Utshovঅধ্যায় 130
130.1
ধৃতরাষ্ট্র উবাচ
তস্মিন্প্রবিষ্টে দুর্ধর্ষে সৃঞ্জয়ানমিতৌজসি
অমৃষ্যমাণে সংরব্ধে কা বোঽভূদ্বৈ মতিস্তদা
130.2
দুর্যোধনং তথা পুত্রমুক্ত্বা শাস্ত্রাতিগং মম
যত্প্রাবিশদমেয়াত্মা কিং পার্থঃ প্রত্যপদ্যত
130.3
নিহতে সৈন্ধবে বীরে ভূরিশ্রবসি চৈব হি
যদভ্যগান্মহাতেজাঃ পাঞ্চালানপরাজিতঃ
130.4
কিমমন্যত দুর্ধর্ষঃ প্রবিষ্টে শত্রুতাপনে
দুর্যোধনশ্চ কিং কৃত্যং প্রাপ্তকালমমন্যত
130.5
কে চ তং বরদং বীরমন্বয়ুর্দ্বিজসত্তমম্
কে চাস্য পৃষ্ঠতোঽগচ্ছন্বীরাঃ শূরস্য যুধ্যতঃ
কে পুরস্তাদয়ুধ্যন্ত নিঘ্নতঃ শাত্রবান্রণে
130.6
মন্যেঽহং পাণ্ডবান্সর্বান্ভারদ্বাজশরার্দিতান্
শিশিরে কম্পমানা বৈ কৃশা গাব ইবাভিভো
130.7
প্রবিশ্য স মহেষ্বাসঃ পাঞ্চালানরিমর্দনঃ
কথং নু পুরুষব্যাঘ্রঃ পঞ্চত্বমুপজগ্মিবান্
130.8
সর্বেষু সৈন্যেষু চ সংগতেষু; রাত্রৌ সমেতেষু মহারথেষু
সংলোড্যমানেষু পৃথগ্বিধেষু; কে বস্তদানীং মতিমন্ত আসন্
130.9
হতাংশ্চৈব বিষক্তাংশ্চ পরাভূতাংশ্চ শংসসি
রথিনো বিরথাংশ্চৈব কৃতান্যুদ্ধেষু মামকান্
130.10
কথমেষাং তদা তত্র পার্থানামপলায়িনাম্
প্রকাশমভবদ্রাত্রৌ কথং কুরুষু সংজয়
130.11
সংজয় উবাচ
রাত্রিয়ুদ্ধে তদা রাজন্বর্তমানে সুদারুণে
দ্রোণমভ্যদ্রবন্রাত্রৌ পাণ্ডবাঃ সহসৈনিকাঃ
130.12
ততো দ্রোণঃ কেকয়াংশ্চ ধৃষ্টদ্যুম্নস্য চাত্মজান্
প্রেষয়ন্মৃত্যুলোকায় সর্বানিষুভিরাশুগৈঃ
130.13
তস্য প্রমুখতো রাজন্যেঽবর্তন্ত মহারথাঃ
তান্সর্বান্প্রেষয়ামাস পরলোকায় ভারত
130.14
প্রমথ্নন্তং তদা বীরং ভারদ্বাজং মহারথম্
অভ্যবর্তত সংক্রুদ্ধঃ শিবী রাজন্প্রতাপবান্
130.15
তমাপতন্তং সংপ্রেক্ষ্য পাণ্ডবানাং মহারথম্
বিব্যাধ দশভির্দ্রোণঃ সর্বপারশবৈঃ শরৈঃ
130.16
তং শিবিঃ প্রতিবিব্যাধ ত্রিংশতা নিশিতৈঃ শরৈঃ
সারথিং চাস্য ভল্লেন স্ময়মানো ন্যপাতয়ৎ
130.17
তস্য দ্রোণো হয়ান্হত্বা সারথিং চ মহাত্মনঃ
অথাস্য সশিরস্ত্রাণং শিরঃ কায়াদপাহরৎ
130.18
কলিঙ্গানাং চ সৈন্যেন কলিঙ্গস্য সুতো রণে
পূর্বং পিতৃবধাত্ক্রুদ্ধো ভীমসেনমুপাদ্রবৎ
130.19
স ভীমং পঞ্চভির্বিদ্ধ্বা পুনর্বিব্যাধ সপ্তভিঃ
বিশোকং ত্রিভিরাজঘ্নে ধ্বজমেকেন পত্রিণা
130.20
কলিঙ্গানাং তু তং শূরং ক্রুদ্ধং ক্রুদ্ধো বৃকোদরঃ
রথাদ্রথমভিদ্রুত্য মুষ্টিনাভিজঘান হ
130.21
তস্য মুষ্টিহতস্যাজৌ পাণ্ডবেন বলীয়সা
সর্বাণ্যস্থীনি সহসা প্রাপতন্বৈ পৃথক্পৃথক্
130.22
তং কর্ণো ভ্রাতরশ্চাস্য নামৃষ্যন্ত মহারথাঃ
তে ভীমসেনং নারাচৈর্জঘ্নুরাশীবিষোপমৈঃ
130.23
ততঃ শত্রুরথং ত্যক্ত্বা ভীমো ধ্রুবরথং গতঃ
ধ্রুবং চাস্যন্তমনিশং মুষ্টিনা সমপোথয়ৎ
স তথা পাণ্ডুপুত্রেণ বলিনা নিহতোঽপতৎ
130.24
তং নিহত্য মহারাজ ভীমসেনো মহাবলঃ
জয়রাতরথং প্রাপ্য মুহুঃ সিংহ ইবানদৎ
130.25
জয়রাতমথাক্ষিপ্য নদন্সব্যেন পাণিনা
তলেন নাশয়ামাস কর্ণস্যৈবাগ্রতঃ স্থিতম্
130.26
কর্ণস্তু পাণ্ডবে শক্তিং কাঞ্চনীং সমবাসৃজৎ
ততস্তামেব জগ্রাহ প্রহসন্পাণ্ডুনন্দনঃ
130.27
কর্ণায়ৈব চ দুর্ধর্ষশ্চিক্ষেপাজৌ বৃকোদরঃ
তামন্তরিক্ষে চিচ্ছেদ শকুনিস্তৈলপায়িনা
130.28
ততস্তব সুতা রাজন্ভীমস্য রথমাব্রজন্
মহতা শরবর্ষেণ ছাদয়ন্তো বৃকোদরম্
130.29
দুর্মদস্য ততো ভীমঃ প্রহসন্নিব সংয়ুগে
সারথিং চ হয়াংশ্চৈব শরৈর্নিন্যে যমক্ষয়ম্
দুর্মদস্তু ততো যানং দুষ্কর্ণস্যাবপুপ্লুবে
130.30
তাবেকরথমারূঢৌ ভ্রাতরৌ পরতাপনৌ
সংগ্রামশিরসো মধ্যে ভীমং দ্বাবভ্যধাবতাম্
যথাম্বুপতিমিত্রৌ হি তারকং দৈত্যসত্তমম্
130.31
ততস্তু দুর্মদশ্চৈব দুষ্কর্ণশ্চ তবাত্মজৌ
রথমেকং সমারুহ্য ভীমং বাণৈরবিধ্যতাম্
130.32
ততঃ কর্ণস্য মিষতো দ্রৌণের্দুর্যোধনস্য চ
কৃপস্য সোমদত্তস্য বাহ্লীকস্য চ পাণ্ডবঃ
130.33
দুর্মদস্য চ বীরস্য দুষ্কর্ণস্য চ তং রথম্
পাদপ্রহারেণ ধরাং প্রাবেশয়দরিংদমঃ
130.34
ততঃ সুতৌ তে বলিনৌ শূরৌ দুষ্কর্ণদুর্মদৌ
মুষ্টিনাহত্য সংক্রুদ্ধো মমর্দ চরণেন চ
130.35
ততো হাহাকৃতে সৈন্যে দৃষ্ট্বা ভীমং নৃপাব্রুবন্
রুদ্রোঽয়ং ভীমরূপেণ ধার্তরাষ্ট্রেষু গৃধ্যতি
130.36
এবমুক্ত্বাপলায়ন্ত সর্বে ভারত পার্থিবাঃ
বিসংজ্ঞাবাহয়ন্বাহান্ন চ দ্বৌ সহ ধাবতঃ
130.37
ততো বলে ভৃশলুলিতে নিশামুখে; সুপূজিতো নৃপবৃষভৈর্বৃকোদরঃ
মহাবলঃ কমলবিবুদ্ধলোচনো; যুধিষ্ঠিরং নৃপতিমপূজয়দ্বলী
130.38
ততো যমৌ দ্রুপদবিরাটকেকয়া; যুধিষ্ঠিরশ্চাপি পরাং মুদং যয়ুঃ
বৃকোদরং ভৃশমভিপূজয়ংশ্চ তে; যথান্ধকে প্রতিনিহতে হরং সুরাঃ
130.39
ততঃ সুতাস্তব বরুণাত্মজোপমা; রুষান্বিতাঃ সহ গুরুণা মহাত্মনা
বৃকোদরং সরথপদাতিকুঞ্জরা; যুয়ুত্সবো ভৃশমভিপর্যবারয়ন্
130.40
ততোঽভবত্তিমিরঘনৈরিবাবৃতং; মহাভয়ে ভয়দমতীব দারুণম্
নিশামুখে বডবৃকগৃধ্রমোদনং; মহাত্মনাং নৃপবরয়ুদ্ধমদ্ভুতম্