Utshovঅধ্যায় 121
121.1
সংজয় উবাচ
স রণে ব্যচরত্পার্থঃ প্রেক্ষণীয়ো ধনংজয়ঃ
যুগপদ্দিক্ষু সর্বাসু চিত্রাণ্যস্ত্রাণি দর্শয়ন্
121.2
মধ্যংদিনগতং সূর্যং প্রতপন্তমিবাম্বরে
ন শেকুঃ সর্বভূতানি পাণ্ডবং প্রতিবীক্ষিতুম্
121.3
প্রসৃতাংস্তস্য গাণ্ডীবাচ্ছরব্রাতান্মহাত্মনঃ
সংগ্রামে সমপশ্যাম হংসপঙ্ক্তীরিবাম্বরে
121.4
বিনিবার্য স বীরাণামস্ত্রৈরস্ত্রাণি সর্বশঃ
দর্শয়ন্রৌদ্রমাত্মানমুগ্রে কর্মণি ধিষ্ঠিতঃ
121.5
স তান্রথবরান্রাজন্নভ্যতিক্রামদর্জুনঃ
মোহয়ন্নিব নারাচৈর্জয়দ্রথবধেপ্সয়া
121.6
বিসৃজন্দিক্ষু সর্বাসু শরানসিতসারথিঃ
স রণে ব্যচরত্তূর্ণং প্রেক্ষণীয়ো ধনংজয়ঃ
121.7
ভ্রমন্ত ইব শূরস্য শরব্রাতা মহাত্মনঃ
অদৃশ্যন্তান্তরিক্ষস্থাঃ শতশোঽথ সহস্রশঃ
121.8
আদদানং মহেষ্বাসং সংদধানং চ পাণ্ডবম্
বিসৃজন্তং চ কৌন্তেয়ং নানুপশ্যামহে তদা
121.9
তথা সর্বা দিশো রাজন্সর্বাংশ্চ রথিনো রণে
আকুলীকৃত্য কৌন্তেয়ো জয়দ্রথমুপাদ্রবৎ
বিব্যাধ চ চতুঃষষ্ট্যা শরাণাং নতপর্বণাম্
121.10
সৈন্ধবস্তু তথা বিদ্ধঃ শরৈর্গাণ্ডীবধন্বনা
ন চক্ষমে সুসংক্রুদ্ধস্তোত্ত্রার্দিত ইব দ্বিপঃ
121.11
স বরাহধ্বজস্তূর্ণং গার্ধ্রপত্রানজিহ্মগান্
আশীবিষসমপ্রখ্যান্কর্মারপরিমার্জিতান্
মুমোচ নিশিতান্সংখ্যে সায়কান্সব্যসাচিনি
121.12
ত্রিভিস্তু বিদ্ধ্বা গাণ্ডীবং নারাচৈঃ ষড্ভিরর্জুনম্
অষ্টাভির্বাজিনোঽবিধ্যদ্ধ্বজং চৈকেন পত্রিণা
121.13
স বিক্ষিপ্যার্জুনস্তীক্ষ্ণান্সৈন্ধবপ্রেষিতাঞ্শরান্
যুগপত্তস্য চিচ্ছেদ শরাভ্যাং সৈন্ধবস্য হ
সারথেশ্চ শিরঃ কায়াদ্ধ্বজং চ সমলংকৃতম্
121.14
স ছিন্নয়ষ্টিঃ সুমহাঞ্শীর্যমাণঃ শরাহতঃ
বরাহঃ সিন্ধুরাজস্য পপাতাগ্নিশিখোপমঃ
121.15
এতস্মিন্নেব কালে তু দ্রুতং গচ্ছতি ভাস্করে
অব্রবীত্পাণ্ডবং তত্র ত্বরমাণো জনার্দনঃ
121.16
ধনংজয় শিরশ্ছিন্ধি সৈন্ধবস্য দুরাত্মনঃ
অস্তং মহীধরশ্রেষ্ঠং যিয়াসতি দিবাকরঃ
শৃণুষ্বৈব চ মে বাক্যং জয়দ্রথবধং প্রতি
121.17
বৃদ্ধক্ষত্রঃ সৈন্ধবস্য পিতা জগতি বিশ্রুতঃ
স কালেনেহ মহতা সৈন্ধবং প্রাপ্তবান্সুতম্
121.18
জয়দ্রথমমিত্রঘ্নং তং চোবাচ ততো নৃপম্
অন্তর্হিতা তদা বাণী মেঘদুন্দুভিনিস্বনা
121.19
তবাত্মজোঽয়ং মর্ত্যেষু কুলশীলদমাদিভিঃ
গুণৈর্ভবিষ্যতি বিভো সদৃশো বংশয়োর্দ্বয়োঃ
ক্ষত্রিয়প্রবরো লোকে নিত্যং শূরাভিসত্কৃতঃ
121.20
শত্রুভির্যুধ্যমানস্য সংগ্রামে ত্বস্য ধন্বিনঃ
শিরশ্ছেত্স্যতি সংক্রুদ্ধঃ শত্রুর্নালক্ষিতো ভুবি
121.21
এতচ্ছ্রুত্বা সিন্ধুরাজো ধ্যাত্বা চিরমরিংদম
জ্ঞাতীন্সর্বানুবাচেদং পুত্রস্নেহাভিপীডিতঃ
121.22
সংগ্রামে যুধ্যমানস্য বহতো মহতীং ধুরম্
ধরণ্যাং মম পুত্রস্য পাতয়িষ্যতি যঃ শিরঃ
তস্যাপি শতধা মূর্ধা ফলিষ্যতি ন সংশয়ঃ
121.23
এবমুক্ত্বা ততো রাজ্যে স্থাপয়িত্বা জয়দ্রথম্
বৃদ্ধক্ষত্রো বনং যাতস্তপশ্চেষ্টং সমাস্থিতঃ
121.24
সোঽয়ং তপ্যতি তেজস্বী তপো ঘোরং দুরাসদম্
সমন্তপঞ্চকাদস্মাদ্বহির্বানরকেতন
121.25
তস্মাজ্জয়দ্রথস্য ত্বং শিরশ্ছিত্ত্বা মহামৃধে
দিব্যেনাস্ত্রেণ রিপুহন্ঘোরেণাদ্ভুতকর্মণা
121.26
সকুণ্ডলং সিন্ধুপতেঃ প্রভঞ্জনসুতানুজ
উত্সঙ্গে পাতয়স্বাশু বৃদ্ধক্ষত্রস্য ভারত
121.27
অথ ত্বমস্য মূর্ধানং পাতয়িষ্যসি ভূতলে
তবাপি শতধা মূর্ধা ফলিষ্যতি ন সংশয়ঃ
121.28
যথা চৈতন্ন জানীয়াত্স রাজা পৃথিবীপতিঃ
তথা কুরু কুরুশ্রেষ্ঠ দিব্যমস্ত্রমুপাশ্রিতঃ
121.29
ন হ্যসাধ্যমকার্যং বা বিদ্যতে তব কিংচন
সমস্তেষ্বপি লোকেষু ত্রিষু বাসবনন্দন
121.30
এতচ্ছ্রুত্বা তু বচনং সৃক্কিণী পরিসংলিহন্
ইন্দ্রাশনিসমস্পর্শং দিব্যমন্ত্রাভিমন্ত্রিতম্
121.31
সর্বভারসহং শশ্বদ্গন্ধমাল্যার্চিতং শরম্
বিসসর্জার্জুনস্তূর্ণং সৈন্ধবস্য বধে বৃতঃ
121.32
স তু গাণ্ডীবনির্মুক্তঃ শরঃ শ্যেন ইবাশুগঃ
শকুন্তমিব বৃক্ষাগ্রাত্সৈন্ধবস্য শিরোঽহরৎ
121.33
অহরত্তত্পুনশ্চৈব শরৈরূর্ধ্বং ধনংজয়ঃ
দুর্হৃদামপ্রহর্ষায় সুহৃদাং হর্ষণায় চ
121.34
শরৈঃ কদম্বকীকৃত্য কালে তস্মিংশ্চ পাণ্ডবঃ
সমন্তপঞ্চকাদ্বাহ্যং শিরস্তদ্ব্যহরত্ততঃ
121.35
এতস্মিন্নেব কালে তু বৃদ্ধক্ষত্রো মহীপতিঃ
সংধ্যামুপাস্তে তেজস্বী সংবন্ধী তব মারিষ
121.36
উপাসীনস্য তস্যাথ কৃষ্ণকেশং সকুণ্ডলম্
সিন্ধুরাজস্য মূর্ধানমুত্সঙ্গে সমপাতয়ৎ
121.37
তস্যোত্সঙ্গে নিপতিতং শিরস্তচ্চারুকুণ্ডলম্
বৃদ্ধক্ষত্রস্য নৃপতেরলক্ষিতমরিংদম
121.38
কৃতজপ্যস্য তস্যাথ বৃদ্ধক্ষত্রস্য ধীমতঃ
উত্তিষ্ঠতস্তত্সহসা শিরোঽগচ্ছদ্ধরাতলম্
121.39
ততস্তস্য নরেন্দ্রস্য পুত্রমূর্ধনি ভূতলম্
গতে তস্যাপি শতধা মূর্ধাগচ্ছদরিংদম
121.40
ততঃ সর্বাণি ভূতানি বিস্ময়ং জগ্মুরুত্তমম্
বাসুদেবশ্চ বীভত্সুং প্রশশংস মহারথম্
121.41
ততো দৃষ্ট্বা বিনিহতং সিন্ধুরাজং জয়দ্রথম্
পুত্রাণাং তব নেত্রেভ্যো দুঃখাদ্বহ্বপতজ্জলম্
121.42
ভীমসেনোঽপি সংগ্রামে বোধয়ন্নিব পাণ্ডবম্
সিংহনাদেন মহতা পূরয়ামাস রোদসী
121.43
তং শ্রুত্বা তু মহানাদং ধর্মপুত্রো যুধিষ্ঠিরঃ
সৈন্ধবং নিহতং মেনে ফল্গুনেন মহাত্মনা
121.44
ততো বাদিত্রঘোষেণ স্বান্যোধানভিহর্ষয়ন্
অভ্যবর্তত সংগ্রামে ভারদ্বাজং যুয়ুত্সয়া
121.45
ততঃ প্রববৃতে রাজন্নস্তং গচ্ছতি ভাস্করে
দ্রোণস্য সোমকৈঃ সার্ধং সংগ্রামো লোমহর্ষণঃ
121.46
তে তু সর্বপ্রয়ত্নেন ভারদ্বাজং জিঘাংসবঃ
সৈন্ধবে নিহতে রাজন্নয়ুধ্যন্ত মহারথাঃ
121.47
পাণ্ডবাস্তু জয়ং লব্ধ্বা সৈন্ধবং বিনিহত্য চ
অয়োধয়ংস্ততো দ্রোণং জয়োন্মত্তাস্ততস্ততঃ
121.48
অর্জুনোঽপি রণে যোধাংস্তাবকান্রথসত্তমান্
অয়োধয়ন্মহারাজ হত্বা সৈন্ধবকং নৃপম্
121.49
স দেবশত্রূনিব দেবরাজঃ; কিরীটমালী ব্যধমত্সমন্তাৎ
যথা তমাংস্যভ্যুদিতস্তমোঘ্নঃ; পূর্বাং প্রতিজ্ঞাং সমবাপ্য বীরঃ