Utshovঅধ্যায় 120
120.1
ধৃতরাষ্ট্র উবাচ
তদবস্থে হতে তস্মিন্ভূরিশ্রবসি কৌরবে
যথা ভূয়োঽভবদ্যুদ্ধং তন্মমাচক্ষ্ব সংজয়
120.2
সংজয় উবাচ
ভূরিশ্রবসি সংক্রান্তে পরলোকায় ভারত
বাসুদেবং মহাবাহুরর্জুনঃ সমচূচুদৎ
120.3
চোদয়াশ্বান্ভৃশং কৃষ্ণ যতো রাজা জয়দ্রথঃ
অস্তমেতি মহাবাহো ত্বরমাণো দিবাকরঃ
120.4
এতদ্ধি পুরুষব্যাঘ্র মহদভ্যুদ্যতং ময়া
কার্যং সংরক্ষ্যতে চৈষ কুরুসেনামহারথৈঃ
120.5
নাস্তমেতি যথা সূর্যো যথা সত্যং ভবেদ্বচঃ
চোদয়াশ্বাংস্তথা কৃষ্ণ যথা হন্যাং জয়দ্রথম্
120.6
ততঃ কৃষ্ণো মহাবাহূ রজতপ্রতিমান্হয়ান্
হয়জ্ঞশ্চোদয়ামাস জয়দ্রথরথং প্রতি
120.7
তং প্রয়ান্তমমোঘেষুমুত্পতদ্ভিরিবাশুগৈঃ
ত্বরমাণা মহারাজ সেনামুখ্যাঃ সমাব্রজন্
120.8
দুর্যোধনশ্চ কর্ণশ্চ বৃষসেনোঽথ মদ্ররাট্
অশ্বত্থামা কৃপশ্চৈব স্বয়মেব চ সৈন্ধবঃ
120.9
সমাসাদ্য তু বীভত্সুঃ সৈন্ধবং প্রমুখে স্থিতম্
নেত্রাভ্যাং ক্রোধদীপ্তাভ্যাং সংপ্রৈক্ষন্নির্দহন্নিব
120.10
ততো দুর্যোধনো রাজা রাধেয়ং ত্বরিতোঽব্রবীৎ
অর্জুনং বীক্ষ্য সংয়ান্তং জয়দ্রথরথং প্রতি
120.11
অয়ং স বৈকর্তন যুদ্ধকালো; বিদর্শয়স্বাত্মবলং মহাত্মন্
যথা ন বধ্যেত রণেঽর্জুনেন; জয়দ্রথঃ কর্ণ তথা কুরুষ্ব
120.12
অল্পাবশিষ্টং দিবসং নৃবীর; বিঘাতয়স্বাদ্য রিপুং শরৌঘৈঃ
দিনক্ষয়ং প্রাপ্য নরপ্রবীর; ধ্রুবং হি নঃ কর্ণ জয়ো ভবিষ্যতি
120.13
সৈন্ধবে রক্ষ্যমাণে তু সূর্যস্যাস্তময়ং প্রতি
মিথ্যাপ্রতিজ্ঞঃ কৌন্তেয়ঃ প্রবেক্ষ্যতি হুতাশনম্
120.14
অনর্জুনায়াং চ ভুবি মুহূর্তমপি মানদ
জীবিতুং নোত্সহেরন্বৈ ভ্রাতরোঽস্য সহানুগাঃ
120.15
বিনষ্টৈঃ পাণ্ডবেয়ৈশ্চ সশৈলবনকাননাম্
বসুংধরামিমাং কর্ণ ভোক্ষ্যামো হতকণ্টকাম্
120.16
দৈবেনোপহতঃ পার্থো বিপরীতশ্চ মানদ
কার্যাকার্যমজানন্বৈ প্রতিজ্ঞাং কৃতবান্রণে
120.17
নূনমাত্মবিনাশায় পাণ্ডবেন কিরীটিনা
প্রতিজ্ঞেয়ং কৃতা কর্ণ জয়দ্রথবধং প্রতি
120.18
কথং জীবতি দুর্ধর্ষে ত্বয়ি রাধেয় ফল্গুনঃ
অনস্তংগত আদিত্যে হন্যাত্সৈন্ধবকং নৃপম্
120.19
রক্ষিতং মদ্ররাজেন কৃপেণ চ মহাত্মনা
জয়দ্রথং রণমুখে কথং হন্যাদ্ধনংজয়ঃ
120.20
দ্রৌণিনা রক্ষ্যমাণং চ ময়া দুঃশাসনেন চ
কথং প্রাপ্স্যতি বীভত্সুঃ সৈন্ধবং কালচোদিতঃ
120.21
যুধ্যন্তে বহবঃ শূরা লম্বতে চ দিবাকরঃ
শঙ্কে জয়দ্রথং পার্থো নৈব প্রাপ্স্যতি মানদ
120.22
স ত্বং কর্ণ ময়া সার্ধং শূরৈশ্চান্যৈর্মহারথৈঃ
যুধ্যস্ব যত্নমাস্থায় পরং পার্থেন সংয়ুগে
120.23
এবমুক্তস্তু রাধেয়স্তব পুত্রেণ মারিষ
দুর্যোধনমিদং বাক্যং প্রত্যুবাচ কুরূত্তমম্
120.24
দৃঢলক্ষ্যেণ শূরেণ ভীমসেনেন ধন্বিনা
ভৃশমুদ্বেজিতঃ সংখ্যে শরজালৈরনেকশঃ
120.25
স্থাতব্যমিতি তিষ্ঠামি রণে সংপ্রতি মানদ
নৈবাঙ্গমিঙ্গতি কিংচিন্মে সংতপ্তস্য রণেষুভিঃ
120.26
যোত্স্যামি তু তথা রাজঞ্শক্ত্যাহং পরয়া রণে
যথা পাণ্ডবমুখ্যোঽসৌ ন হনিষ্যতি সৈন্ধবম্
120.27
ন হি মে যুধ্যমানস্য সায়কাংশ্চাস্যতঃ শিতান্
সৈন্ধবং প্রাপ্স্যতে বীরঃ সব্যসাচী ধনংজয়ঃ
120.28
যত্তু শক্তিমতা কার্যং সততং হিতকারিণা
তত্করিষ্যামি কৌরব্য জয়ো দৈবে প্রতিষ্ঠিতঃ
120.29
অদ্য যোত্স্যেঽর্জুনমহং পৌরুষং স্বং ব্যপাশ্রিতঃ
ত্বদর্থং পুরুষব্যাঘ্র জয়ো দৈবে প্রতিষ্ঠিতঃ
120.30
অদ্য যুদ্ধং কুরুশ্রেষ্ঠ মম পার্থস্য চোভয়োঃ
পশ্যন্তু সর্বভূতানি দারুণং লোমহর্ষণম্
120.31
কর্ণকৌরবয়োরেবং রণে সংভাষমাণয়োঃ
অর্জুনো নিশিতৈর্বাণৈর্জঘান তব বাহিনীম্
120.32
চিচ্ছেদ তীক্ষ্ণাগ্রমুখৈঃ শূরাণামনিবর্তিনাম্
ভুজান্পরিঘসংকাশান্হস্তিহস্তোপমান্রণে
120.33
শিরাংসি চ মহাবাহুশ্চিচ্ছেদ নিশিতৈঃ শরৈঃ
হস্তিহস্তান্হয়গ্রীবা রথাক্ষাংশ্চ সমন্ততঃ
120.34
শোণিতাক্তান্হয়ারোহান্গৃহীতপ্রাসতোমরান্
ক্ষুরৈশ্চিচ্ছেদ বীভত্সুর্দ্বিধৈকৈকং ত্রিধৈব চ
120.35
হয়বারণমুখ্যাশ্চ প্রাপতন্ত সহস্রশঃ
ধ্বজাশ্ছত্রাণি চাপানি চামরাণি শিরাংসি চ
120.36
কক্ষমগ্নিমিবোদ্ধূতঃ প্রদহংস্তব বাহিনীম্
অচিরেণ মহীং পার্থশ্চকার রুধিরোত্তরাম্
120.37
হতভূয়িষ্ঠয়োধং তত্কৃত্বা তব বলং বলী
আসসাদ দুরাধর্ষঃ সৈন্ধবং সত্যবিক্রমঃ
120.38
বীভত্সুর্ভীমসেনেন সাত্বতেন চ রক্ষিতঃ
স বভৌ ভরতশ্রেষ্ঠ জ্বলন্নিব হুতাশনঃ
120.39
তং তথাবস্থিতং দৃষ্ট্বা ত্বদীয়া বীর্যসংমতাঃ
নামৃষ্যন্ত মহেষ্বাসাঃ ফল্গুনং পুরুষর্ষভাঃ
120.40
দুর্যোধনশ্চ কর্ণশ্চ বৃষসেনোঽথ মদ্ররাট্
অশ্বত্থামা কৃপশ্চৈব স্বয়মেব চ সৈন্ধবঃ
120.41
সংরব্ধাঃ সৈন্ধবস্যার্থে সমাবৃণ্বন্কিরীটিনম্
নৃত্যন্তং রথমার্গেষু ধনুর্জ্যাতলনিস্বনৈঃ
120.42
সংগ্রামকোবিদং পার্থং সর্বে যুদ্ধবিশারদাঃ
অভীতাঃ পর্যবর্তন্ত ব্যাদিতাস্যমিবান্তকম্
120.43
সৈন্ধবং পৃষ্ঠতঃ কৃত্বা জিঘাংসন্তোঽর্জুনাচ্যুতৌ
সূর্যাস্তময়মিচ্ছন্তো লোহিতায়তি ভাস্করে
120.44
তে ভুজৈর্ভোগিভোগাভৈর্ধনূংষ্যায়ম্য সায়কান্
মুমুচুঃ সূর্যরশ্ম্যাভাঞ্শতশঃ ফল্গুনং প্রতি
120.45
তানস্তানস্যমানাংশ্চ কিরীটী যুদ্ধদুর্মদঃ
দ্বিধা ত্রিধাষ্টধৈকৈকং ছিত্ত্বা বিব্যাধ তান্রণে
120.46
সিংহলাঙ্গূলকেতুস্তু দর্শয়ঞ্শক্তিমাত্মনঃ
শারদ্বতীসুতো রাজন্নর্জুনং প্রত্যবারয়ৎ
120.47
স বিদ্ধ্বা দশভিঃ পার্থং বাসুদেবং চ সপ্তভিঃ
অতিষ্ঠদ্রথমার্গেষু সৈন্ধবং পরিপালয়ন্
120.48
অথৈনং কৌরবশ্রেষ্ঠাঃ সর্ব এব মহারথাঃ
মহতা রথবংশেন সর্বতঃ পর্যবারয়ন্
120.49
বিস্ফারয়ন্তশ্চাপানি বিসৃজন্তশ্চ সায়কান্
সৈন্ধবং পর্যরক্ষন্ত শাসনাত্তনয়স্য তে
120.50
তত্র পার্থস্য শূরস্য বাহ্বোর্বলমদৃশ্যত
ইষূণামক্ষয়ত্বং চ ধনুষো গাণ্ডিবস্য চ
120.51
অস্ত্রৈরস্ত্রাণি সংবার্য দ্রৌণেঃ শারদ্বতস্য চ
একৈকং নবভির্বাণৈঃ সর্বানেব সমর্পয়ৎ
120.52
তং দ্রৌণিঃ পঞ্চবিংশত্যা বৃষসেনশ্চ সপ্তভিঃ
দুর্যোধনশ্চ বিংশত্যা কর্ণশল্যৌ ত্রিভিস্ত্রিভিঃ
120.53
ত এনমভিগর্জন্তো বিধ্যন্তশ্চ পুনঃ পুনঃ
বিধুন্বন্তশ্চ চাপানি সর্বতঃ পর্যবারয়ন্
120.54
শ্লিষ্টং তু সর্বতশ্চক্রূ রথমণ্ডলমাশু তে
সূর্যাস্তময়মিচ্ছন্তস্ত্বরমাণা মহারথাঃ
120.55
ত এনমভিনর্দন্তো বিধুন্বানা ধনূংষি চ
সিষিচুর্মার্গণৈর্ঘোরৈর্গিরিং মেঘা ইবাম্বুভিঃ
120.56
তে মহাস্ত্রাণি দিব্যানি তত্র রাজন্ব্যদর্শয়ন্
ধনংজয়স্য গাত্রেষু শূরাঃ পরিঘবাহবঃ
120.57
হতভূয়িষ্ঠয়োধং তত্কৃত্বা তব বলং বলী
আসসাদ দুরাধর্ষঃ সৈন্ধবং সত্যবিক্রমঃ
120.58
তং কর্ণঃ সংয়ুগে রাজন্প্রত্যবারয়দাশুগৈঃ
মিষতো ভীমসেনস্য সাত্বতস্য চ ভারত
120.59
তং পার্থো দশভির্বাণৈঃ প্রত্যবিধ্যদ্রণাজিরে
সূতপুত্রং মহাবাহুঃ সর্বসৈন্যস্য পশ্যতঃ
120.60
সাত্বতশ্চ ত্রিভির্বাণৈঃ কর্ণং বিব্যাধ মারিষ
ভীমসেনস্ত্রিভিশ্চৈব পুনঃ পার্থশ্চ সপ্তভিঃ
120.61
তান্কর্ণঃ প্রতিবিব্যাধ ষষ্ট্যা ষষ্ট্যা মহারথঃ
তদ্যুদ্ধমভবদ্রাজন্কর্ণস্য বহুভিঃ সহ
120.62
তত্রাদ্ভুতমপশ্যাম সূতপুত্রস্য মারিষ
যদেকঃ সমরে ক্রুদ্ধস্ত্রীন্রথান্পর্যবারয়ৎ
120.63
ফল্গুনস্তু মহাবাহুঃ কর্ণং বৈকর্তনং রণে
সায়কানাং শতেনৈব সর্বমর্মস্বতাডয়ৎ
120.64
রুধিরোক্ষিতসর্বাঙ্গঃ সূতপুত্রঃ প্রতাপবান্
শরৈঃ পঞ্চাশতা বীরঃ ফল্গুনং প্রত্যবিধ্যত
তস্য তল্লাঘবং দৃষ্ট্বা নামৃষ্যত রণেঽর্জুনঃ
120.65
ততঃ পার্থো ধনুশ্ছিত্ত্বা বিব্যাধৈনং স্তনান্তরে
সায়কৈর্নবভির্বীরস্ত্বরমাণো ধনংজয়ঃ
120.66
বধার্থং চাস্য সমরে সায়কং সূর্যবর্চসম্
চিক্ষেপ ত্বরয়া যুক্তস্ত্বরাকালে ধনংজয়ঃ
120.67
তমাপতন্তং বেগেন দ্রৌণিশ্চিচ্ছেদ সায়কম্
অর্ধচন্দ্রেণ তীক্ষ্ণেন স ছিন্নঃ প্রাপতদ্ভুবি
120.68
অথান্যদ্ধনুরাদায় সূতপুত্রঃ প্রতাপবান্
কর্ণোঽপি দ্বিষতাং হন্তা ছাদয়ামাস ফল্গুনম্
সায়কৈর্বহুসাহস্রৈঃ কৃতপ্রতিকৃতেপ্সয়া
120.69
তৌ বৃষাবিব নর্দন্তৌ নরসিংহৌ মহারথৌ
সায়কৌঘপ্রতিচ্ছন্নং চক্রতুঃ খমজিহ্মগৈঃ
অদৃশ্যৌ চ শরৌঘৈস্তৌ নিঘ্নতামিতরেতরম্
120.70
পার্থোঽহমস্মি তিষ্ঠ ত্বং কর্ণোঽহং তিষ্ঠ ফল্গুন
ইত্যেবং তর্জয়ন্তৌ তৌ বাক্শল্যৈস্তুদতাং তথা
120.71
যুধ্যেতাং সমরে বীরৌ চিত্রং লঘু চ সুষ্ঠু চ
প্রেক্ষণীয়ৌ চাভবতাং সর্বয়োধসমাগমে
120.72
প্রশস্যমানৌ সমরে সিদ্ধচারণবাতিকৈঃ
অয়ুধ্যেতাং মহারাজ পরস্পরবধৈষিণৌ
120.73
ততো দুর্যোধনো রাজংস্তাবকানভ্যভাষত
যত্তা রক্ষত রাধেয়ং নাহত্বা সমরেঽর্জুনম্
নিবর্তিষ্যতি রাধেয় ইতি মামুক্তবান্বৃষঃ
120.74
এতস্মিন্নন্তরে রাজন্দৃষ্ট্বা কর্ণস্য বিক্রমম্
আকর্ণমুক্তৈরিষুভিঃ কর্ণস্য চতুরো হয়ান্
অনয়ন্মৃত্যুলোকায় চতুর্ভিঃ সায়কোত্তমৈঃ
120.75
সারথিং চাস্য ভল্লেন রথনীডাদপাহরৎ
ছাদয়ামাস চ শরৈস্তব পুত্রস্য পশ্যতঃ
120.76
স ছাদ্যমানঃ সমরে হতাশ্বো হতসারথিঃ
মোহিতঃ শরজালেন কর্তব্যং নাভ্যপদ্যত
120.77
তং তথা বিরথং দৃষ্ট্বা রথমারোপ্য স্বং তদা
অশ্বত্থামা মহারাজ ভূয়োঽর্জুনময়োধয়ৎ
120.78
মদ্ররাজস্তু কৌন্তেয়মবিধ্যত্ত্রিংশতা শরৈঃ
শারদ্বতস্তু বিংশত্যা বাসুদেবং সমার্পয়ৎ
ধনংজয়ং দ্বাদশভিরাজঘান শিলীমুখৈঃ
120.79
চতুর্ভিঃ সিন্ধুরাজশ্চ বৃষসেনশ্চ সপ্তভিঃ
পৃথক্পৃথঙ্মহারাজ কৃষ্ণপার্থাববিধ্যতাম্
120.80
তথৈব তান্প্রত্যবিধ্যত্কুন্তীপুত্রো ধনংজয়ঃ
দ্রোণপুত্রং চতুঃষষ্ট্যা মদ্ররাজং শতেন চ
120.81
সৈন্ধবং দশভির্ভল্লৈর্বৃষসেনং ত্রিভিঃ শরৈঃ
শারদ্বতং চ বিংশত্যা বিদ্ধ্বা পার্থঃ সমুন্নদৎ
120.82
তে প্রতিজ্ঞাপ্রতীঘাতমিচ্ছন্তঃ সব্যসাচিনঃ
সহিতাস্তাবকাস্তূর্ণমভিপেতুর্ধনংজয়ম্
120.83
অথার্জুনঃ সর্বতোধারমস্ত্রং; প্রাদুশ্চক্রে ত্রাসয়ন্ধার্তরাষ্ট্রান্
তং প্রত্যুদীয়ুঃ কুরবঃ পাণ্ডুসূনুং; রথৈর্মহার্হৈঃ শরবর্ষাণ্যবর্ষন্
120.84
ততস্তু তস্মিংস্তুমুলে সমুত্থিতে; সুদারুণে ভারত মোহনীয়ে
নামুহ্যত প্রাপ্য স রাজপুত্রঃ; কিরীটমালী বিসৃজন্পৃষত্কান্
120.85
রাজ্যপ্রেপ্সুঃ সব্যসাচী কুরূণাং; স্মরন্ক্লেশান্দ্বাদশবর্ষবৃত্তান্
গাণ্ডীবমুক্তৈরিষুভির্মহাত্মা; সর্বা দিশো ব্যাবৃণোদপ্রমেয়ৈঃ
120.86
প্রদীপ্তোল্কমভবচ্চান্তরিক্ষং; দেহেষু ভূরীণ্যপতন্বয়াংসি
যত্পিঙ্গলজ্যেন কিরীটমালী; ক্রুদ্ধো রিপূনাজগবেন হন্তি
120.87
কিরীটমালী মহতা মহায়শাঃ; শরাসনেনাস্য শরাননীকজিৎ
হয়প্রবেকোত্তমনাগধূর্গতা;ন্কুরুপ্রবীরানিষুভির্ন্যপাতয়ৎ
120.88
গদাশ্চ গুর্বীঃ পরিঘানয়স্ময়া;নসীংশ্চ শক্তীশ্চ রণে নরাধিপাঃ
মহান্তি শস্ত্রাণি চ ভীমদর্শনাঃ; প্রগৃহ্য পার্থং সহসাভিদুদ্রুবুঃ
120.89
স তানুদীর্ণান্সরথাশ্ববারণা;ন্পদাতিসংঘাংশ্চ মহাধনুর্ধরঃ
বিপন্নসর্বায়ুধজীবিতান্রণে; চকার বীরো যমরাষ্ট্রবর্ধনান্