Utshovঅধ্যায় 104
104.1
ধৃতরাষ্ট্র উবাচ
তথা তু নর্দমানং তং ভীমসেনং মহাবলম্
মেঘস্তনিতনির্ঘোষং কে বীরাঃ পর্যবারয়ন্
104.2
ন হি পশ্যাম্যহং তং বৈ ত্রিষু লোকেষু সংজয়
ক্রুদ্ধস্য ভীমসেনস্য যস্তিষ্ঠেদগ্রতো রণে
104.3
গদামুদ্যচ্ছমানস্য কালস্যেব মহামৃধে
ন হি পশ্যাম্যহং তাত যস্তিষ্ঠেত রণাজিরে
104.4
রথং রথেন যো হন্যাত্কুঞ্জরং কুঞ্জরেণ চ
কস্তস্য সমরে স্থাতা সাক্ষাদপি শতক্রতুঃ
104.5
ক্রুদ্ধস্য ভীমসেনস্য মম পুত্রাঞ্জিঘাংসতঃ
দুর্যোধনহিতে যুক্তাঃ সমতিষ্ঠন্ত কেঽগ্রতঃ
104.6
ভীমসেনদবাগ্নেস্তু মম পুত্রতৃণোলপম্
প্রধক্ষ্যতো রণমুখে কে বীরাঃ প্রমুখে স্থিতাঃ
104.7
কাল্যমানান্হি মে পুত্রান্ভীমেনাবেক্ষ্য সংয়ুগে
কালেনেব প্রজাঃ সর্বাঃ কে ভীমং পর্যবারয়ন্
104.8
ভীমবহ্নেঃ প্রদীপ্তস্য মম পুত্রান্দিধক্ষতঃ
কে শূরাঃ পর্যবর্তন্ত তন্মমাচক্ষ্ব সংজয়
104.9
সংজয় উবাচ
তথা তু নর্দমানং তং ভীমসেনং মহারথম্
তুমুলেনৈব শব্দেন কর্ণোঽপ্যভ্যপতদ্বলী
104.10
ব্যাক্ষিপন্বলবচ্চাপমতিমাত্রমমর্ষণঃ
কর্ণস্তু যুদ্ধমাকাঙ্ক্ষন্দর্শয়িষ্যন্বলং বলী
104.11
প্রাবেপন্নিব গাত্রাণি কর্ণভীমসমাগমে
রথিনাং সাদিনাং চৈব তয়োঃ শ্রুত্বা তলস্বনম্
104.12
ভীমসেনস্য নিনদং ঘোরং শ্রুত্বা রণাজিরে
খং চ ভূমিং চ সংবদ্ধাং মেনিরে ক্ষত্রিয়র্ষভাঃ
104.13
পুনর্ঘোরেণ নাদেন পাণ্ডবস্য মহাত্মনঃ
সমরে সর্বয়োধানাং ধনূংষ্যভ্যপতন্ক্ষিতৌ
104.14
বিত্রস্তানি চ সর্বাণি শকৃন্মূত্রং প্রসুস্রুবুঃ
বাহনানি মহারাজ বভূবুর্বিমনাংসি চ
104.15
প্রাদুরাসন্নিমিত্তানি ঘোরাণি চ বহূনি চ
তস্মিংস্তু তুমুলে রাজন্ভীমকর্ণসমাগমে
104.16
ততঃ কর্ণস্তু বিংশত্যা শরাণাং ভীমমার্দয়ৎ
বিব্যাধ চাস্য ত্বরিতঃ সূতং পঞ্চভিরাশুগৈঃ
104.17
প্রহস্য ভীমসেনস্তু কর্ণং প্রত্যর্পয়দ্রণে
সায়কানাং চতুঃষষ্ট্যা ক্ষিপ্রকারী মহাবলঃ
104.18
তস্য কর্ণো মহেষ্বাসঃ সায়কাংশ্চতুরোঽক্ষিপৎ
অসংপ্রাপ্তাংস্তু তান্ভীমঃ সায়কৈর্নতপর্বভিঃ
চিচ্ছেদ বহুধা রাজন্দর্শয়ন্পাণিলাঘবম্
104.19
তং কর্ণশ্ছাদয়ামাস শরব্রাতৈরনেকশঃ
সংছাদ্যমানঃ কর্ণেন বহুধা পাণ্ডুনন্দনঃ
104.20
চিচ্ছেদ চাপং কর্ণস্য মুষ্টিদেশে মহারথঃ
বিব্যাধ চৈনং বহুভিঃ সায়কৈর্নতপর্বভিঃ
104.21
অথান্যদ্ধনুরাদায় সজ্যং কৃত্বা চ সূতজঃ
বিব্যাধ সমরে ভীমং ভীমকর্মা মহারথঃ
104.22
তস্য ভীমো ভৃশং ক্রুদ্ধস্ত্রীঞ্শরান্নতপর্বণঃ
নিচখানোরসি তদা সূতপুত্রস্য বেগিতঃ
104.23
তৈঃ কর্ণোঽভ্রাজত শরৈরুরোমধ্যগতৈস্তদা
মহীধর ইবোদগ্রস্ত্রিশৃঙ্গো ভরতর্ষভ
104.24
সুস্রাব চাস্য রুধিরং বিদ্ধস্য পরমেষুভিঃ
ধাতুপ্রস্যন্দিনঃ শৈলাদ্যথা গৈরিকরাজয়ঃ
104.25
কিংচিদ্বিচলিতঃ কর্ণঃ সুপ্রহারাভিপীডিতঃ
সসায়কং ধনুঃ কৃত্বা ভীমং বিব্যাধ মারিষ
চিক্ষেপ চ পুনর্বাণাঞ্শতশোঽথ সহস্রশঃ
104.26
স ছাদ্যমানঃ সহসা কর্ণেন দৃঢধন্বিনা
ধনুর্জ্যামচ্ছিনত্তূর্ণমুত্স্ময়ন্পাণ্ডুনন্দনঃ
104.27
সারথিং চাস্য ভল্লেন প্রাহিণোদ্যমসাদনম্
বাহাংশ্চ চতুরঃ সংখ্যে ব্যসূংশ্চক্রে মহারথঃ
104.28
হতাশ্বাত্তু রথাত্কর্ণঃ সমাপ্লুত্য বিশাং পতে
স্যন্দনং বৃষসেনস্য সমারোহন্মহারথঃ
104.29
নির্জিত্য তু রণে কর্ণং ভীমসেনঃ প্রতাপবান্
ননাদ সুমহানাদং পর্জন্যনিনদোপমম্
104.30
তস্য তং নিনদং শ্রুত্বা প্রহৃষ্টোঽভূদ্যুধিষ্ঠিরঃ
কর্ণং চ নির্জিতং মত্বা ভীমসেনেন ভারত
104.31
সমন্তাচ্ছঙ্খনিনদং পাণ্ডুসেনাকরোত্তদা
শত্রুসেনাধ্বনিং শ্রুত্বা তাবকা হ্যপি নানদন্
গাণ্ডীবং প্রাক্ষিপত্পার্থঃ কৃষ্ণোঽপ্যব্জমবাদয়ৎ
104.32
তমন্তর্ধায় নিনদং ধ্বনির্ভীমস্য নর্দতঃ
অশ্রূয়ত মহারাজ সর্বসৈন্যেষু ভারত
104.33
ততো ব্যায়চ্ছতামস্ত্রৈঃ পৃথক্পৃথগরিংদমৌ
মৃদুপূর্বং চ রাধেয়ো দৃঢপূর্বং চ পাণ্ডবঃ