Utshovঅধ্যায় 117
117.1
সংজয় উবাচ
তমাপতন্তং সংপ্রেক্ষ্য সাত্বতং যুদ্ধদুর্মদম্
ক্রোধাদ্ভূরিশ্রবা রাজন্সহসা সমুপাদ্রবৎ
117.2
তমব্রবীন্মহাবাহুঃ কৌরব্যঃ শিনিপুংগবম্
অদ্য প্রাপ্তোঽসি দিষ্ট্যা মে চক্ষুর্বিষয়মিত্যুত
117.3
চিরাভিলষিতং কামমদ্য প্রাপ্স্যামি সংয়ুগে
ন হি মে মোক্ষ্যসে জীবন্যদি নোত্সৃজসে রণম্
117.4
অদ্য ত্বাং সমরে হত্বা নিত্যং শূরাভিমানিনম্
নন্দয়িষ্যামি দাশার্হ কুরুরাজং সুয়োধনম্
117.5
অদ্য মদ্বাণনির্দগ্ধং পতিতং ধরণীতলে
দ্রক্ষ্যতস্ত্বাং রণে বীরৌ সহিতৌ কেশবার্জুনৌ
117.6
অদ্য ধর্মসুতো রাজা শ্রুত্বা ত্বাং নিহতং ময়া
সব্রীডো ভবিতা সদ্যো যেনাসীহ প্রবেশিতঃ
117.7
অদ্য মে বিক্রমং পার্থো বিজ্ঞাস্যতি ধনংজয়ঃ
ত্বয়ি ভূমৌ বিনিহতে শয়ানে রুধিরোক্ষিতে
117.8
চিরাভিলষিতো হ্যদ্য ত্বয়া সহ সমাগমঃ
পুরা দেবাসুরে যুদ্ধে শক্রস্য বলিনা যথা
117.9
অদ্য যুদ্ধং মহাঘোরং তব দাস্যামি সাত্বত
ততো জ্ঞাস্যসি তত্ত্বেন মদ্বীর্যবলপৌরুষম্
117.10
অদ্য সংয়মনীং যাতা ময়া ত্বং নিহতো রণে
যথা রামানুজেনাজৌ রাবণির্লক্ষ্মণেন বৈ
117.11
অদ্য কৃষ্ণশ্চ পার্থশ্চ ধর্মরাজশ্চ মাধব
হতে ত্বয়ি নিরুত্সাহা রণং ত্যক্ষ্যন্ত্যসংশয়ম্
117.12
অদ্য তেঽপচিতিং কৃত্বা শিতৈর্মাধব সায়কৈঃ
তত্স্ত্রিয়ো নন্দয়িষ্যামি যে ত্বয়া নিহতা রণে
117.13
চক্ষুর্বিষয়সংপ্রাপ্তো ন ত্বং মাধব মোক্ষ্যসে
সিংহস্য বিষয়ং প্রাপ্তো যথা ক্ষুদ্রমৃগস্তথা
117.14
যুয়ুধানস্তু তং রাজন্প্রত্যুবাচ হসন্নিব
কৌরবেয় ন সংত্রাসো বিদ্যতে মম সংয়ুগে
117.15
স মাং নিহন্যাত্সংগ্রামে যো মাং কুর্যান্নিরায়ুধম্
সমাস্তু শাশ্বতীর্হন্যাদ্যো মাং হন্যাদ্ধি সংয়ুগে
117.16
কিং মৃষোক্তেন বহুনা কর্মণা তু সমাচর
শারদস্যেব মেঘস্য গর্জিতং নিষ্ফলং হি তে
117.17
শ্রুত্বৈতদ্গর্জিতং বীর হাস্যং হি মম জায়তে
চিরকালেপ্সিতং লোকে যুদ্ধমদ্যাস্তু কৌরব
117.18
ত্বরতে মে মতিস্তাত ত্বয়ি যুদ্ধাভিকাঙ্ক্ষিণি
নাহত্বা সংনিবর্তিষ্যে ত্বামদ্য পুরুষাধম
117.19
অন্যোন্যং তৌ তদা বাগ্ভিস্তক্ষন্তৌ নরপুংগবৌ
জিঘাংসূ পরমক্রুদ্ধাবভিজঘ্নতুরাহবে
117.20
সমেতৌ তৌ নরব্যাঘ্রৌ শুষ্মিণৌ স্পর্ধিনৌ রণে
দ্বিরদাবিব সংক্রুদ্ধৌ বাশিতার্থে মদোত্কটৌ
117.21
ভূরিশ্রবাঃ সাত্যকিশ্চ ববর্ষতুররিংদমৌ
শরবর্ষাণি ভীমানি মেঘাবিব পরস্পরম্
117.22
সৌমদত্তিস্তু শৈনেয়ং প্রচ্ছাদ্যেষুভিরাশুগৈঃ
জিঘাংসুর্ভরতশ্রেষ্ঠ বিব্যাধ নিশিতৈঃ শরৈঃ
117.23
দশভিঃ সাত্যকিং বিদ্ধ্বা সৌমদত্তিরথাপরান্
মুমোচ নিশিতান্বাণাঞ্জিঘাংসুঃ শিনিপুংগবম্
117.24
তানস্য বিশিখাংস্তীক্ষ্ণানন্তরিক্ষে বিশাং পতে
অপ্রাপ্তানস্ত্রমায়াভিরগ্রসত্সাত্যকিঃ প্রভো
117.25
তৌ পৃথক্শরবর্ষাভ্যামবর্ষেতাং পরস্পরম্
উত্তমাভিজনৌ বীরৌ কুরুবৃষ্ণিয়শস্করৌ
117.26
তৌ নখৈরিব শার্দূলৌ দন্তৈরিব মহাদ্বিপৌ
রথশক্তিভিরন্যোন্যং বিশিখৈশ্চাপ্যকৃন্ততাম্
117.27
নির্ভিদন্তৌ হি গাত্রাণি বিক্ষরন্তৌ চ শোণিতম্
ব্যষ্টম্ভয়েতামন্যোন্যং প্রাণদ্যূতাভিদেবিনৌ
117.28
এবমুত্তমকর্মাণৌ কুরুবৃষ্ণিয়শস্করৌ
পরস্পরময়ুধ্যেতাং বারণাবিব যূথপৌ
117.29
তাবদীর্ঘেণ কালেন ব্রহ্মলোকপুরস্কৃতৌ
জিগীষন্তৌ পরং স্থানমন্যোন্যমভিজঘ্নতুঃ
117.30
সাত্যকিঃ সৌমদত্তিশ্চ শরবৃষ্ট্যা পরস্পরম্
হৃষ্টবদ্ধার্তরাষ্ট্রাণাং পশ্যতামভ্যবর্ষতাম্
117.31
সংপ্রৈক্ষন্ত জনাস্তত্র যুধ্যমানৌ যুধাং পতী
যূথপৌ বাশিতাহেতোঃ প্রয়ুদ্ধাবিব কুঞ্জরৌ
117.32
অন্যোন্যস্য হয়ান্হত্বা ধনুষী বিনিকৃত্য চ
বিরথাবসিয়ুদ্ধায় সমেয়াতাং মহারণে
117.33
আর্ষভে চর্মণী চিত্রে প্রগৃহ্য বিপুলে শুভে
বিকোশৌ চাপ্যসী কৃত্বা সমরে তৌ বিচেরতুঃ
117.34
চরন্তৌ বিবিধান্মার্গান্মণ্ডলানি চ ভাগশঃ
মুহুরাজঘ্নতুঃ ক্রুদ্ধাবন্যোন্যমরিমর্দনৌ
117.35
সখড্গৌ চিত্রবর্মাণৌ সনিষ্কাঙ্গদভূষণৌ
রণে রণোত্কটৌ রাজন্নন্যোন্যং পর্যকর্ষতাম্
117.36
মুহূর্তমিব রাজেন্দ্র পরিকৃষ্য পরস্পরম্
পশ্যতাং সর্বসৈন্যানাং বীরাবাশ্বসতাং পুনঃ
117.37
অসিভ্যাং চর্মণী শুভ্রে বিপুলে চ শরাবরে
নিকৃত্য পুরুষব্যাঘ্রৌ বাহুয়ুদ্ধং প্রচক্রতুঃ
117.38
ব্যূঢোরস্কৌ দীর্ঘভুজৌ নিয়ুদ্ধকুশলাবুভৌ
বাহুভিঃ সমসজ্জেতামায়সৈঃ পরিঘৈরিব
117.39
তয়োরাসন্ভুজাঘাতা নিগ্রহপ্রগ্রহৌ তথা
শিক্ষাবলসমুদ্ভূতাঃ সর্বয়োধপ্রহর্ষণাঃ
117.40
তয়োর্নৃবরয়ো রাজন্সমরে যুধ্যমানয়োঃ
ভীমোঽভবন্মহাশব্দো বজ্রপর্বতয়োরিব
117.41
দ্বিপাবিব বিষাণাগ্রৈঃ শৃঙ্গৈরিব মহর্ষভৌ
যুয়ুধাতে মহাত্মানৌ কুরুসাত্বতপুংগবৌ
117.42
ক্ষীণায়ুধে সাত্বতে যুধ্যমানে; ততোঽব্রবীদর্জুনং বাসুদেবঃ
পশ্যস্বৈনং বিরথং যুধ্যমানং; রণে কেতুং সর্বধনুর্ধরাণাম্
117.43
প্রবিষ্টো ভারতীং সেনাং তব পাণ্ডব পৃষ্ঠতঃ
যোধিতশ্চ মহাবীর্যৈঃ সর্বৈর্ভারত ভারতৈঃ
117.44
পরিশ্রান্তো যুধাং শ্রেষ্ঠঃ সংপ্রাপ্তো ভূরিদক্ষিণম্
যুদ্ধকাঙ্ক্ষিণমায়ান্তং নৈতত্সমমিবার্জুন
117.45
ততো ভূরিশ্রবাঃ ক্রুদ্ধঃ সাত্যকিং যুদ্ধদুর্মদম্
উদ্যম্য ন্যহনদ্রাজন্মত্তো মত্তমিব দ্বিপম্
117.46
রথস্থয়োর্দ্বয়োর্যুদ্ধে ক্রুদ্ধয়োর্যোধমুখ্যয়োঃ
কেশবার্জুনয়ো রাজন্সমরে প্রেক্ষমাণয়োঃ
117.47
অথ কৃষ্ণো মহাবাহুরর্জুনং প্রত্যভাষত
পশ্য বৃষ্ণ্যন্ধকব্যাঘ্রং সৌমদত্তিবশং গতম্
117.48
পরিশ্রান্তং গতং ভূমৌ কৃত্বা কর্ম সুদুষ্করম্
তবান্তেবাসিনং শূরং পালয়ার্জুন সাত্যকিম্
117.49
ন বশং যজ্ঞশীলস্য গচ্ছেদেষ বরারিহন্
ত্বত্কৃতে পুরুষব্যাঘ্র তদাশু ক্রিয়তাং বিভো
117.50
অথাব্রবীদ্ধৃষ্টমনা বাসুদেবং ধনংজয়ঃ
পশ্য বৃষ্ণিপ্রবীরেণ ক্রীডন্তং কুরুপুংগবম্
মহাদ্বিপেনেব বনে মত্তেন হরিয়ূথপম্
117.51
হাহাকারো মহানাসীত্সৈন্যানাং ভরতর্ষভ
যদুদ্যম্য মহাবাহুঃ সাত্যকিং ন্যহনদ্ভুবি
117.52
স সিংহ ইব মাতঙ্গং বিকর্ষন্ভূরিদক্ষিণঃ
ব্যরোচত কুরুশ্রেষ্ঠঃ সাত্বতপ্রবরং যুধি
117.53
অথ কোশাদ্বিনিষ্কৃষ্য খড্গং ভূরিশ্রবা রণে
মূর্ধজেষু নিজগ্রাহ পদা চোরস্যতাডয়ৎ
117.54
তথা তু পরিকৃষ্যন্তং দৃষ্ট্বা সাত্বতমাহবে
বাসুদেবস্ততো রাজন্ভূয়োঽর্জুনমভাষত
117.55
পশ্য বৃষ্ণ্যন্ধকব্যাঘ্রং সৌমদত্তিবশং গতম্
তব শিষ্যং মহাবাহো ধনুষ্যনবরং ত্বয়া
117.56
অসত্যো বিক্রমঃ পার্থ যত্র ভূরিশ্রবা রণে
বিশেষয়তি বার্ষ্ণেয়ং সাত্যকিং সত্যবিক্রমম্
117.57
এবমুক্তো মহাবাহুর্বাসুদেবেন পাণ্ডবঃ
মনসা পূজয়ামাস ভূরিশ্রবসমাহবে
117.58
বিকর্ষন্সাত্বতশ্রেষ্ঠং ক্রীডমান ইবাহবে
সংহর্ষয়তি মাং ভূয়ঃ কুরূণাং কীর্তিবর্ধনঃ
117.59
প্রবরং বৃষ্ণিবীরাণাং যন্ন হন্যাদ্ধি সাত্যকিম্
মহাদ্বিপমিবারণ্যে মৃগেন্দ্র ইব কর্ষতি
117.60
এবং তু মনসা রাজন্পার্থঃ সংপূজ্য কৌরবম্
বাসুদেবং মহাবাহুরর্জুনঃ প্রত্যভাষত
117.61
সৈন্ধবাসক্তদৃষ্টিত্বান্নৈনং পশ্যামি মাধব
এষ ত্বসুকরং কর্ম যাদবার্থে করোম্যহম্
117.62
ইত্যুক্ত্বা বচনং কুর্বন্বাসুদেবস্য পাণ্ডবঃ
সখড্গং যজ্ঞশীলস্য পত্রিণা বাহুমচ্ছিনৎ