Utshovঅধ্যায় 111
111.1
সংজয় উবাচ
তবাত্মজাংস্তু পতিতান্দৃষ্ট্বা কর্ণঃ প্রতাপবান্
ক্রোধেন মহতাবিষ্টো নির্বিণ্ণোঽভূত্স জীবিতাৎ
111.2
আগস্কৃতমিবাত্মানং মেনে চাধিরথিস্তদা
ভীমসেনং ততঃ ক্রুদ্ধঃ সমাদ্রবত সংভ্রমাৎ
111.3
স ভীমং পঞ্চভির্বিদ্ধ্বা রাধেয়ঃ প্রহসন্নিব
পুনর্বিব্যাধ সপ্তত্যা স্বর্ণপুঙ্খৈঃ শিলাশিতৈঃ
111.4
অবহাসং তু তং পার্থো নামৃষ্যত বৃকোদরঃ
ততো বিব্যাধ রাধেয়ং শতেন নতপর্বণাম্
111.5
পুনশ্চ বিশিখৈস্তীক্ষ্ণৈর্বিদ্ধ্বা পঞ্চভিরাশুগৈঃ
ধনুশ্চিচ্ছেদ ভল্লেন সূতপুত্রস্য মারিষ
111.6
অথান্যদ্ধনুরাদায় কর্ণো ভারত দুর্মনাঃ
ইষুভিশ্ছাদয়ামাস ভীমসেনং সমন্ততঃ
111.7
তস্য ভীমো হয়ান্হত্বা বিনিহত্য চ সারথিম্
প্রজহাস মহাহাসং কৃতে প্রতিকৃতং পুনঃ
111.8
ইষুভিঃ কার্মুকং চাস্য চকর্ত পুরুষর্ষভঃ
তত্পপাত মহারাজ স্বর্ণপৃষ্ঠং মহাস্বনম্
111.9
অবারোহদ্রথাত্তস্মাদথ কর্ণো মহারথঃ
গদাং গৃহীত্বা সমরে ভীমসেনায় চাক্ষিপৎ
111.10
তামাপতন্তীং সহসা গদাং দৃষ্ট্বা বৃকোদরঃ
শরৈরবারয়দ্রাজন্সর্বসৈন্যস্য পশ্যতঃ
111.11
ততো বাণসহস্রাণি প্রেষয়ামাস পাণ্ডবঃ
সূতপুত্রবধাকাঙ্ক্ষী ত্বরমাণঃ পরাক্রমী
111.12
তানিষূনিষুভিঃ কর্ণো বারয়িত্বা মহামৃধে
কবচং ভীমসেনস্য পাতয়ামাস সায়কৈঃ
111.13
অথৈনং পঞ্চবিংশত্যা ক্ষুদ্রকাণাং সমার্পয়ৎ
পশ্যতাং সর্বভূতানাং তদদ্ভুতমিবাভবৎ
111.14
ততো ভীমো মহারাজ নবভির্নতপর্বণাম্
রণেঽপ্রেষয়ত ক্রুদ্ধঃ সূতপুত্রস্য মারিষ
111.15
তে তস্য কবচং ভিত্ত্বা তথা বাহুং চ দক্ষিণম্
অভ্যগুর্ধরণীং তীক্ষ্ণা বল্মীকমিব পন্নগাঃ
111.16
রাধেয়ং তু রণে দৃষ্ট্বা পদাতিনমবস্থিতম্
ভীমসেনেন সংরব্ধং রাজা দুর্যোধনোঽব্রবীৎ
ত্বরধ্বং সর্বতো যত্তা রাধেয়স্য রথং প্রতি
111.17
ততস্তব সুতা রাজঞ্শ্রুত্বা ভ্রাতুর্বচো দ্রুতম্
অভ্যয়ুঃ পাণ্ডবং যুদ্ধে বিসৃজন্তঃ শিতাঞ্শরান্
111.18
চিত্রোপচিত্রশ্চিত্রাক্ষশ্চারুচিত্রঃ শরাসনঃ
চিত্রায়ুধশ্চিত্রবর্মা সমরে চিত্রয়োধিনঃ
111.19
আগচ্ছতস্তান্সহসা ভীমো রাজন্মহারথঃ
সাশ্বসূতধ্বজান্যত্তান্পাতয়ামাস সংয়ুগে
তে হতা ন্যপতন্ভূমৌ বাতনুন্না ইব দ্রুমাঃ
111.20
দৃষ্ট্বা বিনিহতান্পুত্রাংস্তব রাজন্মহারথান্
অশ্রুপূর্ণমুখঃ কর্ণঃ কশ্মলং সমপদ্যত
111.21
রথমন্যং সমাস্থায় বিধিবত্কল্পিতং পুনঃ
অভ্যয়াত্পাণ্ডবং যুদ্ধে ত্বরমাণঃ পরাক্রমী
111.22
তাবন্যোন্যং শরৈর্বিদ্ধ্বা স্বর্ণপুঙ্খৈঃ শিলাশিতৈঃ
ব্যভ্রাজেতাং মহারাজ পুষ্পিতাবিব কিংশুকৌ
111.23
ষট্ত্রিংশদ্ভিস্ততো ভল্লৈর্নিশিতৈস্তিগ্মতেজনৈঃ
ব্যধমত্কবচং ক্রুদ্ধঃ সূতপুত্রস্য পাণ্ডবঃ
111.24
রক্তচন্দনদিগ্ধাঙ্গৌ শরৈঃ কৃতমহাব্রণৌ
শোণিতাক্তৌ ব্যরাজেতাং কালসূর্যাবিবোদিতৌ
111.25
তৌ শোণিতোক্ষিতৈর্গাত্রৈঃ শরৈশ্ছিন্নতনুচ্ছদৌ
বিবর্মাণৌ ব্যরাজেতাং নির্মুক্তাবিব পন্নগৌ
111.26
ব্যাঘ্রাবিব নরব্যাঘ্রৌ দংষ্ট্রাভিরিতরেতরম্
শরদংষ্ট্রা বিধুন্বানৌ ততক্ষতুররিংদমৌ
111.27
বারণাবিব সংসক্তৌ রঙ্গমধ্যে বিরেজতুঃ
তুদন্তৌ বিশিখৈস্তীক্ষ্ণৈর্মত্তবারণবিক্রমৌ
111.28
প্রচ্ছাদয়ন্তৌ সমরে শরজালৈঃ পরস্পরম্
রথাভ্যাং নাদয়ন্তৌ চ দিশঃ সর্বা বিচেরতুঃ
111.29
তৌ রথাভ্যাং মহারাজ মণ্ডলাবর্তনাদিষু
ব্যরোচেতাং মহাত্মানৌ বৃত্রবজ্রধরাবিব
111.30
সহস্তাভরণাভ্যাং তু ভুজাভ্যাং বিক্ষিপন্ধনুঃ
ব্যরোচত রণে ভীমঃ সবিদ্যুদিব তোয়দঃ
111.31
স চাপঘোষস্তনিতঃ শরধারাম্বুদো মহান্
ভীমমেঘো মহারাজ কর্ণপর্বতমভ্যয়াৎ
111.32
ততঃ শরসহস্রেণ ধনুর্মুক্তেন ভারত
পাণ্ডবো ব্যকিরত্কর্ণং ঘনোঽদ্রিমিব বৃষ্টিভিঃ
111.33
তত্রাবৈক্ষন্ত পুত্রাস্তে ভীমসেনস্য বিক্রমম্
সুপুঙ্খৈঃ কঙ্কবাসোভির্যত্কর্ণং ছাদয়চ্ছরৈঃ
111.34
স নন্দয়ন্রণে পার্থং কেশবং চ যশস্বিনম্
সাত্যকিং চক্ররক্ষৌ চ ভীমঃ কর্ণময়োধয়ৎ
111.35
বিক্রমং ভুজয়োর্বীর্যং ধৈর্যং চ বিদিতাত্মনঃ
পুত্রাস্তব মহারাজ দদৃশুঃ পাণ্ডবস্য হ