Utshovঅধ্যায় 124
124.1
সংজয় উবাচ
ততো যুধিষ্ঠিরো রাজা রথাদাপ্লুত্য ভারত
পর্যষ্বজত্তদা কৃষ্ণাবানন্দাশ্রুপরিপ্লুতঃ
124.2
প্রমৃজ্য বদনং শুভ্রং পুণ্ডরীকসমপ্রভম্
অব্রবীদ্বাসুদেবং চ পাণ্ডবং চ ধনংজয়ম্
124.3
দিষ্ট্যা পশ্যামি সংগ্রামে তীর্ণভারৌ মহারথৌ
দিষ্ট্যা চ নিহতঃ পাপঃ সৈন্ধবঃ পুরুষাধমঃ
124.4
কৃষ্ণ দিষ্ট্যা মম প্রীতির্মহতী প্রতিপাদিতা
দিষ্ট্যা শত্রুগণাশ্চৈব নিমগ্নাঃ শোকসাগরে
124.5
ন তেষাং দুষ্করং কিংচিত্ত্রিষু লোকেষু বিদ্যতে
সর্বলোকগুরুর্যেষাং ত্বং নাথো মধুসূদন
124.6
তব প্রসাদাদ্গোবিন্দ বয়ং জেষ্যামহে রিপূন্
যথা পূর্বং প্রসাদাত্তে দানবান্পাকশাসনঃ
124.7
পৃথিবীবিজয়ো বাপি ত্রৈলোক্যবিজয়োঽপি বা
ধ্রুবো হি তেষাং বার্ষ্ণেয় যেষাং তুষ্টোঽসি মাধব
124.8
ন তেষাং বিদ্যতে পাপং সংগ্রামে বা পরাজয়ঃ
ত্রিদশেশ্বরনাথস্ত্বং যেষাং তুষ্টোঽসি মাধব
124.9
ত্বত্প্রসাদাদ্ধৃষীকেশ শক্রঃ সুরগণেশ্বরঃ
ত্রৈলোক্যবিজয়ং শ্রীমান্প্রাপ্তবান্রণমূর্ধনি
124.10
তব চৈব প্রসাদেন ত্রিদশাস্ত্রিদশেশ্বর
অমরত্বং গতাঃ কৃষ্ণ লোকাংশ্চাশ্নুবতেঽক্ষয়ান্
124.11
ত্বত্প্রসাদসমুত্থেন বিক্রমেণারিসূদন
সুরেশত্বং গতঃ শক্রো হত্বা দৈত্যান্সহস্রশঃ
124.12
ত্বত্প্রসাদাদ্ধৃষীকেশ জগত্স্থাবরজঙ্গমম্
স্ববর্ত্মনি স্থিতং বীর জপহোমেষু বর্ততে
124.13
একার্ণবমিদং পূর্বং সর্বমাসীত্তমোময়ম্
ত্বত্প্রসাদাত্প্রকাশত্বং জগত্প্রাপ্তং নরোত্তম
124.14
স্রষ্টারং সর্বলোকানাং পরমাত্মানমচ্যুতম্
যে প্রপন্না হৃষীকেশং ন তে মুহ্যন্তি কর্হিচিৎ
124.15
অনাদিনিধনং দেবং লোককর্তারমব্যয়ম্
ত্বাং ভক্তা যে হৃষীকেশ দুর্গাণ্যতিতরন্তি তে
124.16
পরং পুরাণং পুরুষং পুরাণানাং পরং চ যৎ
প্রপদ্যতস্তং পরমং পরা ভূতির্বিধীয়তে
124.17
যোঽগাত চতুরো বেদান্যশ্চ বেদেষু গীয়তে
তং প্রপদ্য মহাত্মানং ভূতিমাপ্নোত্যনুত্তমাম্
124.18
ধনংজয়সখা যশ্চ ধনংজয়হিতশ্চ যঃ
তং ধনংজয়গোপ্তারং প্রপদ্য সুখমেধতে
124.19
ইত্যুক্তৌ তৌ মহাত্মানাবুভৌ কেশবপাণ্ডবৌ
তাবব্রূতাং তদা হৃষ্টৌ রাজানং পৃথিবীপতিম্
124.20
তব কোপাগ্নিনা দগ্ধঃ পাপো রাজা জয়দ্রথঃ
উদীর্ণং চাপি সুমহদ্ধার্তরাষ্ট্রবলং রণে
124.21
হন্যতে নিহতং চৈব বিনঙ্ক্ষ্যতি চ ভারত
তব ক্রোধহতা হ্যেতে কৌরবাঃ শত্রুসূদন
124.22
ত্বাং হি চক্ষুর্হণং বীরং কোপয়িত্বা সুয়োধনঃ
সমিত্রবন্ধুঃ সমরে প্রাণাংস্ত্যক্ষ্যতি দুর্মতিঃ
124.23
তব ক্রোধহতঃ পূর্বং দেবৈরপি সুদুর্জয়ঃ
শরতল্পগতঃ শেতে ভীষ্মঃ কুরুপিতামহঃ
124.24
দুর্লভো হি জয়স্তেষাং সংগ্রামে রিপুসূদন
যাতা মৃত্যুবশং তে বৈ যেষাং ক্রুদ্ধোঽসি পাণ্ডব
124.25
রাজ্যং প্রাণাঃ প্রিয়াঃ পুত্রাঃ সৌখ্যানি বিবিধানি চ
অচিরাত্তস্য নশ্যন্তি যেষাং ক্রুদ্ধোঽসি মানদ
124.26
বিনষ্টান্কৌরবান্মন্যে সপুত্রপশুবান্ধবান্
রাজধর্মপরে নিত্যং ত্বয়ি ক্রুদ্ধে যুধিষ্ঠির
124.27
ততো ভীমো মহাবাহুঃ সাত্যকিশ্চ মহারথঃ
অভিবাদ্য গুরুং জ্যেষ্ঠং মার্গণৈঃ ক্ষতবিক্ষতৌ
স্থিতাবাস্তাং মহেষ্বাসৌ পাঞ্চাল্যৈঃ পরিবারিতৌ
124.28
তৌ দৃষ্ট্ব মুদিতৌ বীরৌ প্রাঞ্জলী চাগ্রতঃ স্থিতৌ
অভ্যনন্দত কৌন্তেয়স্তাবুভৌ ভীমসাত্যকী
124.29
দিষ্ট্যা পশ্যামি বাং বীরৌ বিমুক্তৌ সৈন্যসাগরাৎ
দ্রোণগ্রাহাদ্দুরাধর্ষাদ্ধার্দিক্যমকরালয়াৎ
দিষ্ট্যা চ নির্জিতাঃ সংখ্যে পৃথিব্যাং সর্বপার্থিবাঃ
124.30
যুবাং বিজয়িনৌ চাপি দিষ্ট্যা পশ্যামি সংয়ুগে
দিষ্ট্যা দ্রোণো জিতঃ সংখ্যে হার্দিক্যশ্চ মহাবলঃ
124.31
সৈন্যার্ণবং সমুত্তীর্ণৌ দিষ্ট্যা পশ্যামি চানঘৌ
সমরশ্লাঘিনৌ বীরৌ সমরেষ্বপলায়িনৌ
মম প্রাণসমৌ চৈব দিষ্ট্যা পশ্যামি বামহম্
124.32
ইত্যুক্ত্বা পাণ্ডবো রাজা যুয়ুধানবৃকোদরৌ
সস্বজে পুরুষব্যাঘ্রৌ হর্ষাদ্বাষ্পং মুমোচ হ
124.33
ততঃ প্রমুদিতং সর্বং বলমাসীদ্বিশাং পতে
পাণ্ডবানাং জয়ং দৃষ্ট্বা যুদ্ধায় চ মনো দধে