Utshovঅধ্যায় 127
127.1
সংজয় উবাচ
ততো দুর্যোধনো রাজা দ্রোণেনৈবং প্রচোদিতঃ
অমর্ষবশমাপন্নো যুদ্ধায়ৈব মনো দধে
127.2
অব্রবীচ্চ তদা কর্ণং পুত্রো দুর্যোধনস্তব
পশ্য কৃষ্ণসহায়েন পাণ্ডবেন কিরীটিনা
আচার্যবিহিতং ব্যূহং ভিন্নং দেবৈঃ সুদুর্ভিদম্
127.3
তব ব্যায়চ্ছমানস্য দ্রোণস্য চ মহাত্মনঃ
মিষতাং যোধমুখ্যানাং সৈন্ধবো বিনিপাতিতঃ
127.4
পশ্য রাধেয় রাজানঃ পৃথিব্যাং প্রবরা যুধি
পার্থেনৈকেন নিহতাঃ সিংহেনেবেতরা মৃগাঃ
127.5
মম ব্যায়চ্ছমানস্য সমরে শত্রুসূদন
অল্পাবশেষং সৈন্যং মে কৃতং শক্রাত্মজেন হ
127.6
কথং হ্যনিচ্ছমানস্য দ্রোণস্য যুধি ফল্গুনঃ
ভিন্দ্যাত্সুদুর্ভিদং ব্যূহং যতমানোঽপি সংয়ুগে
127.7
প্রিয়ো হি ফল্গুনো নিত্যমাচার্যস্য মহাত্মনঃ
ততোঽস্য দত্তবান্দ্বারং নয়ুদ্ধেনারিমর্দন
127.8
অভয়ং সৈন্ধবস্যাজৌ দত্ত্বা দ্রোণঃ পরংতপঃ
প্রাদাত্কিরীটিনে দ্বারং পশ্য নির্গুণতাং মম
127.9
যদ্যদাস্যমনুজ্ঞাং বৈ পূর্বমেব গৃহান্প্রতি
সিন্ধুরাজস্য সমরে নাভবিষ্যজ্জনক্ষয়ঃ
127.10
জয়দ্রথো জীবিতার্থী গচ্ছমানো গৃহান্প্রতি
ময়ানার্যেণ সংরুদ্ধো দ্রোণাত্প্রাপ্যাভয়ং রণে
127.11
অদ্য মে ভ্রাতরঃ ক্ষীণাশ্চিত্রসেনাদয়ো যুধি
ভীমসেনং সমাসাদ্য পশ্যতাং নো দুরাত্মনাম্
127.12
কর্ণ উবাচ
আচার্যং মা বিগর্হস্ব শক্ত্যা যুধ্যত্যসৌ দ্বিজঃ
অজয্যান্পাণ্ডবান্মন্যে দ্রোণেনাস্ত্রবিদা মৃধে
127.13
তথা হ্যেনমতিক্রম্য প্রবিষ্টঃ শ্বেতবাহনঃ
দৈবদৃষ্টোঽন্যথাভাবো ন মন্যে বিদ্যতে ক্বচিৎ
127.14
ততো নো যুধ্যমানানাং পরং শক্ত্যা সুয়োধন
সৈন্ধবো নিহতো রাজন্দৈবমত্র পরং স্মৃতম্
127.15
পরং যত্নং কুর্বতাং চ ত্বয়া সার্ধং রণাজিরে
হত্বাস্মাকং পৌরুষং হি দৈবং পশ্চাত্করোতি নঃ
সততং চেষ্টমানানাং নিকৃত্যা বিক্রমেণ চ
127.16
দৈবোপসৃষ্টঃ পুরুষো যত্কর্ম কুরুতে ক্বচিৎ
কৃতং কৃতং স্ম তত্তস্য দৈবেন বিনিহন্যতে
127.17
যত্কর্তব্যং মনুষ্যেণ ব্যবসায়বতা সতা
তত্কার্যমবিশঙ্কেন সিদ্ধির্দৈবে প্রতিষ্ঠিতা
127.18
নিকৃত্যা নিকৃতাঃ পার্থা বিষয়োগৈশ্চ ভারত
দগ্ধা জতুগৃহে চাপি দ্যূতেন চ পরাজিতাঃ
127.19
রাজনীতিং ব্যপাশ্রিত্য প্রহিতাশ্চৈব কাননম্
যত্নেন চ কৃতং যত্তে দৈবেন বিনিপাতিতম্
127.20
যুধ্যস্ব যত্নমাস্থায় মৃত্যুং কৃত্বা নিবর্তনম্
যততস্তব তেষাং চ দৈবং মার্গেণ যাস্যতি
127.21
ন তেষাং মতিপূর্বং হি সুকৃতং দৃশ্যতে ক্বচিৎ
দুষ্কৃতং তব বা বীর বুদ্ধ্যা হীনং কুরূদ্বহ
127.22
দৈবং প্রমাণং সর্বস্য সুকৃতস্যেতরস্য বা
অনন্যকর্ম দৈবং হি জাগর্তি স্বপতামপি
127.23
বহূনি তব সৈন্যানি যোধাশ্চ বহবস্তথা
ন তথা পাণ্ডুপুত্রাণামেবং যুদ্ধমবর্তত
127.24
তৈরল্পৈর্বহবো যূয়ং ক্ষয়ং নীতাঃ প্রহারিণঃ
শঙ্কে দৈবস্য তত্কর্ম পৌরুষং যেন নাশিতম্
127.25
সংজয় উবাচ
এবং সংভাষমাণানাং বহু তত্তজ্জনাধিপ
পাণ্ডবানামনীকানি সমদৃশ্যন্ত সংয়ুগে
127.26
ততঃ প্রববৃতে যুদ্ধং ব্যতিষক্তরথদ্বিপম্
তাবকানাং পরৈঃ সার্ধং রাজন্দুর্মন্ত্রিতে তব