Utshovঅধ্যায় 129
129.1
ধৃতরাষ্ট্র উবাচ
যত্তদা প্রাবিশত্পাণ্ডূনাচার্যঃ কুপিতো বশী
উক্ত্বা দুর্যোধনং সম্যঙ্মম শাস্ত্রাতিগং সুতম্
129.2
প্রবিশ্য বিচরন্তং চ রণে শূরমবস্থিতম্
কথং দ্রোণং মহেষ্বাসং পাণ্ডবাঃ পর্যবারয়ন্
129.3
কেঽরক্ষন্দক্ষিণং চক্রমাচার্যস্য মহাত্মনঃ
কে চোত্তরমরক্ষন্ত নিঘ্নতঃ শাত্রবান্রণে
129.4
নৃত্যন্স রথমার্গেষু সর্বশস্ত্রভৃতাং বরঃ
ধূমকেতুরিব ক্রুদ্ধঃ কথং মৃত্যুমুপেয়িবান্
129.5
সংজয় উবাচ
সায়াহ্নে সৈন্ধবং হত্বা রাজ্ঞা পার্থঃ সমেত্য চ
সাত্যকিশ্চ মহেষ্বাসো দ্রোণমেবাভ্যধাবতাম্
129.6
তথা যুধিষ্ঠিরস্তূর্ণং ভীমসেনশ্চ পাণ্ডবঃ
পৃথক্চমূভ্যাং সংসক্তৌ দ্রোণমেবাভ্যধাবতাম্
129.7
তথৈব নকুলো ধীমান্সহদেবশ্চ দুর্জয়ঃ
ধৃষ্টদ্যুম্নঃ শতানীকো বিরাটশ্চ সকেকয়ঃ
মত্স্যাঃ শাল্বেয়সেনাশ্চ দ্রোণমেব যয়ুর্যুধি
129.8
দ্রুপদশ্চ তথা রাজা পাঞ্চালৈরভিরক্ষিতঃ
ধৃষ্টদ্যুম্নপিতা রাজন্দ্রোণমেবাভ্যবর্তত
129.9
দ্রৌপদেয়া মহেষ্বাসা রাক্ষসশ্চ ঘটোত্কচঃ
সসেনাস্তেঽভ্যবর্তন্ত দ্রোণমেব মহাদ্যুতিম্
129.10
প্রভদ্রকাশ্চ পাঞ্চালাঃ ষট্সহস্রাঃ প্রহারিণঃ
দ্রোণমেবাভ্যবর্তন্ত পুরস্কৃত্য শিখণ্ডিনম্
129.11
তথেতরে নরব্যাঘ্রাঃ পাণ্ডবানাং মহারথাঃ
সহিতাঃ সংন্যবর্তন্ত দ্রোণমেব দ্বিজর্ষভম্
129.12
তেষু শূরেষু যুদ্ধায় গতেষু ভরতর্ষভ
বভূব রজনী ঘোরা ভীরূণাং ভয়বর্ধিনী
129.13
যোধানামশিবা রৌদ্রা রাজন্নন্তকগামিনী
কুঞ্জরাশ্বমনুষ্যাণাং প্রাণান্তকরণী তদা
129.14
তস্যাং রজন্যাং ঘোরায়াং নদন্ত্যঃ সর্বতঃ শিবাঃ
ন্যবেদয়ন্ভয়ং ঘোরং সজ্বালকবলৈর্মুখৈঃ
129.15
উলূকাশ্চাপ্যদৃশ্যন্ত শংসন্তো বিপুলং ভয়ম্
বিশেষতঃ কৌরবাণাং ধ্বজিন্যামতিদারুণম্
129.16
ততঃ সৈন্যেষু রাজেন্দ্র শব্দঃ সমভবন্মহান্
ভেরীশব্দেন মহতা মৃদঙ্গানাং স্বনেন চ
129.17
গজানাং গর্জিতৈশ্চাপি তুরঙ্গাণাং চ হেষিতৈঃ
খুরশব্দনিপাতৈশ্চ তুমুলঃ সর্বতোঽভবৎ
129.18
ততঃ সমভবদ্যুদ্ধং সংধ্যায়ামতিদারুণম্
দ্রোণস্য চ মহারাজ সৃঞ্জয়ানাং চ সর্বশঃ
129.19
তমসা চাবৃতে লোকে ন প্রাজ্ঞায়ত কিংচন
সৈন্যেন রজসা চৈব সমন্তাদুত্থিতেন হ
129.20
নরস্যাশ্বস্য নাগস্য সমসজ্জত শোণিতম্
নাপশ্যাম রজো ভৌমং কশ্মলেনাভিসংবৃতাঃ
129.21
রাত্রৌ বংশবনস্যেব দহ্যমানস্য পর্বতে
ঘোরশ্চটচটাশব্দঃ শস্ত্রাণাং পততামভূৎ
129.22
নৈব স্বে ন পরে রাজন্প্রাজ্ঞায়ন্ত তমোবৃতে
উন্মত্তমিব তত্সর্বং বভূব রজনীমুখে
129.23
ভৌমং রজোঽথ রাজেন্দ্র শোণিতেন প্রশামিতম্
শাতকৌম্ভৈশ্চ কবচৈর্ভূষণৈশ্চ তমোঽভ্যগাৎ
129.24
ততঃ সা ভারতী সেনা মণিহেমবিভূষিতা
দ্যৌরিবাসীত্সনক্ষত্রা রজন্যাং ভরতর্ষভ
129.25
গোমায়ুবডসংঘুষ্টা শক্তিধ্বজসমাকুলা
দারুণাভিরুতা ঘোরা ক্ষ্বেডিতোত্ক্রুষ্টনাদিতা
129.26
ততোঽভবন্মহাশব্দস্তুমুলো লোমহর্ষণঃ
সমাবৃণ্বন্দিশঃ সর্বা মহেন্দ্রাশনিনিস্বনঃ
129.27
সা নিশীথে মহারাজ সেনাদৃশ্যত ভারতী
অঙ্গদৈঃ কুণ্ডলৈর্নিষ্কৈঃ শস্ত্রৈশ্চৈবাবভাসিতা
129.28
তত্র নাগা রথাশ্চৈব জাম্বূনদবিভূষিতাঃ
নিশায়াং প্রত্যদৃশ্যন্ত মেঘা ইব সবিদ্যুতঃ
129.29
ঋষ্টিশক্তিগদাবাণমুসলপ্রাসপট্টিশাঃ
সংপতন্তো ব্যদৃশ্যন্ত ভ্রাজমানা ইবাগ্নয়ঃ
129.30
দুর্যোধনপুরোবাতাং রথনাগবলাহকাম্
বাদিত্রঘোষস্তনিতাং চাপবিদ্যুদ্ধ্বজৈর্বৃতাম্
129.31
দ্রোণপাণ্ডবপর্জন্যাং খড্গশক্তিগদাশনিম্
শরধারাস্ত্রপবনাং ভৃশং শীতোষ্ণসংকুলাম্
129.32
ঘোরাং বিস্মাপনীমুগ্রাং জীবিতচ্ছিদমপ্লবাম্
তাং প্রাবিশন্নতিভয়াং সেনাং যুদ্ধচিকীর্ষবঃ
129.33
তস্মিন্রাত্রিমুখে ঘোরে মহাশব্দনিনাদিতে
ভীরূণাং ত্রাসজননে শূরাণাং হর্ষবর্ধনে
129.34
রাত্রিয়ুদ্ধে তদা ঘোরে বর্তমানে সুদারুণে
দ্রোণমভ্যদ্রবন্ক্রুদ্ধাঃ সহিতাঃ পাণ্ডুসৃঞ্জয়াঃ
129.35
যে যে প্রমুখতো রাজন্ন্যবর্তন্ত মহাত্মনঃ
তান্সর্বান্বিমুখাংশ্চক্রে কাংশ্চিন্নিন্যে যমক্ষয়ম্