Utshovঅধ্যায় 122
122.1
ধৃতরাষ্ট্র উবাচ
তস্মিন্বিনিহতে বীরে সৈন্ধবে সব্যসাচিনা
মামকা যদকুর্বন্ত তন্মমাচক্ষ্ব সংজয়
122.2
সংজয় উবাচ
সৈন্ধবং নিহতং দৃষ্ট্বা রণে পার্থেন মারিষ
অমর্ষবশমাপন্নঃ কৃপঃ শারদ্বতস্তদা
122.3
মহতা শরবর্ষেণ পাণ্ডবং সমবাকিরৎ
দ্রৌণিশ্চাভ্যদ্রবত্পার্থং রথমাস্থায় ফল্গুনম্
122.4
তাবেনং রথিনাং শ্রেষ্ঠৌ রথাভ্যাং রথসত্তমম্
উভাবুভয়তস্তীক্ষ্ণৈর্বিশিখৈরভ্যবর্ষতাম্
122.5
স তথা শরবর্ষাভ্যাং সুমহদ্ভ্যাং মহাভুজঃ
পীড্যমানঃ পরামার্তিমগমদ্রথিনাং বরঃ
122.6
সোঽজিঘাংসুর্গুরুং সংখ্যে গুরোস্তনয়মেব চ
চকারাচার্যকং তত্র কুন্তীপুত্রো ধনংজয়ঃ
122.7
অস্ত্রৈরস্ত্রাণি সংবার্য দ্রৌণেঃ শারদ্বতস্য চ
মন্দবেগানিষূংস্তাভ্যামজিঘাংসুরবাসৃজৎ
122.8
তে নাতিভৃশমভ্যঘ্নন্বিশিখা জয়চোদিতাঃ
বহুত্বাত্তু পরামার্তিং শরাণাং তাবগচ্ছতাম্
122.9
অথ শারদ্বতো রাজন্কৌন্তেয়শরপীডিতঃ
অবাসীদদ্রথোপস্থে মূর্চ্ছামভিজগাম হ
122.10
বিহ্বলং তমভিজ্ঞায় ভর্তারং শরপীডিতম্
হতোঽয়মিতি চ জ্ঞাত্বা সারথিস্তমপাবহৎ
122.11
তস্মিন্সন্নে মহারাজ কৃপে শারদ্বতে যুধি
অশ্বত্থামাপ্যপায়াসীত্পাণ্ডবেয়াদ্রথান্তরম্
122.12
দৃষ্ট্বা শারদ্বতং পার্থো মূর্ছিতং শরপীডিতম্
রথ এব মহেষ্বাসঃ কৃপণং পর্যদেবয়ৎ
122.13
পশ্যন্নিদং মহাপ্রাজ্ঞঃ ক্ষত্তা রাজানমুক্তবান্
কুলান্তকরণে পাপে জাতমাত্রে সুয়োধনে
122.14
নীয়তাং পরলোকায় সাধ্বয়ং কুলপাংসনঃ
অস্মাদ্ধি কুরুমুখ্যানাং মহদুত্পত্স্যতে ভয়ম্
122.15
তদিদং সমনুপ্রাপ্তং বচনং সত্যবাদিনঃ
তত্কৃতে হ্যদ্য পশ্যামি শরতল্পগতং কৃপম্
122.16
ধিগস্তু ক্ষাত্রমাচারং ধিগস্তু বলপৌরুষম্
কো হি ব্রাহ্মণমাচার্যমভিদ্রুহ্যেত মাদৃশঃ
122.17
ঋষিপুত্রো মমাচার্যো দ্রোণস্য দয়িতঃ সখা
এষ শেতে রথোপস্থে মদ্বাণৈরভিপীডিতঃ
122.18
অকাময়ানেন ময়া বিশিখৈরর্দিতো ভৃশম্
অবাসীদদ্রথোপস্থে প্রাণান্পীডয়তীব মে
122.19
শরার্দিতেন হি ময়া প্রেক্ষণীয়ো মহাদ্যুতিঃ
প্রত্যস্তো বহুভির্বাণৈর্দশধর্মগতেন বৈ
122.20
শোচয়ত্যেষ নিপতন্ভূয়ঃ পুত্রবধাদ্ধি মাম্
কৃপণং স্বরথে সন্নং পশ্য কৃষ্ণ যথা গতম্
122.21
উপাকৃত্য তু বৈ বিদ্যামাচার্যেভ্যো নরর্ষভাঃ
প্রয়চ্ছন্তীহ যে কামান্দেবত্বমুপয়ান্তি তে
122.22
যে তু বিদ্যামুপাদায় গুরুভ্যঃ পুরুষাধমাঃ
ঘ্নন্তি তানেব দুর্বৃত্তাস্তে বৈ নিরয়গামিনঃ
122.23
তদিদং নরকায়াদ্য কৃতং কর্ম ময়া ধ্রুবম্
আচার্যং শরবর্ষেণ রথে সাদয়তা কৃপম্
122.24
যত্তত্পূর্বমুপাকুর্বন্নস্ত্রং মামব্রবীত্কৃপঃ
ন কথংচন কৌরব্য প্রহর্তব্যং গুরাবিতি
122.25
তদিদং বচনং সাধোরাচার্যস্য মহাত্মনঃ
নানুষ্ঠিতং তমেবাজৌ বিশিখৈরভিবর্ষতা
122.26
নমস্তস্মৈ সুপূজ্যায় গৌতমায়াপলায়িনে
ধিগস্তু মম বার্ষ্ণেয় যো হ্যস্মৈ প্রহরাম্যহম্
122.27
তথা বিলপমানে তু সব্যসাচিনি তং প্রতি
সৈন্ধবং নিহতং দৃষ্ট্বা রাধেয়ঃ সমুপাদ্রবৎ
122.28
উপায়ান্তং তু রাধেয়ং দৃষ্ট্বা পার্থো মহারথঃ
প্রহসন্দেবকীপুত্রমিদং বচনমব্রবীৎ
122.29
এষ প্রয়াত্যাধিরথিঃ সাত্যকেঃ স্যন্দনং প্রতি
ন মৃষ্যতি হতং নূনং ভূরিশ্রবসমাহবে
122.30
যত্র যাত্যেষ তত্র ত্বং চোদয়াশ্বাঞ্জনার্দন
মা সোমদত্তেঃ পদবীং গময়েত্সাত্যকিং বৃষঃ
122.31
এবমুক্তো মহাবাহুঃ কেশবঃ সব্যসাচিনা
প্রত্যুবাচ মহাতেজাঃ কালয়ুক্তমিদং বচঃ
122.32
অলমেষ মহাবাহুঃ কর্ণায়ৈকো হি পাণ্ডব
কিং পুনর্দ্রৌপদেয়াভ্যাং সহিতঃ সাত্বতর্ষভঃ
122.33
ন চ তাবত্ক্ষমঃ পার্থ কর্ণেন তব সংগরঃ
প্রজ্বলন্তী মহোল্কেব তিষ্ঠত্যস্য হি বাসবী
ত্বদর্থং পূজ্যমানৈষা রক্ষ্যতে পরবীরহন্
122.34
অতঃ কর্ণঃ প্রয়াত্বত্র সাত্বতস্য যথা তথা
অহং জ্ঞাস্যামি কৌরব্য কালমস্য দুরাত্মনঃ
122.35
ধৃতরাষ্ট্র উবাচ
যোঽসৌ কর্ণেন বীরেণ বার্ষ্ণেয়স্য সমাগমঃ
হতে তু ভূরিশ্রবসি সৈন্ধবে চ নিপাতিতে
122.36
সাত্যকিশ্চাপি বিরথঃ কং সমারূঢবান্রথম্
চক্ররক্ষৌ চ পাঞ্চাল্যৌ তন্মমাচক্ষ্ব সংজয়
122.37
সংজয় উবাচ
হন্ত তে বর্ণয়িষ্যামি যথাবৃত্তং মহারণে
শুশ্রূষস্ব স্থিরো ভূত্বা দুরাচরিতমাত্মনঃ
122.38
পূর্বমেব হি কৃষ্ণস্য মনোগতমিদং প্রভো
বিজেতব্যো যথা বীরঃ সাত্যকির্যূপকেতুনা
122.39
অতীতানাগতং রাজন্স হি বেত্তি জনার্দনঃ
অতঃ সূতং সমাহূয় দারুকং সংদিদেশ হ
রথো মে যুজ্যতাং কাল্যমিতি রাজন্মহাবলঃ
122.40
ন হি দেবা ন গন্ধর্বা ন যক্ষোরগরাক্ষসাঃ
মানবা বা বিজেতারঃ কৃষ্ণয়োঃ সন্তি কেচন
122.41
পিতামহপুরোগাশ্চ দেবাঃ সিদ্ধাশ্চ তং বিদুঃ
তয়োঃ প্রভাবমতুলং শৃণু যুদ্ধং চ তদ্যথা
122.42
সাত্যকিং বিরথং দৃষ্ট্বা কর্ণং চাভ্যুদ্যতায়ুধম্
দধ্মৌ শঙ্খং মহাবেগমার্ষভেণাথ মাধবঃ
122.43
দারুকোঽবেত্য সংদেশং শ্রুত্বা শঙ্খস্য চ স্বনম্
রথমন্বানয়ত্তস্মৈ সুপর্ণোচ্ছ্রিতকেতনম্
122.44
স কেশবস্যানুমতে রথং দারুকসংয়ুতম্
আরুরোহ শিনেঃ পৌত্রো জ্বলনাদিত্যসংনিভম্
122.45
কামগৈঃ সৈন্যসুগ্রীবমেঘপুষ্পবলাহকৈঃ
হয়োদগ্রৈর্মহাবেগৈর্হেমভাণ্ডবিভূষিতৈঃ
122.46
যুক্তং সমারুহ্য চ তং বিমানপ্রতিমং রথম্
অভ্যদ্রবত রাধেয়ং প্রবপন্সায়কান্বহূন্
122.47
চক্ররক্ষাবপি তদা যুধামন্যূত্তমৌজসৌ
ধনংজয়রথং হিত্বা রাধেয়ং প্রত্যুদীয়য়ুঃ
122.48
রাধেয়োঽপি মহারাজ শরবর্ষং সমুত্সৃজন্
অভ্যদ্রবত্সুসংক্রুদ্ধো রণে শৈনেয়মচ্যুতম্
122.49
নৈব দৈবং ন গান্ধর্বং নাসুরোরগরাক্ষসম্
তাদৃশং ভুবি বা যুদ্ধং দিবি বা শ্রুতমিত্যুত
122.50
উপারমত তত্সৈন্যং সরথাশ্বনরদ্বিপম্
তয়োর্দৃষ্ট্বা মহারাজ কর্ম সংমূঢচেতনম্
122.51
সর্বে চ সমপশ্যন্ত তদ্যুদ্ধমতিমানুষম্
তয়োর্নৃবরয়ো রাজন্সারথ্যং দারুকস্য চ
122.52
গতপ্রত্যাগতাবৃত্তৈর্মণ্ডলৈঃ সংনিবর্তনৈঃ
সারথেস্তু রথস্থস্য কাশ্যপেয়স্য বিস্মিতাঃ
122.53
নভস্তলগতাশ্চৈব দেবগন্ধর্বদানবাঃ
অতীবাবহিতা দ্রষ্টুং কর্ণশৈনেয়য়ো রণম্
122.54
মিত্রার্থে তৌ পরাক্রান্তৌ স্পর্ধিনৌ শুষ্মিণৌ রণে
কর্ণশ্চামরসংকাশো যুয়ুধানশ্চ সাত্যকিঃ
122.55
অন্যোন্যং তৌ মহারাজ শরবর্ষৈরবর্ষতাম্
প্রমমাথ শিনেঃ পৌত্রং কর্ণঃ সায়কবৃষ্টিভিঃ
122.56
অমৃষ্যমাণো নিধনং কৌরব্যজলসংধয়োঃ
কর্ণঃ শোকসমাবিষ্টো মহোরগ ইব শ্বসন্
122.57
স শৈনেয়ং রণে ক্রুদ্ধঃ প্রদহন্নিব চক্ষুষা
অভ্যদ্রবত বেগেন পুনঃ পুনররিংদমঃ
122.58
তং তু সংপ্রেক্ষ্য সংক্রুদ্ধং সাত্যকিঃ প্রত্যবিধ্যত
মহতা শরবর্ষেণ গজঃ প্রতিগজং যথা
122.59
তৌ সমেত্য নরব্যাঘ্রৌ ব্যাঘ্রাবিব তরস্বিনৌ
অন্যোন্যং সংততক্ষাতে রণেঽনুপমবিক্রমৌ
122.60
ততঃ কর্ণং শিনেঃ পৌত্রঃ সর্বপারশবৈঃ শরৈঃ
বিভেদ সর্বগাত্রেষু পুনঃ পুনররিংদমঃ
122.61
সারথিং চাস্য ভল্লেন রথনীডাদপাহরৎ
অশ্বাংশ্চ চতুরঃ শ্বেতান্নিজঘ্নে নিশিতৈঃ শরৈঃ
122.62
ছিত্ত্বা ধ্বজং শতেনৈব শতধা পুরুষর্ষভঃ
চকার বিরথং কর্ণং তব পুত্রস্য পশ্যতঃ
122.63
ততো বিমনসো রাজংস্তাবকাঃ পুরুষর্ষভাঃ
বৃষসেনঃ কর্ণসুতঃ শল্যো মদ্রাধিপস্তথা
122.64
দ্রোণপুত্রশ্চ শৈনেয়ং সর্বতঃ পর্যবারয়ন্
ততঃ পর্যাকুলং সর্বং ন প্রাজ্ঞায়ত কিংচন
122.65
তথা সাত্যকিনা বীরে বিরথে সূতজে কৃতে
হাহাকারস্ততো রাজন্সর্বসৈন্যেষু চাভবৎ
122.66
কর্ণোঽপি বিহ্বলো রাজন্সাত্বতেনার্দিতঃ শরৈঃ
দুর্যোধনরথং রাজন্নারুরোহ বিনিঃশ্বসন্
122.67
মানয়ংস্তব পুত্রস্য বাল্যাত্প্রভৃতি সৌহৃদম্
কৃতাং রাজ্যপ্রদানেন প্রতিজ্ঞাং পরিপালয়ন্
122.68
তথা তু বিরথে কর্ণে পুত্রান্বৈ তব পার্থিব
দুঃশাসনমুখাঞ্শূরান্নাবধীত্সাত্যকির্বশী
122.69
রক্ষন্প্রতিজ্ঞাং চ পুনর্ভীমসেনকৃতাং পুরা
বিরথান্বিহ্বলাংশ্চক্রে ন তু প্রাণৈর্ব্যয়োজয়ৎ
122.70
ভীমসেনেন তু বধঃ পুত্রাণাং তে প্রতিশ্রুতঃ
পুনর্দ্যূতে চ পার্থেন বধঃ কর্ণস্য সংশ্রুতঃ
122.71
বধে ত্বকুর্বন্যত্নং তে তস্য কর্ণমুখাস্তদা
নাশক্নুবংশ্চ তং হন্তুং সাত্যকিং প্রবরা রথাঃ
122.72
দ্রৌণিশ্চ কৃতবর্মা চ তথৈবান্যে মহারথাঃ
নির্জিতা ধনুষৈকেন শতশঃ ক্ষত্রিয়র্ষভাঃ
কাঙ্ক্ষতা পরলোকং চ ধর্মরাজস্য চ প্রিয়ম্
122.73
কৃষ্ণয়োঃ সদৃশো বীর্যে সাত্যকিঃ শত্রুকর্শনঃ
কৃষ্ণো বাপি ভবেল্লোকে পার্থো বাপি ধনুর্ধরঃ
শৈনেয়ো বা নরব্যাঘ্রশ্চতুর্থো নোপলভ্যতে
122.74
ধৃতরাষ্ট্র উবাচ
অজয্যং রথমাস্থায় বাসুদেবস্য সাত্যকিঃ
বিরথং কৃতবান্কর্ণং বাসুদেবসমো যুবা
122.75
দারুকেণ সমায়ুক্তং স্ববাহুবলদর্পিতঃ
কচ্চিদন্যং সমারূঢঃ স রথং সাত্যকিঃ পুনঃ
122.76
এতদিচ্ছাম্যহং শ্রোতুং কুশলো হ্যসি ভাষিতুম্
অসহ্যং তমহং মন্যে তন্মমাচক্ষ্ব সংজয়
122.77
সংজয় উবাচ
শৃণু রাজন্যথা তস্য রথমন্যং মহামতিঃ
দারুকস্যানুজস্তূর্ণং কল্পনাবিধিকল্পিতম্
122.78
আয়সৈঃ কাঞ্চনৈশ্চাপি পট্টৈর্নদ্ধং সকূবরম্
তারাসহস্রখচিতং সিংহধ্বজপতাকিনম্
122.79
অশ্বৈর্বাতজবৈর্যুক্তং হেমভাণ্ডপরিচ্ছদৈঃ
পাণ্ডুরৈরিন্দুসংকাশৈঃ সর্বশব্দাতিগৈর্দৃঢৈঃ
122.80
চিত্রকাঞ্চনসংনাহৈর্বাজিমুখ্যৈর্বিশাং পতে
ঘণ্টাজালাকুলরবং শক্তিতোমরবিদ্যুতম্
122.81
বৃতং সাংগ্রামিকৈর্দ্রব্যৈর্বহুশস্ত্রপরিচ্ছদম্
রথং সংপাদয়ামাস মেঘগম্ভীরনিস্বনম্
122.82
তং সমারুহ্য শৈনেয়স্তব সৈন্যমুপাদ্রবৎ
দারুকোঽপি যথাকামং প্রয়য়ৌ কেশবান্তিকম্
122.83
কর্ণস্যাপি মহারাজ শঙ্খগোক্ষীরপাণ্ডুরৈঃ
চিত্রকাঞ্চনসংনাহৈঃ সদশ্বৈর্বেগবত্তরৈঃ
122.84
হেমকক্ষ্যাধ্বজোপেতং কৢপ্তয়ন্ত্রপতাকিনম্
অগ্র্যং রথং সুয়ন্তারং বহুশস্ত্রপরিচ্ছদম্
122.85
উপাজহ্রুস্তমাস্থায় কর্ণোঽপ্যভ্যদ্রবদ্রিপূন্
এতত্তে সর্বমাখ্যাতং যন্মাং ত্বং পরিপৃচ্ছসি
122.86
ভূয়শ্চাপি নিবোধ ত্বং তবাপনয়জং ক্ষয়ম্
একত্রিংশত্তব সুতা ভীমসেনেন পাতিতাঃ
122.87
দুর্মুখং প্রমুখে কৃত্বা সততং চিত্রয়োধিনম্
শতশো নিহতাঃ শূরাঃ সাত্বতেনার্জুনেন চ
122.88
ভীষ্মং প্রমুখতঃ কৃত্বা ভগদত্তং চ মারিষ
এবমেষ ক্ষয়ো বৃত্তো রাজন্দুর্মন্ত্রিতে তব