃ
প্রত্যুদ্যয়ুস্তদা পার্থং সূতপুত্রপরীপ্সয়া
134.34
আয়ান্তং দৃশ্য কৌন্তেয়ং বৃত্রং দেবচমূমিব
প্রত্যুদ্যয়ৌ তদা কর্ণো যথা শক্রঃ প্রতাপবান্
134.35
ধৃতরাষ্ট্র উবাচ
সংরব্ধং ফল্গুনং দৃষ্ট্বা কালান্তকয়মোপমম্
কর্ণো বৈকর্তনঃ সূত প্রত্যপদ্যত্কিমুত্তরম্
134.36
স হ্যস্পর্ধত পার্থেন নিত্যমেব মহারথঃ
আশংসতে চ বীভত্সুং যুদ্ধে জেতুং সুদারুণে
134.37
স তু তং সহসা প্রাপ্তং নিত্যমত্যন্তবৈরিণম্
কর্ণো বৈকর্তনঃ সূত কিমুত্তরমপদ্যত
134.38
সংজয় উবাচ
আয়ান্তং পাণ্ডবং দৃষ্ট্বা গজঃ প্রতিগজং যথা
অসংভ্রান্ততরঃ কর্ণঃ প্রত্যুদীয়াদ্ধনংজয়ম্
134.39
তমাপতন্তং বেগেন বৈকর্তনমজিহ্মগৈঃ
বারয়ামাস তেজস্বী পাণ্ডবঃ শত্রুতাপনঃ
134.40
তং কর্ণঃ শরজালেন ছাদয়ামাস মারিষ
বিব্যাধ চ সুসংক্রুদ্ধঃ শরৈস্ত্রিভিরজিহ্মগৈঃ
134.41
তস্য তল্লাঘবং পার্থো নামৃষ্যত মহাবলঃ
তস্মৈ বাণাঞ্শিলাধৌতান্প্রসন্নাগ্রানজিহ্মগান্
134.42
প্রাহিণোত্সূতপুত্রায় ত্রিংশতং শত্রুতাপনঃ
বিব্যাধ চৈনং সংরব্ধো বাণেনৈকেন বীর্যবান্
134.43
সব্যে ভুজাগ্রে বলবান্নারাচেন হসন্নিব
তস্য বিদ্ধস্য বেগেন করাচ্চাপং পপাত হ
134.44
পুনরাদায় তচ্চাপং নিমেষার্ধান্মহাবলঃ
ছাদয়ামাস বাণৌঘৈঃ ফল্গুনং কৃতহস্তবৎ
134.45
শরবৃষ্টিং তু তাং মুক্তাং সূতপুত্রেণ ভারত
ব্যধমচ্ছরবর্ষেণ স্ময়ন্নিব ধনংজয়ঃ
134.46
তৌ পরস্পরমাসাদ্য শরবর্ষেণ পার্থিব
ছাদয়েতাং মহেষ্বাসৌ কৃতপ্রতিকৃতৈষিণৌ
134.47
তদদ্ভুতমভূদ্যুদ্ধং কর্ণপাণ্ডবয়োর্মৃধে
ক্রুদ্ধয়োর্বাশিতাহেতোর্বন্যয়োর্গজয়োরিব
134.48
ততঃ পার্থো মহেষ্বাসো দৃষ্ট্বা কর্ণস্য বিক্রমম্
মুষ্টিদেশে ধনুস্তস্য চিচ্ছেদ ত্বরয়ান্বিতঃ
134.49
অশ্বাংশ্চ চতুরো ভল্লৈরনয়দ্যমসাদনম্
সারথেশ্চ শিরঃ কায়াদহরচ্ছত্রুতাপনঃ
134.50
অথৈনং ছিন্নধন্বানং হতাশ্বং হতসারথিম্
বিব্যাধ সায়কৈঃ পার্থশ্চতুর্ভিঃ পাণ্ডুনন্দনঃ
134.51
হতাশ্বাত্তু রথাত্তূর্ণমবপ্লুত্য নরর্ষভঃ
আরুরোহ রথং তূর্ণং কৃপস্য শরপীডিতঃ
134.52
রাধেয়ং নির্জিতং দৃষ্ট্বা তাবকা ভরতর্ষভ
ধনংজয়শরৈর্নুন্নাঃ প্রাদ্রবন্ত দিশো দশ
134.53
দ্রবতস্তান্সমালোক্য রাজা দুর্যোধনো নৃপ
নিবর্তয়ামাস তদা বাক্যং চেদমুবাচ হ
134.54
অলং দ্রুতেন বঃ শূরাস্তিষ্ঠধ্বং ক্ষত্রিয়র্ষভাঃ
এষ পার্থবধায়াহং স্বয়ং গচ্ছামি সংয়ুগে
অহং পার্থান্হনিষ্যামি সপাঞ্চালান্সসোমকান্
134.55
অদ্য মে যুধ্যমানস্য সহ গাণ্ডীবধন্বনা
দ্রক্ষ্যন্তি বিক্রমং পার্থাঃ কালস্যেব যুগক্ষয়ে
134.56
অদ্য মদ্বাণজালানি বিমুক্তানি সহস্রশঃ
দ্রক্ষ্যন্তি সমরে যোধাঃ শলভানামিবায়তীঃ
134.57
অদ্য বাণময়ং বর্ষং সৃজতো মম ধন্বিনঃ
জীমূতস্যেব ঘর্মান্তে দ্রক্ষ্যন্তি যুধি সৈনিকাঃ
134.58
জেষ্যাম্যদ্য রণে পার্থং সায়কৈর্নতপর্বভিঃ
তিষ্ঠধ্বং সমরে শূরা ভয়ং ত্যজত ফল্গুনাৎ
134.59
ন হি মদ্বীর্যমাসাদ্য ফল্গুনঃ প্রসহিষ্যতি
যথা বেলাং সমাসাদ্য সাগরো মকরালয়ঃ
134.60
ইত্যুক্ত্বা প্রয়য়ৌ রাজা সৈন্যেন মহতা বৃতঃ
ফল্গুনং প্রতি দুর্ধর্ষঃ ক্রোধসংরক্তলোচনঃ
134.61
তং প্রয়ান্তং মহাবাহুং দৃষ্ট্বা শারদ্বতস্তদা
অশ্বত্থামানমাসাদ্য বাক্যমেতদুবাচ হ
134.62
এষ রাজা মহাবাহুরমর্ষী ক্রোধমূর্ছিতঃ
পতংগবৃত্তিমাস্থায় ফল্গুনং যোদ্ধুমিচ্ছতি
134.63
যাবন্নঃ পশ্যমানানাং প্রাণান্পার্থেন সংগতঃ
ন জহ্যাত্পুরুষব্যাঘ্রস্তাবদ্বারয় কৌরবম্
134.64
যাবত্ফল্গুনবাণানাং গোচরং নাধিগচ্ছতি
কৌরবঃ পার্থিবো বীরস্তাবদ্বারয় তং দ্রুতম্
134.65
যাবত্পার্থশরৈর্ঘোরৈর্নির্মুক্তোরগসংনিভৈঃ
ন ভস্মীক্রিয়তে রাজা তাবদ্যুদ্ধান্নিবার্যতাম্
134.66
অয়ুক্তমিব পশ্যামি তিষ্ঠত্স্বস্মাসু মানদ
স্বয়ং যুদ্ধায় যদ্রাজা পার্থং যাত্যসহায়বান্
134.67
দুর্লভং জীবিতং মন্যে কৌরব্যস্য কিরীটিনা
যুধ্যমানস্য পার্থেন শার্দূলেনেব হস্তিনঃ
134.68
মাতুলেনৈবমুক্তস্তু দ্রৌণিঃ শস্ত্রভৃতাং বরঃ
দুর্যোধনমিদং বাক্যং ত্বরিতং সমভাষত
134.69
ময়ি জীবতি গান্ধারে ন যুদ্ধং গন্তুমর্হসি
মামনাদৃত্য কৌরব্য তব নিত্যং হিতৈষিণম্
134.70
ন হি তে সংভ্রমঃ কার্যঃ পার্থস্য বিজয়ং প্রতি
অহমাবারয়িষ্যামি পার্থং তিষ্ঠ সুয়োধন
134.71
দুর্যোধন উবাচ
আচার্যঃ পাণ্ডুপুত্রান্বৈ পুত্রবত্পরিরক্ষতি
ত্বমপ্যুপেক্ষাং কুরুষে তেষু নিত্যং দ্বিজোত্তম
134.72
মম বা মন্দভাগ্যত্বান্মন্দস্তে বিক্রমো যুধি
ধর্মরাজপ্রিয়ার্থং বা দ্রৌপদ্যা বা ন বিদ্ম তৎ
134.73
ধিগস্তু মম লুব্ধস্য যত্কৃতে সর্ববান্ধবাঃ
সুখার্হাঃ পরমং দুঃখং প্রাপ্নুবন্ত্যপরাজিতাঃ
134.74
কো হি শস্ত্রভৃতাং মুখ্যো মহেশ্বরসমো যুধি
শত্রূন্ন ক্ষপয়েচ্ছক্তো যো ন স্যাদ্গৌতমীসুতঃ
134.75
অশ্বত্থামন্প্রসীদস্ব নাশয়ৈতান্মমাহিতান্
তবাস্ত্রগোচরে শক্তাঃ স্থাতুং দেবাপি নানঘ
134.76
পাঞ্চালান্সোমকাংশ্চৈব জহি দ্রৌণে সহানুগান্
বয়ং শেষান্হনিষ্যামস্ত্বয়ৈব পরিরক্ষিতাঃ
134.77
এতে হি সোমকা বিপ্র পাঞ্চালাশ্চ যশস্বিনঃ
মম সৈন্যেষু সংরব্ধা বিচরন্তি দবাগ্নিবৎ
134.78
তান্বারয় মহাবাহো কেকয়াংশ্চ নরোত্তম
পুরা কুর্বন্তি নিঃশেষং রক্ষ্যমাণাঃ কিরীটিনা
134.79
আদৌ বা যদি বা পশ্চাত্তবেদং কর্ম মারিষ
ত্বমুত্পন্নো মহাবাহো পাঞ্চালানাং বধং প্রতি
134.80
করিষ্যসি জগত্সর্বমপাঞ্চালং কিলাচ্যুত
এবং সিদ্ধাব্রুবন্বাচো ভবিষ্যতি চ তত্তথা
134.81
ন তেঽস্ত্রগোচরে শক্তাঃ স্থাতুং দেবাঃ সবাসবাঃ
কিমু পার্থাঃ সপাঞ্চালাঃ সত্যমেতদ্বচো মম