Utshovঅধ্যায় 119
119.1
ধৃতরাষ্ট্র উবাচ
অজিতো দ্রোণরাধেয়বিকর্ণকৃতবর্মভিঃ
তীর্ণঃ সৈন্যার্ণবং বীরঃ প্রতিশ্রুত্য যুধিষ্ঠিরে
119.2
স কথং কৌরবেয়েণ সমরেষ্বনিবারিতঃ
নিগৃহ্য ভূরিশ্রবসা বলাদ্ভুবি নিপাতিতঃ
119.3
সংজয় উবাচ
শৃণু রাজন্নিহোত্পত্তিং শৈনেয়স্য যথা পুরা
যথা চ ভূরিশ্রবসো যত্র তে সংশয়ো নৃপ
119.4
অত্রেঃ পুত্রোঽভবত্সোমঃ সোমস্য তু বুধঃ স্মৃতঃ
বুধস্যাসীন্মহেন্দ্রাভঃ পুত্র একঃ পুরূরবাঃ
119.5
পুরূরবস আয়ুস্তু আয়ুষো নহুষঃ স্মৃতঃ
নহুষস্য যয়াতিস্তু রাজর্ষির্দেবসংমিতঃ
119.6
যয়াতের্দেবয়ান্যাং তু যদুর্জ্যেষ্ঠোঽভবত্সুতঃ
যদোরভূদন্ববায়ে দেবমীঢ ইতি শ্রুতঃ
119.7
যাদবস্তস্য চ সুতঃ শূরস্ত্রৈলোক্যসংমতঃ
শূরস্য শৌরির্নৃবরো বসুদেবো মহায়শাঃ
119.8
ধনুষ্যনবরঃ শূরঃ কার্তবীর্যসমো যুধি
তদ্বীর্যশ্চাপি তত্রৈব কুলে শিনিরভূন্নৃপঃ
119.9
এতস্মিন্নেব কালে তু দেবকস্য মহাত্মনঃ
দুহিতুঃ স্বয়ংবরে রাজন্সর্বক্ষত্রসমাগমে
119.10
তত্র বৈ দেবকীং দেবীং বসুদেবার্থমাপ্তবান্
নির্জিত্য পার্থিবান্সর্বান্রথমারোপয়চ্ছিনিঃ
119.11
তাং দৃষ্ট্বা দেবকীং শৌরে রথস্থাং পুরুষর্ষভঃ
নামৃষ্যত মহাতেজাঃ সোমদত্তঃ শিনের্নৃপ
119.12
তয়োর্যুদ্ধমভূদ্রাজন্দিনার্ধং চিত্রমদ্ভুতম্
বাহুয়ুদ্ধং সুবলিনোঃ শক্রপ্রহ্রাদয়োরিব
119.13
শিনিনা সোমদত্তস্তু প্রসহ্য ভুবি পাতিতঃ
অসিমুদ্যম্য কেশেষু প্রগৃহ্য চ পদা হতঃ
119.14
মধ্যে রাজসহস্রাণাং প্রেক্ষকাণাং সমন্ততঃ
কৃপয়া চ পুনস্তেন জীবেতি স বিসর্জিতঃ
119.15
তদবস্থঃ কৃতস্তেন সোমদত্তোঽথ মারিষ
প্রসাদয়ন্মহাদেবমমর্ষবশমাস্থিতঃ
119.16
তস্য তুষ্টো মহাদেবো বরাণাং বরদঃ প্রভুঃ
বরেণ ছন্দয়ামাস স তু বব্রে বরং নৃপঃ
119.17
পুত্রমিচ্ছামি ভগবন্যো নিহন্যাচ্ছিনেঃ সুতম্
মধ্যে রাজসহস্রাণাং পদা হন্যাচ্চ সংয়ুগে
119.18
তস্য তদ্বচনং শ্রুত্বা সোমদত্তস্য পার্থিব
এবমস্ত্বিতি তত্রোক্ত্বা স দেবোঽন্তরধীয়ত
119.19
স তেন বরদানেন লব্ধবান্ভূরিদক্ষিণম্
ন্যপাতয়চ্চ সমরে সৌমদত্তিঃ শিনেঃ সুতম্
119.20
এতত্তে কথিতং রাজন্যন্মাং ত্বং পরিপৃচ্ছসি
ন হি শক্যা রণে জেতুং সাত্বতা মনুজর্ষভ
119.21
লব্ধলক্ষ্যাশ্চ সংগ্রামে বহবশ্চিত্রয়োধিনঃ
দেবদানবগন্ধর্বান্বিজেতারো হ্যবিস্মিতাঃ
স্ববীর্যবিজয়ে যুক্তা নৈতে পরপরিগ্রহাঃ
119.22
ন তুল্যং বৃষ্ণিভিরিহ দৃশ্যতে কিংচন প্রভো
ভূতং ভব্যং ভবিষ্যচ্চ বলেন ভরতর্ষভ
119.23
ন জ্ঞাতিমবমন্যন্তে বৃদ্ধানাং শাসনে রতাঃ
ন দেবাসুরগন্ধর্বা ন যক্ষোরগরাক্ষসাঃ
জেতারো বৃষ্ণিবীরাণাং ন পুনর্মানুষা রণে
119.24
ব্রহ্মদ্রব্যে গুরুদ্রব্যে জ্ঞাতিদ্রব্যেঽপ্যহিংসকাঃ
এতেষাং রক্ষিতারশ্চ যে স্যুঃ কস্যাংচিদাপদি
119.25
অর্থবন্তো ন চোত্সিক্তা ব্রহ্মণ্যাঃ সত্যবাদিনঃ
সমর্থান্নাবমন্যন্তে দীনানভ্যুদ্ধরন্তি চ
119.26
নিত্যং দেবপরা দান্তা দাতারশ্চাবিকত্থনাঃ
তেন বৃষ্ণিপ্রবীরাণাং চক্রং ন প্রতিহন্যতে
119.27
অপি মেরুং বহেত্কশ্চিত্তরেদ্বা মকরালয়ম্
ন তু বৃষ্ণিপ্রবীরাণাং সমেত্যান্তং ব্রজেন্নৃপ
119.28
এতত্তে সর্বমাখ্যাতং যত্র তে সংশয়ো বিভো
কুরুরাজ নরশ্রেষ্ঠ তব হ্যপনয়ো মহান্