Utshovঅধ্যায় 114
114.1
সংজয় উবাচ
ততঃ কর্ণো মহারাজ ভীমং বিদ্ধ্বা ত্রিভিঃ শরৈঃ
মুমোচ শরবর্ষাণি চিত্রাণি চ বহূনি চ
114.2
বধ্যমানো মহারাজ সূতপুত্রেণ পাণ্ডবঃ
ন বিব্যথে ভীমসেনো ভিদ্যমান ইবাচলঃ
114.3
স কর্ণং কর্ণিনা কর্ণে পীতেন নিশিতেন চ
বিব্যাধ যুধি রাজেন্দ্র ভীমসেনঃ পতত্রিণা
114.4
স কুণ্ডলং মহত্কর্ণাত্কর্ণস্যাপাতয়দ্ভুবি
তপনীয়ং মহারাজ দীপ্তং জ্যোতিরিবাম্বরাৎ
114.5
অথাপরেণ ভল্লেন সূতপুত্রং স্তনান্তরে
আজঘান ভৃশং ভীমঃ স্ময়ন্নিব মহাবলঃ
114.6
পুনরস্য ত্বরন্ভীমো নারাচান্দশ ভারত
রণে প্রৈষীন্মহাবেগান্যমদণ্ডোপমাংস্তথা
114.7
তে ললাটং সমাসাদ্য সূতপুত্রস্য মারিষ
বিবিশুশ্চোদিতাস্তেন বল্মীকমিব পন্নগাঃ
114.8
ললাটস্থৈস্তু তৈর্বাণৈঃ সূতপুত্রো ব্যরোচত
নীলোত্পলময়ীং মালাং ধারয়ন্স পুরা যথা
114.9
ততঃ ক্রুদ্ধো রণে কর্ণঃ পীডিতো দৃঢধন্বনা
বেগং চক্রে মহাবেগো ভীমসেনবধং প্রতি
114.10
তস্মৈ কর্ণঃ শতং রাজন্নিষূণাং গার্ধ্রবাসসাম্
অমর্ষী বলবান্ক্রুদ্ধঃ প্রেষয়ামাস ভারত
114.11
ততঃ প্রাসৃজদুগ্রাণি শরবর্ষাণি পাণ্ডবঃ
সমরে তমনাদৃত্য নাস্য বীর্যমচিন্তয়ৎ
114.12
ততঃ কর্ণো মহারাজ পাণ্ডবং নিশিতৈঃ শরৈঃ
আজঘানোরসি ক্রুদ্ধঃ ক্রুদ্ধরূপং পরংতপঃ
114.13
জীমূতাবিব চান্যোন্যং তৌ ববর্ষতুরাহবে
তলশব্দরবৈশ্চৈব ত্রাসয়ন্তৌ পরস্পরম্
114.14
শরজালৈশ্চ বিবিধৈশ্ছাদয়ামাসতুর্মৃধে
অন্যোন্যং সমরে ক্রুদ্ধৌ কৃতপ্রতিকৃতৈষিণৌ
114.15
ততো ভীমো মহাবাহূ রাধেয়স্য মহাত্মনঃ
ক্ষুরপ্রেণ ধনুশ্ছিত্ত্বা কর্ণং বিব্যাধ পত্রিণা
114.16
তদপাস্য ধনুশ্ছিন্নং সূতপুত্রো মহামনাঃ
অন্যত্কার্মুকমাদত্ত বেগঘ্নং ভারসাধনম্
114.17
দৃষ্ট্বা চ কুরুসৌবীরসৈন্ধবানাং বলক্ষয়ম্
সবর্মধ্বজশস্ত্রৈশ্চ পতিতৈঃ সংবৃতাং মহীম্
114.18
হস্ত্যশ্বনরদেহাংশ্চ গতাসূন্প্রেক্ষ্য সর্বতঃ
সূতপুত্রস্য সংরম্ভাদ্দীপ্তং বপুরজায়ত
114.19
স বিস্ফার্য মহচ্চাপং কার্তস্বরবিভূষিতম্
ভীমং প্রৈক্ষত রাধেয়ো রাজন্ঘোরেণ চক্ষুষা
114.20
ততঃ ক্রুদ্ধঃ শরানস্যন্সূতপুত্রো ব্যরোচত
মধ্যংদিনগতোঽর্চিষ্মাঞ্শরদীব দিবাকরঃ
114.21
মরীচিবিকচস্যেব রাজন্ভানুমতো বপুঃ
আসীদাধিরথের্ঘোরং বপুঃ শরশতার্চিষঃ
114.22
করাভ্যামাদদানস্য সংদধানস্য চাশুগান্
বিকর্ষতো মুঞ্চতো বা নান্তরং দদৃশূ রণে
114.23
অগ্নিচক্রোপমং ঘোরং মণ্ডলীকৃতমায়ুধম্
কর্ণস্যাসীন্মহারাজ সব্যদক্ষিণমস্যতঃ
114.24
স্বর্ণপুঙ্খাঃ সুনিশিতাঃ কর্ণচাপচ্যুতাঃ শরাঃ
প্রাচ্ছাদয়ন্মহারাজ দিশঃ সূর্যস্য চ প্রভাম্
114.25
ততঃ কনকপুঙ্খানাং শরাণাং নতপর্বণাম্
ধনুশ্চ্যুতানাং বিয়তি দদৃশে বহুধা ব্রজঃ
114.26
শরাসনাদাধিরথেঃ প্রভবন্তঃ স্ম সায়কাঃ
শ্রেণীকৃতা ব্যরাজন্ত রাজন্ক্রৌঞ্চা ইবাম্বরে
114.27
গার্ধ্রপত্রাঞ্শিলাধৌতান্কার্তস্বরবিভূষিতান্
মহাবেগান্প্রদীপ্তাগ্রান্মুমোচাধিরথিঃ শরান্
114.28
তে তু চাপবলোদ্ধূতাঃ শাতকুম্ভবিভূষিতাঃ
অজস্রমন্বকীর্যন্ত শরাঃ পার্থরথং প্রতি
114.29
তে ব্যোম্নি রত্নবিকৃতা ব্যকাশন্ত সহস্রশঃ
শলভানামিব ব্রাতাঃ শরাঃ কর্ণসমীরিতাঃ
114.30
চাপাদাধিরথের্মুক্তাঃ প্রপতন্তঃ স্ম সায়কাঃ
একো দীর্ঘ ইব প্রাংশুঃ প্রভবন্দৃশ্যতে শরঃ
114.31
পর্বতং বারিধারাভিশ্ছাদয়ন্নিব তোয়দঃ
কর্ণঃ প্রাচ্ছাদয়ত্ক্রুদ্ধো ভীমং সায়কবৃষ্টিভিঃ
114.32
তত্র ভারত ভীমস্য বলবীর্যপরাক্রমম্
ব্যবসায়ং চ পুত্রাস্তে প্রৈক্ষন্ত কুরুভিঃ সহ
114.33
তাং সমুদ্রমিবোদ্ধূতাং শরবৃষ্টিং সমুত্থিতাম্
অচিন্তয়িত্বা ভীমস্তু ক্রুদ্ধঃ কর্ণমুপাদ্রবৎ
114.34
রুক্মপৃষ্ঠং মহচ্চাপং ভীমস্যাসীদ্বিশাং পতে
আকর্ষান্মণ্ডলীভূতং শক্রচাপমিবাপরম্
তস্মাচ্ছরাঃ প্রাদুরাসন্পূরয়ন্ত ইবাম্বরম্
114.35
সুবর্ণপুঙ্খৈর্ভীমেন সায়কৈর্নতপর্বভিঃ
গগনে রচিতা মালা কাঞ্চনীব ব্যরাজত
114.36
ততো ব্যোম্নি বিষক্তানি শরজালানি ভাগশঃ
আহতানি ব্যশীর্যন্ত ভীমসেনস্য পত্রিভিঃ
114.37
কর্ণস্য শরজালৌঘৈর্ভীমসেনস্য চোভয়োঃ
অগ্নিস্ফুলিঙ্গসংস্পর্শৈরঞ্জোগতিভিরাহবে
তৈস্তৈঃ কনকপুঙ্খানাং দ্যৌরাসীত্সংবৃতা ব্রজৈঃ
114.38
স ভীমং ছাদয়ন্বাণৈঃ সূতপুত্রঃ পৃথগ্বিধৈঃ
উপারোহদনাদৃত্য তস্য বীর্যং মহাত্মনঃ
114.39
তয়োর্বিসৃজতোস্তত্র শরজালানি মারিষ
বায়ুভূতান্যদৃশ্যন্ত সংসক্তানীতরেতরম্
114.40
তস্মৈ কর্ণঃ শিতান্বাণান্কর্মারপরিমার্জিতান্
সুবর্ণবিকৃতান্ক্রুদ্ধঃ প্রাহিণোদ্বধকাঙ্ক্ষয়া
114.41
তানন্তরিক্ষে বিশিখৈস্ত্রিধৈকৈকমশাতয়ৎ
বিশেষয়ন্সূতপুত্রং ভীমস্তিষ্ঠেতি চাব্রবীৎ
114.42
পুনশ্চাসৃজদুগ্রাণি শরবর্ষাণি পাণ্ডবঃ
অমর্ষী বলবান্ক্রুদ্ধো দিধক্ষন্নিব পাবকঃ
114.43
তস্য তান্যাদদে কর্ণঃ সর্বাণ্যস্ত্রাণ্যভীতবৎ
যুধ্যতঃ পাণ্ডুপুত্রস্য সূতপুত্রোঽস্ত্রমায়য়া
114.44
তস্যেষুধী ধনুর্জ্যাং চ বাণৈঃ সংনতপর্বভিঃ
রশ্মীন্যোক্ত্রাণি চাশ্বানাং কর্ণো বৈকর্তনোঽচ্ছিনৎ
114.45
অথাস্যাশ্বান্পুনর্হত্বা ত্রিভির্বিব্যাধ সারথিম্
সোঽবপ্লুত্য দ্রুতং সূতো যুয়ুধানরথং যয়ৌ
114.46
উত্স্ময়ন্নিব ভীমস্য ক্রুদ্ধঃ কালানলপ্রভঃ
ধ্বজং চিচ্ছেদ রাধেয়ঃ পতাকাশ্চ ন্যপাতয়ৎ
114.47
স বিধন্বা মহারাজ রথশক্তিং পরামৃশৎ
তামবাসৃজদাবিধ্য ক্রুদ্ধঃ কর্ণরথং প্রতি
114.48
তামাধিরথিরায়স্তঃ শক্তিং হেমপরিষ্কৃতাম্
আপতন্তীং মহোল্কাভাং চিচ্ছেদ দশভিঃ শরৈঃ
114.49
সাপতদ্দশধা রাজন্নিকৃত্তা কর্ণসায়কৈঃ
অস্যতঃ সূতপুত্রস্য মিত্রার্থে চিত্রয়োধিনঃ
114.50
স চর্মাদত্ত কৌন্তেয়ো জাতরূপপরিষ্কৃতম্
খড্গং চান্যতরপ্রেপ্সুর্মৃত্যোরগ্রে জয়স্য বা
তদস্য সহসা কর্ণো ব্যধমত্প্রহসন্নিব
114.51
স বিচর্মা মহারাজ বিরথঃ ক্রোধমূর্ছিতঃ
অসিং প্রাসৃজদাবিধ্য ত্বরন্কর্ণরথং প্রতি
114.52
স ধনুঃ সূতপুত্রস্য ছিত্ত্বা জ্যাং চ সুসংশিতঃ
অপতদ্ভুবি নিস্ত্রিংশশ্চ্যুতঃ সর্প ইবাম্বরাৎ
114.53
ততঃ প্রহস্যাধিরথিরন্যদাদত্ত কার্মুকম্
শত্রুঘ্নং সমরে ক্রুদ্ধো দৃঢজ্যং বেগবত্তরম্
114.54
স ভীমসেনঃ কুপিতো বলবান্সত্যবিক্রমঃ
বিহায়সং প্রাক্রমদ্বৈ কর্ণস্য ব্যথয়ন্মনঃ
114.55
তস্য তচ্চরিতং দৃষ্ট্বা সংগ্রামে বিজয়ৈষিণঃ
লয়মাস্থায় রাধেয়ো ভীমসেনমবঞ্চয়ৎ
114.56
তমদৃষ্ট্বা রথোপস্থে নিলীনং ব্যথিতেন্দ্রিয়ম্
ধ্বজমস্য সমাসাদ্য তস্থৌ স ধরণীতলে
114.57
তদস্য কুরবঃ সর্বে চারণাশ্চাভ্যপূজয়ন্
যদিয়েষ রথাত্কর্ণং হন্তুং তার্ক্ষ্য ইবোরগম্
114.58
স ছিন্নধন্বা বিরথঃ স্বধর্মমনুপালয়ন্
স্বরথং পৃষ্ঠতঃ কৃত্বা যুদ্ধায়ৈব ব্যবস্থিতঃ
114.59
তদ্বিহত্যাস্য রাধেয়স্তত এনং সমভ্যয়াৎ
সংরব্ধঃ পাণ্ডবং সংখ্যে যুদ্ধায় সমুপস্থিতম্
114.60
তৌ সমেতৌ মহারঙ্গে স্পর্ধমানৌ মহাবলৌ
জীমূতাবিব ঘর্মান্তে গর্জমানৌ নভস্তলে
114.61
তয়োরাসীত্সংপ্রহারঃ ক্রুদ্ধয়োর্নরসিংহয়োঃ
অমৃষ্যমাণয়োঃ সংখ্যে দেবদানবয়োরিব
114.62
ক্ষীণশস্ত্রস্তু কৌন্তেয়ঃ কর্ণেন সমভিদ্রুতঃ
দৃষ্ট্বার্জুনহতান্নাগান্পতিতান্পর্বতোপমান্
রথমার্গবিঘাতার্থং ব্যায়ুধঃ প্রবিবেশ হ
114.63
হস্তিনাং ব্রজমাসাদ্য রথদুর্গং প্রবিশ্য চ
পাণ্ডবো জীবিতাকাঙ্ক্ষী রাধেয়ং নাভ্যহারয়ৎ
114.64
ব্যবস্থানমথাকাঙ্ক্ষন্ধনংজয়শরৈর্হতম্
উদ্যম্য কুঞ্জরং পার্থস্তস্থৌ পরপুরংজয়ঃ
114.65
তমস্য বিশিখৈঃ কর্ণো ব্যধমত্কুঞ্জরং পুনঃ
হস্ত্যঙ্গান্যথ কর্ণায় প্রাহিণোত্পাণ্ডবো নদন্
114.66
চক্রাণ্যশ্বাংস্তথা বাহান্যদ্যত্পশ্যতি ভূতলে
তত্তদাদায় চিক্ষেপ ক্রুদ্ধঃ কর্ণায় পাণ্ডবঃ
114.67
তদস্য সর্বং চিচ্ছেদ ক্ষিপ্তং ক্ষিপ্তং শিতৈঃ শরৈঃ
ব্যায়ুধং নাবধীচ্চৈনং কর্ণঃ কুন্ত্যা বচঃ স্মরন্
114.68
ধনুষোঽগ্রেণ তং কর্ণস্ত্বভিদ্রুত্য পরামৃশৎ
উত্স্ময়ন্নিব রাধেয়ো ভীমসেনমুবাচ হ
114.69
পুনঃ পুনস্তূবরক মূঢ ঔদরিকেতি চ
অকৃতাস্ত্রক মা যোত্সীর্বাল সংগ্রামকাতর
114.70
যত্র ভোজ্যং বহুবিধং ভক্ষ্যং পেয়ং চ পাণ্ডব
তত্র ত্বং দুর্মতে যোগ্যো ন যুদ্ধেষু কথংচন
114.71
মুনির্ভূত্বাথ বা ভীম ফলান্যদ্ধি সুদুর্মতে
বনায় ব্রজ কৌন্তেয় ন ত্বং যুদ্ধবিশারদঃ
114.72
ফলমূলাশনে যুক্তস্ত্বং তথাতিথিভোজনে
ন ত্বাং শস্ত্রসমুদ্যোগে যোগ্যং মন্যে বৃকোদর
114.73
পুষ্পমূলফলাহারো ব্রতেষু নিয়মেষু চ
উচিতস্ত্বং বনে ভীম ন ত্বং যুদ্ধবিশারদঃ
114.74
ক্ব যুদ্ধং ক্ব মুনিত্বং চ বনং গচ্ছ বৃকোদর
ন ত্বং যুদ্ধোচিতস্তাত বনবাসরতির্ভব
114.75
সূদান্ভৃত্যজনান্দাসাংস্ত্বং গৃহে ত্বরয়ন্ভৃশম্
যোগ্যস্তাডয়িতুং ক্রোধাদ্ভোজনার্থং বৃকোদর
114.76
কৌমারে যানি চাপ্যাসন্নপ্রিয়াণি বিশাং পতে
পূর্ববৃত্তানি চাপ্যেনং রূক্ষাণ্যশ্রাবয়দ্ভৃশম্
114.77
অথৈনং তত্র সংলীনমস্পৃশদ্ধনুষা পুনঃ
প্রহসংশ্চ পুনর্বাক্যং ভীমমাহ বৃষস্তদা
114.78
যোদ্ধব্যমাবিশান্যত্র ন যোদ্ধব্যং তু মাদৃশৈঃ
মাদৃশৈর্যুধ্যমানানামেতচ্চান্যচ্চ বিদ্যতে
114.79
গচ্ছ বা যত্র তৌ কৃষ্ণৌ তৌ ত্বা রক্ষিষ্যতো রণে
গৃহং বা গচ্ছ কৌন্তেয় কিং তে যুদ্ধেন বালক
114.80
এবং তং বিরথং কৃত্বা কর্ণো রাজন্ব্যকত্থত
প্রমুখে বৃষ্ণিসিংহস্য পার্থস্য চ মহাত্মনঃ
114.81
ততো রাজঞ্শিলাধৌতাঞ্শরাঞ্শাখামৃগধ্বজঃ
প্রাহিণোত্সূতপুত্রায় কেশবেন প্রচোদিতঃ
114.82
ততঃ পার্থভুজোত্সৃষ্টাঃ শরাঃ কাঞ্চনভূষণাঃ
গাণ্ডীবপ্রভবাঃ কর্ণং হংসাঃ ক্রৌঞ্চমিবাবিশন্
114.83
স ভুজংগৈরিবায়স্তৈর্গাণ্ডীবপ্রেষিতৈঃ শরৈঃ
ভীমসেনাদপাসেধত্সূতপুত্রং ধনংজয়ঃ
114.84
স ছিন্নধন্বা ভীমেন ধনংজয়শরাহতঃ
কর্ণো ভীমাদপায়াসীদ্রথেন মহতা দ্রুতম্
114.85
ভীমোঽপি সাত্যকের্বাহং সমারুহ্য নরর্ষভঃ
অন্বয়াদ্ভ্রাতরং সংখ্যে পাণ্ডবং সব্যসাচিনম্
114.86
ততঃ কর্ণং সমুদ্দিশ্য ত্বরমাণো ধনংজয়ঃ
নারাচং ক্রোধতাম্রাক্ষঃ প্রৈষীন্মৃত্যুমিবান্তকঃ
114.87
স গরুত্মানিবাকাশে প্রার্থয়ন্ভুজগোত্তমম্
নারাচোঽভ্যপতত্কর্ণং তূর্ণং গাণ্ডীবচোদিতঃ
114.88
তমন্তরিক্ষে নারাচং দ্রৌণিশ্চিচ্ছেদ পত্রিণা
ধনংজয়ভয়াত্কর্ণমুজ্জিহীর্ষুর্মহারথঃ
114.89
ততো দ্রৌণিং চতুঃষষ্ট্যা বিব্যাধ কুপিতোঽর্জুনঃ
শিলীমুখৈর্মহারাজ মা গাস্তিষ্ঠেতি চাব্রবীৎ
114.90
স তু মত্তগজাকীর্ণমনীকং রথসংকুলম্
তূর্ণমভ্যাবিশদ্দ্রৌণির্ধনংজয়শরার্দিতঃ
114.91
ততঃ সুবর্ণপৃষ্ঠানাং ধনুষাং কূজতাং রণে
শব্দং গাণ্ডীবঘোষেণ কৌন্তেয়োঽভ্যভবদ্বলী
114.92
ধনংজয়স্তথা যান্তং পৃষ্ঠতো দ্রৌণিমভ্যয়াৎ
নাতিদীর্ঘমিবাধ্বানং শরৈঃ সংত্রাসয়ন্বলম্
114.93
বিদার্য দেহান্নারাচৈর্নরবারণবাজিনাম্
কঙ্কবর্হিণবাসোভির্বলং ব্যধমদর্জুনঃ
114.94
তদ্বলং ভরতশ্রেষ্ঠ সবাজিদ্বিপমানবম্
পাকশাসনিরায়স্তঃ পার্থঃ সংনিজঘান হ