Utshovঅধ্যায় 109
109.1
সংজয় উবাচ
স তথা বিরথঃ কর্ণঃ পুনর্ভীমেন নির্জিতঃ
রথমন্যং সমাস্থায় সদ্যো বিব্যাধ পাণ্ডবম্
109.2
মহাগজাবিবাসাদ্য বিষাণাগ্রৈঃ পরস্পরম্
শরৈঃ পূর্ণায়তোত্সৃষ্টৈরন্যোন্যমভিজঘ্নতুঃ
109.3
অথ কর্ণঃ শরব্রাতৈর্ভীমং বলবদর্দয়ৎ
ননাদ বলবন্নাদং পুনর্বিব্যাধ চোরসি
109.4
তং ভীমো দশভির্বাণৈঃ প্রত্যবিধ্যদজিহ্মগৈঃ
পুনর্বিব্যাধ বিংশত্যা শরাণাং নতপর্বণাম্
109.5
কর্ণস্তু নবভির্ভীমং বিদ্ধ্বা রাজন্স্তনান্তরে
ধ্বজমেকেন বিব্যাধ সায়কেন শিতেন হ
109.6
সায়কানাং ততঃ পার্থস্ত্রিষষ্ট্যা প্রত্যবিধ্যত
তোত্ত্রৈরিব মহানাগং কশাভিরিব বাজিনম্
109.7
সোঽতিবিদ্ধো মহারাজ পাণ্ডবেন যশস্বিনা
সৃক্বিণী লেলিহন্বীরঃ ক্রোধসংরক্তলোচনঃ
109.8
ততঃ শরং মহারাজ সর্বকায়াবদারণম্
প্রাহিণোদ্ভীমসেনায় বলায়েন্দ্র ইবাশনিম্
109.9
স নির্ভিদ্য রণে পার্থং সূতপুত্রধনুশ্চ্যুতঃ
অগচ্ছদ্দারয়ন্ভূমিং চিত্রপুঙ্খঃ শিলীমুখঃ
109.10
সর্বশৈক্যাং চতুষ্কিষ্কুং গুর্বীং রুক্মাঙ্গদাং গদাম্
প্রাহিণোত্সূতপুত্রায় ষডস্রামবিচারয়ন্
109.11
তয়া জঘানাধিরথেঃ সদশ্বান্সাধুবাহিনঃ
গদয়া ভারতঃ ক্রুদ্ধো বজ্রেণেন্দ্র ইবাসুরান্
109.12
ততো ভীমো মহাবাহুঃ ক্ষুরাভ্যাং ভরতর্ষভ
ধ্বজমাধিরথেশ্ছিত্ত্বা সূতমভ্যহনত্তদা
109.13
হতাশ্বসূতমুত্সৃজ্য রথং স পতিতধ্বজম্
বিস্ফারয়ন্ধনুঃ কর্ণস্তস্থৌ ভারত দুর্মনাঃ
109.14
তত্রাদ্ভুতমপশ্যাম রাধেয়স্য পরাক্রমম্
বিরথো রথিনাং শ্রেষ্ঠো বারয়ামাস যদ্রিপুম্
109.15
বিরথং তং রথশ্রেষ্ঠং দৃষ্ট্বাধিরথিমাহবে
দুর্যোধনস্ততো রাজন্নভ্যভাষত দুর্মুখম্
109.16
এষ দুর্মুখ রাধেয়ো ভীমেন বিরথীকৃতঃ
তং রথেন নরশ্রেষ্ঠং সংপাদয় মহারথম্
109.17
দুর্যোধনবচঃ শ্রুত্বা ততো ভারত দুর্মুখঃ
ত্বরমাণোঽভ্যয়াত্কর্ণং ভীমং চাবারয়চ্ছরৈঃ
109.18
দুর্মুখং প্রেক্ষ্য সংগ্রামে সূতপুত্রপদানুগম্
বায়ুপুত্রঃ প্রহৃষ্টোঽভূত্সৃক্কিণী পরিলেলিহন্
109.19
ততঃ কর্ণং মহারাজ বারয়িত্বা শিলীমুখৈঃ
দুর্মুখায় রথং শীঘ্রং প্রেষয়ামাস পাণ্ডবঃ
109.20
তস্মিন্ক্ষণে মহারাজ নবভির্নতপর্বভিঃ
সুপুঙ্খৈর্দুর্মুখং ভীমঃ শরৈর্নিন্যে যমক্ষয়ম্
109.21
ততস্তমেবাধিরথিঃ স্যন্দনং দুর্মুখে হতে
আস্থিতঃ প্রবভৌ রাজন্দীপ্যমান ইবাংশুমান্
109.22
শয়ানং ভিন্নমর্মাণং দুর্মুখং শোণিতোক্ষিতম্
দৃষ্ট্বা কর্ণোঽশ্রুপূর্ণাক্ষো মুহূর্তং নাভ্যবর্তত
109.23
তং গতাসুমতিক্রম্য কৃত্বা কর্ণঃ প্রদক্ষিণম্
দীর্ঘমুষ্ণং শ্বসন্বীরো ন কিংচিত্প্রত্যপদ্যত
109.24
তস্মিংস্তু বিবরে রাজন্নারাচান্গার্ধ্রবাসসঃ
প্রাহিণোত্সূতপুত্রায় ভীমসেনশ্চতুর্দশ
109.25
তে তস্য কবচং ভিত্ত্বা স্বর্ণপুঙ্খা মহৌজসঃ
হেমচিত্রা মহারাজ দ্যোতয়ন্তো দিশো দশ
109.26
অপিবন্সূতপুত্রস্য শোণিতং রক্তভোজনাঃ
ক্রুদ্ধা ইব মনুষ্যেন্দ্র ভুজগাঃ কালচোদিতাঃ
109.27
প্রসর্পমাণা মেদিন্যাং তে ব্যরোচন্ত মার্গণাঃ
অর্ধপ্রবিষ্টাঃ সংরব্ধা বিলানীব মহোরগাঃ
109.28
তং প্রত্যবিধ্যদ্রাধেয়ো জাম্বূনদবিভূষিতৈঃ
চতুর্দশভিরত্যুগ্রৈর্নারাচৈরবিচারয়ন্
109.29
তে ভীমসেনস্য ভুজং সব্যং নির্ভিদ্য পত্রিণঃ
প্রাবিশন্মেদিনীং ভীমাঃ ক্রৌঞ্চং পত্ররথা ইব
109.30
তে ব্যরোচন্ত নারাচাঃ প্রবিশন্তো বসুংধরাম্
গচ্ছত্যস্তং দিনকরে দীপ্যমানা ইবাংশবঃ
109.31
স নির্ভিন্নো রণে ভীমো নারাচৈর্মর্মভেদিভিঃ
সুস্রাব রুধিরং ভূরি পর্বতঃ সলিলং যথা
109.32
স ভীমস্ত্রিভিরায়স্তঃ সূতপুত্রং পতত্রিভিঃ
সুপর্ণবেগৈর্বিব্যাধ সারথিং চাস্য সপ্তভিঃ
109.33
স বিহ্বলো মহারাজ কর্ণো ভীমবলার্দিতঃ
প্রাদ্রবজ্জবনৈরশ্বৈ রণং হিত্বা মহায়শাঃ
109.34
ভীমসেনস্তু বিস্ফার্য চাপং হেমপরিষ্কৃতম্
আহবেঽতিরথোঽতিষ্ঠজ্জ্বলন্নিব হুতাশনঃ