Utshovঅধ্যায় 108
108.1
ধৃতরাষ্ট্র উবাচ
অত্যদ্ভুতমহং মন্যে ভীমসেনস্য বিক্রমম্
যত্কর্ণং যোধয়ামাস সমরে লঘুবিক্রমম্
108.2
ত্রিদশানপি চোদ্যুক্তান্সর্বশস্ত্রধরান্যুধি
বারয়েদ্যো রণে কর্ণঃ সয়ক্ষাসুরমানবান্
108.3
স কথং পাণ্ডবং যুদ্ধে ভ্রাজমানমিব শ্রিয়া
নাতরত্সংয়ুগে তাত তন্মমাচক্ষ্ব সংজয়
108.4
কথং চ যুদ্ধং ভূয়োঽভূত্তয়োঃ প্রাণদুরোদরে
অত্র মন্যে সমায়ত্তো জয়ো বাজয় এব বা
108.5
কর্ণং প্রাপ্য রণে সূত মম পুত্রঃ সুয়োধনঃ
জেতুমুত্সহতে পার্থান্সগোবিন্দান্সসাত্বতান্
108.6
শ্রুত্বা তু নির্জিতং কর্ণমসকৃদ্ভীমকর্মণা
ভীমসেনেন সমরে মোহ আবিশতীব মাম্
108.7
বিনষ্টান্কৌরবান্মন্যে মম পুত্রস্য দুর্নয়ৈঃ
ন হি কর্ণো মহেষ্বাসান্পার্থাঞ্জেষ্যতি সংজয়
108.8
কৃতবান্যানি যুদ্ধানি কর্ণঃ পাণ্ডুসুতৈঃ সহ
সর্বত্র পাণ্ডবাঃ কর্ণমজয়ন্ত রণাজিরে
108.9
অজয্যাঃ পাণ্ডবাস্তাত দেবৈরপি সবাসবৈঃ
ন চ তদ্বুধ্যতে মন্দঃ পুত্রো দুর্যোধনো মম
108.10
ধনং ধনেশ্বরস্যেব হৃত্বা পার্থস্য মে সুতঃ
মধুপ্রেপ্সুরিবাবুদ্ধিঃ প্রপাতং নাববুধ্যতে
108.11
নিকৃত্যা নিকৃতিপ্রজ্ঞো রাজ্যং হৃত্বা মহাত্মনাম্
জিতানিত্যেব মন্বানঃ পাণ্ডবানবমন্যতে
108.12
পুত্রস্নেহাভিভূতেন ময়া চাপ্যকৃতাত্মনা
ধর্মে স্থিতা মহাত্মানো নিকৃতাঃ পাণ্ডুনন্দনাঃ
108.13
শমকামঃ সদা পার্থো দীর্ঘপ্রেক্ষী যুধিষ্ঠিরঃ
অশক্ত ইতি মন্বানৈঃ পুত্রৈর্মম নিরাকৃতঃ
108.14
তানি দুঃখান্যনেকানি বিপ্রকারাংশ্চ সর্বশঃ
হৃদি কৃত্বা মহাবাহুর্ভীমোঽয়ুধ্যত সূতজম্
108.15
তস্মান্মে সংজয় ব্রূহি কর্ণভীমৌ যথা রণে
অয়ুধ্যেতাং যুধি শ্রেষ্ঠৌ পরস্পরবধৈষিণৌ
108.16
সংজয় উবাচ
শৃণু রাজন্যথা বৃত্তঃ সংগ্রামঃ কর্ণভীময়োঃ
পরস্পরবধপ্রেপ্স্বোর্বনে কুঞ্জরয়োরিব
108.17
রাজন্বৈকর্তনো ভীমং ক্রুদ্ধঃ ক্রুদ্ধমরিংদমম্
পরাক্রান্তং পরাক্রম্য বিব্যাধ ত্রিংশতা শরৈঃ
108.18
মহাবেগৈঃ প্রসন্নাগ্রৈঃ শাতকুম্ভপরিষ্কৃতৈঃ
আহনদ্ভরতশ্রেষ্ঠ ভীমং বৈকর্তনঃ শরৈঃ
108.19
তস্যাস্যতো ধনুর্ভীমশ্চকর্ত নিশিতৈস্ত্রিভিঃ
রথনীডাচ্চ যন্তারং ভল্লেনাপাতয়ত্ক্ষিতৌ
108.20
স কাঙ্ক্ষন্ভীমসেনস্য বধং বৈকর্তনো বৃষঃ
শক্তিং কনকবৈডূর্যচিত্রদণ্ডাং পরামৃশৎ
108.21
প্রগৃহ্য চ মহাশক্তিং কালশক্তিমিবাপরাম্
সমুত্ক্ষিপ্য চ রাধেয়ঃ সংধায় চ মহাবলঃ
চিক্ষেপ ভীমসেনায় জীবিতান্তকরীমিব
108.22
শক্তিং বিসৃজ্য রাধেয়ঃ পুরংদর ইবাশনিম্
ননাদ সুমহানাদং বলবান্সূতনন্দনঃ
তং চ নাদং ততঃ শ্রুত্বা পুত্রাস্তে হৃষিতাভবন্
108.23
তাং কর্ণভুজনির্মুক্তামর্কবৈশ্বানরপ্রভাম্
শক্তিং বিয়তি চিচ্ছেদ ভীমঃ সপ্তভিরাশুগৈঃ
108.24
ছিত্ত্বা শক্তিং ততো ভীমো নির্মুক্তোরগসংনিভাম্
মার্গমাণ ইব প্রাণান্সূতপুত্রস্য মারিষ
108.25
প্রাহিণোন্নব সংরব্ধঃ শরান্বর্হিণবাসসঃ
স্বর্ণপুঙ্খাঞ্শিলাধৌতান্যমদণ্ডোপমান্মৃধে
108.26
কর্ণোঽপ্যন্যদ্ধনুর্গৃহ্য হেমপৃষ্ঠং দুরাসদম্
বিকৃষ্য চ মহাতেজা ব্যসৃজত্সায়কান্নব
108.27
তান্পাণ্ডুপুত্রশ্চিচ্ছেদ নবভির্নতপর্বভিঃ
বসুষেণেন নির্মুক্তান্নব রাজন্মহাশরান্
ছিত্ত্বা ভীমো মহারাজ নাদং সিংহ ইবানদৎ
108.28
তৌ বৃষাবিব নর্দন্তৌ বলিনৌ বাশিতান্তরে
শার্দূলাবিব চান্যোন্যমত্যর্থং চ হ্যগর্জতাম্
108.29
অন্যোন্যং প্রজিহীর্ষন্তাবন্যোন্যস্যান্তরৈষিণৌ
অন্যোন্যমভিবীক্ষন্তৌ গোষ্ঠেষ্বিব মহর্ষভৌ
108.30
মহাগজাবিবাসাদ্য বিষাণাগ্রৈঃ পরস্পরম্
শরৈঃ পূর্ণায়তোত্সৃষ্টৈরন্যোন্যমভিজঘ্নতুঃ
108.31
নির্দহন্তৌ মহারাজ শরবৃষ্ট্যা পরস্পরম্
অন্যোন্যমভিবীক্ষন্তৌ কোপাদ্বিবৃতলোচনৌ
108.32
প্রহসন্তৌ তথান্যোন্যং ভর্ত্সয়ন্তৌ মুহুর্মুহুঃ
শঙ্খশব্দং চ কুর্বাণৌ যুয়ুধাতে পরস্পরম্
108.33
তস্য ভীমঃ পুনশ্চাপং মুষ্টৌ চিচ্ছেদ মারিষ
শঙ্খবর্ণাংশ্চ তানশ্বান্বাণৈর্নিন্যে যমক্ষয়ম্
108.34
তথা কৃচ্ছ্রগতং দৃষ্ট্বা কর্ণং দুর্যোধনো নৃপঃ
বেপমান ইব ক্রোধাদ্ব্যাদিদেশাথ দুর্জয়ম্
108.35
গচ্ছ দুর্জয় রাধেয়ং পুরা গ্রসতি পাণ্ডবঃ
জহি তূবরকং ক্ষিপ্রং কর্ণস্য বলমাদধৎ
108.36
এবমুক্তস্তথেত্যুক্ত্বা তব পুত্রস্তবাত্মজম্
অভ্যদ্রবদ্ভীমসেনং ব্যাসক্তং বিকিরঞ্শরান্
108.37
স ভীমং নবভির্বাণৈরশ্বানষ্টভিরর্দয়ৎ
ষড্ভিঃ সূতং ত্রিভিঃ কেতুং পুনস্তং চাপি সপ্তভিঃ
108.38
ভীমসেনোঽপি সংক্রুদ্ধঃ সাশ্বয়ন্তারমাশুগৈঃ
দুর্জয়ং ভিন্নমর্মাণমনয়দ্যমসাদনম্
108.39
স্বলংকৃতং ক্ষিতৌ ক্ষুণ্ণং চেষ্টমানং যথোরগম্
রুদন্নার্তস্তব সুতং কর্ণশ্চক্রে প্রদক্ষিণম্
108.40
স তু তং বিরথং কৃত্বা স্ময়ন্নত্যন্তবৈরিণম্
সমাচিনোদ্বাণগণৈঃ শতঘ্নীমিব শঙ্কুভিঃ
108.41
তথাপ্যতিরথঃ কর্ণো ভিদ্যমানঃ স্ম সায়কৈঃ
ন জহৌ সমরে ভীমং ক্রুদ্ধরূপং পরংতপঃ