Utshovঅধ্যায় 132
132.1
সংজয় উবাচ
দ্রুপদস্যাত্মজান্দৃষ্ট্বা কুন্তিভোজসুতাংস্তথা
দ্রোণপুত্রেণ নিহতান্রাক্ষসাংশ্চ সহস্রশঃ
132.2
যুধিষ্ঠিরো ভীমসেনো ধৃষ্টদ্যুম্নশ্চ পার্ষতঃ
যুয়ুধানশ্চ সংয়ত্তা যুদ্ধায়ৈব মনো দধুঃ
132.3
সোমদত্তঃ পুনঃ কুর্দ্ধো দৃষ্ট্বা সাত্যকিমাহবে
মহতা শরবর্ষেণ ছাদয়ামাস সর্বতঃ
132.4
ততঃ সমভবদ্যুদ্ধমতীব ভয়বর্ধনম্
ত্বদীয়ানাং পরেষাং চ ঘোরং বিজয়কাঙ্ক্ষিণাম্
132.5
দশভিঃ সাত্বতস্যার্থে ভীমো বিব্যাধ কৌরবম্
সোমদত্তোঽপি তং বীরং শতেন প্রত্যবিধ্যত
132.6
সাত্বতস্ত্বভিসংক্রুদ্ধঃ পুত্রাধিভিরভিপ্লুতম্
বৃদ্ধমৃদ্ধং গুণৈঃ সর্বৈর্যয়াতিমিব নাহুষম্
132.7
বিব্যাধ দশভিস্তীক্ষ্ণৈঃ শরৈর্বজ্রনিপাতিভিঃ
শক্ত্যা চৈনমথাহত্য পুনর্বিব্যাধ সপ্তভিঃ
132.8
ততস্তু সাত্যকেরর্থে ভীমসেনো নবং দৃঢম্
মুমোচ পরিঘং ঘোরং সোমদত্তস্য মূর্ধনি
132.9
সাত্যকিশ্চাগ্নিসংকাশং মুমোচ শরমুত্তমম্
সোমদত্তোরসি ক্রুদ্ধঃ সুপত্রং নিশিতং যুধি
132.10
যুগপত্পেততুরথ ঘোরৌ পরিঘমার্গণৌ
শরীরে সোমদত্তস্য স পপাত মহারথঃ
132.11
ব্যামোহিতে তু তনয়ে বাহ্লীকঃ সমুপাদ্রবৎ
বিসৃজঞ্শরবর্ষাণি কালবর্ষীব তোয়দঃ
132.12
ভীমোঽথ সাত্বতস্যার্থে বাহ্লীকং নবভিঃ শরৈঃ
পীডয়ন্বৈ মহাত্মানং বিব্যাধ রণমূর্ধনি
132.13
প্রাতিপীয়স্তু সংক্রুদ্ধঃ শক্তিং ভীমস্য বক্ষসি
নিচখান মহাবাহুঃ পুরংদর ইবাশনিম্
132.14
স তয়াভিহতো ভীমশ্চকম্পে চ মুমোহ চ
প্রাপ্য চেতশ্চ বলবান্গদামস্মৈ সসর্জ হ
132.15
সা পাণ্ডবেন প্রহিতা বাহ্লীকস্য শিরোঽহরৎ
স পপাত হতঃ পৃথ্ব্যাং বজ্রাহত ইবাদ্রিরাট্
132.16
তস্মিন্বিনিহতে বীরে বাহ্লীকে পুরুষর্ষভে
পুত্রাস্তেঽভ্যর্দয়ন্ভীমং দশ দাশরথেঃ সমাঃ
132.17
নারাচৈর্দশভির্ভীমস্তান্নিহত্য তবাত্মজান্
কর্ণস্য দয়িতং পুত্রং বৃষসেনমবাকিরৎ
132.18
ততো বৃষরথো নাম ভ্রাতা কর্ণস্য বিশ্রুতঃ
জঘান ভীমং নারাচৈস্তমপ্যভ্যবধীদ্বলী
132.19
ততঃ সপ্ত রথান্বীরঃ স্যালানাং তব ভারত
নিহত্য ভীমো নারাচৈঃ শতচন্দ্রমপোথয়ৎ
132.20
অমর্ষয়ন্তো নিহতং শতচন্দ্রং মহারথম্
শকুনের্ভ্রাতরো বীরা গজাক্ষঃ শরভো বিভুঃ
অভিদ্রুত্য শরৈস্তীক্ষ্ণৈর্ভীমসেনমতাডয়ন্
132.21
স তুদ্যমানো নারাচৈর্বৃষ্টিবেগৈরিবর্ষভঃ
জঘান পঞ্চভির্বাণৈঃ পঞ্চৈবাতিবলো রথান্
তান্দৃষ্ট্বা নিহতান্বীরান্বিচেলুর্নৃপসত্তমাঃ
132.22
ততো যুধিষ্ঠিরঃ ক্রুদ্ধস্তবানীকমশাতয়ৎ
মিষতঃ কুম্ভয়োনেশ্চ পুত্রাণাং চ তবানঘ
132.23
অম্বষ্ঠান্মালবাঞ্শূরাংস্ত্রিগর্তান্সশিবীনপি
প্রাহিণোন্মৃত্যুলোকায় গণান্যুদ্ধে যুধিষ্ঠিরঃ
132.24
অভীষাহাঞ্শূরসেনান্বাহ্লীকান্সবসাতিকান্
নিকৃত্য পৃথিবীং রাজা চক্রে শোণিতকর্দমাম্
132.25
যৌধেয়ারট্টরাজন্যমদ্রকাণাং গণান্যুধি
প্রাহিণোন্মৃত্যুলোকায় শূরান্বাণৈর্যুধিষ্ঠিরঃ
132.26
হতাহরত গৃহ্ণীত বিধ্যত ব্যবকৃন্তত
ইত্যাসীত্তুমুলঃ শব্দো যুধিষ্ঠিররথং প্রতি
132.27
সৈন্যানি দ্রাবয়ন্তং তং দ্রোণো দৃষ্ট্বা যুধিষ্ঠিরম্
চোদিতস্তব পুত্রেণ সায়কৈরভ্যবাকিরৎ
132.28
দ্রোণস্তু পরমক্রুদ্ধো বায়ব্যাস্ত্রেণ পার্থিবম্
বিব্যাধ সোঽস্য তদ্দিব্যমস্ত্রমস্ত্রেণ জঘ্নিবান্
132.29
তস্মিন্বিনিহতে চাস্ত্রে ভারদ্বাজো যুধিষ্ঠিরে
বারুণং যাম্যমাগ্নেয়ং ত্বাষ্ট্রং সাবিত্রমেব চ
চিক্ষেপ পরমক্রুদ্ধো জিঘাংসুঃ পাণ্ডুনন্দনম্
132.30
ক্ষিপ্তানি ক্ষিপ্যমাণানি তানি চাস্ত্রাণি ধর্মজঃ
জঘানাস্ত্রৈর্মহাবাহুঃ কুম্ভয়োনেরবিত্রসন্
132.31
সত্যাং চিকীর্ষমাণস্তু প্রতিজ্ঞাং কুম্ভসংভবঃ
প্রাদুশ্চক্রেঽস্ত্রমৈন্দ্রং বৈ প্রাজাপত্যং চ ভারত
জিঘাংসুর্ধর্মতনয়ং তব পুত্রহিতে রতঃ
132.32
পতিঃ কুরূণাং গজসিংহগামী; বিশালবক্ষাঃ পৃথুলোহিতাক্ষঃ
প্রাদুশ্চকারাস্ত্রমহীনতেজা; মাহেন্দ্রমন্যত্স জঘান তেঽস্ত্রে
132.33
বিহন্যমানেষ্বস্ত্রেষু দ্রোণঃ ক্রোধসমন্বিতঃ
যুধিষ্ঠিরবধপ্রেপ্সুর্ব্রাহ্মমস্ত্রমুদৈরয়ৎ
132.34
ততো নাজ্ঞাসিষং কিংচিদ্ঘোরেণ তমসাবৃতে
সর্বভূতানি চ পরং ত্রাসং জগ্মুর্মহীপতে
132.35
ব্রহ্মাস্ত্রমুদ্যতং দৃষ্ট্বা কুন্তীপুত্রো যুধিষ্ঠিরঃ
ব্রহ্মাস্ত্রেণৈব রাজেন্দ্র তদস্ত্রং প্রত্যবারয়ৎ
132.36
ততঃ সৈনিকমুখ্যাস্তে প্রশশংসুর্নরর্ষভৌ
দ্রোণপার্থৌ মহেষ্বাসৌ সর্বয়ুদ্ধবিশারদৌ
132.37
ততঃ প্রমুচ্য কৌন্তেয়ং দ্রোণো দ্রুপদবাহিনীম্
ব্যধমদ্রোষতাম্রাক্ষো বায়ব্যাস্ত্রেণ ভারত
132.38
তে হন্যমানা দ্রোণেন পাঞ্চালাঃ প্রাদ্রবন্ভয়াৎ
পশ্যতো ভীমসেনস্য পার্থস্য চ মহাত্মনঃ
132.39
ততঃ কিরীটী ভীমশ্চ সহসা সংন্যবর্ততাম্
মহদ্ভ্যাং রথবংশাভ্যাং পরিগৃহ্য বলং তব
132.40
বীভত্সুর্দক্ষিণং পার্শ্বমুত্তরং তু বৃকোদরঃ
ভারদ্বাজং শরৌঘাভ্যাং মহদ্ভ্যামভ্যবর্ষতাম্
132.41
তৌ তদা সৃঞ্জয়াশ্চৈব পাঞ্চালাশ্চ মহৌজসঃ
অন্বগচ্ছন্মহারাজ মত্স্যাশ্চ সহ সাত্বতৈঃ
132.42
ততঃ সা ভারতী সেনা বধ্যমানা কিরীটিনা
দ্রোণেন বার্যমাণাস্তে স্বয়ং তব সুতেন চ
নাশক্যন্ত মহারাজ যোধা বারয়িতুং তদা