Utshovঅধ্যায় 128
128.1
সংজয় উবাচ
তদুদীর্ণগজাশ্বৌঘং বলং তব জনাধিপ
পাণ্ডুসেনামভিদ্রুত্য যোধয়ামাস সর্বতঃ
128.2
পাঞ্চালাঃ কুরবশ্চৈব যোধয়ন্তঃ পরস্পরম্
যমরাষ্ট্রায় মহতে পরলোকায় দীক্ষিতাঃ
128.3
শূরাঃ শূরৈঃ সমাগম্য শরতোমরশক্তিভিঃ
বিব্যধুঃ সমরে তূর্ণং নিন্যুশ্চৈব যমক্ষয়ম্
128.4
রথিনাং রথিভিঃ সার্ধং রুধিরস্রাবি দারুণম্
প্রাবর্তত মহদ্যুদ্ধং নিঘ্নতামিতরেতরম্
128.5
বারণাশ্চ মহারাজ সমাসাদ্য পরস্পরম্
বিষাণৈর্দারয়ামাসুঃ সংক্রুদ্ধাশ্চ মদোত্কটাঃ
128.6
হয়ারোহান্হয়ারোহাঃ প্রাসশক্তিপরশ্বধৈঃ
বিভিদুস্তুমুলে যুদ্ধে প্রার্থয়ন্তো মহদ্যশঃ
128.7
পত্তয়শ্চ মহাবাহো শতশঃ শস্ত্রপাণয়ঃ
অন্যোন্যমার্দয়ন্রাজন্নিত্যয়ত্তাঃ পরাক্রমে
128.8
গোত্রাণাং নামধেয়ানাং কুলানাং চৈব মারিষ
শ্রবণাদ্ধি বিজানীমঃ পাঞ্চালান্কুরুভিঃ সহ
128.9
অন্যোন্যং সমরে যোধাঃ শরশক্তিপরশ্বধৈঃ
প্রেষয়ন্পরলোকায় বিচরন্তো হ্যভীতবৎ
128.10
শরৈর্দশ দিশো রাজংস্তেষাং মুক্তৈঃ সহস্রশঃ
ন ভ্রাজন্ত যথাপূর্বং ভাস্করেঽস্তং গতেঽপি চ
128.11
তথা প্রয়ুধ্যমানেষু পাণ্ডবেয়েষু নির্ভয়ঃ
দুর্যোধনো মহারাজ ব্যবগাহত তদ্বলম্
128.12
সৈন্ধবস্য বধেনৈব ভৃশং দুঃখসমন্বিতঃ
মর্তব্যমিতি সংচিন্ত্য প্রাবিশত্তু দ্বিষদ্বলম্
128.13
নাদয়ন্রথঘোষেণ কম্পয়ন্নিব মেদিনীম্
অভ্যবর্তত পুত্রস্তে পাণ্ডবানামনীকিনীম্
128.14
স সংনিপাতস্তুমুলস্তস্য তেষাং চ ভারত
অভবত্সর্বসৈন্যানামভাবকরণো মহান্
128.15
মধ্যংদিনগতং সূর্যং প্রতপন্তং গভস্তিভিঃ
তথা তব সুতং মধ্যে প্রতপন্তং শরোর্মিভিঃ
128.16
ন শেকুর্ভারতং যুদ্ধে পাণ্ডবাঃ সমবেক্ষিতুম্
পলায়নে কৃতোত্সাহা নিরুত্সাহা দ্বিষজ্জয়ে
128.17
পর্যধাবন্ত পাঞ্চালা বধ্যমানা মহাত্মনা
রুক্মপুঙ্খৈঃ প্রসন্নাগ্রৈস্তব পুত্রেণ ধন্বিনা
অর্দ্যমানাঃ শরৈস্তূর্ণং ন্যপতন্পাণ্ডুসৈনিকাঃ
128.18
ন তাদৃশং রণে কর্ম কৃতবন্তস্তু তাবকাঃ
যাদৃশং কৃতবান্রাজা পুত্রস্তব বিশাং পতে
128.19
পুত্রেণ তব সা সেনা পাণ্ডবী মথিতা রণে
নলিনী দ্বিরদেনেব সমন্তাত্ফুল্লপঙ্কজা
128.20
ক্ষীণতোয়ানিলার্কাভ্যাং হতত্বিডিব পদ্মিনী
বভূব পাণ্ডবী সেনা তব পুত্রস্য তেজসা
128.21
পাণ্ডুসেনাং হতাং দৃষ্ট্বা তব পুত্রেণ ভারত
ভীমসেনপুরোগাস্তু পাঞ্চালাঃ সমুপাদ্রবন্
128.22
স ভীমসেনং দশভির্মাদ্রীপুত্রৌ ত্রিভিস্ত্রিভিঃ
বিরাটদ্রুপদৌ ষড্ভিঃ শতেন চ শিখণ্ডিনম্
128.23
ধৃষ্টদ্যুম্নং চ সপ্তত্যা ধর্মপুত্রং চ সপ্তভিঃ
কেকয়াংশ্চৈব চেদীংশ্চ বহুভির্নিশিতৈঃ শরৈঃ
128.24
সাত্বতং পঞ্চভির্বিদ্ধ্বা দ্রৌপদেয়াংস্ত্রিভিস্ত্রিভিঃ
ঘটোত্কচং চ সমরে বিদ্ধ্বা সিংহ ইবানদৎ
128.25
শতশশ্চাপরান্যোধান্সদ্বিপাশ্বরথান্রণে
শরৈরবচকর্তোগ্রৈঃ ক্রুদ্ধোঽন্তক ইব প্রজাঃ
128.26
তস্য তান্নিঘ্নতঃ শত্রূন্রুক্মপৃষ্ঠং মহদ্ধনুঃ
ভল্লাভ্যাং পাণ্ডবো জ্যেষ্ঠস্ত্রিধা চিচ্ছেদ মারিষ
128.27
বিব্যাধ চৈনং দশভিঃ সম্যগস্তৈঃ শিতৈঃ শরৈঃ
মর্মাণি ভিত্ত্বা তে সর্বে সংভগ্নাঃ ক্ষিতিমাবিশন্
128.28
ততঃ প্রমুদিতা যোধাঃ পরিবব্রুর্যুধিষ্ঠিরম্
বৃত্রহত্যৈ যথা দেবাঃ পরিবব্রুঃ পুরংদরম্
128.29
ততো যুধিষ্ঠিরো রাজা তব পুত্রস্য মারিষ
শরং পরমদুর্বারং প্রেষয়ামাস সংয়ুগে
স তেন ভৃশসংবিদ্ধো নিষসাদ রথোত্তমে
128.30
ততঃ পাঞ্চালসৈন্যানাং ভৃশমাসীদ্রবো মহান্
হতো রাজেতি রাজেন্দ্র মুদিতানাং সমন্ততঃ
128.31
বাণশব্দরবশ্চোগ্রঃ শুশ্রুবে তত্র মারিষ
অথ দ্রোণো দ্রুতং তত্র প্রত্যদৃশ্যত সংয়ুগে
128.32
হৃষ্টো দুর্যোধনশ্চাপি দৃঢমাদায় কার্মুকম্
তিষ্ঠ তিষ্ঠেতি রাজানং ব্রুবন্পাণ্ডবমভ্যয়াৎ
128.33
প্রত্যুদ্যয়ুস্তং ত্বরিতাঃ পাঞ্চালা রাজগৃদ্ধিনঃ
তান্দ্রোণঃ প্রতিজগ্রাহ পরীপ্সন্কুরুসত্তমম্
চণ্ডবাতোদ্ধতান্মেঘান্নিঘ্নন্রশ্মিমুচো যথা
128.34
ততো রাজন্মহানাসীত্সংগ্রামো ভূরিবর্ধনঃ
তাবকানাং পরেষাং চ সমেতানাং যুয়ুত্সয়া