Utshovঅধ্যায় 131
131.1
সংজয় উবাচ
প্রায়োপবিষ্টে তু হতে পুত্রে সাত্যকিনা ততঃ
সোমদত্তো ভৃশং ক্রুদ্ধঃ সাত্যকিং বাক্যমব্রবীৎ
131.2
ক্ষত্রধর্মঃ পুরা দৃষ্টো যস্তু দেবৈর্মহাত্মভিঃ
তং ত্বং সাত্বত সংত্যজ্য দস্যুধর্মে কথং রতঃ
131.3
পরাঙ্মুখায় দীনায় ন্যস্তশস্ত্রায় যাচতে
ক্ষত্রধর্মরতঃ প্রাজ্ঞঃ কথং নু প্রহরেদ্রণে
131.4
দ্বাবেব কিল বৃষ্ণীনাং তত্র খ্যাতৌ মহারথৌ
প্রদ্যুম্নশ্চ মহাবাহুস্ত্বং চৈব যুধি সাত্বত
131.5
কথং প্রায়োপবিষ্টায় পার্থেন ছিন্নবাহবে
নৃশংসং পতনীয়ং চ তাদৃশং কৃতবানসি
131.6
শপে সাত্বত পুত্রাভ্যামিষ্টেন সুকৃতেন চ
অনতীতামিমাং রাত্রিং যদি ত্বাং বীরমানিনম্
131.7
অরক্ষ্যমাণং পার্থেন জিষ্ণুনা সসুতানুজম্
ন হন্যাং নিরয়ে ঘোরে পতেয়ং বৃষ্ণিপাংসন
131.8
এবমুক্ত্বা সুসংক্রুদ্ধঃ সোমদত্তো মহাবলঃ
দধ্মৌ শঙ্খং চ তারেণ সিংহনাদং ননাদ চ
131.9
ততঃ কমলপত্রাক্ষঃ সিংহদংষ্ট্রো মহাবলঃ
সাত্বতো ভৃশসংক্রুদ্ধঃ সোমদত্তমথাব্রবীৎ
131.10
হতো ভূরিশ্রবা বীরস্তব পুত্রো মহারথঃ
শলশ্চৈব তথা রাজন্ভ্রাতৃব্যসনকর্শিতঃ
131.11
ত্বাং চাপ্যদ্য বধিষ্যামি সপুত্রপশুবান্ধবম্
তিষ্ঠেদানীং রণে যত্তঃ কৌরবোঽসি বিশেষতঃ
131.12
যস্মিন্দানং দমঃ শৌচমহিংসা হ্রীর্ধৃতিঃ ক্ষমা
অনপায়ীনি সর্বাণি নিত্যং রাজ্ঞি যুধিষ্ঠিরে
131.13
মৃদঙ্গকেতোস্তস্য ত্বং তেজসা নিহতঃ পুরা
সকর্ণসৌবলঃ সংখ্যে বিনাশং সমুপেষ্যসি
131.14
শপেঽহং কৃষ্ণচরণৈরিষ্টাপূর্তেন চৈব হ
যদি ত্বাং সসুতং পাপং ন হন্যাং যুধি রোষিতঃ
অপয়াস্যসি চেত্ত্যক্ত্বা ততো মুক্তো ভবিষ্যসি
131.15
এবমাভাষ্য চান্যোন্যং ক্রোধসংরক্তলোচনৌ
প্রবৃত্তৌ শরসংপাতং কর্তুং পুরুষসত্তমৌ
131.16
ততো গজসহস্রেণ রথানাময়ুতেন চ
দুর্যোধনঃ সোমদত্তং পরিবার্য ব্যবস্থিতঃ
131.17
শকুনিশ্চ সুসংক্রুদ্ধঃ সর্বশস্ত্রভৃতাং বরঃ
পুত্রপৌত্রৈঃ পরিবৃতো ভ্রাতৃভিশ্চেন্দ্রবিক্রমৈঃ
স্যালস্তব মহাবাহুর্বজ্রসংহননো যুবা
131.18
সাগ্রং শতসহস্রং তু হয়ানাং তস্য ধীমতঃ
সোমদত্তং মহেষ্বাসং সমন্তাত্পর্যরক্ষত
131.19
রক্ষ্যমাণশ্চ বলিভিশ্ছাদয়ামাস সাত্যকিম্
তং ছাদ্যমানং বিশিখৈর্দৃষ্ট্বা সংনতপর্বভিঃ
ধৃষ্টদ্যুম্নোঽভ্যয়াত্ক্রুদ্ধঃ প্রগৃহ্য মহতীং চমূম্
131.20
চণ্ডবাতাভিসৃষ্টানামুদধীনামিব স্বনঃ
আসীদ্রাজন্বলৌঘানামন্যোন্যমভিনিঘ্নতাম্
131.21
বিব্যাধ সোমদত্তস্তু সাত্বতং নবভিঃ শরৈঃ
সাত্যকির্দশভিশ্চৈনমবধীত্কুরুপুংগবম্
131.22
সোঽতিবিদ্ধো বলবতা সমরে দৃঢধন্বনা
রথোপস্থং সমাসাদ্য মুমোহ গতচেতনঃ
131.23
তং বিমূঢং সমালক্ষ্য সারথিস্ত্বরয়ান্বিতঃ
অপোবাহ রণাদ্বীরং সোমদত্তং মহারথম্
131.24
তং বিসংজ্ঞং সমালোক্য যুয়ুধানশরার্দিতম্
দ্রৌণিরভ্যদ্রবত্ক্রুদ্ধঃ সাত্বতং রণমূর্ধনি
131.25
তমাপতন্তং সংপ্রেক্ষ্য শৈনেয়স্য রথং প্রতি
ভৈমসেনিঃ সুসংক্রুদ্ধঃ প্রত্যমিত্রমবারয়ৎ
131.26
কার্ষ্ণায়সময়ং ঘোরমৃক্ষচর্মাবৃতং মহৎ
যুক্তং গজনিভৈর্বাহৈর্ন হয়ৈর্নাপি বা গজৈঃ
131.27
বিক্ষিপ্তমষ্টচক্রেণ বিবৃতাক্ষেণ কূজতা
ধ্বজেনোচ্ছ্রিততুণ্ডেন গৃধ্ররাজেন রাজতা
131.28
লোহিতার্দ্রপতাকং তমন্ত্রমালাবিভূষিতম্
অষ্টচক্রসমায়ুক্তমাস্থায় বিপুলং রথম্
131.29
শূলমুদ্গরধারিণ্যা শৈলপাদপহস্তয়া
রক্ষসাং ঘোররূপাণামক্ষৌহিণ্যা সমাবৃতঃ
131.30
তমুদ্যতমহাচাপং নিশাম্য ব্যথিতা নৃপাঃ
যুগান্তকালসময়ে দণ্ডহস্তমিবান্তকম্
131.31
ভয়ার্দিতা প্রচুক্ষোভ পুত্রস্য তব বাহিনী
বায়ুনা ক্ষোভিতাবর্তা গঙ্গেবোর্ধ্বতরঙ্গিণী
131.32
ঘটোত্কচপ্রয়ুক্তেন সিংহনাদেন ভীষিতাঃ
প্রসুস্রুবুর্গজা মূত্রং বিব্যথুশ্চ নরা ভৃশম্
131.33
ততোঽশ্মবৃষ্টিরত্যর্থমাসীত্তত্র সমন্ততঃ
সংধ্যাকালাধিকবলৈঃ প্রমুক্তা রাক্ষসৈঃ ক্ষিতৌ
131.34
আয়সানি চ চক্রাণি ভুশুণ্ড্যঃ প্রাসতোমরাঃ
পতন্ত্যবিরলাঃ শূলাঃ শতঘ্ন্যঃ পট্টিশাস্তথা
131.35
তদুগ্রমতিরৌদ্রং চ দৃষ্ট্বা যুদ্ধং নরাধিপাঃ
তনয়াস্তব কর্ণশ্চ ব্যথিতাঃ প্রাদ্রবন্দিশঃ
131.36
তত্রৈকোঽস্ত্রবলশ্লাঘী দ্রৌণির্মানী ন বিব্যথে
ব্যধমচ্চ শরৈর্মায়াং ঘটোত্কচবিনির্মিতাম্
131.37
নিহতায়াং তু মায়ায়ামমর্ষী স ঘটোত্কচঃ
বিসসর্জ শরান্ঘোরাংস্তেঽশ্বত্থামানমাবিশন্
131.38
ভুজগা ইব বেগেন বল্মীকং ক্রোধমূর্ছিতাঃ
তে শরা রুধিরাভ্যক্তা ভিত্ত্বা শারদ্বতীসুতম্
বিবিশুর্ধরণীং শীঘ্রা রুক্মপুঙ্খাঃ শিলাশিতাঃ
131.39
অশ্বত্থামা তু সংক্রুদ্ধো লঘুহস্তঃ প্রতাপবান্
ঘটোত্কচমভিক্রুদ্ধং বিভেদ দশভিঃ শরৈঃ
131.40
ঘটোত্কচোঽতিবিদ্ধস্তু দ্রোণপুত্রেণ মর্মসু
চক্রং শতসহস্রারমগৃহ্ণাদ্ব্যথিতো ভৃশম্
131.41
ক্ষুরান্তং বালসূর্যাভং মণিবজ্রবিভূষিতম্
অশ্বত্থাম্নস্তু চিক্ষেপ ভৈমসেনির্জিঘাংসয়া
131.42
বেগেন মহতা গচ্ছদ্বিক্ষিপ্তং দ্রৌণিনা শরৈঃ
অভাগ্যস্যেব সংকল্পস্তন্মোঘং ন্যপতদ্ভুবি
131.43
ঘটোত্কচস্ততস্তূর্ণং দৃষ্ট্বা চক্রং নিপাতিতম্
দ্রৌণিং প্রাচ্ছাদয়দ্বাণৈঃ স্বর্ভানুরিব ভাস্করম্
131.44
ঘটোত্কচসুতঃ শ্রীমান্ভিন্নাঞ্জনচয়োপমঃ
রুরোধ দ্রৌণিমায়ান্তং প্রভঞ্জনমিবাদ্রিরাট্
131.45
পৌত্রেণ ভীমসেনস্য শরৈঃ সোঽঞ্জনপর্বণা
বভৌ মেঘেন ধারাভির্গিরির্মেরুরিবার্দিতঃ
131.46
অশ্বত্থামা ত্বসংভ্রান্তো রুদ্রোপেন্দ্রেন্দ্রবিক্রমঃ
ধ্বজমেকেন বাণেন চিচ্ছেদাঞ্জনপর্বণঃ
131.47
দ্বাভ্যাং তু রথয়ন্তারং ত্রিভিশ্চাস্য ত্রিবেণুকম্
ধনুরেকেন চিচ্ছেদ চতুর্ভিশ্চতুরো হয়ান্
131.48
বিরথস্যোদ্যতং হস্তাদ্ধেমবিন্দুভিরাচিতম্
বিশিখেন সুতীক্ষ্ণেন খড্গমস্য দ্বিধাকরোৎ
131.49
গদা হেমাঙ্গদা রাজংস্তূর্ণং হৈডিম্বসূনুনা
ভ্রাম্যোত্ক্ষিপ্তা শরৈঃ সাপি দ্রৌণিনাভ্যাহতাপতৎ
131.50
ততোঽন্তরিক্ষমুত্পত্য কালমেঘ ইবোন্নদন্
ববর্ষাঞ্জনপর্বা স দ্রুমবর্ষং নভস্তলাৎ
131.51
ততো মায়াধরং দ্রৌণির্ঘটোত্কচসুতং দিবি
মার্গণৈরভিবিব্যাধ ঘনং সূর্য ইবাংশুভিঃ
131.52
সোঽবতীর্য পুনস্তস্থৌ রথে হেমপরিষ্কৃতে
মহীধর ইবাত্যুচ্চঃ শ্রীমানঞ্জনপর্বতঃ
131.53
তময়স্ময়বর্মাণং দ্রৌণির্ভীমাত্মজাত্মজম্
জঘানাঞ্জনপর্বাণং মহেশ্বর ইবান্ধকম্
131.54
অথ দৃষ্ট্বা হতং পুত্রমশ্বত্থাম্না মহাবলম্
দ্রৌণেঃ সকাশমভ্যেত্য রোষাত্প্রচলিতাঙ্গদঃ
131.55
প্রাহ বাক্যমসংভ্রান্তো বীরং শারদ্বতীসুতম্
দহন্তং পাণ্ডবানীকং বনমগ্নিমিবোদ্ধতম্
131.56
তিষ্ঠ তিষ্ঠ ন মে জীবন্দ্রোণপুত্র গমিষ্যসি
ত্বামদ্য নিহনিষ্যামি ক্রৌঞ্চমগ্নিসুতো যথা
131.57
অশ্বত্থামোবাচ
গচ্ছ বত্স সহান্যৈস্ত্বং যুধ্যস্বামরবিক্রম
ন হি পুত্রেণ হৈডিম্বে পিতা ন্যায্যং প্রবাধিতুম্
131.58
কামং খলু ন মে রোষো হৈডিম্বে বিদ্যতে ত্বয়ি
কিং তু রোষান্বিতো জন্তুর্হন্যাদাত্মানমপ্যুত
131.59
সংজয় উবাচ
শ্রুত্বৈতত্ক্রোধতাম্রাক্ষঃ পুত্রশোকসমন্বিতঃ
অশ্বত্থামানমায়স্তো ভৈমসেনিরভাষত
131.60
কিমহং কাতরো দ্রৌণে পৃথগ্জন ইবাহবে
ভীমাত্খল্বহমুত্পন্নঃ কুরূণাং বিপুলে কুলে
131.61
পাণ্ডবানামহং পুত্রঃ সমরেষ্বনিবর্তিনাম্
রক্ষসামধিরাজোঽহং দশগ্রীবসমো বলে
131.62
তিষ্ঠ তিষ্ঠ ন মে জীবন্দ্রোণপুত্র গমিষ্যসি
যুদ্ধশ্রদ্ধামহং তেঽদ্য বিনেষ্যামি রণাজিরে
131.63
ইত্যুক্ত্বা রোষতাম্রাক্ষো রাক্ষসঃ সুমহাবলঃ
দ্রৌণিমভ্যদ্রবত্ক্রুদ্ধো গজেন্দ্রমিব কেসরী
131.64
রথাক্ষমাত্রৈরিষুভিরভ্যবর্ষদ্ঘটোত্কচঃ
রথিনামৃষভং দ্রৌণিং ধারাভিরিব তোয়দঃ
131.65
শরবৃষ্টিং শরৈর্দ্রৌণিরপ্রাপ্তাং তাং ব্যশাতয়ৎ
ততোঽন্তরিক্ষে বাণানাং সংগ্রামোঽন্য ইবাভবৎ
131.66
অথাস্ত্রসংঘর্ষকৃতৈর্বিস্ফুলিঙ্গৈঃ সমাবভৌ
বিভাবরীমুখে ব্যোম খদ্যোতৈরিব চিত্রিতম্
131.67
নিশাম্য নিহতাং মায়াং দ্রৌণিনা রণমানিনা
ঘটোত্কচস্ততো মায়াং সসর্জান্তর্হিতঃ পুনঃ
131.68
সোঽভবদ্গিরিরত্যুচ্চঃ শিখরৈস্তরুসংকটৈঃ
শূলপ্রাসাসিমুসলজলপ্রস্রবণো মহান্
131.69
তমঞ্জনচয়প্রখ্যং দ্রৌণির্দৃষ্ট্বা মহীধরম্
প্রপতদ্ভিশ্চ বহুভিঃ শস্ত্রসংঘৈর্ন চুক্ষুভে
131.70
ততঃ স্ময়ন্নিব দ্রৌণির্বজ্রমস্ত্রমুদীরয়ৎ
স তেনাস্ত্রেণ শৈলেন্দ্রঃ ক্ষিপ্তঃ ক্ষিপ্রমনশ্যত
131.71
ততঃ স তোয়দো ভূত্বা নীলঃ সেন্দ্রায়ুধো দিবি
অশ্মবৃষ্টিভিরত্যুগ্রো দ্রৌণিমাচ্ছাদয়দ্রণে
131.72
অথ সংধায় বায়ব্যমস্ত্রমস্ত্রবিদাং বরঃ
ব্যধমদ্দ্রোণতনয়ো নীলমেঘং সমুত্থিতম্
131.73
স মার্গণগণৈর্দ্রৌণির্দিশঃ প্রচ্ছাদ্য সর্বতঃ
শতং রথসহস্রাণাং জঘান দ্বিপদাং বরঃ
131.74
স দৃষ্ট্বা পুনরায়ান্তং রথেনায়তকার্মুকম্
ঘটোত্কচমসংভ্রান্তং রাক্ষসৈর্বহুভির্বৃতম্
131.75
সিংহশার্দূলসদৃশৈর্মত্তদ্বিরদবিক্রমৈঃ
গজস্থৈশ্চ রথস্থৈশ্চ বাজিপৃষ্ঠগতৈরপি
131.76
বিবৃতাস্যশিরোগ্রীবৈর্হৈডিম্বানুচরৈঃ সহ
পৌলস্ত্যৈর্যাতুধানৈশ্চ তামসৈশ্চোগ্রবিক্রমৈঃ
131.77
নানাশস্ত্রধরৈর্বীরৈর্নানাকবচভূষণৈঃ
মহাবলৈর্ভীমরবৈঃ সংরম্ভোদ্বৃত্তলোচনৈঃ
131.78
উপস্থিতৈস্ততো যুদ্ধে রাক্ষসৈর্যুদ্ধদুর্মদৈঃ
বিষণ্ণমভিসংপ্রেক্ষ্য পুত্রং তে দ্রৌণিরব্রবীৎ
131.79
তিষ্ঠ দুর্যোধনাদ্য ত্বং ন কার্যঃ সংভ্রমস্ত্বয়া
সহৈভির্ভ্রাতৃভির্বীরৈঃ পার্থিবৈশ্চেন্দ্রবিক্রমৈঃ
131.80
নিহনিষ্যাম্যমিত্রাংস্তে ন তবাস্তি পরাজয়ঃ
সত্যং তে প্রতিজানামি পর্যাশ্বাসয় বাহিনীম্
131.81
দুর্যোধন উবাচ
ন ত্বেতদদ্ভুতং মন্যে যত্তে মহদিদং মনঃ
অস্মাসু চ পরা ভক্তিস্তব গৌতমিনন্দন
131.82
সংজয় উবাচ
অশ্বত্থামানমুক্ত্বৈবং ততঃ সৌবলমব্রবীৎ
বৃতঃ শতসহস্রেণ রথানাং রণশোভিনাম্
131.83
ষষ্ট্যা গজসহস্রৈশ্চ প্রয়াহি ত্বং ধনংজয়ম্
কর্ণশ্চ বৃষসেনশ্চ কৃপো নীলস্তথৈব চ
131.84
উদীচ্যাঃ কৃতবর্মা চ পুরুমিত্রঃ শ্রুতার্পণঃ
দুঃশাসনো নিকুম্ভশ্চ কুণ্ডভেদী উরুক্রমঃ
131.85
পুরংজয়ো দৃঢরথঃ পতাকী হেমপঙ্কজঃ
শল্যারুণীন্দ্রসেনাশ্চ সংজয়ো বিজয়ো জয়ঃ
131.86
কমলাক্ষঃ পুরুঃ ক্রাথী জয়বর্মা সুদর্শনঃ
এতে ত্বামনুয়াস্যন্তি পত্তীনাময়ুতানি ষট্
131.87
জহি ভীমং যমৌ চোভৌ ধর্মরাজং চ মাতুল
অসুরানিব দেবেন্দ্রো জয়াশা মে ত্বয়ি স্থিতা
131.88
দারিতান্দ্রৌণিনা বাণৈর্ভৃশং বিক্ষতবিগ্রহান্
জহি মাতুল কৌন্তেয়ানসুরানিব পাবকিঃ
131.89
এবমুক্তো যয়ৌ শীঘ্রং পুত্রেণ তব সৌবলঃ
পিপ্রীষুস্তে সুতান্রাজন্দিধক্ষুশ্চৈব পাণ্ডবান্
131.90
অথ প্রববৃতে যুদ্ধং দ্রৌণিরাক্ষসয়োর্মৃধে
বিভাবর্যাং সুতুমুলং শক্রপ্রহ্রাদয়োরিব
131.91
ততো ঘটোত্কচো বাণৈর্দশভির্গৌতমীসুতম্
জঘানোরসি সংক্রুদ্ধো বিষাগ্নিপ্রতিমৈর্দৃঢৈঃ
131.92
স তৈরভ্যাহতো গাঢং শরৈর্ভীমসুতেরিতৈঃ
চচাল রথমধ্যস্থো বাতোদ্ধূত ইব দ্রুমঃ
131.93
ভূয়শ্চাঞ্জলিকেনাস্য মার্গণেন মহাপ্রভম্
দ্রৌণিহস্তস্থিতং চাপং চিচ্ছেদাশু ঘটোত্কচঃ
131.94
ততোঽন্যদ্দ্রৌণিরাদায় ধনুর্ভারসহং মহৎ
ববর্ষ বিশিখাংস্তীক্ষ্ণান্বারিধারা ইবাম্বুদঃ
131.95
ততঃ শারদ্বতীপুত্রঃ প্রেষয়ামাস ভারত
সুবর্ণপুঙ্খাঞ্শত্রুঘ্নান্খচরান্খচরান্প্রতি
131.96
তদ্বাণৈরর্দিতং যূথং রক্ষসাং পীনবক্ষসাম্
সিংহৈরিব বভৌ মত্তং গজানামাকুলং কুলম্
131.97
বিধম্য রাক্ষসান্বাণৈঃ সাশ্বসূতরথান্বিভুঃ
দদাহ ভগবান্বহ্নির্ভূতানীব যুগক্ষয়ে
131.98
স দগ্ধ্বাক্ষৌহিণীং বাণৈর্নৈরৃতান্রুরুচে ভৃশম্
পুরেব ত্রিপুরং দগ্ধ্বা দিবি দেবো মহেশ্বরঃ
131.99
যুগান্তে সর্বভূতানি দগ্ধ্বেব বসুরুল্বণঃ
ররাজ জয়তাং শ্রেষ্ঠো দ্রোণপুত্রস্তবাহিতান্
131.100
তেষু রাজসহস্রেষু পাণ্ডবেয়েষু ভারত
নৈনং নিরীক্ষিতুং কশ্চিচ্ছক্নোতি দ্রৌণিমাহবে
ঋতে ঘটোত্কচাদ্বীরাদ্রাক্ষসেন্দ্রান্মহাবলাৎ
131.101
স পুনর্ভরতশ্রেষ্ঠ ক্রোধাদ্রক্তান্তলোচনঃ
তলং তলেন সংহত্য সংদশ্য দশনচ্ছদম্
স্বসূতমব্রবীত্ক্রুদ্ধো দ্রোণপুত্রায় মাং বহ
131.102
স যয়ৌ ঘোররূপেণ তেন জৈত্রপতাকিনা
দ্বৈরথং দ্রোণপুত্রেণ পুনরপ্যরিসূদনঃ
131.103
স চিক্ষেপ ততঃ ক্রুদ্ধো দ্রোণপুত্রায় রাক্ষসঃ
অষ্টচক্রাং মহারৌদ্রামশনীং রুদ্রনির্মিতাম্
131.104
তামবপ্লুত্য জগ্রাহ দ্রৌণির্ন্যস্য রথে ধনুঃ
চিক্ষেপ চৈনাং তস্যৈব স্যন্দনাত্সোঽবপুপ্লুবে
131.105
সাশ্বসূতধ্বজং বাহং ভস্ম কৃত্বা মহাপ্রভা
বিবেশ বসুধাং ভিত্ত্বা সাশনির্ভৃশদারুণা
131.106
দ্রৌণেস্তত্কর্ম দৃষ্ট্বা তু সর্বভূতান্যপূজয়ন্
যদবপ্লুত্য জগ্রাহ ঘোরাং শংকরনির্মিতাম্
131.107
ধৃষ্টদ্যুম্নরথং গত্বা ভৈমসেনিস্ততো নৃপ
মুমোচ নিশিতান্বাণান্পুনর্দ্রৌণের্মহোরসি
131.108
ধৃষ্টদ্যুম্নোঽপ্যসংভ্রান্তো মুমোচাশীবিষোপমান্
সুবর্ণপুঙ্খান্বিশিখান্দ্রোণপুত্রস্য বক্ষসি
131.109
ততো মুমোচ নারাচান্দ্রৌণিস্তাভ্যাং সহস্রশঃ
তাবপ্যগ্নিশিখাপ্রখ্যৈর্জঘ্নতুস্তস্য মার্গণান্
131.110
অতিতীব্রমভূদ্যুদ্ধং তয়োঃ পুরুষসিংহয়োঃ
যোধানাং প্রীতিজননং দ্রৌণেশ্চ ভরতর্ষভ
131.111
ততো রথসহস্রেণ দ্বিরদানাং শতৈস্ত্রিভিঃ
ষড্ভির্বাজিসহস্রৈশ্চ ভীমস্তং দেশমাব্রজৎ
131.112
ততো ভীমাত্মজং রক্ষো ধৃষ্টদ্যুম্নং চ সানুগম্
অয়োধয়ত ধর্মাত্মা দ্রৌণিরক্লিষ্টকর্মকৃৎ
131.113
তত্রাদ্ভুততমং দ্রৌণির্দর্শয়ামাস বিক্রমম্
অশক্যং কর্তুমন্যেন সর্বভূতেষু ভারত
131.114
নিমেষান্তরমাত্রেণ সাশ্বসূতরথদ্বিপাম্
অক্ষৌহিণীং রাক্ষসানাং শিতৈর্বাণৈরশাতয়ৎ
131.115
মিষতো ভীমসেনস্য হৈডিম্বেঃ পার্ষতস্য চ
যময়োর্ধর্মপুত্রস্য বিজয়স্যাচ্যুতস্য চ
131.116
প্রগাঢমঞ্জোগতিভির্নারাচৈরভিতাডিতাঃ
নিপেতুর্দ্বিরদা ভূমৌ দ্বিশৃঙ্গা ইব পর্বতাঃ
131.117
নিকৃত্তৈর্হস্তিহস্তৈশ্চ বিচলদ্ভিরিতস্ততঃ
ররাজ বসুধা কীর্ণা বিসর্পদ্ভিরিবোরগৈঃ
131.118
ক্ষিপ্তৈঃ কাঞ্চনদণ্ডৈশ্চ নৃপচ্ছত্রৈঃ ক্ষিতির্বভৌ
দ্যৌরিবোদিতচন্দ্রার্কা গ্রহাকীর্ণা যুগক্ষয়ে
131.119
প্রবৃদ্ধধ্বজমণ্ডূকাং ভেরীবিস্তীর্ণকচ্ছপাম্
ছত্রহংসাবলীজুষ্টাং ফেনচামরমালিনীম্
131.120
কঙ্কগৃধ্রমহাগ্রাহাং নৈকায়ুধঝষাকুলাম্
রথক্ষিপ্তমহাবপ্রাং পতাকারুচিরদ্রুমাম্
131.121
শরমীনাং মহারৌদ্রাং প্রাসশক্ত্যুগ্রডুণ্ডুভাম্
মজ্জামাংসমহাপঙ্কাং কবন্ধাবর্জিতোডুপাম্
131.122
কেশশৈবলকল্মাষাং ভীরূণাং কশ্মলাবহাম্
নাগেন্দ্রহয়য়োধানাং শরীরব্যয়সংভবাম্
131.123
শোণিতৌঘমহাবেগাং দ্রৌণিঃ প্রাবর্তয়ন্নদীম্
যোধার্তরবনির্ঘোষাং ক্ষতজোর্মিসমাকুলাম্
131.124
প্রায়াদতিমহাঘোরং যমক্ষয়মহোদধিম্
নিহত্য রাক্ষসান্বাণৈর্দ্রৌণির্হৈডিম্বমার্দয়ৎ
131.125
পুনরপ্যতিসংক্রুদ্ধঃ সবৃকোদরপার্ষতান্
স নারাচগণৈঃ পার্থান্দ্রৌণির্বিদ্ধ্বা মহাবলঃ
131.126
জঘান সুরথং নাম দ্রুপদস্য সুতং বিভুঃ
পুনঃ শ্রুতংজয়ং নাম সুরথস্যানুজং রণে
131.127
বলানীকং জয়ানীকং জয়াশ্বং চাভিজঘ্নিবান্
শ্রুতাহ্বয়ং চ রাজেন্দ্র দ্রৌণির্নিন্যে যমক্ষয়ম্
131.128
ত্রিভিশ্চান্যৈঃ শরৈস্তীক্ষ্ণৈঃ সুপুঙ্খৈ রুক্মমালিনম্
শত্রুংজয়ং চ বলিনং শক্রলোকং নিনায় হ
131.129
জঘান স পৃষধ্রং চ চন্দ্রদেবং চ মানিনম্
কুন্তিভোজসুতাংশ্চাজৌ দশভির্দশ জঘ্নিবান্
131.130
অশ্বত্থামা সুসংক্রুদ্ধঃ সংধায়োগ্রমজিহ্মগম্
মুমোচাকর্ণপূর্ণেন ধনুষা শরমুত্তমম্
যমদণ্ডোপমং ঘোরমুদ্দিশ্যাশু ঘটোত্কচম্
131.131
স ভিত্ত্বা হৃদয়ং তস্য রাক্ষসস্য মহাশরঃ
বিবেশ বসুধাং শীঘ্রং সপুঙ্খঃ পৃথিবীপতে
131.132
তং হতং পতিতং জ্ঞাত্বা ধৃষ্টদ্যুম্নো মহারথঃ
দ্রৌণেঃ সকাশাদ্রাজেন্দ্র অপনিন্যে রথান্তরম্
131.133
তথা পরাঙ্মুখরথং সৈন্যং যৌধিষ্ঠিরং নৃপ
পরাজিত্য রণে বীরো দ্রোণপুত্রো ননাদ হ
পূজিতঃ সর্বভূতৈশ্চ তব পুত্রৈশ্চ ভারত
131.134
অথ শরশতভিন্নকৃত্তদেহৈ;র্হতপতিতৈঃ ক্ষণদাচরৈঃ সমন্তাৎ
নিধনমুপগতৈর্মহী কৃতাভূ;দ্গিরিশিখরৈরিব দুর্গমাতিরৌদ্রা
131.135
তং সিদ্ধগন্ধর্বপিশাচসংঘা; নাগাঃ সুপর্ণাঃ পিতরো বয়াংসি
রক্ষোগণা ভূতগণাশ্চ দ্রৌণি;মপূজয়ন্নপ্সরসঃ সুরাশ্চ