Utshovঅধ্যায় 123
123.1
ধৃতরাষ্ট্র উবাচ
তথা গতেষু শূরেষু তেষাং মম চ সংজয়
কিং বৈ ভীমস্তদাকার্ষীত্তন্মমাচক্ষ্ব সংজয়
123.2
সংজয় উবাচ
বিরথো ভীমসেনো বৈ কর্ণবাক্শল্যপীডিতঃ
অমর্ষবশমাপন্নঃ ফল্গুনং বাক্যমব্রবীৎ
123.3
পুনঃ পুনস্তূবরক মূঢ ঔদরিকেতি চ
অকৃতাস্ত্রক মা যোধীর্বাল সংগ্রামকাতর
123.4
ইতি মামব্রবীত্কর্ণঃ পশ্যতস্তে ধনংজয়
এবং বক্তা চ মে বধ্যস্তেন চোক্তোঽস্মি ভারত
123.5
এতদ্ব্রতং মহাবাহো ত্বয়া সহ কৃতং ময়া
যথৈতন্মম কৌন্তেয় তথা তব ন সংশয়ঃ
123.6
তদ্বধায় নরশ্রেষ্ঠ স্মরৈতদ্বচনং মম
যথা ভবতি তত্সত্যং তথা কুরু ধনংজয়
123.7
তচ্ছ্রুত্বা বচনং তস্য ভীমস্যামিতবিক্রমঃ
ততোঽর্জুনোঽব্রবীত্কর্ণং কিংচিদভ্যেত্য সংয়ুগে
123.8
কর্ণ কর্ণ বৃথাদৃষ্টে সূতপুত্রাত্মসংস্তুত
অধর্মবুদ্ধে শৃণু মে যত্ত্বা বক্ষ্যামি সাংপ্রতম্
123.9
দ্বিবিধং কর্ম শূরাণাং যুদ্ধে জয়পরাজয়ৌ
তৌ চাপ্যনিত্যৌ রাধেয় বাসবস্যাপি যুধ্যতঃ
123.10
মুমূর্ষুর্যুয়ুধানেন বিরথোঽসি বিসর্জিতঃ
যদৃচ্ছয়া ভীমসেনং বিরথং কৃতবানসি
123.11
অধর্মস্ত্বেষ রাধেয় যত্ত্বং ভীমমবোচথাঃ
যুদ্ধধর্মং বিজানন্বৈ যুধ্যন্তমপলায়িনম্
পূরয়ন্তং যথাশক্তি শূরকর্মাহবে তথা
123.12
পশ্যতাং সর্বসৈন্যানাং কেশবস্য মমৈব চ
বিরথো ভীমসেনেন কৃতোঽসি বহুশো রণে
ন চ ত্বাং পরুষং কিংচিদুক্তবান্পণ্ডুনন্দনঃ
123.13
যস্মাত্তু বহু রূক্ষং চ শ্রাবিতস্তে বৃকোদরঃ
পরোক্ষং যচ্চ সৌভদ্রো যুষ্মাভির্নিহতো মম
123.14
তস্মাদস্যাবলেপস্য সদ্যঃ ফলমবাপ্নুহি
ত্বয়া তস্য ধনুশ্ছিন্নমাত্মনাশায় দুর্মতে
123.15
তস্মাদ্বধ্যোঽসি মে মূঢ সভৃত্যবলবাহনঃ
কুরু ত্বং সর্বকৃত্যানি মহত্তে ভয়মাগতম্
123.16
হন্তাস্মি বৃষসেনং তে প্রেক্ষমাণস্য সংয়ুগে
যে চান্যেঽপ্যুপয়াস্যন্তি বুদ্ধিমোহেন মাং নৃপাঃ
তাংশ্চ সর্বান্হনিষ্যামি সত্যেনায়ুধমালভে
123.17
ত্বাং চ মূঢাকৃতপ্রজ্ঞমতিমানিনমাহবে
দৃষ্ট্বা দুর্যোধনো মন্দো ভৃশং তপ্স্যতি পাতিতম্
123.18
অর্জুনেন প্রতিজ্ঞাতে বধে কর্ণসুতস্য তু
মহান্সুতুমুলঃ শব্দো বভূব রথিনাং তদা
123.19
তস্মিন্নাকুলসংগ্রামে বর্তমানে মহাভয়ে
মন্দরশ্মিঃ সহস্রাংশুরস্তং গিরিমুপাগমৎ
123.20
ততো রাজন্হৃষীকেশঃ সংগ্রামশিরসি স্থিতম্
তীর্ণপ্রতিজ্ঞং বীভত্সুং পরিষ্বজ্যেদমব্রবীৎ
123.21
দিষ্ট্যা সংপাদিতা জিষ্ণো প্রতিজ্ঞা মহতী ত্বয়া
দিষ্ট্যা চ নিহতঃ পাপো বৃদ্ধক্ষত্রঃ সহাত্মজঃ
123.22
ধার্তরাষ্ট্রবলং প্রাপ্য দেবসেনাপি ভারত
সীদেত সমরে জিষ্ণো নাত্র কার্যা বিচারণা
123.23
ন তং পশ্যামি লোকেষু চিন্তয়ন্পুরুষং ক্বচিৎ
ত্বদৃতে পুরুষব্যাঘ্র য এতদ্যোধয়েদ্বলম্
123.24
মহাপ্রভাবা বহবস্ত্বয়া তুল্যাধিকাপি বা
সমেতাঃ পৃথিবীপালা ধার্তরাষ্ট্রস্য কারণাৎ
তে ত্বাং প্রাপ্য রণে ক্রুদ্ধং নাভ্যবর্তন্ত দংশিতাঃ
123.25
তব বীর্যং বলং চৈব রুদ্রশক্রান্তকোপমম্
নেদৃশং শক্নুয়াত্কশ্চিদ্রণে কর্তুং পরাক্রমম্
যাদৃশং কৃতবানদ্য ত্বমেকঃ শত্রুতাপনঃ
123.26
এবমেব হতে কর্ণে সানুবন্ধে দুরাত্মনি
বর্ধয়িষ্যামি ভূয়স্ত্বাং বিজিতারিং হতদ্বিষম্
123.27
তমর্জুনঃ প্রত্যুবাচ প্রসাদাত্তব মাধব
প্রতিজ্ঞেয়ং ময়োত্তীর্ণা বিবুধৈরপি দুস্তরা
123.28
অনাশ্চর্যো জয়স্তেষাং যেষাং নাথোঽসি মাধব
ত্বত্প্রসাদান্মহীং কৃত্স্নাং সংপ্রাপ্স্যতি যুধিষ্ঠিরঃ
123.29
তবৈব ভারো বার্ষ্ণেয় তবৈব বিজয়ঃ প্রভো
বর্ধনীয়াস্তব বয়ং প্রেষ্যাশ্চ মধুসূদন
123.30
এবমুক্তঃ স্ময়ন্কৃষ্ণঃ শনকৈর্বাহয়ন্হয়ান্
দর্শয়ামাস পার্থায় ক্রূরমায়োধনং মহৎ
123.31
শ্রীকৃষ্ণ উবাচ
প্রার্থয়ন্তো জয়ং যুদ্ধে প্রথিতং চ মহদ্যশঃ
পৃথিব্যাং শেরতে শূরাঃ পার্থিবাস্ত্বচ্ছরৈর্হতাঃ
123.32
বিকীর্ণশস্ত্রাভরণা বিপন্নাশ্বরথদ্বিপাঃ
সংছিন্নভিন্নবর্মাণো বৈক্লব্যং পরমং গতাঃ
123.33
সসত্ত্বা গতসত্ত্বাশ্চ প্রভয়া পরয়া যুতাঃ
সজীবা ইব লক্ষ্যন্তে গতসত্ত্বা নরাধিপাঃ
123.34
তেষাং শরৈঃ স্বর্ণপুঙ্খৈঃ শস্ত্রৈশ্চ বিবিধৈঃ শিতৈঃ
বাহনৈরায়ুধৈশ্চৈব সংপূর্ণাং পশ্য মেদিনীম্
123.35
বর্মভিশ্চর্মভির্হারৈঃ শিরোভিশ্চ সকুণ্ডলৈঃ
উষ্ণীষৈর্মুকুটৈঃ স্রগ্ভিশ্চূডামণিভিরম্বরৈঃ
123.36
কণ্ঠসূত্রৈরঙ্গদৈশ্চ নিষ্কৈরপি চ সুপ্রভৈঃ
অন্যৈশ্চাভরণৈশ্চিত্রৈর্ভাতি ভারত মেদিনী
123.37
চামরৈর্ব্যজনৈশ্চিত্রৈর্ধ্বজৈশ্চাশ্বরথদ্বিপৈঃ
বিবিধৈশ্চ পরিস্তোমৈরশ্বানাং চ প্রকীর্ণকৈঃ
123.38
কুথাভিশ্চ বিচিত্রাভির্বরূথৈশ্চ মহাধনৈঃ
সংস্তীর্ণাং বসুধাং পশ্য চিত্রপট্টৈরিবাবৃতাম্
123.39
নাগেভ্যঃ পতিতানন্যান্কল্পিতেভ্যো দ্বিপৈঃ সহ
সিংহান্বজ্রপ্রণুন্নেভ্যো গির্যগ্রেভ্য ইব চ্যুতান্
123.40
সংস্যূতান্বাজিভিঃ সার্ধং ধরণ্যাং পশ্য চাপরান্
পদাতিসাদিসংঘাংশ্চ ক্ষতজৌঘপরিপ্লুতান্
123.41
সংজয় উবাচ
এবং সংদর্শয়ন্কৃষ্ণো রণভূমিং কিরীটিনঃ
স্বৈঃ সমেতঃ স মুদিতঃ পাঞ্চজন্যং ব্যনাদয়ৎ