Utshovঅধ্যায় 126
126.1
ধৃতরাষ্ট্র উবাচ
সিন্ধুরাজে হতে তাত সমরে সব্যসাচিনা
তথৈব ভূরিশ্রবসি কিমাসীদ্বো মনস্তদা
126.2
দুর্যোধনেন চ দ্রোণস্তথোক্তঃ কুরুসংসদি
কিমুক্তবান্পরং তস্মাত্তন্মমাচক্ষ্ব সংজয়
126.3
সংজয় উবাচ
নিষ্টানকো মহানাসীত্সৈন্যানাং তব ভারত
সৈন্ধবং নিহতং দৃষ্ট্বা ভূরিশ্রবসমেব চ
126.4
মন্ত্রিতং তব পুত্রস্য তে সর্বমবমেনিরে
যেন মন্ত্রেণ নিহতাঃ শতশঃ ক্ষত্রিয়র্ষভাঃ
126.5
দ্রোণস্তু তদ্বচঃ শ্রুত্বা পুত্রস্য তব দুর্মনাঃ
মুহূর্তমিব তু ধ্যাত্বা ভৃশমার্তোঽভ্যভাষত
126.6
দুর্যোধন কিমেবং মাং বাক্শরৈরভিকৃন্তসি
অজয্যং সমরে নিত্যং ব্রুবাণং সব্যসাচিনম্
126.7
এতেনৈবার্জুনং জ্ঞাতুমলং কৌরব সংয়ুগে
যচ্ছিখণ্ড্যবধীদ্ভীষ্মং পাল্যমানঃ কিরীটিনা
126.8
অবধ্যং নিহতং দৃষ্ট্বা সংয়ুগে দেবমানুষৈঃ
তদৈবাজ্ঞাসিষমহং নেয়মস্তীতি ভারতী
126.9
যং পুংসাং ত্রিষু লোকেষু সর্বশূরমমংস্মহি
তস্মিন্বিনিহতে শূরে কিং শেষং পর্যুপাস্মহে
126.10
যান্স্ম তান্গ্লহতে তাতঃ শকুনিঃ কুরুসংসদি
অক্ষান্ন তেঽক্ষা নিশিতা বাণাস্তে শত্রুতাপনাঃ
126.11
ত এতে ঘ্নন্তি নস্তাত বিশিখা জয়চোদিতাঃ
যাংস্তদা খ্যাপ্যমানাংস্ত্বং বিদুরেণ ন বুধ্যসে
126.12
তাস্তা বিলপতশ্চাপি বিদুরস্য মহাত্মনঃ
ধীরস্য বাচো নাশ্রৌষীঃ ক্ষেমায় বদতঃ শিবাঃ
126.13
তদিদং বর্ততে ঘোরমাগতং বৈশসং মহৎ
তস্যাবমানাদ্বাক্যস্য দুর্যোধন কৃতে তব
126.14
যচ্চ নঃ প্রেক্ষমাণানাং কৃষ্ণামানায়য়ঃ সভাম্
অনর্হতীং কুলে জাতাং সর্বধর্মানুচারিণীম্
126.15
তস্যাধর্মস্য গান্ধারে ফলং প্রাপ্তমিদং ত্বয়া
নো চেত্পাপং পরে লোকে ত্বমর্চ্ছেথাস্ততোঽধিকম্
126.16
যচ্চ তান্পাণ্ডবান্দ্যূতে বিষমেণ বিজিত্য হ
প্রাব্রাজয়স্তদারণ্যে রৌরবাজিনবাসসঃ
126.17
পুত্রাণামিব চৈতেষাং ধর্মমাচরতাং সদা
দ্রুহ্যেত্কো নু নরো লোকে মদন্যো ব্রাহ্মণব্রুবঃ
126.18
পাণ্ডবানাময়ং কোপস্ত্বয়া শকুনিনা সহ
আহৃতো ধৃতরাষ্ট্রস্য সংমতে কুরুসংসদি
126.19
দুঃশাসনেন সংয়ুক্তঃ কর্ণেন পরিবর্ধিতঃ
ক্ষত্তুর্বাক্যমনাদৃত্য ত্বয়াভ্যস্তঃ পুনঃ পুনঃ
126.20
যত্তত্সর্বে পরাভূয় পর্যবারয়তার্জুনিম্
সিন্ধুরাজানমাশ্রিত্য স বো মধ্যে কথং হতঃ
126.21
কথং ত্বয়ি চ কর্ণে চ কৃপে শল্যে চ জীবতি
অশ্বত্থাম্নি চ কৌরব্য নিধনং সৈন্ধবোঽগমৎ
126.22
যদ্বস্তত্সর্বরাজানস্তেজস্তিগ্মমুপাসতে
সিন্ধুরাজং পরিত্রাতুং স বো মধ্যে কথং হতঃ
126.23
ময্যেব হি বিশেষেণ তথা দুর্যোধন ত্বয়ি
আশংসত পরিত্রাণমর্জুনাত্স মহীপতিঃ
126.24
ততস্তস্মিন্পরিত্রাণমলব্ধবতি ফল্গুনাৎ
ন কিংচিদনুপশ্যামি জীবিতত্রাণমাত্মনঃ
126.25
মজ্জন্তমিব চাত্মানং ধৃষ্টদ্যুম্নস্য কিল্বিষে
পশ্যাম্যহত্বা পাঞ্চালান্সহ তেন শিখণ্ডিনা
126.26
তন্মা কিমভিতপ্যন্তং বাক্শরৈরভিকৃন্তসি
অশক্তঃ সিন্ধুরাজস্য ভূত্বা ত্রাণায় ভারত
126.27
সৌবর্ণং সত্যসংধস্য ধ্বজমক্লিষ্টকর্মণঃ
অপশ্যন্যুধি ভীষ্মস্য কথমাশংসসে জয়ম্
126.28
মধ্যে মহারথানাং চ যত্রাহন্যত সৈন্ধবঃ
হতো ভূরিশ্রবাশ্চৈব কিং শেষং তত্র মন্যসে
126.29
কৃপ এব চ দুর্ধর্ষো যদি জীবতি পার্থিব
যো নাগাত্সিন্ধুরাজস্য বর্ত্ম তং পূজয়াম্যহম্
126.30
যচ্চাপশ্যং হতং ভীষ্মং পশ্যতস্তেঽনুজস্য বৈ
দুঃশাসনস্য কৌরব্য কুর্বাণং কর্ম দুষ্করম্
অবধ্যকল্পং সংগ্রামে দেবৈরপি সবাসবৈঃ
126.31
ন তে বসুংধরাস্তীতি তদহং চিন্তয়ে নৃপ
ইমানি পাণ্ডবানাং চ সৃঞ্জয়ানাং চ ভারত
অনীকান্যাদ্রবন্তে মাং সহিতান্যদ্য মারিষ
126.32
নাহত্বা সর্বপাঞ্চালান্কবচস্য বিমোক্ষণম্
কর্তাস্মি সমরে কর্ম ধার্তরাষ্ট্র হিতং তব
126.33
রাজন্ব্রূয়াঃ সুতং মে ত্বমশ্বত্থামানমাহবে
ন সোমকাঃ প্রমোক্তব্যা জীবিতং পরিরক্ষতা
126.34
যচ্চ পিত্রানুশিষ্টোঽসি তদ্বচঃ পরিপালয়
আনৃশংস্যে দমে সত্যে আর্জবে চ স্থিরো ভব
126.35
ধর্মার্থকামকুশলো ধর্মার্থাবপ্যপীডয়ন্
ধর্মপ্রধানঃ কার্যাণি কুর্যাশ্চেতি পুনঃ পুনঃ
126.36
চক্ষুর্মনোভ্যাং সংতোষ্যা বিপ্রাঃ সেব্যাশ্চ শক্তিতঃ
ন চৈষাং বিপ্রিয়ং কার্যং তে হি বহ্নিশিখোপমাঃ
126.37
এষ ত্বহমনীকানি প্রবিশাম্যরিসূদন
রণায় মহতে রাজংস্ত্বয়া বাক্শল্যপীডিতঃ
126.38
ত্বং চ দুর্যোধন বলং যদি শক্নোষি ধারয়
রাত্রাবপি হি যোত্স্যন্তে সংরব্ধাঃ কুরুসৃঞ্জয়াঃ
126.39
এবমুক্ত্বা ততঃ প্রায়াদ্দ্রোণঃ পাণ্ডবসৃঞ্জয়ান্
মুষ্ণন্ক্ষত্রিয়তেজাংসি নক্ষত্রাণামিবাংশুমান্