Utshovঅধ্যায় 113
113.1
ধৃতরাষ্ট্র উবাচ
মহানপনয়ঃ সূত মমৈবাত্র বিশেষতঃ
স ইদানীমনুপ্রাপ্তো মন্যে সংজয় শোচতঃ
113.2
যদ্গতং তদ্গতমিতি মমাসীন্মনসি স্থিতম্
ইদানীমত্র কিং কার্যং প্রকরিষ্যামি সংজয়
113.3
যথা ত্বেষ ক্ষয়ো বৃত্তো মমাপনয়সংভবঃ
বীরাণাং তন্মমাচক্ষ্ব স্থিরীভূতোঽস্মি সংজয়
113.4
সংজয় উবাচ
কর্ণভীমৌ মহারাজ পরাক্রান্তৌ মহাহবে
বাণবর্ষাণ্যবর্ষেতাং বৃষ্টিমন্তাবিবাম্বুদৌ
113.5
ভীমনামাঙ্কিতা বাণাঃ স্বর্ণপুঙ্খাঃ শিলাশিতাঃ
বিবিশুঃ কর্ণমাসাদ্য ভিন্দন্ত ইব জীবিতম্
113.6
তথৈব কর্ণনির্মুক্তৈঃ সবিষৈরিব পন্নগৈঃ
আকীর্যত রণে ভীমঃ শতশোঽথ সহস্রশঃ
113.7
তয়োঃ শরৈর্মহারাজ সংপতদ্ভিঃ সমন্ততঃ
বভূব তব সৈন্যানাং সংক্ষোভঃ সাগরোপমঃ
113.8
ভীমচাপচ্যুতৈর্বাণৈস্তব সৈন্যমরিংদম
অবধ্যত চমূমধ্যে ঘোরৈরাশীবিষোপমৈঃ
113.9
বারণৈঃ পতিতৈ রাজন্বাজিভিশ্চ নরৈঃ সহ
অদৃশ্যত মহী কীর্ণা বাতনুন্নৈর্দ্রুমৈরিব
113.10
তে বধ্যমানাঃ সমরে ভীমচাপচ্যুতৈঃ শরৈঃ
প্রাদ্রবংস্তাবকা যোধাঃ কিমেতদিতি চাব্রুবন্
113.11
ততো ব্যুদস্তং তত্সৈন্যং সিন্ধুসৌবীরকৌরবম্
প্রোত্সারিতং মহাবেগৈঃ কর্ণপাণ্ডবয়োঃ শরৈঃ
113.12
তে শরাতুরভূয়িষ্ঠা হতাশ্বনরবাহনাঃ
উত্সৃজ্য কর্ণং ভীমং চ প্রাদ্রবন্সর্বতোদিশম্
113.13
নূনং পার্থার্থমেবাস্মান্মোহয়ন্তি দিবৌকসঃ
যত্কর্ণভীমপ্রভবৈর্বধ্যতে নো বলং শরৈঃ
113.14
এবং ব্রুবন্তো যোধাস্তে তাবকা ভয়পীডিতাঃ
শরপাতং সমুত্সৃজ্য স্থিতা যুদ্ধদিদৃক্ষবঃ
113.15
ততঃ প্রাবর্তত নদী ঘোররূপা মহাহবে
বভূব চ বিশেষেণ ভীরূণাং ভয়বর্ধিনী
113.16
বারণাশ্বমনুষ্যাণাং রুধিরৌঘসমুদ্ভবা
সংবৃতা গতসত্ত্বৈশ্চ মনুষ্যগজবাজিভিঃ
113.17
সানুকর্ষপতাকৈশ্চ দ্বিপাশ্বরথভূষণৈঃ
স্যন্দনৈরপবিদ্ধৈশ্চ ভগ্নচক্রাক্ষকূবরৈঃ
113.18
জাতরূপপরিষ্কারৈর্ধনুর্ভিঃ সুমহাধনৈঃ
সুবর্ণপুঙ্খৈরিষুভির্নারাচৈশ্চ সহস্রশঃ
113.19
কর্ণপাণ্ডবনির্মুক্তৈর্নির্মুক্তৈরিব পন্নগৈঃ
প্রাসতোমরসংঘাতৈঃ খড্গৈশ্চ সপরশ্বধৈঃ
113.20
সুবর্ণবিকৃতৈশ্চাপি গদামুসলপট্টিশৈঃ
বজ্রৈশ্চ বিবিধাকারৈঃ শক্তিভিঃ পরিঘৈরপি
শতঘ্নীভিশ্চ চিত্রাভির্বভৌ ভারত মেদিনী
113.21
কনকাঙ্গদকেয়ূরৈঃ কুণ্ডলৈর্মণিভিঃ শুভৈঃ
তনুত্রৈঃ সতলত্রৈশ্চ হারৈর্নিষ্কৈশ্চ ভারত
113.22
বস্ত্রৈশ্ছত্রৈশ্চ বিধ্বস্তৈশ্চামরব্যজনৈরপি
গজাশ্বমনুজৈর্ভিন্নৈঃ শস্ত্রৈঃ স্যন্দনভূষণৈঃ
113.23
তৈস্তৈশ্চ বিবিধৈর্ভাবৈস্তত্র তত্র বসুংধরা
পতিতৈরপবিদ্ধৈশ্চ সংবভৌ দ্যৌরিব গ্রহৈঃ
113.24
অচিন্ত্যমদ্ভুতং চৈব তয়োঃ কর্মাতিমানুষম্
দৃষ্ট্বা চারণসিদ্ধানাং বিস্ময়ঃ সমপদ্যত
113.25
অগ্নের্বায়ুসহায়স্য গতিঃ কক্ষ ইবাহবে
আসীদ্ভীমসহায়স্য রৌদ্রমাধিরথের্গতম্
নিপাতিতধ্বজরথং হতবাজিনরদ্বিপম্
113.26
গজাভ্যাং সংপ্রয়ুক্তাভ্যামাসীন্নডবনং যথা
তথাভূতং মহত্সৈন্যমাসীদ্ভারত সংয়ুগে
বিমর্দঃ কর্ণভীমাভ্যামাসীচ্চ পরমো রণে