Utshovঅধ্যায় 112
112.1
সংজয় উবাচ
ভীমসেনস্য রাধেয়ঃ শ্রুত্বা জ্যাতলনিস্বনম্
নামৃষ্যত যথা মত্তো গজঃ প্রতিগজস্বনম্
112.2
অপক্রম্য স ভীমস্য মুহূর্তং শরগোচরাৎ
তব চাধিরথির্দৃষ্ট্বা স্যন্দনেভ্যশ্চ্যুতান্সুতান্
112.3
ভীমসেনেন নিহতান্বিমনা দুঃখিতোঽভবৎ
নিঃশ্বসন্দীর্ঘমুষ্ণং চ পুনঃ পাণ্ডবমভ্যয়াৎ
112.4
স তাম্রনয়নঃ ক্রোধাচ্ছ্বসন্নিব মহোরগঃ
বভৌ কর্ণঃ শরানস্যন্রশ্মিবানিব ভাস্করঃ
112.5
রশ্মিজালৈরিবার্কস্য বিততৈর্ভরতর্ষভ
কর্ণচাপচ্যুতৈর্বাণৈঃ প্রাচ্ছাদ্যত বৃকোদরঃ
112.6
কর্ণচাপচ্যুতাশ্চিত্রাঃ শরা বর্হিণবাসসঃ
বিবিশুঃ সর্বতঃ পার্থং বাসায়েবাণ্ডজা দ্রুমম্
112.7
কর্ণচাপচ্যুতা বাণাঃ সংপতন্তস্ততস্ততঃ
রুক্মপুঙ্খা ব্যরাজন্ত হংসাঃ শ্রেণীকৃতা ইব
112.8
চাপধ্বজোপস্করেভ্যশ্ছত্রাদীষামুখাদ্যুগাৎ
প্রভবন্তো ব্যদৃশ্যন্ত রাজন্নাধিরথেঃ শরাঃ
112.9
খং পূরয়ন্মহাবেগান্খগমান্খগবাসসঃ
সুবর্ণবিকৃতাংশ্চিত্রান্মুমোচাধিরথিঃ শরান্
112.10
তমন্তকমিবায়স্তমাপতন্তং বৃকোদরঃ
ত্যক্ত্বা প্রাণানভিক্রুধ্য বিব্যাধ নবভিঃ শরৈঃ
112.11
তস্য বেগমসংসহ্যং দৃষ্ট্বা কর্ণস্য পাণ্ডবঃ
মহতশ্চ শরৌঘাংস্তান্নৈবাব্যথত বীর্যবান্
112.12
ততো বিধম্যাধিরথেঃ শরজালানি পাণ্ডবঃ
বিব্যাধ কর্ণং বিংশত্যা পুনরন্যৈঃ শিতৈঃ শরৈঃ
112.13
যথৈব হি শরৈঃ পার্থঃ সূতপুত্রেণ ছাদিতঃ
তথৈব কর্ণং সমরে ছাদয়ামাস পাণ্ডবঃ
112.14
দৃষ্ট্বা তু ভীমসেনস্য বিক্রমং যুধি ভারত
অভ্যনন্দংস্ত্বদীয়াশ্চ সংপ্রহৃষ্টাশ্চ চারণাঃ
112.15
ভূরিশ্রবাঃ কৃপো দ্রৌণির্মদ্ররাজো জয়দ্রথঃ
উত্তমৌজা যুধামন্যুঃ সাত্যকিঃ কেশবার্জুনৌ
112.16
কুরুপাণ্ডবানাং প্রবরা দশ রাজন্মহারথাঃ
সাধু সাধ্বিতি বেগেন সিংহনাদমথানদন্
112.17
তস্মিংস্তু তুমুলে শব্দে প্রবৃত্তে লোমহর্ষণে
অভ্যভাষত পুত্রাংস্তে রাজন্দুর্যোধনস্ত্বরন্
112.18
রাজ্ঞশ্চ রাজপুত্রাংশ্চ সোদর্যাংশ্চ বিশেষতঃ
কর্ণং গচ্ছত ভদ্রং বঃ পরীপ্সন্তো বৃকোদরাৎ
112.19
পুরা নিঘ্নন্তি রাধেয়ং ভীমচাপচ্যুতাঃ শরাঃ
তে যতধ্বং মহেষ্বাসাঃ সূতপুত্রস্য রক্ষণে
112.20
দুর্যোধনসমাদিষ্টাঃ সোদর্যাঃ সপ্ত মারিষ
ভীমসেনমভিদ্রুত্য সংরব্ধাঃ পর্যবারয়ন্
112.21
তে সমাসাদ্য কৌন্তেয়মাবৃণ্বঞ্শরবৃষ্টিভিঃ
পর্বতং বারিধারাভিঃ প্রাবৃষীব বলাহকাঃ
112.22
তেঽপীডয়ন্ভীমসেনং ক্রুদ্ধাঃ সপ্ত মহারথাঃ
প্রজাসংহরণে রাজন্সোমং সপ্ত গ্রহা ইব
112.23
ততো বামেন কৌন্তেয়ঃ পীডয়িত্বা শরাসনম্
মুষ্টিনা পাণ্ডবো রাজন্দৃঢেন সুপরিষ্কৃতম্
112.24
মনুষ্যসমতাং জ্ঞাত্বা সপ্ত সংধায় সায়কান্
তেভ্যো ব্যসৃজদায়স্তঃ সূর্যরশ্মিনিভান্প্রভুঃ
112.25
নিরস্যন্নিব দেহেভ্যস্তনয়ানামসূংস্তব
ভীমসেনো মহারাজ পূর্ববৈরমনুস্মরন্
112.26
তে ক্ষিপ্তা ভীমসেনেন শরা ভারত ভারতান্
বিদার্য খং সমুত্পেতুঃ স্বর্ণপুঙ্খাঃ শিলাশিতাঃ
112.27
তেষাং বিদার্য চেতাংসি শরা হেমবিভূষিতাঃ
ব্যরাজন্ত মহারাজ সুপর্ণা ইব খেচরাঃ
112.28
শোণিতাদিগ্ধবাজাগ্রাঃ সপ্ত হেমপরিষ্কৃতাঃ
পুত্রাণাং তব রাজেন্দ্র পীত্বা শোণিতমুদ্গতাঃ
112.29
তে শরৈর্ভিন্নমর্মাণো রথেভ্যঃ প্রাপতন্ক্ষিতৌ
গিরিসানুরুহা ভগ্না দ্বিপেনেব মহাদ্রুমাঃ
112.30
শত্রুংজয়ঃ শত্রুসহশ্চিত্রশ্চিত্রায়ুধো দৃঢঃ
চিত্রসেনো বিকর্ণশ্চ সপ্তৈতে বিনিপাতিতাঃ
112.31
তান্নিহত্য মহাবাহূ রাধেয়স্যৈব পশ্যতঃ
সিংহনাদরবং ঘোরমসৃজত্পাণ্ডুনন্দনঃ
112.32
স রবস্তস্য শূরস্য ধর্মরাজস্য ভারত
আচখ্যাবিব তদ্যুদ্ধং বিজয়ং চাত্মনো মহৎ
112.33
তং শ্রুত্বা সুমহানাদং ভীমসেনস্য ধন্বিনঃ
বভূব পরমা প্রীতির্ধর্মরাজস্য সংয়ুগে
112.34
ততো হৃষ্টো মহারাজ বাদিত্রাণাং মহাস্বনৈঃ
ভীমসেনরবং পার্থঃ প্রতিজগ্রাহ সর্বশঃ
112.35
অভ্যয়াচ্চৈব সমরে দ্রোণমস্ত্রভৃতাং বরম্
হর্ষেণ মহতা যুক্তঃ কৃতসংজ্ঞে বৃকোদরে
112.36
একত্রিংশন্মহারাজ পুত্রাংস্তব মহারথান্
হতান্দুর্যোধনো দৃষ্ট্বা ক্ষত্তুঃ সস্মার তদ্বচঃ
112.37
তদিদং সমনুপ্রাপ্তং ক্ষত্তুর্হিতকরং বচঃ
ইতি সংচিন্ত্য রাজাসৌ নোত্তরং প্রত্যপদ্যত
112.38
যদ্দ্যূতকালে দুর্বুদ্ধিরব্রবীত্তনয়স্তব
যচ্চ কর্ণোঽব্রবীত্কৃষ্ণাং সভায়াং পরুষং বচঃ
112.39
প্রমুখে পাণ্ডুপুত্রাণাং তব চৈব বিশাং পতে
কৌরবাণাং চ সর্বেষামাচার্যস্য চ সংনিধৌ
112.40
বিনষ্টাঃ পাণ্ডবাঃ কৃষ্ণে শাশ্বতং নরকং গতাঃ
পতিমন্যং বৃণীষ্বেতি তস্যেদং ফলমাগতম্
112.41
যত্স্ম তাং পরুষাণ্যাহুঃ সভামানায্য দ্রৌপদীম্
পাণ্ডবানুগ্রধনুষঃ ক্রোধয়ন্তস্তবাত্মজাঃ
112.42
তং ভীমসেনঃ ক্রোধাগ্নিং ত্রয়োদশ সমাঃ স্থিতম্
বিসৃজংস্তব পুত্রাণামন্তং গচ্ছতি কৌরব
112.43
বিলপংশ্চ বহু ক্ষত্তা শমং নালভত ত্বয়ি
সপুত্রো ভরতশ্রেষ্ঠ তস্য ভুঙ্ক্ষ্ব ফলোদয়ম্
হতো বিকর্ণো রাজেন্দ্র চিত্রসেনশ্চ বীর্যবান্
112.44
প্রবরানাত্মজানাং তে সুতাংশ্চান্যান্মহারথান্
যান্যাংশ্চ দদৃশে ভীমশ্চক্ষুর্বিষয়মাগতান্
পুত্রাংস্তব মহাবাহো ত্বরয়া তাঞ্জঘান হ
112.45
ত্বত্কৃতে হ্যহমদ্রাক্ষং দহ্যমানাং বরূথিনীম্
সহস্রশঃ শরৈর্মুক্তৈঃ পাণ্ডবেন বৃষেণ চ