Utshovঅধ্যায় 106
106.1
ধৃতরাষ্ট্র উবাচ
যৌ তৌ কর্ণশ্চ ভীমশ্চ সংপ্রয়ুদ্ধৌ মহাবলৌ
অর্জুনস্য রথোপান্তে কীদৃশঃ সোঽভবদ্রণঃ
106.2
পূর্বং হি নির্জিতঃ কর্ণো ভীমসেনেন সংয়ুগে
কথং ভূয়স্তু রাধেয়ো ভীমমাগান্মহারথঃ
106.3
ভীমো বা সূততনয়ং প্রত্যুদ্যাতঃ কথং রণে
মহারথসমাখ্যাতং পৃথিব্যাং প্রবরং রথম্
106.4
ভীষ্মদ্রোণাবতিক্রম্য ধর্মপুত্রো যুধিষ্ঠিরঃ
নান্যতো ভয়মাদত্ত বিনা কর্ণং ধনুর্ধরম্
106.5
ভয়ান্ন শেতে সততং চিন্তয়ন্বৈ মহারথম্
তং কথং সূতপুত্রং হি ভীমোঽয়ুধ্যত সংয়ুগে
106.6
ব্রহ্মণ্যং বীর্যসংপন্নং সমরেষ্বনিবর্তিনম্
কথং কর্ণং যুধাং শ্রেষ্ঠং ভীমোঽয়ুধ্যত সংয়ুগে
106.7
যৌ তৌ সমীয়তুর্বীরাবর্জুনস্য রথং প্রতি
কথং নু তাবয়ুধ্যেতাং সূতপুত্রবৃকোদরৌ
106.8
ভ্রাতৃত্বং দর্শিতং পূর্বং ঘৃণী চাপি স সূতজঃ
কথং ভীমেন যুয়ুধে কুন্ত্যা বাক্যমনুস্মরন্
106.9
ভীমো বা সূতপুত্রেণ স্মরন্বৈরং পুরা কৃতম্
সোঽয়ুধ্যত কথং বীরঃ কর্ণেন সহ সংয়ুগে
106.10
আশাস্তে চ সদা সূত পুত্রো দুর্যোধনো মম
কর্ণো জেষ্যতি সংগ্রামে সহিতান্পাণ্ডবানিতি
106.11
জয়াশা যত্র মন্দস্য পুত্রস্য মম সংয়ুগে
স কথং ভীমকর্মাণং ভীমসেনময়ুধ্যত
106.12
যং সমাশ্রিত্য পুত্রৈর্মে কৃতং বৈরং মহারথৈঃ
তং সূততনয়ং তাত কথং ভীমো হ্যয়োধয়ৎ
106.13
অনেকান্বিপ্রকারাংশ্চ সূতপুত্রসমুদ্ভবান্
স্মরমাণঃ কথং ভীমো যুয়ুধে সূতসূনুনা
106.14
যোঽজয়ত্পৃথিবীং সর্বাং রথেনৈকেন বীর্যবান্
তং সূততনয়ং যুদ্ধে কথং ভীমো হ্যয়োধয়ৎ
106.15
যো জাতঃ কুণ্ডলাভ্যাং চ কবচেন সহৈব চ
তং সূতপুত্রং সমরে ভীমঃ কথময়োধয়ৎ
106.16
যথা তয়োর্যুদ্ধমভূদ্যশ্চাসীদ্বিজয়ী তয়োঃ
তন্মমাচক্ষ্ব তত্ত্বেন কুশলো হ্যসি সংজয়
106.17
সংজয় উবাচ
ভীমসেনস্তু রাধেয়মুত্সৃজ্য রথিনাং বরম্
ইয়েষ গন্তুং যত্রাস্তাং বীরৌ কৃষ্ণধনংজয়ৌ
106.18
তং প্রয়ান্তমভিদ্রুত্য রাধেয়ঃ কঙ্কপত্রিভিঃ
অভ্যবর্ষন্মহারাজ মেঘো বৃষ্ট্যেব পর্বতম্
106.19
ফুল্লতা পঙ্কজেনেব বক্ত্রেণাভ্যুত্স্ময়ন্বলী
আজুহাব রণে যান্তং ভীমমাধিরথিস্তদা
106.20
ভীমসেনস্তদাহ্বানং কর্ণান্নামর্ষয়দ্যুধি
অর্ধমণ্ডলমাবৃত্য সূতপুত্রময়োধয়ৎ
106.21
অবক্রগামিভির্বাণৈরভ্যবর্ষন্মহায়সৈঃ
দ্বৈরথে দংশিতং যত্তং সর্বশস্ত্রভৃতাং বরম্
106.22
বিধিত্সুঃ কলহস্যান্তং জিঘাংসুঃ কর্ণমক্ষিণোৎ
তং চ হত্বেতরান্সর্বান্হন্তুকামো মহাবলঃ
106.23
তস্মৈ প্রাসৃজদুগ্রাণি বিবিধানি পরংতপঃ
অমর্ষী পাণ্ডবঃ ক্রুদ্ধঃ শরবর্ষাণি মারিষ
106.24
তস্য তানীষুবর্ষাণি মত্তদ্বিরদগামিনঃ
সূতপুত্রোঽস্ত্রমায়াভিরগ্রসত্সুমহায়শাঃ
106.25
স যথাবন্মহারাজ বিদ্যয়া বৈ সুপূজিতঃ
আচার্যবন্মহেষ্বাসঃ কর্ণঃ পর্যচরদ্রণে
106.26
সংরম্ভেণ তু যুধ্যন্তং ভীমসেনং স্ময়ন্নিব
অভ্যপদ্যত রাধেয়স্তমমর্ষী বৃকোদরম্
106.27
তন্নামৃষ্যত কৌন্তেয়ঃ কর্ণস্য স্মিতমাহবে
যুধ্যমানেষু বীরেষু পশ্যত্সু চ সমন্ততঃ
106.28
তং ভীমসেনঃ সংপ্রাপ্তং বত্সদন্তৈঃ স্তনান্তরে
বিব্যাধ বলবান্ক্রুদ্ধস্তোত্ত্রৈরিব মহাদ্বিপম্
106.29
সূতং তু সূতপুত্রস্য সুপুঙ্খৈর্নিশিতৈঃ শরৈঃ
সুমুক্তৈশ্চিত্রবর্মাণং নির্বিভেদ ত্রিসপ্তভিঃ
106.30
কর্ণো জাম্বূনদৈর্জালৈঃ সংছন্নান্বাতরংহসঃ
বিব্যাধ তুরগান্বীরঃ পঞ্চভিঃ পঞ্চভিঃ শরৈঃ
106.31
ততো বাণময়ং জালং ভীমসেনরথং প্রতি
কর্ণেন বিহিতং রাজন্নিমেষার্ধাদদৃশ্যত
106.32
সরথঃ সধ্বজস্তত্র সসূতঃ পাণ্ডবস্তদা
প্রাচ্ছাদ্যত মহারাজ কর্ণচাপচ্যুতৈঃ শরৈঃ
106.33
তস্য কর্ণশ্চতুঃষষ্ট্যা ব্যধমত্কবচং দৃঢম্
ক্রুদ্ধশ্চাপ্যহনত্পার্শ্বে নারাচৈর্মর্মভেদিভিঃ
106.34
ততোঽচিন্ত্য মহাবেগান্কর্ণকার্মুকনিঃসৃতান্
সমাশ্লিষ্যদসংভ্রান্তঃ সূতপুত্রং বৃকোদরঃ
106.35
স কর্ণচাপপ্রভবানিষূনাশীবিষোপমান্
বিভ্রদ্ভীমো মহারাজ ন জগাম ব্যথাং রণে
106.36
ততো দ্বাত্রিংশতা ভল্লৈর্নিশিতৈস্তিগ্মতেজনৈঃ
বিব্যাধ সমরে কর্ণং ভীমসেনঃ প্রতাপবান্
106.37
অয়ত্নেনৈব তং কর্ণঃ শরৈরুপ সমাকিরৎ
ভীমসেনং মহাবাহুং সৈন্ধবস্য বধৈষিণম্
106.38
মৃদুপূর্বং চ রাধেয়ো ভীমমাজাবয়োধয়ৎ
ক্রোধপূর্বং তথা ভীমঃ পূর্ববৈরমনুস্মরন্
106.39
তং ভীমসেনো নামৃষ্যদবমানমমর্ষণঃ
স তস্মৈ ব্যসৃজত্তূর্ণং শরবর্ষমমিত্রজিৎ
106.40
তে শরাঃ প্রেষিতা রাজন্ভীমসেনেন সংয়ুগে
নিপেতুঃ সর্বতো ভীমাঃ কূজন্ত ইব পক্ষিণঃ
106.41
হেমপুঙ্খা মহারাজ ভীমসেনধনুশ্চ্যুতাঃ
অভ্যদ্রবংস্তে রাধেয়ং বৃকাঃ ক্ষুদ্রমৃগং যথা
106.42
কর্ণস্তু রথিনাং শ্রেষ্ঠশ্ছাদ্যমানঃ সমন্ততঃ
রাজন্ব্যসৃজদুগ্রাণি শরবর্ষাণি সংয়ুগে
106.43
তস্য তানশনিপ্রখ্যানিষূন্সমরশোভিনঃ
চিচ্ছেদ বহুভির্ভল্লৈরসংপ্রাপ্তান্বৃকোদরঃ
106.44
পুনশ্চ শরবর্ষেণ ছাদয়ামাস ভারত
কর্ণো বৈকর্তনো যুদ্ধে ভীমসেনং মহারথম্
106.45
তত্র ভারত ভীমং তু দৃষ্টবন্তঃ স্ম সায়কৈঃ
সমাচিততনুং সংখ্যে শ্বাবিধং শললৈরিব
106.46
হেমপুঙ্খাঞ্শিলাধৌতান্কর্ণচাপচ্যুতাঞ্শরান্
দধার সমরে বীরঃ স্বরশ্মীনিব ভাস্করঃ
106.47
রুধিরোক্ষিতসর্বাঙ্গো ভীমসেনো ব্যরোচত
তপনীয়নিভৈঃ পুষ্পৈঃ পলাশ ইব কাননে
106.48
তত্তু ভীমো মহারাজ কর্ণস্য চরিতং রণে
নামৃষ্যত মহেষ্বাসঃ ক্রোধাদুদ্বৃত্য চক্ষুষী
106.49
স কর্ণং পঞ্চবিংশত্যা নারাচানাং সমার্পয়ৎ
মহীধরমিব শ্বেতং গূঢপাদৈর্বিষোল্বণৈঃ
106.50
তং বিব্যাধ পুনর্ভীমঃ ষড্ভিরষ্টাভিরেব চ
মর্মস্বমরবিক্রান্তঃ সূতপুত্রং মহারণে
106.51
ততঃ কর্ণস্য সংক্রুদ্ধো ভীমসেনঃ প্রতাপবান্
চিচ্ছেদ কার্মুকং তূর্ণং সর্বোপকরণানি চ
106.52
জঘান চতুরশ্চাশ্বান্সূতং চ ত্বরিতঃ শরৈঃ
নারাচৈরর্করশ্ম্যাভৈঃ কর্ণং বিব্যাধ চোরসি
106.53
তে জগ্মুর্ধরণীং সর্বে কর্ণং নির্ভিদ্য মারিষ
যথা হি জলদং ভিত্ত্বা রাজন্সূর্যস্য রশ্ময়ঃ
106.54
স বৈকল্যং মহত্প্রাপ্য ছিন্নধন্বা শরার্দিতঃ
তথা পুরুষমানী স প্রত্যপায়াদ্রথান্তরম্