Utshovঅধ্যায় 105
105.1
সংজয় উবাচ
তস্মিন্বিলুলিতে সৈন্যে সৈন্ধবায়ার্জুনে গতে
সাত্বতে ভীমসেনে চ পুত্রস্তে দ্রোণমভ্যয়াৎ
ত্বরন্নেকরথেনৈব বহুকৃত্যং বিচিন্তয়ন্
105.2
স রথস্তব পুত্রস্য ত্বরয়া পরয়া যুতঃ
তূর্ণমভ্যপতদ্দ্রোণং মনোমারুতবেগবান্
105.3
উবাচ চৈনং পুত্রস্তে সংরম্ভাদ্রক্তলোচনঃ
অর্জুনো ভীমসেনশ্চ সাত্যকিশ্চাপরাজিতঃ
105.4
বিজিত্য সর্বসৈন্যানি সুমহান্তি মহারথাঃ
সংপ্রাপ্তাঃ সিন্ধুরাজস্য সমীপমরিকর্শনাঃ
ব্যায়চ্ছন্তি চ তত্রাপি সর্ব এবাপরাজিতাঃ
105.5
যদি তাবদ্রণে পার্থো ব্যতিক্রান্তো মহারথঃ
কথং সাত্যকিভীমাভ্যাং ব্যতিক্রান্তোঽসি মানদ
105.6
আশ্চর্যভূতং লোকেঽস্মিন্সমুদ্রস্যেব শোষণম্
নির্জয়ং তব বিপ্রাগ্র্য সাত্বতেনার্জুনেন চ
105.7
তথৈব ভীমসেনেন লোকঃ সংবদতে ভৃশম্
কথং দ্রোণো জিতঃ সংখ্যে ধনুর্বেদস্য পারগঃ
105.8
নাশ এব তু মে নূনং মন্দভাগ্যস্য সংয়ুগে
যত্র ত্বাং পুরুষব্যাঘ্রমতিক্রান্তাস্ত্রয়ো রথাঃ
105.9
এবং গতে তু কৃত্যেঽস্মিন্ব্রূহি যত্তে বিবক্ষিতম্
যদ্গতং গতমেবেহ শেষং চিন্তয় মানদ
105.10
যত্কৃত্যং সিন্ধুরাজস্য প্রাপ্তকালমনন্তরম্
তদ্ব্রবীতু ভবান্ক্ষিপ্রং সাধু তত্সংবিধীয়তাম্
105.11
দ্রোণ উবাচ
চিন্ত্যং বহু মহারাজ কৃত্যং যত্তত্র মে শৃণু
ত্রয়ো হি সমতিক্রান্তাঃ পাণ্ডবানাং মহারথাঃ
যাবদেব ভয়ং পশ্চাত্তাবদেষাং পুরঃসরম্
105.12
তদ্গরীয়স্তরং মন্যে যত্র কৃষ্ণধনংজয়ৌ
সা পুরস্তাচ্চ পশ্চাচ্চ গৃহীতা ভারতী চমূঃ
105.13
তত্র কৃত্যমহং মন্যে সৈন্ধবস্যাভিরক্ষণম্
স নো রক্ষ্যতমস্তাত ক্রুদ্ধাদ্ভীতো ধনংজয়াৎ
105.14
গতৌ হি সৈন্ধবং বীরৌ যুয়ুধানবৃকোদরৌ
সংপ্রাপ্তং তদিদং দ্যূতং যত্তচ্ছকুনিবুদ্ধিজম্
105.15
ন সভায়াং জয়ো বৃত্তো নাপি তত্র পরাজয়ঃ
ইহ নো গ্লহমানানামদ্য তাত জয়াজয়ৌ
105.16
যান্স্ম তান্গ্লহতে ঘোরাঞ্শকুনিঃ কুরুসংসদি
অক্ষান্সংমন্যমানঃ স প্রাক্শরাস্তে দুরাসদাঃ
105.17
যত্র তে বহবস্তাত কুরবঃ পর্যবস্থিতাঃ
সেনাং দুরোদরং বিদ্ধি শরানক্ষান্বিশাং পতে
105.18
গ্লহং চ সৈন্ধবং রাজন্নত্র দ্যূতস্য নিশ্চয়ঃ
সৈন্ধবে হি মহাদ্যূতং সমাসক্তং পরৈঃ সহ
105.19
অত্র সর্বে মহারাজ ত্যক্ত্বা জীবিতমাত্মনঃ
সৈন্ধবস্য রণে রক্ষাং বিধিবত্কর্তুমর্হথ
তত্র নো গ্লহমানানাং ধ্রুবৌ তাত জয়াজয়ৌ
105.20
যত্র তে পরমেষ্বাসা যত্তা রক্ষন্তি সৈন্ধবম্
তত্র যাহি স্বয়ং শীঘ্রং তাংশ্চ রক্ষস্ব রক্ষিণঃ
105.21
ইহৈব ত্বহমাসিষ্যে প্রেষয়িষ্যামি চাপরান্
নিরোত্স্যামি চ পাঞ্চালান্সহিতান্পাণ্ডুসৃঞ্জয়ৈঃ
105.22
ততো দুর্যোধনঃ প্রায়াত্তূর্ণমাচার্যশাসনাৎ
উদ্যম্যাত্মানমুগ্রায় কর্মণে সপদানুগঃ
105.23
চক্ররক্ষৌ তু পাঞ্চাল্যৌ যুধামন্যূত্তমৌজসৌ
বাহ্যেন সেনামভ্যেত্য জগ্মতুঃ সব্যসাচিনম্
105.24
তৌ হি পূর্বং মহারাজ বারিতৌ কৃতবর্মণা
প্রবিষ্টে ত্বর্জুনে রাজংস্তব সৈন্যং যুয়ুত্সয়া
105.25
তাভ্যাং দুর্যোধনঃ সার্ধমগচ্ছদ্যুদ্ধমুত্তমম্
ত্বরিতস্ত্বরমাণাভ্যাং ভ্রাতৃভ্যাং ভারতো বলী
105.26
তাবভিদ্রবতামেনমুভাবুদ্যতকার্মুকৌ
মহারথসমাখ্যাতৌ ক্ষত্রিয়প্রবরৌ যুধি
105.27
যুধামন্যুস্তু সংক্রুদ্ধঃ শরাংস্ত্রিংশতমায়সান্
ব্যসৃজত্তব পুত্রস্য ত্বরমাণঃ স্তনান্তরে
105.28
দুর্যোধনোঽপি রাজেন্দ্র পাঞ্চাল্যস্যোত্তমৌজসঃ
জঘান চতুরশ্চাশ্বানুভৌ চ পার্ষ্ণিসারথী
105.29
উত্তমৌজা হতাশ্বস্তু হতসূতশ্চ সংয়ুগে
আরুরোহ রথং ভ্রাতুর্যুধামন্যোরভিত্বরন্
105.30
স রথং প্রাপ্য তং ভ্রাতুর্দুর্যোধনহয়াঞ্শরৈঃ
বহুভিস্তাডয়ামাস তে হতাঃ প্রাপতন্ভুবি
105.31
হয়েষু পতিতেষ্বস্য চিচ্ছেদ পরমেষুণা
যুধামন্যুর্ধনুঃ শীঘ্রং শরাবাপং চ সংয়ুগে
105.32
হতাশ্বসূতাত্স রথাদবপ্লুত্য মহারথঃ
গদামাদায় তে পুত্রঃ পাঞ্চাল্যাবভ্যধাবত
105.33
তমাপতন্তং সংপ্রেক্ষ্য ক্রুদ্ধং পরপুরংজয়ম্
অবপ্লুতৌ রথোপস্থাদ্যুধামন্যূত্তমৌজসৌ
105.34
ততঃ স হেমচিত্রং তং স্যন্দনপ্রবরং গদী
গদয়া পোথয়ামাস সাশ্বসূতধ্বজং রণে
105.35
হত্বা চৈনং স পুত্রস্তে হতাশ্বো হতসারথিঃ
মদ্ররাজরথং তূর্ণমারুরোহ পরংতপঃ
105.36
পাঞ্চালানাং তু মুখ্যৌ তৌ রাজপুত্রৌ মহাবলৌ
রথমন্যং সমারুহ্য ধনংজয়মভীয়তুঃ