Utshovঅধ্যায় 125
125.1
সংজয় উবাচ
সৈন্ধবে নিহতে রাজন্পুত্রস্তব সুয়োধনঃ
অশ্রুক্লিন্নমুখো দীনো নিরুত্সাহো দ্বিষজ্জয়ে
অমন্যতার্জুনসমো যোধো ভুবি ন বিদ্যতে
125.2
ন দ্রোণো ন চ রাধেয়ো নাশ্বত্থামা কৃপো ন চ
ক্রুদ্ধস্য প্রমুখে স্থাতুং পর্যাপ্তা ইতি মারিষ
125.3
নির্জিত্য হি রণে পার্থঃ সর্বান্মম মহারথান্
অবধীত্সৈন্ধবং সংখ্যে নৈনং কশ্চিদবারয়ৎ
125.4
সর্বথা হতমেবৈতত্কৌরবাণাং মহদ্বলম্
ন হ্যস্য বিদ্যতে ত্রাতা সাক্ষাদপি পুরংদরঃ
125.5
যমুপাশ্রিত্য সংগ্রামে কৃতঃ শস্ত্রসমুদ্যমঃ
স কর্ণো নির্জিতঃ সংখ্যে হতশ্চৈব জয়দ্রথঃ
125.6
পরুষাণি সভামধ্যে প্রোক্তবান্যঃ স্ম পাণ্ডবান্
স কর্ণো নির্জিতঃ সংখ্যে সৈন্ধবশ্চ নিপাতিতঃ
125.7
যস্য বীর্যং সমাশ্রিত্য শমং যাচন্তমচ্যুতম্
তৃণবত্তমহং মন্যে স কর্ণো নির্জিতো যুধি
125.8
এবং ক্লান্তমনা রাজন্নুপায়াদ্দ্রোণমীক্ষিতুম্
আগস্কৃত্সর্বলোকস্য পুত্রস্তে ভরতর্ষভ
125.9
ততস্তত্সর্বমাচখ্যৌ কুরূণাং বৈশসং মহৎ
পরান্বিজয়তশ্চাপি ধার্তরাষ্ট্রান্নিমজ্জতঃ
125.10
দুর্যোধন উবাচ
পশ্য মূর্ধাবসিক্তানামাচার্য কদনং কৃতম্
কৃত্বা প্রমুখতঃ শূরং ভীষ্মং মম পিতামহম্
125.11
তং নিহত্য প্রলুব্ধোঽয়ং শিখণ্ডী পূর্ণমানসঃ
পাঞ্চালৈঃ সহিতঃ সর্বৈঃ সেনাগ্রমভিকর্ষতি
125.12
অপরশ্চাপি দুর্ধর্ষঃ শিষ্যস্তে সব্যসাচিনা
অক্ষৌহিণীঃ সপ্ত হত্বা হতো রাজা জয়দ্রথঃ
125.13
অস্মদ্বিজয়কামানাং সুহৃদামুপকারিণাম্
গন্তাস্মি কথমানৃণ্যং গতানাং যমসাদনম্
125.14
যে মদর্থং পরীপ্সন্তি বসুধাং বসুধাধিপাঃ
তে হিত্বা বসুধৈশ্বর্যং বসুধামধিশেরতে
125.15
সোঽহং কাপুরুষঃ কৃত্বা মিত্রাণাং ক্ষয়মীদৃশম্
নাশ্বমেধসহস্রেণ পাতুমাত্মানমুত্সহে
125.16
মম লুব্ধস্য পাপস্য তথা ধর্মাপচায়িনঃ
ব্যায়চ্ছন্তো জিগীষন্তঃ প্রাপ্তা বৈবস্বতক্ষয়ম্
125.17
কথং পতিতবৃত্তস্য পৃথিবী সুহৃদাং দ্রুহঃ
বিবরং নাশকদ্দাতুং মম পার্থিবসংসদি
125.18
সোঽহং রুধিরসিক্তাঙ্গং রাজ্ঞাং মধ্যে পিতামহম্
শয়ানং নাশকং ত্রাতুং ভীষ্মমায়োধনে হতম্
125.19
তং মামনার্যপুরুষং মিত্রদ্রুহমধার্মিকম্
কিং স বক্ষ্যতি দুর্ধর্ষঃ সমেত্য পরলোকজিৎ
125.20
জলসংধং মহেষ্বাসং পশ্য সাত্যকিনা হতম্
মদর্থমুদ্যতং শূরং প্রাণাংস্ত্যক্ত্বা মহারথম্
125.21
কাম্বোজং নিহতং দৃষ্ট্বা তথালম্বুসমেব চ
অন্যান্বহূংশ্চ সুহৃদো জীবিতার্থোঽদ্য কো মম
125.22
ব্যায়চ্ছন্তো হতাঃ শূরা মদর্থে যেঽপরাঙ্মুখাঃ
যতমানাঃ পরং শক্ত্যা বিজেতুমহিতান্মম
125.23
তেষাং গত্বাহমানৃণ্যমদ্য শক্ত্যা পরংতপ
তর্পয়িষ্যামি তানেব জলেন যমুনামনু
125.24
সত্যং তে প্রতিজানামি সর্বশস্ত্রভৃতাং বর
ইষ্টাপূর্তেন চ শপে বীর্যেণ চ সুতৈরপি
125.25
নিহত্য তান্রণে সর্বান্পাঞ্চালান্পাণ্ডবৈঃ সহ
শান্তিং লব্ধাস্মি তেষাং বা রণে গন্তা সলোকতাম্
125.26
ন হীদানীং সহায়া মে পরীপ্সন্ত্যনুপস্কৃতাঃ
শ্রেয়ো হি পাণ্ডূন্মন্যন্তে ন তথাস্মান্মহাভুজ
125.27
স্বয়ং হি মৃত্যুর্বিহিতঃ সত্যসংধেন সংয়ুগে
ভবানুপেক্ষাং কুরুতে সুশিষ্যত্বাদ্ধনংজয়ে
125.28
অতো বিনিহতাঃ সর্বে যেঽস্মজ্জয়চিকীর্ষবঃ
কর্ণমেব তু পশ্যামি সংপ্রত্যস্মজ্জয়ৈষিণম্
125.29
যো হি মিত্রমবিজ্ঞায় যাথাতথ্যেন মন্দধীঃ
মিত্রার্থে যোজয়ত্যেনং তস্য সোঽর্থোঽবসীদতি
125.30
তাদৃগ্রূপমিদং কার্যং কৃতং মম সুহৃদ্ব্রুবৈঃ
মোহাল্লুব্ধস্য পাপস্য জিহ্মাচারৈস্ততস্ততঃ
125.31
হতো জয়দ্রথশ্চৈব সৌমদত্তিশ্চ বীর্যবান্
অভীষাহাঃ শূরসেনাঃ শিবয়োঽথ বসাতয়ঃ
125.32
সোঽহমদ্য গমিষ্যামি যত্র তে পুরুষর্ষভাঃ
হতা মদর্থং সংগ্রামে যুধ্যমানাঃ কিরীটিনা
125.33
ন হি মে জীবিতেনার্থস্তানৃতে পুরুষর্ষভান্
আচার্যঃ পাণ্ডুপুত্রাণামনুজানাতু নো ভবান্