Utshovঅধ্যায় 110
110.1
ধৃতরাষ্ট্র উবাচ
দৈবমেব পরং মন্যে ধিক্পৌরুষমনর্থকম্
যত্রাধিরথিরায়স্তো নাতরত্পাণ্ডবং রণে
110.2
কর্ণঃ পার্থান্সগোবিন্দাঞ্জেতুমুত্সহতে রণে
ন চ কর্ণসমং যোধং লোকে পশ্যামি কংচন
ইতি দুর্যোধনস্যাহমশ্রৌষং জল্পতো মুহুঃ
110.3
কর্ণো হি বলবাঞ্শূরো দৃঢধন্বা জিতক্লমঃ
ইতি মামব্রবীত্সূত মন্দো দুর্যোধনঃ পুরা
110.4
বসুষেণসহায়ং মাং নালং দেবাপি সংয়ুগে
কিমু পাণ্ডুসুতা রাজন্গতসত্ত্বা বিচেতসঃ
110.5
তত্র তং নির্জিতং দৃষ্ট্বা ভুজংগমিব নির্বিষম্
যুদ্ধাত্কর্ণমপক্রান্তং কিং স্বিদ্দুর্যোধনোঽব্রবীৎ
110.6
অহো দুর্মুখমেবৈকং যুদ্ধানামবিশারদম্
প্রাবেশয়দ্ধুতবহং পতংগমিব মোহিতঃ
110.7
অশ্বত্থামা মদ্ররাজঃ কৃপঃ কর্ণশ্চ সংগতাঃ
ন শক্তাঃ প্রমুখে স্থাতুং নূনং ভীমস্য সংজয়
110.8
তেঽপি চাস্য মহাঘোরং বলং নাগায়ুতোপমম্
জানন্তো ব্যবসায়ং চ ক্রূরং মারুততেজসঃ
110.9
কিমর্থং ক্রূরকর্মাণং যমকালান্তকোপমম্
বলসংরম্ভবীর্যজ্ঞাঃ কোপয়িষ্যন্তি সংয়ুগে
110.10
কর্ণস্ত্বেকো মহাবাহুঃ স্ববাহুবলমাশ্রিতঃ
ভীমসেনমনাদৃত্য রণেঽয়ুধ্যত সূতজঃ
110.11
যোঽজয়ত্সমরে কর্ণং পুরংদর ইবাসুরম্
ন স পাণ্ডুসুতো জেতুং শক্যঃ কেনচিদাহবে
110.12
দ্রোণং যঃ সংপ্রমথ্যৈকঃ প্রবিষ্টো মম বাহিনীম্
ভীমো ধনংজয়ান্বেষী কস্তমর্ছেজ্জিজীবিষুঃ
110.13
কো হি সংজয় ভীমস্য স্থাতুমুত্সহতেঽগ্রতঃ
উদ্যতাশনিবজ্রস্য মহেন্দ্রস্যেব দানবঃ
110.14
প্রেতরাজপুরং প্রাপ্য নিবর্তেতাপি মানবঃ
ন ভীমসেনং সংপ্রাপ্য নিবর্তেত কদাচন
110.15
পতংগা ইব বহ্নিং তে প্রাবিশন্নল্পচেতসঃ
যে ভীমসেনং সংক্রুদ্ধমভ্যধাবন্বিমোহিতাঃ
110.16
যত্তত্সভায়াং ভীমেন মম পুত্রবধাশ্রয়ম্
শপ্তং সংরম্ভিণোগ্রেণ কুরূণাং শৃণ্বতাং তদা
110.17
তন্নূনমভিসংচিন্ত্য দৃষ্ট্বা কর্ণং চ নির্জিতম্
দুঃশাসনঃ সহ ভ্রাত্রা ভয়াদ্ভীমাদুপারমৎ
110.18
যশ্চ সংজয় দুর্বুদ্ধিরব্রবীত্সমিতৌ মুহুঃ
কর্ণো দুঃশাসনোঽহং চ জেষ্যামো যুধি পাণ্ডবান্
110.19
স নূনং বিরথং দৃষ্ট্বা কর্ণং ভীমেন নির্জিতম্
প্রত্যাখ্যানাচ্চ কৃষ্ণস্য ভৃশং তপ্যতি সংজয়
110.20
দৃষ্ট্বা ভ্রাতৄন্হতান্যুদ্ধে ভীমসেনেন দংশিতান্
আত্মাপরাধাত্সুমহন্নূনং তপ্যতি পুত্রকঃ
110.21
কো হি জীবিতমন্বিচ্ছন্প্রতীপং পাণ্ডবং ব্রজেৎ
ভীমং ভীমায়ুধং ক্রুদ্ধং সাক্ষাত্কালমিব স্থিতম্
110.22
বডবামুখমধ্যস্থো মুচ্যেতাপি হি মানবঃ
ন ভীমমুখসংপ্রাপ্তো মুচ্যেতেতি মতির্মম
110.23
ন পাণ্ডবা ন পাঞ্চালা ন চ কেশবসাত্যকী
জানন্তি যুধি সংরব্ধা জীবিতং পরিরক্ষিতুম্
110.24
সংজয় উবাচ
যত্সংশোচসি কৌরব্য বর্তমানে জনক্ষয়ে
ত্বমস্য জগতো মূলং বিনাশস্য ন সংশয়ঃ
110.25
স্বয়ং বৈরং মহত্কৃত্বা পুত্রাণাং বচনে স্থিতঃ
উচ্যমানো ন গৃহ্ণীষে মর্ত্যঃ পথ্যমিবৌষধম্
110.26
স্বয়ং পীত্বা মহারাজ কালকূটং সুদুর্জরম্
তস্যেদানীং ফলং কৃত্স্নমবাপ্নুহি নরোত্তম
110.27
যত্তু কুত্সয়সে যোধান্যুধ্যমানান্যথাবলম্
অত্র তে বর্ণয়িষ্যামি যথা যুদ্ধমবর্তত
110.28
দৃষ্ট্বা কর্ণং তু পুত্রাস্তে ভীমসেনপরাজিতম্
নামৃষ্যন্ত মহেষ্বাসাঃ সোদর্যাঃ পঞ্চ মারিষ
110.29
দুর্মর্ষণো দুঃসহশ্চ দুর্মদো দুর্ধরো জয়ঃ
পাণ্ডবং চিত্রসংনাহাস্তং প্রতীপমুপাদ্রবন্
110.30
তে সমন্তান্মহাবাহুং পরিবার্য বৃকোদরম্
দিশঃ শরৈঃ সমাবৃণ্বঞ্শলভানামিব ব্রজৈঃ
110.31
আগচ্ছতস্তান্সহসা কুমারান্দেবরূপিণঃ
প্রতিজগ্রাহ সমরে ভীমসেনো হসন্নিব
110.32
তব দৃষ্ট্বা তু তনয়ান্ভীমসেনসমীপগান্
অভ্যবর্তত রাধেয়ো ভীমসেনং মহাবলম্
110.33
বিসৃজন্বিশিখান্রাজন্স্বর্ণপুঙ্খাঞ্শিলাশিতান্
তং তু ভীমোঽভ্যয়াত্তূর্ণং বার্যমাণঃ সুতৈস্তব
110.34
কুরবস্তু ততঃ কর্ণং পরিবার্য সমন্ততঃ
অবাকিরন্ভীমসেনং শরৈঃ সংনতপর্বভিঃ
110.35
তান্বাণৈঃ পঞ্চবিংশত্যা সাশ্বান্রাজন্নরর্ষভান্
সসূতান্ভীমধনুষো ভীমো নিন্যে যমক্ষয়ম্
110.36
প্রাপতন্স্যন্দনেভ্যস্তে সার্ধং সূতৈর্গতাসবঃ
চিত্রপুষ্পধরা ভগ্না বাতেনেব মহাদ্রুমাঃ
110.37
তত্রাদ্ভুতমপশ্যাম ভীমসেনস্য বিক্রমম্
সংবার্যাধিরথিং বাণৈর্যজ্জঘান তবাত্মজান্
110.38
স বার্যমাণো ভীমেন শিতৈর্বাণৈঃ সমন্ততঃ
সূতপুত্রো মহারাজ ভীমসেনমবৈক্ষত
110.39
তং ভীমসেনঃ সংরম্ভাত্ক্রোধসংরক্তলোচনঃ
বিস্ফার্য সুমহচ্চাপং মুহুঃ কর্ণমবৈক্ষত