Utshovঅধ্যায় 133
133.1
সংজয় উবাচ
উদীর্যমাণং তদ্দৃষ্ট্বা পাণ্ডবানাং মহদ্বলম্
অবিষহ্যং চ মন্বানঃ কর্ণং দুর্যোধনোঽব্রবীৎ
133.2
অয়ং স কালঃ সংপ্রাপ্তো মিত্রাণাং মিত্রবত্সল
ত্রায়স্ব সমরে কর্ণ সর্বান্যোধান্মহাবল
133.3
পাঞ্চালৈর্মত্স্যকৈকেয়ৈঃ পাণ্ডবৈশ্চ মহারথৈঃ
বৃতান্সমন্তাত্সংক্রুদ্ধৈর্নিঃশ্বসদ্ভিরিবোরগৈঃ
133.4
এতে নদন্তি সংহৃষ্টাঃ পাণ্ডবা জিতকাশিনঃ
শক্রোপমাশ্চ বহবঃ পাঞ্চালানাং রথব্রজাঃ
133.5
কর্ণ উবাচ
পরিত্রাতুমিহ প্রাপ্তো যদি পার্থং পুরংদরঃ
তমপ্যাশু পরাজিত্য ততো হন্তাস্মি পাণ্ডবম্
133.6
সত্যং তে প্রতিজানামি সমাশ্বসিহি ভারত
হন্তাস্মি পাণ্ডুতনয়ান্পাঞ্চালাংশ্চ সমাগতান্
133.7
জয়ং তে প্রতিজানামি বাসবস্যেব পাবকিঃ
প্রিয়ং তব ময়া কার্যমিতি জীবামি পার্থিব
133.8
সর্বেষামেব পার্থানাং ফল্গুনো বলবত্তরঃ
তস্যামোঘাং বিমোক্ষ্যামি শক্তিং শক্রবিনির্মিতাম্
133.9
তস্মিন্হতে মহেষ্বাসে ভ্রাতরস্তস্য মানদ
তব বশ্যা ভবিষ্যন্তি বনং যাস্যন্তি বা পুনঃ
133.10
ময়ি জীবতি কৌরব্য বিষাদং মা কৃথাঃ ক্বচিৎ
অহং জেষ্যামি সমরে সহিতান্সর্বপাণ্ডবান্
133.11
পাঞ্চালান্কেকয়াংশ্চৈব বৃষ্ণীংশ্চাপি সমাগতান্
বাণৌঘৈঃ শকলীকৃত্য তব দাস্যামি মেদিনীম্
133.12
সংজয় উবাচ
এবং ব্রুবাণং কর্ণং তু কৃপঃ শারদ্বতোঽব্রবীৎ
স্ময়ন্নিব মহাবাহুঃ সূতপুত্রমিদং বচঃ
133.13
শোভনং শোভনং কর্ণ সনাথঃ কুরুপুংগবঃ
ত্বয়া নাথেন রাধেয় বচসা যদি সিধ্যতি
133.14
বহুশঃ কত্থসে কর্ণ কৌরব্যস্য সমীপতঃ
ন তু তে বিক্রমঃ কশ্চিদ্দৃশ্যতে বলমেব বা
133.15
সমাগমঃ পাণ্ডুসুতৈর্দৃষ্টস্তে বহুশো যুধি
সর্বত্র নির্জিতশ্চাসি পাণ্ডবৈঃ সূতনন্দন
133.16
হ্রিয়মাণে তদা কর্ণ গন্ধর্বৈর্ধৃতরাষ্ট্রজে
তদায়ুধ্যন্ত সৈন্যানি ত্বমেকস্তু পলায়থাঃ
133.17
বিরাটনগরে চাপি সমেতাঃ সর্বকৌরবাঃ
পার্থেন নির্জিতা যুদ্ধে ত্বং চ কর্ণ সহানুজঃ
133.18
একস্যাপ্যসমর্থস্ত্বং ফল্গুনস্য রণাজিরে
কথমুত্সহসে জেতুং সকৃষ্ণান্সর্বপাণ্ডবান্
133.19
অব্রুবন্কর্ণ যুধ্যস্ব বহু কত্থসি সূতজ
অনুক্ত্বা বিক্রমেদ্যস্তু তদ্বৈ সত্পুরুষব্রতম্
133.20
গর্জিত্বা সূতপুত্র ত্বং শারদাভ্রমিবাজলম্
নিষ্ফলো দৃশ্যসে কর্ণ তচ্চ রাজা ন বুধ্যতে
133.21
তাবদ্গর্জসি রাধেয় যাবত্পার্থং ন পশ্যসি
পুরা পার্থং হি তে দৃষ্ট্বা দুর্লভং গর্জিতং ভবেৎ
133.22
ত্বমনাসাদ্য তান্বাণান্ফল্গুনস্য বিগর্জসি
পার্থসায়কবিদ্ধস্য দুর্লভং গর্জিতং ভবেৎ
133.23
বাহুভিঃ ক্ষত্রিয়াঃ শূরা বাগ্ভিঃ শূরা দ্বিজাতয়ঃ
ধনুষা ফল্গুনঃ শূরঃ কর্ণঃ শূরো মনোরথৈঃ
133.24
এবং পরুষিতস্তেন তদা শারদ্বতেন সঃ
কর্ণঃ প্রহরতাং শ্রেষ্ঠঃ কৃপং বাক্যমথাব্রবীৎ
133.25
শূরা গর্জন্তি সততং প্রাবৃষীব বলাহকাঃ
ফলং চাশু প্রয়চ্ছন্তি বীজমুপ্তমৃতাবিব
133.26
দোষমত্র ন পশ্যামি শূরাণাং রণমূর্ধনি
তত্তদ্বিকত্থমানানাং ভারং চোদ্বহতাং মৃধে
133.27
যং ভারং পুরুষো বোঢুং মনসা হি ব্যবস্যতি
দৈবমস্য ধ্রুবং তত্র সাহায্যায়োপপদ্যতে
133.28
ব্যবসায়দ্বিতীয়োঽহং মনসা ভারমুদ্বহন্
গর্জামি যদ্যহং বিপ্র তব কিং তত্র নশ্যতি
133.29
বৃথা শূরা ন গর্জন্তি সজলা ইব তোয়দাঃ
সামর্থ্যমাত্মনো জ্ঞাত্বা ততো গর্জন্তি পণ্ডিতাঃ
133.30
সোঽহমদ্য রণে যত্তঃ সহিতৌ কৃষ্ণপাণ্ডবৌ
উত্সহে তরসা জেতুং ততো গর্জামি গৌতম
133.31
পশ্য ত্বং গর্জিতস্যাস্য ফলং মে বিপ্র সানুগঃ
হত্বা পাণ্ডুসুতানাজৌ সহকৃষ্ণান্সসাত্বতান্
দুর্যোধনায় দাস্যামি পৃথিবীং হতকণ্টকাম্
133.32
কৃপ উবাচ
মনোরথপ্রলাপো মে ন গ্রাহ্যস্তব সূতজ
যদা ক্ষিপসি বৈ কৃষ্ণৌ ধর্মরাজং চ পাণ্ডবম্
133.33
ধ্রুবস্তত্র জয়ঃ কর্ণ যত্র যুদ্ধবিশারদৌ
দেবগন্ধর্বয়ক্ষাণাং মনুষ্যোরগরক্ষসাম্
দংশিতানামপি রণে অজেয়ৌ কৃষ্ণপাণ্ডবৌ
133.34
ব্রহ্মণ্যঃ সত্যবাগ্দান্তো গুরুদৈবতপূজকঃ
নিত্যং ধর্মরতশ্চৈব কৃতাস্ত্রশ্চ বিশেষতঃ
ধৃতিমাংশ্চ কৃতজ্ঞশ্চ ধর্মপুত্রো যুধিষ্ঠিরঃ
133.35
ভ্রাতরশ্চাস্য বলিনঃ সর্বাস্ত্রেষু কৃতশ্রমাঃ
গুরুবৃত্তিরতাঃ প্রাজ্ঞা ধর্মনিত্যা যশস্বিনঃ
133.36
সংবন্ধিনশ্চেন্দ্রবীর্যাঃ স্বনুরক্তাঃ প্রহারিণঃ
ধৃষ্টদ্যুম্নঃ শিখণ্ডী চ দৌর্মুখির্জনমেজয়ঃ
133.37
চন্দ্রসেনো ভদ্রসেনঃ কীর্তিধর্মা ধ্রুবো ধরঃ
বসুচন্দ্রো দামচন্দ্রঃ সিংহচন্দ্রঃ সুবেধনঃ
133.38
দ্রুপদস্য তথা পুত্রা দ্রুপদশ্চ মহাস্ত্রবিৎ
যেষামর্থায় সংয়ত্তো মত্স্যরাজঃ সহানুগঃ
133.39
শতানীকঃ সুদশনঃ শ্রুতানীকঃ শ্রুতধ্বজঃ
বলানীকো জয়ানীকো জয়াশ্বো রথবাহনঃ
133.40
চন্দ্রোদয়ঃ কামরথো বিরাটভ্রাতরঃ শুভাঃ
যমৌ চ দ্রৌপদেয়াশ্চ রাক্ষসশ্চ ঘটোত্কচঃ
যেষামর্থায় যুধ্যন্তে ন তেষাং বিদ্যতে ক্ষয়ঃ
133.41
কামং খলু জগত্সর্বং সদেবাসুরমানবম্
সয়ক্ষরাক্ষসগণং সভূতভুজগদ্বিপম্
নিঃশেষমস্ত্রবীর্যেণ কুর্যাতাং ভীমফল্গুনৌ
133.42
যুধিষ্ঠিরশ্চ পৃথিবীং নির্দহেদ্ঘোরচক্ষুষা
অপ্রমেয়বলঃ শৌরির্যেষামর্থে চ দংশিতঃ
কথং তান্সংয়ুগে কর্ণ জেতুমুত্সহসে পরান্
133.43
মহানপনয়স্ত্বেষ তব নিত্যং হি সূতজ
যস্ত্বমুত্সহসে যোদ্ধুং সমরে শৌরিণা সহ
133.44
সংজয় উবাচ
এবমুক্তস্তু রাধেয়ঃ প্রহসন্ভরতর্ষভ
অব্রবীচ্চ তদা কর্ণো গুরুং শারদ্বতং কৃপম্
133.45
সত্যমুক্তং ত্বয়া ব্রহ্মন্পাণ্ডবান্প্রতি যদ্বচঃ
এতে চান্যে চ বহবো গুণাঃ পাণ্ডুসুতেষু বৈ
133.46
অজয্যাশ্চ রণে পার্থা দেবৈরপি সবাসবৈঃ
সদৈত্যয়ক্ষগন্ধর্বপিশাচোরগরাক্ষসৈঃ
তথাপি পার্থাঞ্জেষ্যামি শক্ত্যা বাসবদত্তয়া
133.47
মমাপ্যমোঘা দত্তেয়ং শক্তিঃ শক্রেণ বৈ দ্বিজ
এতয়া নিহনিষ্যামি সব্যসাচিনমাহবে
133.48
হতে তু পাণ্ডবে কৃষ্ণো ভ্রাতরশ্চাস্য সোদরাঃ
অনর্জুনা ন শক্ষ্যন্তি মহীং ভোক্তুং কথংচন
133.49
তেষু নষ্টেষু সর্বেষু পৃথিবীয়ং সসাগরা
অয়ত্নাত্কৌরবেয়স্য বশে স্থাস্যতি গৌতম
133.50
সুনীতৈরিহ সর্বার্থাঃ সিধ্যন্তে নাত্র সংশয়ঃ
এতমর্থমহং জ্ঞাত্বা ততো গর্জামি গৌতম
133.51
ত্বং তু বৃদ্ধশ্চ বিপ্রশ্চ অশক্তশ্চাপি সংয়ুগে
কৃতস্নেহশ্চ পার্থেষু মোহান্মামবমন্যসে
133.52
যদ্যেবং বক্ষ্যসে ভূয়ো মামপ্রিয়মিহ দ্বিজ
ততস্তে খড্গমুদ্যম্য জিহ্বাং ছেত্স্যামি দুর্মতে
133.53
যচ্চাপি পাণ্ডবান্বিপ্র স্তোতুমিচ্ছসি সংয়ুগে
ভীষয়ন্সর্বসৈন্যানি কৌরবেয়াণি দুর্মতে
অত্রাপি শৃণু মে বাক্যং যথাবদ্গদতো দ্বিজ
133.54
দুর্যোধনশ্চ দ্রোণশ্চ শকুনির্দুর্মুখো জয়ঃ
দুঃশাসনো বৃষসেনো মদ্ররাজস্ত্বমেব চ
সোমদত্তশ্চ ভূরিশ্চ তথা দ্রৌণির্বিবিংশতিঃ
133.55
তিষ্ঠেয়ুর্দংশিতা যত্র সর্বে যুদ্ধবিশারদাঃ
জয়েদেতান্রণে কো নু শক্রতুল্যবলোঽপ্যরিঃ
133.56
শূরাশ্চ হি কৃতাস্ত্রাশ্চ বলিনঃ স্বর্গলিপ্সবঃ
ধর্মজ্ঞা যুদ্ধকুশলা হন্যুর্যুদ্ধে সুরানপি
133.57
এতে স্থাস্যন্তি সংগ্রামে পাণ্ডবানাং বধার্থিনঃ
জয়মাকাঙ্ক্ষমাণা হি কৌরবেয়স্য দংশিতাঃ
133.58
দৈবায়ত্তমহং মন্যে জয়ং সুবলিনামপি
যত্র ভীষ্মো মহাবাহুঃ শেতে শরশতাচিতঃ
133.59
বিকর্ণশ্চিত্রসেনশ্চ বাহ্লীকোঽথ জয়দ্রথঃ
ভূরিশ্রবা জয়শ্চৈব জলসংধঃ সুদক্ষিণঃ
133.60
শলশ্চ রথিনাং শ্রেষ্ঠো ভগদত্তশ্চ বীর্যবান্
এতে চান্যে চ রাজানো দেবৈরপি সুদুর্জয়াঃ
133.61
নিহতাঃ সমরে শূরাঃ পাণ্ডবৈর্বলবত্তরাঃ
কিমন্যদ্দৈবসংয়োগান্মন্যসে পুরুষাধম
133.62
যাংশ্চ তান্স্তৌষি সততং দুর্যোধনরিপূন্দ্বিজ
তেষামপি হতাঃ শূরাঃ শতশোঽথ সহস্রশঃ
133.63
ক্ষীয়ন্তে সর্বসৈন্যানি কুরূণাং পাণ্ডবৈঃ সহ
প্রভাবং নাত্র পশ্যামি পাণ্ডবানাং কথংচন
133.64
যাংস্তান্বলবতো নিত্যং মন্যসে ত্বং দ্বিজাধম
যতিষ্যেঽহং যথাশক্তি যোদ্ধুং তৈঃ সহ সংয়ুগে
দুর্যোধনহিতার্থায় জয়ো দৈবে প্রতিষ্ঠিতঃ