UtshovChapter 120
120.1
धृतराष्ट्र उवाच
तदवस्थे हते तस्मिन्भूरिश्रवसि कौरवे
यथा भूयोऽभवद्युद्धं तन्ममाचक्ष्व संजय
Dhritarashtra uvacha
Tadavasthe hate tasminbhurishravasi kaurave
Yatha bhuyobhavadyuddham tanmamachakshva sanjaya
120.2
संजय उवाच
भूरिश्रवसि संक्रान्ते परलोकाय भारत
वासुदेवं महाबाहुरर्जुनः समचूचुदत्
Sanjaya uvacha
Bhurishravasi sankrante paralokaya bharata
Vasudevam mahabahurarjunah samachuchudat
120.3
चोदयाश्वान्भृशं कृष्ण यतो राजा जयद्रथः
अस्तमेति महाबाहो त्वरमाणो दिवाकरः
Chodayashvanbhrisham krishna yato raja jayadrathah
Astameti mahabaho tvaramano divakarah
120.4
एतद्धि पुरुषव्याघ्र महदभ्युद्यतं मया
कार्यं संरक्ष्यते चैष कुरुसेनामहारथैः
Etaddhi purushavyaghra mahadabhyudyatam maya
Karyam sanrakshyate chaisha kurusenamaharathaih
120.5
नास्तमेति यथा सूर्यो यथा सत्यं भवेद्वचः
चोदयाश्वांस्तथा कृष्ण यथा हन्यां जयद्रथम्
Nastameti yatha suryo yatha satyam bhavedvachah
Chodayashvanstatha krishna yatha hanyam jayadratham
120.6
ततः कृष्णो महाबाहू रजतप्रतिमान्हयान्
हयज्ञश्चोदयामास जयद्रथरथं प्रति
Tatah krishno mahabahu rajatapratimanhayan
Hayagyashchodayamasa jayadratharatham prati
120.7
तं प्रयान्तममोघेषुमुत्पतद्भिरिवाशुगैः
त्वरमाणा महाराज सेनामुख्याः समाव्रजन्
Tam prayantamamogheshumutpatadbhirivashugaih
Tvaramana maharaja senamukhyah samavrajan
120.8
दुर्योधनश्च कर्णश्च वृषसेनोऽथ मद्रराट्
अश्वत्थामा कृपश्चैव स्वयमेव च सैन्धवः
Duryodhanashcha karnashcha vrishasenotha madrarat
Ashvatthama kripashchaiva svayameva cha saindhavah
120.9
समासाद्य तु बीभत्सुः सैन्धवं प्रमुखे स्थितम्
नेत्राभ्यां क्रोधदीप्ताभ्यां संप्रैक्षन्निर्दहन्निव
Samasadya tu bibhatsuh saindhavam pramukhe sthitam
Netrabhyam krodhadiptabhyam sampraikshannirdahanniva
120.10
ततो दुर्योधनो राजा राधेयं त्वरितोऽब्रवीत्
अर्जुनं वीक्ष्य संयान्तं जयद्रथरथं प्रति
Tato duryodhano raja radheyam tvaritobravit
Arjunam vikshya sanyantam jayadratharatham prati
120.11
अयं स वैकर्तन युद्धकालो; विदर्शयस्वात्मबलं महात्मन्
यथा न वध्येत रणेऽर्जुनेन; जयद्रथः कर्ण तथा कुरुष्व
Ayam sa vaikartana yuddhakalo; vidarshayasvatmabalam mahatman
Yatha na vadhyeta ranerjunena; jayadrathah karna tatha kurushva
120.12
अल्पावशिष्टं दिवसं नृवीर; विघातयस्वाद्य रिपुं शरौघैः
दिनक्षयं प्राप्य नरप्रवीर; ध्रुवं हि नः कर्ण जयो भविष्यति
Alpavashishtam divasam nrivira; vighatayasvadya ripum sharaughaih
Dinakshayam prapya narapravira; dhruvam hi nah karna jayo bhavishyati
120.13
सैन्धवे रक्ष्यमाणे तु सूर्यस्यास्तमयं प्रति
मिथ्याप्रतिज्ञः कौन्तेयः प्रवेक्ष्यति हुताशनम्
Saindhave rakshyamane tu suryasyastamayam prati
Mithyapratigyah kaunteyah pravekshyati hutashanam
120.14
अनर्जुनायां च भुवि मुहूर्तमपि मानद
जीवितुं नोत्सहेरन्वै भ्रातरोऽस्य सहानुगाः
Anarjunayam cha bhuvi muhurtamapi manada
Jivitum notsaheranvai bhratarosya sahanugah
120.15
विनष्टैः पाण्डवेयैश्च सशैलवनकाननाम्
वसुंधरामिमां कर्ण भोक्ष्यामो हतकण्टकाम्
Vinashtaih pandaveyaishcha sashailavanakananam
Vasundharamimam karna bhokshyamo hatakantakam
120.16
दैवेनोपहतः पार्थो विपरीतश्च मानद
कार्याकार्यमजानन्वै प्रतिज्ञां कृतवान्रणे
Daivenopahatah partho viparitashcha manada
Karyakaryamajananvai pratigyam kritavanrane
120.17
नूनमात्मविनाशाय पाण्डवेन किरीटिना
प्रतिज्ञेयं कृता कर्ण जयद्रथवधं प्रति
Nunamatmavinashaya pandavena kiritina
Pratigyeyam krita karna jayadrathavadham prati
120.18
कथं जीवति दुर्धर्षे त्वयि राधेय फल्गुनः
अनस्तंगत आदित्ये हन्यात्सैन्धवकं नृपम्
Katham jivati durdharshe tvayi radheya phalgunah
Anastangata aditye hanyatsaindhavakam nripam
120.19
रक्षितं मद्रराजेन कृपेण च महात्मना
जयद्रथं रणमुखे कथं हन्याद्धनंजयः
Rakshitam madrarajena kripena cha mahatmana
Jayadratham ranamukhe katham hanyaddhananjayah
120.20
द्रौणिना रक्ष्यमाणं च मया दुःशासनेन च
कथं प्राप्स्यति बीभत्सुः सैन्धवं कालचोदितः
Draunina rakshyamanam cha maya duhshasanena cha
Katham prapsyati bibhatsuh saindhavam kalachoditah
120.21
युध्यन्ते बहवः शूरा लम्बते च दिवाकरः
शङ्के जयद्रथं पार्थो नैव प्राप्स्यति मानद
Yudhyante bahavah shura lambate cha divakarah
Shanke jayadratham partho naiva prapsyati manada
120.22
स त्वं कर्ण मया सार्धं शूरैश्चान्यैर्महारथैः
युध्यस्व यत्नमास्थाय परं पार्थेन संयुगे
Sa tvam karna maya sardham shuraishchanyairmaharathaih
Yudhyasva yatnamasthaya param parthena sanyuge
120.23
एवमुक्तस्तु राधेयस्तव पुत्रेण मारिष
दुर्योधनमिदं वाक्यं प्रत्युवाच कुरूत्तमम्
Evamuktastu radheyastava putrena marisha
Duryodhanamidam vakyam pratyuvacha kuruttamam
120.24
दृढलक्ष्येण शूरेण भीमसेनेन धन्विना
भृशमुद्वेजितः संख्ये शरजालैरनेकशः
Dridhalakshyena shurena bhimasenena dhanvina
Bhrishamudvejitah sankhye sharajalairanekashah
120.25
स्थातव्यमिति तिष्ठामि रणे संप्रति मानद
नैवाङ्गमिङ्गति किंचिन्मे संतप्तस्य रणेषुभिः
Sthatavyamiti tishthami rane samprati manada
Naivangamingati kinchinme santaptasya raneshubhih
120.26
योत्स्यामि तु तथा राजञ्शक्त्याहं परया रणे
यथा पाण्डवमुख्योऽसौ न हनिष्यति सैन्धवम्
Yotsyami tu tatha rajanshaktyaham paraya rane
Yatha pandavamukhyosau na hanishyati saindhavam
120.27
न हि मे युध्यमानस्य सायकांश्चास्यतः शितान्
सैन्धवं प्राप्स्यते वीरः सव्यसाची धनंजयः
Na hi me yudhyamanasya sayakanshchasyatah shitan
Saindhavam prapsyate virah savyasachi dhananjayah
120.28
यत्तु शक्तिमता कार्यं सततं हितकारिणा
तत्करिष्यामि कौरव्य जयो दैवे प्रतिष्ठितः
Yattu shaktimata karyam satatam hitakarina
Tatkarishyami kauravya jayo daive pratishthitah
120.29
अद्य योत्स्येऽर्जुनमहं पौरुषं स्वं व्यपाश्रितः
त्वदर्थं पुरुषव्याघ्र जयो दैवे प्रतिष्ठितः
Adya yotsyerjunamaham paurusham svam vyapashritah
Tvadartham purushavyaghra jayo daive pratishthitah
120.30
अद्य युद्धं कुरुश्रेष्ठ मम पार्थस्य चोभयोः
पश्यन्तु सर्वभूतानि दारुणं लोमहर्षणम्
Adya yuddham kurushreshtha mama parthasya chobhayoh
Pashyantu sarvabhutani darunam lomaharshanam
120.31
कर्णकौरवयोरेवं रणे संभाषमाणयोः
अर्जुनो निशितैर्बाणैर्जघान तव वाहिनीम्
Karnakauravayorevam rane sambhashamanayoh
Arjuno nishitairbanairjaghana tava vahinim
120.32
चिच्छेद तीक्ष्णाग्रमुखैः शूराणामनिवर्तिनाम्
भुजान्परिघसंकाशान्हस्तिहस्तोपमान्रणे
Chichchheda tikshnagramukhaih shuranamanivartinam
Bhujanparighasankashanhastihastopamanrane
120.33
शिरांसि च महाबाहुश्चिच्छेद निशितैः शरैः
हस्तिहस्तान्हयग्रीवा रथाक्षांश्च समन्ततः
Shiransi cha mahabahushchichchheda nishitaih sharaih
Hastihastanhayagriva rathakshanshcha samantatah
120.34
शोणिताक्तान्हयारोहान्गृहीतप्रासतोमरान्
क्षुरैश्चिच्छेद बीभत्सुर्द्विधैकैकं त्रिधैव च
Shonitaktanhayarohangrihitaprasatomaran
Kshuraishchichchheda bibhatsurdvidhaikaikam tridhaiva cha
120.35
हयवारणमुख्याश्च प्रापतन्त सहस्रशः
ध्वजाश्छत्राणि चापानि चामराणि शिरांसि च
Hayavaranamukhyashcha prapatanta sahasrashah
Dhvajashchhatrani chapani chamarani shiransi cha
120.36
कक्षमग्निमिवोद्धूतः प्रदहंस्तव वाहिनीम्
अचिरेण महीं पार्थश्चकार रुधिरोत्तराम्
Kakshamagnimivoddhutah pradahanstava vahinim
Achirena mahim parthashchakara rudhirottaram
120.37
हतभूयिष्ठयोधं तत्कृत्वा तव बलं बली
आससाद दुराधर्षः सैन्धवं सत्यविक्रमः
Hatabhuyishthayodham tatkritva tava balam bali
Asasada duradharshah saindhavam satyavikramah
120.38
बीभत्सुर्भीमसेनेन सात्वतेन च रक्षितः
स बभौ भरतश्रेष्ठ ज्वलन्निव हुताशनः
Bibhatsurbhimasenena satvatena cha rakshitah
Sa babhau bharatashreshtha jvalanniva hutashanah
120.39
तं तथावस्थितं दृष्ट्वा त्वदीया वीर्यसंमताः
नामृष्यन्त महेष्वासाः फल्गुनं पुरुषर्षभाः
Tam tathavasthitam drishtva tvadiya viryasammatah
Namrishyanta maheshvasah phalgunam purusharshabhah
120.40
दुर्योधनश्च कर्णश्च वृषसेनोऽथ मद्रराट्
अश्वत्थामा कृपश्चैव स्वयमेव च सैन्धवः
Duryodhanashcha karnashcha vrishasenotha madrarat
Ashvatthama kripashchaiva svayameva cha saindhavah
120.41
संरब्धाः सैन्धवस्यार्थे समावृण्वन्किरीटिनम्
नृत्यन्तं रथमार्गेषु धनुर्ज्यातलनिस्वनैः
Sanrabdhah saindhavasyarthe samavrinvankiritinam
Nrityantam rathamargeshu dhanurjyatalanisvanaih
120.42
संग्रामकोविदं पार्थं सर्वे युद्धविशारदाः
अभीताः पर्यवर्तन्त व्यादितास्यमिवान्तकम्
Sangramakovidam partham sarve yuddhavisharadah
Abhitah paryavartanta vyaditasyamivantakam
120.43
सैन्धवं पृष्ठतः कृत्वा जिघांसन्तोऽर्जुनाच्युतौ
सूर्यास्तमयमिच्छन्तो लोहितायति भास्करे
Saindhavam prishthatah kritva jighansantorjunachyutau
Suryastamayamichchhanto lohitayati bhaskare
120.44
ते भुजैर्भोगिभोगाभैर्धनूंष्यायम्य सायकान्
मुमुचुः सूर्यरश्म्याभाञ्शतशः फल्गुनं प्रति
Te bhujairbhogibhogabhairdhanunshyayamya sayakan
Mumuchuh suryarashmyabhanshatashah phalgunam prati
120.45
तानस्तानस्यमानांश्च किरीटी युद्धदुर्मदः
द्विधा त्रिधाष्टधैकैकं छित्त्वा विव्याध तान्रणे
Tanastanasyamananshcha kiriti yuddhadurmadah
Dvidha tridhashtadhaikaikam chhittva vivyadha tanrane
120.46
सिंहलाङ्गूलकेतुस्तु दर्शयञ्शक्तिमात्मनः
शारद्वतीसुतो राजन्नर्जुनं प्रत्यवारयत्
Sinhalangulaketustu darshayanshaktimatmanah
Sharadvatisuto rajannarjunam pratyavarayat
120.47
स विद्ध्वा दशभिः पार्थं वासुदेवं च सप्तभिः
अतिष्ठद्रथमार्गेषु सैन्धवं परिपालयन्
Sa viddhva dashabhih partham vasudevam cha saptabhih
Atishthadrathamargeshu saindhavam paripalayan
120.48
अथैनं कौरवश्रेष्ठाः सर्व एव महारथाः
महता रथवंशेन सर्वतः पर्यवारयन्
Athainam kauravashreshthah sarva eva maharathah
Mahata rathavanshena sarvatah paryavarayan
120.49
विस्फारयन्तश्चापानि विसृजन्तश्च सायकान्
सैन्धवं पर्यरक्षन्त शासनात्तनयस्य ते
Vispharayantashchapani visrijantashcha sayakan
Saindhavam paryarakshanta shasanattanayasya te
120.50
तत्र पार्थस्य शूरस्य बाह्वोर्बलमदृश्यत
इषूणामक्षयत्वं च धनुषो गाण्डिवस्य च
Tatra parthasya shurasya bahvorbalamadrishyata
Ishunamakshayatvam cha dhanusho gandivasya cha
120.51
अस्त्रैरस्त्राणि संवार्य द्रौणेः शारद्वतस्य च
एकैकं नवभिर्बाणैः सर्वानेव समर्पयत्
Astrairastrani sanvarya drauneh sharadvatasya cha
Ekaikam navabhirbanaih sarvaneva samarpayat
120.52
तं द्रौणिः पञ्चविंशत्या वृषसेनश्च सप्तभिः
दुर्योधनश्च विंशत्या कर्णशल्यौ त्रिभिस्त्रिभिः
Tam draunih panchavinshatya vrishasenashcha saptabhih
Duryodhanashcha vinshatya karnashalyau tribhistribhih
120.53
त एनमभिगर्जन्तो विध्यन्तश्च पुनः पुनः
विधुन्वन्तश्च चापानि सर्वतः पर्यवारयन्
Ta enamabhigarjanto vidhyantashcha punah punah
Vidhunvantashcha chapani sarvatah paryavarayan
120.54
श्लिष्टं तु सर्वतश्चक्रू रथमण्डलमाशु ते
सूर्यास्तमयमिच्छन्तस्त्वरमाणा महारथाः
Shlishtam tu sarvatashchakru rathamandalamashu te
Suryastamayamichchhantastvaramana maharathah
120.55
त एनमभिनर्दन्तो विधुन्वाना धनूंषि च
सिषिचुर्मार्गणैर्घोरैर्गिरिं मेघा इवाम्बुभिः
Ta enamabhinardanto vidhunvana dhanunshi cha
Sishichurmarganairghorairgirim megha ivambubhih
120.56
ते महास्त्राणि दिव्यानि तत्र राजन्व्यदर्शयन्
धनंजयस्य गात्रेषु शूराः परिघबाहवः
Te mahastrani divyani tatra rajanvyadarshayan
Dhananjayasya gatreshu shurah parighabahavah
120.57
हतभूयिष्ठयोधं तत्कृत्वा तव बलं बली
आससाद दुराधर्षः सैन्धवं सत्यविक्रमः
Hatabhuyishthayodham tatkritva tava balam bali
Asasada duradharshah saindhavam satyavikramah
120.58
तं कर्णः संयुगे राजन्प्रत्यवारयदाशुगैः
मिषतो भीमसेनस्य सात्वतस्य च भारत
Tam karnah sanyuge rajanpratyavarayadashugaih
Mishato bhimasenasya satvatasya cha bharata
120.59
तं पार्थो दशभिर्बाणैः प्रत्यविध्यद्रणाजिरे
सूतपुत्रं महाबाहुः सर्वसैन्यस्य पश्यतः
Tam partho dashabhirbanaih pratyavidhyadranajire
Sutaputram mahabahuh sarvasainyasya pashyatah
120.60
सात्वतश्च त्रिभिर्बाणैः कर्णं विव्याध मारिष
भीमसेनस्त्रिभिश्चैव पुनः पार्थश्च सप्तभिः
Satvatashcha tribhirbanaih karnam vivyadha marisha
Bhimasenastribhishchaiva punah parthashcha saptabhih
120.61
तान्कर्णः प्रतिविव्याध षष्ट्या षष्ट्या महारथः
तद्युद्धमभवद्राजन्कर्णस्य बहुभिः सह
Tankarnah prativivyadha shashtya shashtya maharathah
Tadyuddhamabhavadrajankarnasya bahubhih saha
120.62
तत्राद्भुतमपश्याम सूतपुत्रस्य मारिष
यदेकः समरे क्रुद्धस्त्रीन्रथान्पर्यवारयत्
Tatradbhutamapashyama sutaputrasya marisha
Yadekah samare kruddhastrinrathanparyavarayat
120.63
फल्गुनस्तु महाबाहुः कर्णं वैकर्तनं रणे
सायकानां शतेनैव सर्वमर्मस्वताडयत्
Phalgunastu mahabahuh karnam vaikartanam rane
Sayakanam shatenaiva sarvamarmasvatadayat
120.64
रुधिरोक्षितसर्वाङ्गः सूतपुत्रः प्रतापवान्
शरैः पञ्चाशता वीरः फल्गुनं प्रत्यविध्यत
तस्य तल्लाघवं दृष्ट्वा नामृष्यत रणेऽर्जुनः
Rudhirokshitasarvangah sutaputrah pratapavan
Sharaih panchashata virah phalgunam pratyavidhyata
Tasya tallaghavam drishtva namrishyata ranerjunah
120.65
ततः पार्थो धनुश्छित्त्वा विव्याधैनं स्तनान्तरे
सायकैर्नवभिर्वीरस्त्वरमाणो धनंजयः
Tatah partho dhanushchhittva vivyadhainam stanantare
Sayakairnavabhirvirastvaramano dhananjayah
120.66
वधार्थं चास्य समरे सायकं सूर्यवर्चसम्
चिक्षेप त्वरया युक्तस्त्वराकाले धनंजयः
Vadhartham chasya samare sayakam suryavarchasam
Chikshepa tvaraya yuktastvarakale dhananjayah
120.67
तमापतन्तं वेगेन द्रौणिश्चिच्छेद सायकम्
अर्धचन्द्रेण तीक्ष्णेन स छिन्नः प्रापतद्भुवि
Tamapatantam vegena draunishchichchheda sayakam
Ardhachandrena tikshnena sa chhinnah prapatadbhuvi
120.68
अथान्यद्धनुरादाय सूतपुत्रः प्रतापवान्
कर्णोऽपि द्विषतां हन्ता छादयामास फल्गुनम्
सायकैर्बहुसाहस्रैः कृतप्रतिकृतेप्सया
Athanyaddhanuradaya sutaputrah pratapavan
Karnopi dvishatam hanta chhadayamasa phalgunam
Sayakairbahusahasraih kritapratikritepsaya
120.69
तौ वृषाविव नर्दन्तौ नरसिंहौ महारथौ
सायकौघप्रतिच्छन्नं चक्रतुः खमजिह्मगैः
अदृश्यौ च शरौघैस्तौ निघ्नतामितरेतरम्
Tau vrishaviva nardantau narasinhau maharathau
Sayakaughapratichchhannam chakratuh khamajihmagaih
Adrishyau cha sharaughaistau nighnatamitaretaram
120.70
पार्थोऽहमस्मि तिष्ठ त्वं कर्णोऽहं तिष्ठ फल्गुन
इत्येवं तर्जयन्तौ तौ वाक्शल्यैस्तुदतां तथा
Parthohamasmi tishtha tvam karnoham tishtha phalguna
Ityevam tarjayantau tau vakshalyaistudatam tatha
120.71
युध्येतां समरे वीरौ चित्रं लघु च सुष्ठु च
प्रेक्षणीयौ चाभवतां सर्वयोधसमागमे
Yudhyetam samare virau chitram laghu cha sushthu cha
Prekshaniyau chabhavatam sarvayodhasamagame
120.72
प्रशस्यमानौ समरे सिद्धचारणवातिकैः
अयुध्येतां महाराज परस्परवधैषिणौ
Prashasyamanau samare siddhacharanavatikaih
Ayudhyetam maharaja parasparavadhaishinau
120.73
ततो दुर्योधनो राजंस्तावकानभ्यभाषत
यत्ता रक्षत राधेयं नाहत्वा समरेऽर्जुनम्
निवर्तिष्यति राधेय इति मामुक्तवान्वृषः
Tato duryodhano rajanstavakanabhyabhashata
Yatta rakshata radheyam nahatva samarerjunam
Nivartishyati radheya iti mamuktavanvrishah
120.74
एतस्मिन्नन्तरे राजन्दृष्ट्वा कर्णस्य विक्रमम्
आकर्णमुक्तैरिषुभिः कर्णस्य चतुरो हयान्
अनयन्मृत्युलोकाय चतुर्भिः सायकोत्तमैः
Etasminnantare rajandrishtva karnasya vikramam
Akarnamuktairishubhih karnasya chaturo hayan
Anayanmrityulokaya chaturbhih sayakottamaih
120.75
सारथिं चास्य भल्लेन रथनीडादपाहरत्
छादयामास च शरैस्तव पुत्रस्य पश्यतः
Sarathim chasya bhallena rathanidadapaharat
Chhadayamasa cha sharaistava putrasya pashyatah
120.76
स छाद्यमानः समरे हताश्वो हतसारथिः
मोहितः शरजालेन कर्तव्यं नाभ्यपद्यत
Sa chhadyamanah samare hatashvo hatasarathih
Mohitah sharajalena kartavyam nabhyapadyata
120.77
तं तथा विरथं दृष्ट्वा रथमारोप्य स्वं तदा
अश्वत्थामा महाराज भूयोऽर्जुनमयोधयत्
Tam tatha viratham drishtva rathamaropya svam tada
Ashvatthama maharaja bhuyorjunamayodhayat
120.78
मद्रराजस्तु कौन्तेयमविध्यत्त्रिंशता शरैः
शारद्वतस्तु विंशत्या वासुदेवं समार्पयत्
धनंजयं द्वादशभिराजघान शिलीमुखैः
Madrarajastu kaunteyamavidhyattrinshata sharaih
Sharadvatastu vinshatya vasudevam samarpayat
Dhananjayam dvadashabhirajaghana shilimukhaih
120.79
चतुर्भिः सिन्धुराजश्च वृषसेनश्च सप्तभिः
पृथक्पृथङ्महाराज कृष्णपार्थावविध्यताम्
Chaturbhih sindhurajashcha vrishasenashcha saptabhih
Prithakprithanmaharaja krishnaparthavavidhyatam
120.80
तथैव तान्प्रत्यविध्यत्कुन्तीपुत्रो धनंजयः
द्रोणपुत्रं चतुःषष्ट्या मद्रराजं शतेन च
Tathaiva tanpratyavidhyatkuntiputro dhananjayah
Dronaputram chatuhshashtya madrarajam shatena cha
120.81
सैन्धवं दशभिर्भल्लैर्वृषसेनं त्रिभिः शरैः
शारद्वतं च विंशत्या विद्ध्वा पार्थः समुन्नदत्
Saindhavam dashabhirbhallairvrishasenam tribhih sharaih
Sharadvatam cha vinshatya viddhva parthah samunnadat
120.82
ते प्रतिज्ञाप्रतीघातमिच्छन्तः सव्यसाचिनः
सहितास्तावकास्तूर्णमभिपेतुर्धनंजयम्
Te pratigyapratighatamichchhantah savyasachinah
Sahitastavakasturnamabhipeturdhananjayam
120.83
अथार्जुनः सर्वतोधारमस्त्रं; प्रादुश्चक्रे त्रासयन्धार्तराष्ट्रान्
तं प्रत्युदीयुः कुरवः पाण्डुसूनुं; रथैर्महार्हैः शरवर्षाण्यवर्षन्
Atharjunah sarvatodharamastram; pradushchakre trasayandhartarashtran
Tam pratyudiyuh kuravah pandusunum; rathairmaharhaih sharavarshanyavarshan
120.84
ततस्तु तस्मिंस्तुमुले समुत्थिते; सुदारुणे भारत मोहनीये
नामुह्यत प्राप्य स राजपुत्रः; किरीटमाली विसृजन्पृषत्कान्
Tatastu tasminstumule samutthite; sudarune bharata mohaniye
Namuhyata prapya sa rajaputrah; kiritamali visrijanprishatkan
120.85
राज्यप्रेप्सुः सव्यसाची कुरूणां; स्मरन्क्लेशान्द्वादशवर्षवृत्तान्
गाण्डीवमुक्तैरिषुभिर्महात्मा; सर्वा दिशो व्यावृणोदप्रमेयैः
Rajyaprepsuh savyasachi kurunam; smarankleshandvadashavarshavrittan
Gandivamuktairishubhirmahatma; sarva disho vyavrinodaprameyaih
120.86
प्रदीप्तोल्कमभवच्चान्तरिक्षं; देहेषु भूरीण्यपतन्वयांसि
यत्पिङ्गलज्येन किरीटमाली; क्रुद्धो रिपूनाजगवेन हन्ति
Pradiptolkamabhavachchantariksham; deheshu bhurinyapatanvayansi
Yatpingalajyena kiritamali; kruddho ripunajagavena hanti
120.87
किरीटमाली महता महायशाः; शरासनेनास्य शराननीकजित्
हयप्रवेकोत्तमनागधूर्गता;न्कुरुप्रवीरानिषुभिर्न्यपातयत्
Kiritamali mahata mahayashah; sharasanenasya sharananikajit
Hayapravekottamanagadhurgata;nkurupraviranishubhirnyapatayat
120.88
गदाश्च गुर्वीः परिघानयस्मया;नसींश्च शक्तीश्च रणे नराधिपाः
महान्ति शस्त्राणि च भीमदर्शनाः; प्रगृह्य पार्थं सहसाभिदुद्रुवुः
Gadashcha gurvih parighanayasmaya;nasinshcha shaktishcha rane naradhipah
Mahanti shastrani cha bhimadarshanah; pragrihya partham sahasabhidudruvuh
120.89
स तानुदीर्णान्सरथाश्ववारणा;न्पदातिसंघांश्च महाधनुर्धरः
विपन्नसर्वायुधजीवितान्रणे; चकार वीरो यमराष्ट्रवर्धनान्
Sa tanudirnansarathashvavarana;npadatisanghanshcha mahadhanurdharah
Vipannasarvayudhajivitanrane; chakara viro yamarashtravardhanan