Utshovঅধ্যায় 103
103.1
সংজয় উবাচ
তমুত্তীর্ণং রথানীকাত্তমসো ভাস্করং যথা
দিধারয়িষুরাচার্যঃ শরবর্ষৈরবাকিরৎ
103.2
পিবন্নিব শরৌঘাংস্তান্দ্রোণচাপবরাতিগান্
সোঽভ্যবর্তত সোদর্যান্মায়য়া মোহয়ন্বলম্
103.3
তং মৃধে বেগমাস্থায় পরং পরমধন্বিনঃ
চোদিতাস্তব পুত্রৈশ্চ সর্বতঃ পর্যবারয়ন্
103.4
স তথা সংবৃতো ভীমঃ প্রহসন্নিব ভারত
উদয়চ্ছদ্গদাং তেভ্যো ঘোরাং তাং সিংহবন্নদন্
অবাসৃজচ্চ বেগেন তেষু তান্প্রমথদ্বলী
103.5
সেন্দ্রাশনিরিবেন্দ্রেণ প্রবিদ্ধা সংহতাত্মনা
ঘোষেণ মহতা রাজন্পূরয়িত্বেব মেদিনীম্
জ্বলন্তী তেজসা ভীমা ত্রাসয়ামাস তে সুতান্
103.6
তাং পতন্তীং মহাবেগাং দৃষ্ট্বা তেজোভিসংবৃতাম্
প্রাদ্রবংস্তাবকাঃ সর্বে নদন্তো ভৈরবান্রবান্
103.7
তং চ শব্দমসংসহ্যং তস্যাঃ সংলক্ষ্য মারিষ
প্রাপতন্মনুজাস্তত্র রথেভ্যো রথিনস্তদা
103.8
স তান্বিদ্রাব্য কৌন্তেয়ঃ সংখ্যেঽমিত্রান্দুরাসদঃ
সুপর্ণ ইব বেগেন পক্ষিরাডত্যগাচ্চমূম্
103.9
তথা তং বিপ্রকুর্বাণং রথয়ূথপয়ূথপম্
ভারদ্বাজো মহারাজ ভীমসেনং সমভ্যয়াৎ
103.10
দ্রোণস্তু সমরে ভীমং বারয়িত্বা শরোর্মিভিঃ
অকরোত্সহসা নাদং পাণ্ডূনাং ভয়মাদধৎ
103.11
তদ্যুদ্ধমাসীত্সুমহদ্ঘোরং দেবাসুরোপমম্
দ্রোণস্য চ মহারাজ ভীমস্য চ মহাত্মনঃ
103.12
যদা তু বিশিখৈস্তীক্ষ্ণৈর্দ্রোণচাপবিনিঃসৃতৈঃ
বধ্যন্তে সমরে বীরাঃ শতশোঽথ সহস্রশঃ
103.13
ততো রথাদবপ্লুত্য বেগমাস্থায় পাণ্ডবঃ
নিমীল্য নয়নে রাজন্পদাতির্দ্রোণমভ্যয়াৎ
103.14
যথা হি গোবৃষো বর্ষং প্রতিগৃহ্ণাতি লীলয়া
তথা ভীমো নরব্যাঘ্রঃ শরবর্ষং সমগ্রহীৎ
103.15
স বধ্যমানঃ সমরে রথং দ্রোণস্য মারিষ
ঈষায়াং পাণিনা গৃহ্য প্রচিক্ষেপ মহাবলঃ
103.16
দ্রোণস্তু সত্বরো রাজন্ক্ষিপ্তো ভীমেন সংয়ুগে
রথমন্যং সমাস্থায় ব্যূহদ্বারমুপায়য়ৌ
103.17
তস্মিন্ক্ষণে তস্য যন্তা তূর্ণমশ্বানচোদয়ৎ
ভীমসেনস্য কৌরব্য তদদ্ভুতমিবাভবৎ
103.18
ততঃ স্বরথমাস্থায় ভীমসেনো মহাবলঃ
অভ্যবর্তত বেগেন তব পুত্রস্য বাহিনীম্
103.19
স মৃদ্নন্ক্ষত্রিয়ানাজৌ বাতো বৃক্ষানিবোদ্ধতঃ
অগচ্ছদ্দারয়ন্সেনাং সিন্ধুবেগো নগানিব
103.20
ভোজানীকং সমাসাদ্য হার্দিক্যেনাভিরক্ষিতম্
প্রমথ্য বহুধা রাজন্ভীমসেনঃ সমভ্যয়াৎ
103.21
সংত্রাসয়ন্ননীকানি তলশব্দেন মারিষ
অজয়ত্সর্বসৈন্যানি শার্দূল ইব গোবৃষান্
103.22
ভোজানীকমতিক্রম্য কাম্বোজানাং চ বাহিনীম্
তথা ম্লেচ্ছগণাংশ্চান্যান্বহূন্যুদ্ধবিশারদান্
103.23
সাত্যকিং চাপি সংপ্রেক্ষ্য যুধ্যমানং নরর্ষভম্
রথেন যত্তঃ কৌন্তেয়ো বেগেন প্রয়য়ৌ তদা
103.24
ভীমসেনো মহারাজ দ্রষ্টুকামো ধনংজয়ম্
অতীত্য সমরে যোধাংস্তাবকান্পাণ্ডুনন্দনঃ
103.25
সোঽপশ্যদর্জুনং তত্র যুধ্যমানং নরর্ষভম্
সৈন্ধবস্য বধার্থং হি পরাক্রান্তং পরাক্রমী
103.26
অর্জুনং তত্র দৃষ্ট্বাথ চুক্রোশ মহতো রবান্
তং তু তস্য মহানাদং পার্থঃ শুশ্রাব নর্দতঃ
103.27
ততঃ পার্থো মহানাদং মুঞ্চন্বৈ মাধবশ্চ হ
অভ্যয়াতাং মহারাজ নর্দন্তৌ গোবৃষাবিব
103.28
বাসুদেবার্জুনৌ শ্রুত্বা নিনাদং তস্য শুষ্মিণঃ
পুনঃ পুনঃ প্রণদতাং দিদৃক্ষন্তৌ বৃকোদরম্
103.29
ভীমসেনরবং শ্রুত্বা ফল্গুনস্য চ ধন্বিনঃ
অপ্রীয়ত মহারাজ ধর্মপুত্রো যুধিষ্ঠিরঃ
103.30
বিশোকশ্চাভবদ্রাজা শ্রুত্বা তং নিনদং মহৎ
ধনংজয়স্য চ রণে জয়মাশাস্তবান্বিভুঃ
103.31
তথা তু নর্দমানে বৈ ভীমসেনে রণোত্কটে
স্মিতং কৃত্বা মহাবাহুর্ধর্মপুত্রো যুধিষ্ঠিরঃ
103.32
হৃদ্গতং মনসা প্রাহ ধ্যাত্বা ধর্মভৃতাং বরঃ
দত্তা ভীম ত্বয়া সংবিত্কৃতং গুরুবচস্তথা
103.33
ন হি তেষাং জয়ো যুদ্ধে যেষাং দ্বেষ্টাসি পাণ্ডব
দিষ্ট্যা জীবতি সংগ্রামে সব্যসাচী ধনংজয়ঃ
103.34
দিষ্ট্যা চ কুশলী বীরঃ সাত্যকিঃ সত্যবিক্রমঃ
দিষ্ট্যা শৃণোমি গর্জন্তৌ বাসুদেবধনংজয়ৌ
103.35
যেন শক্রং রণে জিত্বা তর্পিতো হব্যবাহনঃ
স হন্তা দ্বিষতাং সংখ্যে দিষ্ট্যা জীবতি ফল্গুনঃ
103.36
যস্য বাহুবলং সর্বে বয়মাশ্রিত্য জীবিতাঃ
স হন্তা রিপুসৈন্যানাং দিষ্ট্যা জীবতি ফল্গুনঃ
103.37
নিবাতকবচা যেন দেবৈরপি সুদুর্জয়াঃ
নির্জিতা রথিনৈকেন দিষ্ট্যা পার্থঃ স জীবতি
103.38
কৌরবান্সহিতান্সর্বান্গোগ্রহার্থে সমাগতান্
যোঽজয়ন্মত্স্যনগরে দিষ্ট্যা পার্থঃ স জীবতি
103.39
কালকেয়সহস্রাণি চতুর্দশ মহারণে
যোঽবধীদ্ভুজবীর্যেণ দিষ্ট্যা পার্থঃ স জীবতি
103.40
গন্ধর্বরাজং বলিনং দুর্যোধনকৃতেন বৈ
জিতবান্যোঽস্ত্রবীর্যেণ দিষ্ট্যা পার্থঃ স জীবতি
103.41
কিরীটমালী বলবাঞ্শ্বেতাশ্বঃ কৃষ্ণসারথিঃ
মম প্রিয়শ্চ সততং দিষ্ট্যা জীবতি ফল্গুনঃ
103.42
পুত্রশোকাভিসংতপ্তশ্চিকীর্ষুঃ কর্ম দুষ্করম্
জয়দ্রথবধান্বেষী প্রতিজ্ঞাং কৃতবান্হি যঃ
কচ্চিত্স সৈন্ধবং সংখ্যে হনিষ্যতি ধনংজয়ঃ
103.43
কচ্চিত্তীর্ণপ্রতিজ্ঞং হি বাসুদেবেন রক্ষিতম্
অনস্তমিত আদিত্যে সমেষ্যাম্যহমর্জুনম্
103.44
কচ্চিত্সৈন্ধবকো রাজা দুর্যোধনহিতে রতঃ
নন্দয়িষ্যত্যমিত্রাণি ফল্গুনেন নিপাতিতঃ
103.45
কচ্চিদ্দুর্যোধনো রাজা ফল্গুনেন নিপাতিতম্
দৃষ্ট্বা সৈন্ধবকং সংখ্যে শমমস্মাসু ধাস্যতি
103.46
দৃষ্ট্বা বিনিহতান্ভ্রাতৄন্ভীমসেনেন সংয়ুগে
কচ্চিদ্দুর্যোধনো মন্দঃ শমমস্মাসু ধাস্যতি
103.47
দৃষ্ট্বা চান্যান্বহূন্যোধান্পাতিতান্ধরণীতলে
কচ্চিদ্দুর্যোধনো মন্দঃ পশ্চাত্তাপং করিষ্যতি
103.48
কচ্চিদ্ভীষ্মেণ নো বৈরমেকেনৈব প্রশাম্যতি
শেষস্য রক্ষণার্থং চ সংধাস্যতি সুয়োধনঃ
103.49
এবং বহুবিধং তস্য চিন্তয়ানস্য পার্থিব
কৃপয়াভিপরীতস্য ঘোরং যুদ্ধমবর্তত