Utshovঅধ্যায় 118
118.1
সংজয় উবাচ
স বাহুরপতদ্ভূমৌ সখড্গঃ সশুভাঙ্গদঃ
আদধজ্জীবলোকস্য দুঃখমুত্তমমুত্তমঃ
118.2
প্রহরিষ্যন্হৃতো বাহুরদৃশ্যেন কিরীটিনা
বেগেনাভ্যপতদ্ভূমৌ পঞ্চাস্য ইব পন্নগঃ
118.3
স মোঘং কৃতমাত্মানং দৃষ্ট্বা পার্থেন কৌরবঃ
উত্সৃজ্য সাত্যকিং ক্রোধাদ্গর্হয়ামাস পাণ্ডবম্
118.4
নৃশংসং বত কৌন্তেয় কর্মেদং কৃতবানসি
অপশ্যতো বিষক্তস্য যন্মে বাহুমচিচ্ছিদঃ
118.5
কিং নু বক্ষ্যসি রাজানং ধর্মপুত্রং যুধিষ্ঠিরম্
কিং কুর্বাণো ময়া সংখ্যে হতো ভূরিশ্রবা ইতি
118.6
ইদমিন্দ্রেণ তে সাক্ষাদুপদিষ্টং মহাত্মনা
অস্ত্রং রুদ্রেণ বা পার্থ দ্রোণেনাথ কৃপেণ বা
118.7
ননু নাম স্বধর্মজ্ঞস্ত্বং লোকেঽভ্যধিকঃ পরৈঃ
অয়ুধ্যমানস্য কথং রণে প্রহৃতবানসি
118.8
ন প্রমত্তায় ভীতায় বিরথায় প্রয়াচতে
ব্যসনে বর্তমানায় প্রহরন্তি মনস্বিনঃ
118.9
ইদং তু নীচাচরিতমসত্পুরুষসেবিতম্
কথমাচরিতং পার্থ ত্বয়া কর্ম সুদুষ্করম্
118.10
আর্যেণ সুকরং হ্যাহুরার্যকর্ম ধনংজয়
অনার্যকর্ম ত্বার্যেণ সুদুষ্করতরং ভুবি
118.11
যেষু যেষু নরঃ পার্থ যত্র যত্র চ বর্ততে
আশু তচ্ছীলতামেতি তদিদং ত্বয়ি দৃশ্যতে
118.12
কথং হি রাজবংশ্যস্ত্বং কৌরবেয়ো বিশেষতঃ
ক্ষত্রধর্মাদপক্রান্তঃ সুবৃত্তশ্চরিতব্রতঃ
118.13
ইদং তু যদতিক্ষুদ্রং বার্ষ্ণেয়ার্থে কৃতং ত্বয়া
বাসুদেবমতং নূনং নৈতত্ত্বয্যুপপদ্যতে
118.14
কো হি নাম প্রমত্তায় পরেণ সহ যুধ্যতে
ঈদৃশং ব্যসনং দদ্যাদ্যো ন কৃষ্ণসখো ভবেৎ
118.15
ব্রাত্যাঃ সংশ্লিষ্টকর্মাণঃ প্রকৃত্যৈব বিগর্হিতাঃ
বৃষ্ণ্যন্ধকাঃ কথং পার্থ প্রমাণং ভবতা কৃতাঃ
118.16
এবমুক্ত্বা মহাবাহুর্যূপকেতুর্মহায়শাঃ
যুয়ুধানং পরিত্যজ্য রণে প্রায়মুপাবিশৎ
118.17
শরানাস্তীর্য সব্যেন পাণিনা পুণ্যলক্ষণঃ
যিয়াসুর্ব্রহ্মলোকায় প্রাণান্প্রাণেষ্বথাজুহোৎ
118.18
সূর্যে চক্ষুঃ সমাধায় প্রসন্নং সলিলে মনঃ
ধ্যায়ন্মহোপনিষদং যোগয়ুক্তোঽভবন্মুনিঃ
118.19
ততঃ স সর্বসেনায়াং জনঃ কৃষ্ণধনংজয়ৌ
গর্হয়ামাস তং চাপি শশংস পুরুষর্ষভম্
118.20
নিন্দ্যমানৌ তথা কৃষ্ণৌ নোচতুঃ কিংচিদপ্রিয়ম্
প্রশস্যমানশ্চ তথা নাহৃষ্যদ্যূপকেতনঃ
118.21
তাংস্তথা বাদিনো রাজন্পুত্রাংস্তব ধনংজয়ঃ
অমৃষ্যমাণো মনসা তেষাং তস্য চ ভাষিতম্
118.22
অসংক্রুদ্ধমনা বাচা স্মারয়ন্নিব ভারত
উবাচ পাণ্ডুতনয়ঃ সাক্ষেপমিব ফল্গুনঃ
118.23
মম সর্বেঽপি রাজানো জানন্ত্যেতন্মহাব্রতম্
ন শক্যো মামকো হন্তুং যো মে স্যাদ্বাণগোচরে
118.24
যূপকেতো সমীক্ষ্য ত্বং ন মাং গর্হিতুমর্হসি
ন হি ধর্মমবিজ্ঞায় যুক্তং গর্হয়িতুং পরম্
118.25
আত্তশস্ত্রস্য হি রণে বৃষ্ণিবীরং জিঘাংসতঃ
যদহং বাহুমচ্ছৈত্সং ন স ধর্মো বিগর্হিতঃ
118.26
ন্যস্তশস্ত্রস্য বালস্য বিরথস্য বিবর্মণঃ
অভিমন্যোর্বধং তাত ধার্মিকঃ কো ন পূজয়েৎ
118.27
এবমুক্তস্তু পার্থেন শিরসা ভূমিমস্পৃশৎ
পাণিনা চৈব সব্যেন প্রাহিণোদস্য দক্ষিণম্
118.28
এতত্পার্থস্য তু বচস্ততঃ শ্রুত্বা মহাদ্যুতিঃ
যূপকেতুর্মহারাজ তূষ্ণীমাসীদবাঙ্মুখঃ
118.29
অর্জুন উবাচ
যা প্রীতির্ধর্মরাজে মে ভীমে চ বদতাং বরে
নকুলে সহদেবে চ সা মে ত্বয়ি শলাগ্রজ
118.30
ময়া তু সমনুজ্ঞাতঃ কৃষ্ণেন চ মহাত্মনা
গচ্ছ পুণ্যকৃতাঁল্লোকাঞ্শিবিরৌশীনরো যথা
118.31
সংজয় উবাচ
তত উত্থায় শৈনেয়ো বিমুক্তঃ সৌমদত্তিনা
খড্গমাদায় চিচ্ছিত্সুঃ শিরস্তস্য মহাত্মনঃ
118.32
নিহতং পাণ্ডুপুত্রেণ প্রমত্তং ভূরিদক্ষিণম্
ইয়েষ সাত্যকির্হন্তুং শলাগ্রজমকল্মষম্
118.33
নিকৃত্তভুজমাসীনং ছিন্নহস্তমিব দ্বিপম্
ক্রোশতাং সর্বসৈন্যানাং নিন্দ্যমানঃ সুদুর্মনাঃ
118.34
বার্যমাণঃ স কৃষ্ণেন পার্থেন চ মহাত্মনা
ভীমেন চক্ররক্ষাভ্যামশ্বত্থাম্না কৃপেণ চ
118.35
কর্ণেন বৃষসেনেন সৈন্ধবেন তথৈব চ
বিক্রোশতাং চ সৈন্যানামবধীত্তং যতব্রতম্
118.36
প্রায়োপবিষ্টায় রণে পার্থেন ছিন্নবাহবে
সাত্যকিঃ কৌরবেন্দ্রায় খড্গেনাপাহরচ্ছিরঃ
118.37
নাভ্যনন্দন্ত তত্সৈন্যাঃ সাত্যকিং তেন কর্মণা
অর্জুনেন হতং পূর্বং যজ্জঘান কুরূদ্বহম্
118.38
সহস্রাক্ষসমং তত্র সিদ্ধচারণমানবাঃ
ভূরিশ্রবসমালোক্য যুদ্ধে প্রায়গতং হতম্
118.39
অপূজয়ন্ত তং দেবা বিস্মিতাস্তস্য কর্মভিঃ
পক্ষবাদাংশ্চ বহুশঃ প্রাবদংস্তস্য সৈনিকাঃ
118.40
ন বার্ষ্ণেয়স্যাপরাধো ভবিতব্যং হি তত্তথা
তস্মান্মন্যুর্ন বঃ কার্যঃ ক্রোধো দুঃখকরো নৃণাম্
118.41
হন্তব্যশ্চৈষ বীরেণ নাত্র কার্যা বিচারণা
বিহিতো হ্যস্য ধাত্রৈব মৃত্যুঃ সাত্যকিরাহবে
118.42
সাত্যকিরুবাচ
ন হন্তব্যো ন হন্তব্য ইতি যন্মাং প্রভাষথ
ধর্মবাদৈরধর্মিষ্ঠা ধর্মকঞ্চুকমাস্থিতাঃ
118.43
যদা বালঃ সুভদ্রায়াঃ সুতঃ শস্ত্রবিনাকৃতঃ
যুষ্মাভির্নিহতো যুদ্ধে তদা ধর্মঃ ক্ব বো গতঃ
118.44
ময়া ত্বেতত্প্রতিজ্ঞাতং ক্ষেপে কস্মিংশ্চিদেব হি
যো মাং নিষ্পিষ্য সংগ্রামে জীবন্হন্যাত্পদা রুষা
স মে বধ্যো ভবেচ্ছত্রুর্যদ্যপি স্যান্মুনিব্রতঃ
118.45
চেষ্টমানং প্রতীঘাতে সভুজং মাং সচক্ষুষঃ
মন্যধ্বং মৃতমিত্যেবমেতদ্বো বুদ্ধিলাঘবম্
যুক্তো হ্যস্য প্রতীঘাতঃ কৃতো মে কুরুপুংগবাঃ
118.46
যত্তু পার্থেন মত্স্নেহাত্স্বাং প্রতিজ্ঞাং চ রক্ষতা
সখড্গোঽস্য হৃতো বাহুরেতেনৈবাস্মি বঞ্চিতঃ
118.47
ভবিতব্যং চ যদ্ভাবি দৈবং চেষ্টয়তীব চ
সোঽয়ং হতো বিমর্দেঽস্মিন্কিমত্রাধর্মচেষ্টিতম্
118.48
অপি চায়ং পুরা গীতঃ শ্লোকো বাল্মীকিনা ভুবি
পীডাকরমমিত্রাণাং যত্স্যাত্কর্তব্যমেব তৎ
118.49
সংজয় উবাচ
এবমুক্তে মহারাজ সর্বে কৌরবপাণ্ডবাঃ
ন স্ম কিংচিদভাষন্ত মনসা সমপূজয়ন্
118.50
মন্ত্রৈর্হি পূতস্য মহাধ্বরেষু; যশস্বিনো ভূরিসহস্রদস্য
মুনেরিবারণ্যগতস্য তস্য; ন তত্র কশ্চিদ্বধমভ্যনন্দৎ
118.51
সুনীলকেশং বরদস্য তস্য; শূরস্য পারাবতলোহিতাক্ষম্
অশ্বস্য মেধ্যস্য শিরো নিকৃত্তং; ন্যস্তং হবির্ধানমিবোত্তরেণ
118.52
স তেজসা শস্ত্রহতেন পূতো; মহাহবে দেহবরং বিসৃজ্য
আক্রামদূর্ধ্বং বরদো বরার্হো; ব্যাবৃত্য ধর্মেণ পরেণ রোদসী