Utshovঅধ্যায় 116
116.1
সংজয় উবাচ
তমুদ্যতং মহাবাহুং দুঃশাসনরথং প্রতি
ত্বরিতং ত্বরণীয়েষু ধনংজয়হিতৈষিণম্
116.2
ত্রিগর্তানাং মহেষ্বাসাঃ সুবর্ণবিকৃতধ্বজাঃ
সেনাসমুদ্রমাবিষ্টমানর্তং পর্যবারয়ন্
116.3
অথৈনং রথবংশেন সর্বতঃ সংনিবার্য তে
অবাকিরঞ্শরব্রাতৈঃ ক্রুদ্ধাঃ পরমধন্বিনঃ
116.4
অজয়দ্রাজপুত্রাংস্তান্যতমানান্মহারণে
একঃ পঞ্চাশতং শত্রূন্সাত্যকিঃ সত্যবিক্রমঃ
116.5
সংপ্রাপ্য ভারতীমধ্যং তলঘোষসমাকুলম্
অসিশক্তিগদাপূর্ণমপ্লবং সলিলং যথা
116.6
তত্রাদ্ভুতমপশ্যাম শৈনেয়চরিতং রণে
প্রতীচ্যাং দিশি তং দৃষ্ট্বা প্রাচ্যাং পশ্যাম লাঘবাৎ
116.7
উদীচীং দক্ষিণাং প্রাচীং প্রতীচীং প্রসৃতস্তথা
নৃত্যন্নিবাচরচ্ছূরো যথা রথশতং তথা
116.8
তদ্দৃষ্ট্বা চরিতং তস্য সিংহবিক্রান্তগামিনঃ
ত্রিগর্তাঃ সংন্যবর্তন্ত সংতপ্তাঃ স্বজনং প্রতি
116.9
তমন্যে শূরসেনানাং শূরাঃ সংখ্যে ন্যবারয়ন্
নিয়চ্ছন্তঃ শরব্রাতৈর্মত্তং দ্বিপমিবাঙ্কুশৈঃ
116.10
তান্ন্যবারয়দায়স্তান্মুহূর্তমিব সাত্যকিঃ
ততঃ কলিঙ্গৈর্যুয়ুধে সোঽচিন্ত্যবলবিক্রমঃ
116.11
তাং চ সেনামতিক্রম্য কলিঙ্গানাং দুরত্যয়াম্
অথ পার্থং মহাবাহুর্ধনংজয়মুপাসদৎ
116.12
তরন্নিব জলে শ্রান্তো যথা স্থলমুপেয়িবান্
তং দৃষ্ট্বা পুরুষব্যাঘ্রং যুয়ুধানঃ সমাশ্বসৎ
116.13
তমায়ান্তমভিপ্রেক্ষ্য কেশবোঽর্জুনমব্রবীৎ
অসাবায়াতি শৈনেয়স্তব পার্থ পদানুগঃ
116.14
এষ শিষ্যঃ সখা চৈব তব সত্যপরাক্রমঃ
সর্বান্যোধাংস্তৃণীকৃত্য বিজিগ্যে পুরুষর্ষভঃ
116.15
এষ কৌরবয়োধানাং কৃত্বা ঘোরমুপদ্রবম্
তব প্রাণৈঃ প্রিয়তরঃ কিরীটিন্নেতি সাত্যকিঃ
116.16
এষ দ্রোণং তথা ভোজং কৃতবর্মাণমেব চ
কদর্থীকৃত্য বিশিখৈঃ ফল্গুনাভ্যেতি সাত্যকিঃ
116.17
ধর্মরাজপ্রিয়ান্বেষী হত্বা যোধান্বরান্বরান্
শূরশ্চৈব কৃতাস্ত্রশ্চ ফল্গুনাভ্যেতি সাত্যকিঃ
116.18
কৃত্বা সুদুষ্করং কর্ম সৈন্যমধ্যে মহাবলঃ
তব দর্শনমন্বিচ্ছন্পাণ্ডবাভ্যেতি সাত্যকিঃ
116.19
বহূনেকরথেনাজৌ যোধয়িত্বা মহারথান্
আচার্যপ্রমুখান্পার্থ আয়াত্যেষ হি সাত্যকিঃ
116.20
স্ববাহুবলমাশ্রিত্য বিদার্য চ বরূথিনীম্
প্রেষিতো ধর্মপুত্রেণ পার্থৈষোঽভ্যেতি সাত্যকিঃ
116.21
যস্য নাস্তি সমো যোধঃ কৌরবেষু কথংচন
সোঽয়মায়াতি কৌন্তেয় সাত্যকিঃ সত্যবিক্রমঃ
116.22
কুরুসৈন্যাদ্বিমুক্তো বৈ সিংহো মধ্যাদ্গবামিব
নিহত্য বহুলাঃ সেনাঃ পার্থৈষোঽভ্যেতি সাত্যকিঃ
116.23
এষ রাজসহস্রাণাং বক্ত্রৈঃ পঙ্কজসংনিভৈঃ
আস্তীর্য বসুধাং পার্থ ক্ষিপ্রমায়াতি সাত্যকিঃ
116.24
এষ দুর্যোধনং জিত্বা ভ্রাতৃভিঃ সহিতং রণে
নিহত্য জলসংধং চ ক্ষিপ্রমায়াতি সাত্যকিঃ
116.25
রুধিরৌঘবতীং কৃত্বা নদীং শোণিতকর্দমাম্
তৃণবন্ন্যস্য কৌরব্যানেষ আয়াতি সাত্যকিঃ
116.26
ততোঽপ্রহৃষ্টঃ কৌন্তেয়ঃ কেশবং বাক্যমব্রবীৎ
ন মে প্রিয়ং মহাবাহো যন্মামভ্যেতি সাত্যকিঃ
116.27
ন হি জানামি বৃত্তান্তং ধর্মরাজস্য কেশব
সাত্বতেন বিহীনঃ স যদি জীবতি বা ন বা
116.28
এতেন হি মহাবাহো রক্ষিতব্যঃ স পার্থিবঃ
তমেষ কথমুত্সৃজ্য মম কৃষ্ণ পদানুগঃ
116.29
রাজা দ্রোণায় চোত্সৃষ্টঃ সৈন্ধবশ্চানিপাতিতঃ
প্রত্যুদ্যাতশ্চ শৈনেয়মেষ ভূরিশ্রবা রণে
116.30
সোঽয়ং গুরুতরো ভারঃ সৈন্ধবান্মে সমাহিতঃ
জ্ঞাতব্যশ্চ হি মে রাজা রক্ষিতব্যশ্চ সাত্যকিঃ
116.31
জয়দ্রথশ্চ হন্তব্যো লম্বতে চ দিবাকরঃ
শ্রান্তশ্চৈষ মহাবাহুরল্পপ্রাণশ্চ সাংপ্রতম্
116.32
পরিশ্রান্তা হয়াশ্চাস্য হয়য়ন্তা চ মাধব
ন চ ভূরিশ্রবাঃ শ্রান্তঃ সসহায়শ্চ কেশব
116.33
অপীদানীং ভবেদস্য ক্ষেমমস্মিন্সমাগমে
কচ্চিন্ন সাগরং তীর্ত্বা সাত্যকিঃ সত্যবিক্রমঃ
গোষ্পদং প্রাপ্য সীদেত মহৌজাঃ শিনিপুংগবঃ
116.34
অপি কৌরবমুখ্যেন কৃতাস্ত্রেণ মহাত্মনা
সমেত্য ভূরিশ্রবসা স্বস্তিমান্সাত্যকির্ভবেৎ
116.35
ব্যতিক্রমমিমং মন্যে ধর্মরাজস্য কেশব
আচার্যাদ্ভয়মুত্সৃজ্য যঃ প্রেষয়তি সাত্যকিম্
116.36
গ্রহণং ধর্মরাজস্য খগঃ শ্যেন ইবামিষম্
নিত্যমাশংসতে দ্রোণঃ কচ্চিত্স্যাত্কুশলী নৃপঃ