Utshovঅধ্যায় 107
107.1
ধৃতরাষ্ট্র উবাচ
যস্মিঞ্জয়াশা সততং পুত্রাণাং মম সংজয়
তং দৃষ্ট্বা বিমুখং সংখ্যে কিং নু দুর্যোধনোঽব্রবীৎ
কর্ণো বা সমরে তাত কিমকার্ষীদতঃ পরম্
107.2
সংজয় উবাচ
ভীমসেনং রণে দৃষ্ট্বা জ্বলন্তমিব পাবকম্
রথমন্যং সমাস্থায় বিধিবত্কল্পিতং পুনঃ
অভ্যয়াত্পাণ্ডবং কর্ণো বাতোদ্ধূত ইবার্ণবঃ
107.3
ক্রুদ্ধমাধিরথিং দৃষ্ট্বা পুত্রাস্তব বিশাং পতে
ভীমসেনমমন্যন্ত বৈবস্বতমুখে হুতম্
107.4
চাপশব্দং মহত্কৃত্বা তলশব্দং চ ভৈরবম্
অভ্যবর্তত রাধেয়ো ভীমসেনরথং প্রতি
107.5
পুনরেব ততো রাজন্মহানাসীত্সুদারুণঃ
বিমর্দঃ সূতপুত্রস্য ভীমস্য চ বিশাং পতে
107.6
সংরব্ধৌ হি মহাবাহূ পরস্পরবধৈষিণৌ
অন্যোন্যমীক্ষাং চক্রাতে দহন্তাবিব লোচনৈঃ
107.7
ক্রোধরক্তেক্ষণৌ ক্রুদ্ধৌ নিঃশ্বসন্তৌ মহারথৌ
যুদ্ধেঽন্যোন্যং সমাসাদ্য ততক্ষতুররিংদমৌ
107.8
ব্যাঘ্রাবিব সুসংরব্ধৌ শ্যেনাবিব চ শীঘ্রগৌ
শরভাবিব সংক্রুদ্ধৌ যুয়ুধাতে পরস্পরম্
107.9
ততো ভীমঃ স্মরন্ক্লেশানক্ষদ্যূতে বনেঽপি চ
বিরাটনগরে চৈব প্রাপ্তং দুঃখমরিংদমঃ
107.10
রাষ্ট্রাণাং স্ফীতরত্নানাং হরণং চ তবাত্মজৈঃ
সততং চ পরিক্লেশান্সপুত্রেণ ত্বয়া কৃতান্
107.11
দগ্ধুমৈচ্ছশ্চ যত্কুন্তীং সপুত্রাং ত্বমনাগসম্
কৃষ্ণায়াশ্চ পরিক্লেশং সভামধ্যে দুরাত্মভিঃ
107.12
পতিমন্যং পরীপ্সস্ব ন সন্তি পতয়স্তব
নরকং পতিতাঃ পার্থাঃ সর্বে ষণ্ঢতিলোপমাঃ
107.13
সমক্ষং তব কৌরব্য যদূচুঃ কুরবস্তদা
দাসীভোগেন কৃষ্ণাং চ ভোক্তুকামাঃ সুতাস্তব
107.14
যচ্চাপি তান্প্রব্রজতঃ কৃষ্ণাজিননিবাসিনঃ
পরুষাণ্যুক্তবান্কর্ণঃ সভায়াং সংনিধৌ তব
107.15
তৃণীকৃত্য চ যত্পার্থাংস্তব পুত্রো ববল্গ হ
বিষমস্থান্সমস্থো হি সংরম্ভাদ্গতচেতসঃ
107.16
বাল্যাত্প্রভৃতি চারিঘ্নস্তানি দুঃখানি চিন্তয়ন্
নিরবিদ্যত ধর্মাত্মা জীবিতেন বৃকোদরঃ
107.17
ততো বিস্ফার্য সুমহদ্ধেমপৃষ্ঠং দুরাসদম্
চাপং ভরতশার্দূলস্ত্যক্তাত্মা কর্ণমভ্যয়াৎ
107.18
স সায়কময়ৈর্জালৈর্ভীমঃ কর্ণরথং প্রতি
ভানুমদ্ভিঃ শিলাধৌতৈর্ভানোঃ প্রচ্ছাদয়ত্প্রভাম্
107.19
ততঃ প্রহস্যাধিরথিস্তূর্ণমস্যঞ্শিতাঞ্শরান্
ব্যধমদ্ভীমসেনস্য শরজালানি পত্রিভিঃ
107.20
মহারথো মহাবাহুর্মহাবেগৈর্মহাবলঃ
বিব্যাধাধিরথির্ভীমং নবভির্নিশিতৈঃ শরৈঃ
107.21
স তোত্ত্রৈরিব মাতঙ্গো বার্যমাণঃ পতত্রিভিঃ
অভ্যধাবদসংভ্রান্তঃ সূতপুত্রং বৃকোদরঃ
107.22
তমাপতন্তং বেগেন রভসং পাণ্ডবর্ষভম্
কর্ণঃ প্রত্যুদ্যয়ৌ যোদ্ধুং মত্তো মত্তমিব দ্বিপম্
107.23
ততঃ প্রধ্মাপ্য জলজং ভেরীশতনিনাদিতম্
অক্ষুভ্যত বলং হর্ষাদুদ্ধূত ইব সাগরঃ
107.24
তদুদ্ধূতং বলং দৃষ্ট্ব রথনাগাশ্বপত্তিমৎ
ভীমঃ কর্ণং সমাসাদ্য ছাদয়ামাস সায়কৈঃ
107.25
অশ্বানৃশ্যসবর্ণাংস্তু হংসবর্ণৈর্হয়োত্তমৈঃ
ব্যামিশ্রয়দ্রণে কর্ণঃ পাণ্ডবং ছাদয়ঞ্শরৈঃ
107.26
ঋশ্যবর্ণান্হয়ান্কর্কৈর্মিশ্রান্মারুতরংহসঃ
নিরীক্ষ্য তব পুত্রাণাং হাহাকৃতমভূদ্বলম্
107.27
তে হয়া বহ্বশোভন্ত মিশ্রিতা বাতরংহসঃ
সিতাসিতা মহারাজ যথা ব্যোম্নি বলাহকাঃ
107.28
সংরব্ধৌ ক্রোধতাম্রাক্ষৌ প্রেক্ষ্য কর্ণবৃকোদরৌ
সংত্রস্তাঃ সমকম্পন্ত ত্বদীয়ানাং মহারথাঃ
107.29
যমরাষ্ট্রোপমং ঘোরমাসীদায়োধনং তয়োঃ
দুর্দর্শং ভরতশ্রেষ্ঠ প্রেতরাজপুরং যথা
107.30
সমাজমিব তচ্চিত্রং প্রেক্ষমাণা মহারথাঃ
নালক্ষয়ঞ্জয়ং ব্যক্তমেকৈকস্য নিবারণে
107.31
তয়োঃ প্রৈক্ষন্ত সংমর্দং সংনিকৃষ্টমহাস্ত্রয়োঃ
তব দুর্মন্ত্রিতে রাজন্সপুত্রস্য বিশাং পতে
107.32
ছাদয়ন্তৌ হি শত্রুঘ্নাবন্যোন্যং সায়কৈঃ শিতৈঃ
শরজালাবৃতং ব্যোম চক্রাতে শরবৃষ্টিভিঃ
107.33
তাবন্যোন্যং জিঘাংসন্তৌ শরৈস্তীক্ষ্ণৈর্মহারথৌ
প্রেক্ষণীয়তরাবাস্তাং বৃষ্টিমন্তাবিবাম্বুদৌ
107.34
সুবর্ণবিকৃতান্বাণান্প্রমুঞ্চন্তাবরিংদমৌ
ভাস্বরং ব্যোম চক্রাতে বহ্ন্যুল্কাভিরিব প্রভো
107.35
তাভ্যাং মুক্তা ব্যকাশন্ত কঙ্কবর্হিণবাসসঃ
পঙ্ক্ত্যঃ শরদি মত্তানাং সারসানামিবাম্বরে
107.36
সংসক্তং সূতপুত্রেণ দৃষ্ট্বা ভীমমরিংদমম্
অতিভারমমন্যেতাং ভীমে কৃষ্ণধনংজয়ৌ
107.37
তত্রাধিরথিভীমাভ্যাং শরৈর্মুক্তৈর্দৃঢাহতাঃ
ইষুপাতমতিক্রম্য পেতুরশ্বনরদ্বিপাঃ
107.38
পতদ্ভিঃ পতিতৈশ্চান্যৈর্গতাসুভিরনেকশঃ
কৃতো মহান্মহারাজ পুত্রাণাং তে জনক্ষয়ঃ
107.39
মনুষ্যাশ্বগজানাং চ শরীরৈর্গতজীবিতৈঃ
ক্ষণেন ভূমিঃ সংজজ্ঞে সংবৃতা ভরতর্ষভ