Utshovঅধ্যায় 115
115.1
ধৃতরাষ্ট্র উবাচ
অহন্যহনি মে দীপ্তং যশঃ পততি সংজয়
হতা মে বহবো যোধা মন্যে কালস্য পর্যয়ম্
115.2
ধনংজয়স্তু সংক্রুদ্ধঃ প্রবিষ্টো মামকং বলম্
রক্ষিতং দ্রোণকর্ণাভ্যামপ্রবেশ্যং সুরৈরপি
115.3
তাভ্যামূর্জিতবীর্যাভ্যামাপ্যায়িতপরাক্রমঃ
সহিতঃ কৃষ্ণভীমাভ্যাং শিনীনামৃষভেণ চ
115.4
তদা প্রভৃতি মা শোকো দহত্যগ্নিরিবাশয়ম্
গ্রস্তান্হি প্রতিপশ্যামি ভূমিপালান্সসৈন্ধবান্
115.5
অপ্রিয়ং সুমহত্কৃত্বা সিন্ধুরাজঃ কিরীটিনঃ
চক্ষুর্বিষয়মাপন্নঃ কথং মুচ্যেত জীবিতঃ
115.6
অনুমানাচ্চ পশ্যামি নাস্তি সংজয় সৈন্ধবঃ
যুদ্ধং তু তদ্যথা বৃত্তং তন্মমাচক্ষ্ব পৃচ্ছতঃ
115.7
যচ্চ বিক্ষোভ্য মহতীং সেনাং সংলোড্য চাসকৃৎ
একঃ প্রবিষ্টঃ সংক্রুদ্ধো নলিনীমিব কুঞ্জরঃ
115.8
তস্য বৃষ্ণিপ্রবীরস্য ব্রূহি যুদ্ধং যথাতথম্
ধনংজয়ার্থে যত্তস্য কুশলো হ্যসি সংজয়
115.9
সংজয় উবাচ
তথা তু বৈকর্তনপীডিতং তং; ভীমং প্রয়ান্তং পুরুষপ্রবীরম্
সমীক্ষ্য রাজন্নরবীরমধ্যে; শিনিপ্রবীরোঽনুয়য়ৌ রথেন
115.10
নদন্যথা বজ্রধরস্তপান্তে; জ্বলন্যথা জলদান্তে চ সূর্যঃ
নিঘ্নন্নমিত্রান্ধনুষা দৃঢেন; সংকম্পয়ংস্তব পুত্রস্য সেনাম্
115.11
তং যান্তমশ্বৈ রজতপ্রকাশৈ;রায়োধনে নরবীরং চরন্তম্
নাশক্নুবন্বারয়িতুং ত্বদীয়াঃ; সর্বে রথা ভারত মাধবাগ্র্যম্
115.12
অমর্ষপূর্ণস্ত্বনিবৃত্তয়োধী; শরাসনী কাঞ্চনবর্মধারী
অলম্বুসঃ সাত্যকিং মাধবাগ্র্য;মবারয়দ্রাজবরোঽভিপত্য
115.13
তয়োরভূদ্ভারত সংপ্রহার;স্তথাগতো নৈব বভূব কশ্চিৎ
প্রৈক্ষন্ত এবাহবশোভিনৌ তৌ; যোধাস্ত্বদীয়াশ্চ পরে চ সর্বে
115.14
অবিধ্যদেনং দশভিঃ পৃষত্কৈ;রলম্বুসো রাজবরঃ প্রসহ্য
অনাগতানেব তু তান্পৃষত্কাং;শ্চিচ্ছেদ বাণৈঃ শিনিপুংগবোঽপি
115.15
পুনঃ স বাণৈস্ত্রিভিরগ্নিকল্পৈ;রাকর্ণপূর্ণৈর্নিশিতৈঃ সুপুঙ্খৈঃ
বিব্যাধ দেহাবরণং বিদার্য; তে সাত্যকেরাবিবিশুঃ শরীরম্
115.16
তৈঃ কায়মস্যাগ্ন্যনিলপ্রভাবৈ;র্বিদার্য বাণৈরপরৈর্জ্বলদ্ভিঃ
আজঘ্নিবাংস্তান্রজতপ্রকাশা;নশ্বাংশ্চতুর্ভিশ্চতুরঃ প্রসহ্য
115.17
তথা তু তেনাভিহতস্তরস্বী; নপ্তা শিনেশ্চক্রধরপ্রভাবঃ
অলম্বুসস্যোত্তমবেগবদ্ভি;র্হয়াংশ্চতুর্ভির্নিজঘান বাণৈঃ
115.18
অথাস্য সূতস্য শিরো নিকৃত্য; ভল্লেন কালানলসংনিভেন
সকুণ্ডলং পূর্ণশশিপ্রকাশং; ভ্রাজিষ্ণু বক্ত্রং নিচকর্ত দেহাৎ
115.19
নিহত্য তং পার্থিবপুত্রপৌত্রং; সংখ্যে মধূনামৃষভঃ প্রমাথী
ততোঽন্বয়াদর্জুনমেব বীরঃ; সৈন্যানি রাজংস্তব সংনিবার্য
115.20
অন্বাগতং বৃষ্ণিবরং সমীক্ষ্য; তথারিমধ্যে পরিবর্তমানম্
ঘ্নন্তং কুরূণামিষুভির্বলানি; পুনঃ পুনর্বায়ুরিবাভ্রপূগান্
115.21
ততোঽবহন্সৈন্ধবাঃ সাধু দান্তা; গোক্ষীরকুন্দেন্দুহিমপ্রকাশাঃ
সুবর্ণজালাবততাঃ সদশ্বা; যতো যতঃ কাময়তে নৃসিংহঃ
115.22
অথাত্মজাস্তে সহিতাভিপেতু;রন্যে চ যোধাস্ত্বরিতাস্ত্বদীয়াঃ
কৃত্বা মুখং ভারত যোধমুখ্যং; দুঃশাসনং ত্বত্সুতমাজমীঢ
115.23
তে সর্বতঃ সংপরিবার্য সংখ্যে; শৈনেয়মাজঘ্নুরনীকসাহাঃ
স চাপি তান্প্রবরঃ সাত্বতানাং; ন্যবারয়দ্বাণজালেন বীরঃ
115.24
নিবার্য তাংস্তূর্ণমমিত্রঘাতী; নপ্তা শিনেঃ পত্রিভিরগ্নিকল্পৈঃ
দুঃশাসনস্যাপি জঘান বাহা;নুদ্যম্য বাণাসনমাজমীঢ