Utshovঅধ্যায় 102
102.1
সংজয় উবাচ
ব্যূহেষ্বালোড্যমানেষু পাণ্ডবানাং ততস্ততঃ
সুদূরমন্বয়ুঃ পার্থাঃ পাঞ্চালাঃ সহ সোমকৈঃ
102.2
বর্তমানে তথা রৌদ্রে সংগ্রামে লোমহর্ষণে
প্রক্ষয়ে জগতস্তীব্রে যুগান্ত ইব ভারত
102.3
দ্রোণে যুধি পরাক্রান্তে নর্দমানে মুহুর্মুহুঃ
পাঞ্চালেষু চ ক্ষীণেষু বধ্যমানেষু পাণ্ডুষু
102.4
নাপশ্যচ্ছরণং কিংচিদ্ধর্মরাজো যুধিষ্ঠিরঃ
চিন্তয়ামাস রাজেন্দ্র কথমেতদ্ভবিষ্যতি
102.5
তত্রাবেক্ষ্য দিশঃ সর্বাঃ সব্যসাচিদিদৃক্ষয়া
যুধিষ্ঠিরো দদর্শাথ নৈব পার্থং ন মাধবম্
102.6
সোঽপশ্যন্নরশার্দূলং বানরর্ষভলক্ষণম্
গাণ্ডীবস্য চ নির্ঘোষমশৃণ্বন্ব্যথিতেন্দ্রিয়ঃ
102.7
অপশ্যন্সাত্যকিং চাপি বৃষ্ণীনাং প্রবরং রথম্
চিন্তয়াভিপরীতাঙ্গো ধর্মরাজো যুধিষ্ঠিরঃ
নাধ্যগচ্ছত্তদা শান্তিং তাবপশ্যন্নরর্ষভৌ
102.8
লোকোপক্রোশভীরুত্বাদ্ধর্মরাজো মহায়শাঃ
অচিন্তয়ন্মহাবাহুঃ শৈনেয়স্য রথং প্রতি
102.9
পদবীং প্রেষিতশ্চৈব ফল্গুনস্য ময়া রণে
শৈনেয়ঃ সাত্যকিঃ সত্যো মিত্রাণামভয়ংকরঃ
102.10
তদিদং হ্যেকমেবাসীদ্দ্বিধা জাতং মমাদ্য বৈ
সাত্যকিশ্চ হি মে জ্ঞেয়ঃ পাণ্ডবশ্চ ধনংজয়ঃ
102.11
সাত্যকিং প্রেষয়িত্বা তু পাণ্ডবস্য পদানুগম্
সাত্বতস্যাপি কং যুদ্ধে প্রেষয়িষ্যে পদানুগম্
102.12
করিষ্যামি প্রয়ত্নেন ভ্রাতুরন্বেষণং যদি
যুয়ুধানমনন্বিষ্য লোকো মাং গর্হয়িষ্যতি
102.13
ভ্রাতুরন্বেষণং কৃত্বা ধর্মরাজো যুধিষ্ঠিরঃ
পরিত্যজতি বার্ষ্ণেয়ং সাত্যকিং সত্যবিক্রমম্
102.14
লোকাপবাদভীরুত্বাত্সোঽহং পার্থং বৃকোদরম্
পদবীং প্রেষয়িষ্যামি মাধবস্য মহাত্মনঃ
102.15
যথৈব চ মম প্রীতিরর্জুনে শত্রুসূদনে
তথৈব বৃষ্ণিবীরেঽপি সাত্বতে যুদ্ধদুর্মদে
102.16
অতিভারে নিয়ুক্তশ্চ ময়া শৈনেয়নন্দনঃ
স তু মিত্রোপরোধেন গৌরবাচ্চ মহাবলঃ
প্রবিষ্টো ভারতীং সেনাং মকরঃ সাগরং যথা
102.17
অসৌ হি শ্রূয়তে শব্দঃ শূরাণামনিবর্তিনাম্
মিথঃ সংয়ুধ্যমানানাং বৃষ্ণিবীরেণ ধীমতা
102.18
প্রাপ্তকালং সুবলবন্নিশ্চিত্য বহুধা হি মে
তত্রৈব পাণ্ডবেয়স্য ভীমসেনস্য ধন্বিনঃ
গমনং রোচতে মহ্যং যত্র যাতৌ মহারথৌ
102.19
ন চাপ্যসহ্যং ভীমস্য বিদ্যতে ভুবি কিংচন
শক্তো হ্যেষ রণে যত্তান্পৃথিব্যাং সর্বধন্বিনঃ
স্ববাহুবলমাস্থায় প্রতিব্যূহিতুমঞ্জসা
102.20
যস্য বাহুবলং সর্বে সমাশ্রিত্য মহাত্মনঃ
বনবাসান্নিবৃত্তাঃ স্ম ন চ যুদ্ধেষু নির্জিতাঃ
102.21
ইতো গতে ভীমসেনে সাত্বতং প্রতি পাণ্ডবে
সনাথৌ ভবিতারৌ হি যুধি সাত্বতফল্গুনৌ
102.22
কামং ত্বশোচনীয়ৌ তৌ রণে সাত্বতফল্গুনৌ
রক্ষিতৌ বাসুদেবেন স্বয়ং চাস্ত্রবিশারদৌ
102.23
অবশ্যং তু ময়া কার্যমাত্মনঃ শোকনাশনম্
তস্মাদ্ভীমং নিয়োক্ষ্যামি সাত্বতস্য পদানুগম্
ততঃ প্রতিকৃতং মন্যে বিধানং সাত্যকিং প্রতি
102.24
এবং নিশ্চিত্য মনসা ধর্মপুত্রো যুধিষ্ঠিরঃ
যন্তারমব্রবীদ্রাজন্ভীমং প্রতি নয়স্ব মাম্
102.25
ধর্মরাজবচঃ শ্রুত্বা সারথির্হয়কোবিদঃ
রথং হেমপরিষ্কারং ভীমান্তিকমুপানয়ৎ
102.26
ভীমসেনমনুপ্রাপ্য প্রাপ্তকালমনুস্মরন্
কশ্মলং প্রাবিশদ্রাজা বহু তত্র সমাদিশন্
102.27
যঃ সদেবান্সগন্ধর্বান্দৈত্যাংশ্চৈকরথোঽজয়ৎ
তস্য লক্ষ্ম ন পশ্যামি ভীমসেনানুজস্য তে
102.28
ততোঽব্রবীদ্ধর্মরাজং ভীমসেনস্তথাগতম্
নৈবাদ্রাক্ষং ন চাশ্রৌষং তব কশ্মলমীদৃশম্
102.29
পুরা হি দুঃখদীর্ণানাং ভবান্গতিরভূদ্ধি নঃ
উত্তিষ্ঠোত্তিষ্ঠ রাজেন্দ্র শাধি কিং করবাণি তে
102.30
ন হ্যসাধ্যমকার্যং বা বিদ্যতে মম মানদ
আজ্ঞাপয় কুরুশ্রেষ্ঠ মা চ শোকে মনঃ কৃথাঃ
102.31
তমব্রবীদশ্রুপূর্ণঃ কৃষ্ণসর্প ইব শ্বসন্
ভীমসেনমিদং বাক্যং প্রম্লানবদনো নৃপঃ
102.32
যথা শঙ্খস্য নির্ঘোষঃ পাঞ্চজন্যস্য শ্রূয়তে
প্রেরিতো বাসুদেবেন সংরব্ধেন যশস্বিনা
নূনমদ্য হতঃ শেতে তব ভ্রাতা ধনংজয়ঃ
102.33
তস্মিন্বিনিহতে নূনং যুধ্যতেঽসৌ জনার্দনঃ
যস্য সত্ত্ববতো বীর্যমুপজীবন্তি পাণ্ডবাঃ
102.34
যং ভয়েষ্বভিগচ্ছন্তি সহস্রাক্ষমিবামরাঃ
স শূরঃ সৈন্ধবপ্রেপ্সুরন্বয়াদ্ভারতীং চমূম্
102.35
তস্য বৈ গমনং বিদ্মো ভীম নাবর্তনং পুনঃ
শ্যামো যুবা গুডাকেশো দর্শনীয়ো মহাভুজঃ
102.36
ব্যূঢোরস্কো মহাস্কন্ধো মত্তদ্বিরদবিক্রমঃ
চকোরনেত্রস্তাম্রাক্ষো দ্বিষতামঘবর্ধনঃ
102.37
তদিদং মম ভদ্রং তে শোকস্থানমরিংদম
অর্জুনার্থং মহাবাহো সাত্বতস্য চ কারণাৎ
102.38
বর্ধতে হবিষেবাগ্নিরিধ্যমানঃ পুনঃ পুনঃ
তস্য লক্ষ্ম ন পশ্যামি তেন বিন্দামি কশ্মলম্
102.39
তং বিদ্ধি পুরুষব্যাঘ্রং সাত্বতং চ মহারথম্
স তং মহারথং পশ্চাদনুয়াতস্তবানুজম্
তমপশ্যন্মহাবাহুমহং বিন্দামি কশ্মলম্
102.40
তস্মাত্কৃষ্ণো রণে নূনং যুধ্যতে যুদ্ধকোবিদঃ
যস্য বীর্যবতো বীর্যমুপজীবন্তি পাণ্ডবাঃ
102.41
স তত্র গচ্ছ কৌন্তেয় যত্র যাতো ধনংজয়ঃ
সাত্যকিশ্চ মহাবীর্যঃ কর্তব্যং যদি মন্যসে
বচনং মম ধর্মজ্ঞ জ্যেষ্ঠো ভ্রাতা ভবামি তে
102.42
ন তেঽর্জুনস্তথা জ্ঞেয়ো জ্ঞাতব্যঃ সাত্যকির্যথা
চিকীর্ষুর্মত্প্রিয়ং পার্থ প্রয়াতঃ সব্যসাচিনঃ
পদবীং দুর্গমাং ঘোরামগম্যামকৃতাত্মভিঃ
102.43
ভীমসেন উবাচ
ব্রহ্মেশানেন্দ্রবরুণানবহদ্যঃ পুরা রথঃ
তমাস্থায় গতৌ কৃষ্ণৌ ন তয়োর্বিদ্যতে ভয়ম্
102.44
আজ্ঞাং তু শিরসা বিভ্রদেষ গচ্ছামি মা শুচঃ
সমেত্য তান্নরব্যাঘ্রাংস্তব দাস্যামি সংবিদম্
102.45
সংজয় উবাচ
এতাবদুক্ত্বা প্রয়য়ৌ পরিদায় যুধিষ্ঠিরম্
ধৃষ্টদ্যুম্নায় বলবান্সুহৃদ্ভ্যশ্চ পুনঃ পুনঃ
ধৃষ্টদ্যুম্নং চেদমাহ ভীমসেনো মহাবলঃ
102.46
বিদিতং তে মহাবাহো যথা দ্রোণো মহারথঃ
গ্রহণে ধর্মরাজস্য সর্বোপায়েন বর্ততে
102.47
ন চ মে গমনে কৃত্যং তাদৃক্পার্ষত বিদ্যতে
যাদৃশং রক্ষণে রাজ্ঞঃ কার্যমাত্যয়িকং হি নঃ
102.48
এবমুক্তোঽস্মি পার্থেন প্রতিবক্তুং স্ম নোত্সহে
প্রয়াস্যে তত্র যত্রাসৌ মুমূর্ষুঃ সৈন্ধবঃ স্থিতঃ
ধর্মরাজস্য বচনে স্থাতব্যমবিশঙ্কয়া
102.49
সোঽদ্য যত্তো রণে পার্থং পরিরক্ষ যুধিষ্ঠিরম্
এতদ্ধি সর্বকার্যাণাং পরমং কৃত্যমাহবে
102.50
তমব্রবীন্মহারাজ ধৃষ্টদ্যুম্নো বৃকোদরম্
ঈপ্সিতেন মহাবাহো গচ্ছ পার্থাবিচারয়ন্
102.51
নাহত্বা সমরে দ্রোণো ধৃষ্টদ্যুম্নং কথংচন
নিগ্রহং ধর্মরাজস্য প্রকরিষ্যতি সংয়ুগে
102.52
ততো নিক্ষিপ্য রাজানং ধৃষ্টদ্যুম্নায় পাণ্ডবঃ
অভিবাদ্য গুরুং জ্যেষ্ঠং প্রয়য়ৌ যত্র ফল্গুনঃ
102.53
পরিষ্বক্তস্তু কৌন্তেয়ো ধর্মরাজেন ভারত
আঘ্রাতশ্চ তথা মূর্ধ্নি শ্রাবিতশ্চাশিষঃ শুভাঃ
102.54
ভীমসেনো মহাবাহুঃ কবচী শুভকুণ্ডলী
সাঙ্গদঃ সতনুত্রাণঃ সশরী রথিনাং বরঃ
102.55
তস্য কার্ষ্ণায়সং বর্ম হেমচিত্রং মহর্দ্ধিমৎ
বিবভৌ পর্বতশ্লিষ্টঃ সবিদ্যুদিব তোয়দঃ
102.56
পীতরক্তাসিতসিতৈর্বাসোভিশ্চ সুবেষ্টিতঃ
কণ্ঠত্রাণেন চ বভৌ সেন্দ্রায়ুধ ইবাম্বুদঃ
102.57
প্রয়াতে ভীমসেনে তু তব সৈন্যং যুয়ুত্সয়া
পাঞ্চজন্যরবো ঘোরঃ পুনরাসীদ্বিশাং পতে
102.58
তং শ্রুত্বা নিনদং ঘোরং ত্রৈলোক্যত্রাসনং মহৎ
পুনর্ভীমং মহাবাহুর্ধর্মপুত্রোঽভ্যভাষত
102.59
এষ বৃষ্ণিপ্রবীরেণ ধ্মাতঃ সলিলজো ভৃশম্
পৃথিবীং চান্তরিক্ষং চ বিনাদয়তি শঙ্খরাট্
102.60
নূনং ব্যসনমাপন্নে সুমহত্সব্যসাচিনি
কুরুভির্যুধ্যতে সার্ধং সর্বৈশ্চক্রগদাধরঃ
102.61
নূনমার্যা মহত্কুন্তী পাপমদ্য নিদর্শনম্
দ্রৌপদী চ সুভদ্রা চ পশ্যন্তি সহ বন্ধুভিঃ
102.62
স ভীমস্ত্বরয়া যুক্তো যাহি যত্র ধনংজয়ঃ
মুহ্যন্তীব হি মে সর্বা ধনংজয়দিদৃক্ষয়া
দিশঃ সপ্রদিশঃ পার্থ সাত্বতস্য চ কারণাৎ
102.63
গচ্ছ গচ্ছেতি চ পুনর্ভীমসেনমভাষত
ভৃশং স প্রহিতো ভ্রাত্রা ভ্রাতা ভ্রাতুঃ প্রিয়ংকরঃ
আহত্য দুন্দুভিং ভীমঃ শঙ্খং প্রধ্মায় চাসকৃৎ
102.64
বিনদ্য সিংহনাদং চ জ্যাং বিকর্ষন্পুনঃ পুনঃ
দর্শয়ন্ঘোরমাত্মানমমিত্রান্সহসাভ্যয়াৎ
102.65
তমূহুর্জবনা দান্তা বিকুর্বাণা হয়োত্তমাঃ
বিশোকেনাভিসংয়ত্তা মনোমারুতরংহসঃ
102.66
আরুজন্বিরুজন্পার্থো জ্যাং বিকর্ষংশ্চ পাণিনা
সোঽবকর্ষন্বিকর্ষংশ্চ সেনাগ্রং সমলোডয়ৎ
102.67
তং প্রয়ান্তং মহাবাহুং পাঞ্চালাঃ সহসোমকাঃ
পৃষ্ঠতোঽনুয়য়ুঃ শূরা মঘবন্তমিবামরাঃ
102.68
তং সসেনা মহারাজ সোদর্যাঃ পর্যবারয়ন্
দুঃশলশ্চিত্রসেনশ্চ কুণ্ডভেদী বিবিংশতিঃ
102.69
দুর্মুখো দুঃসহশ্চৈব বিকর্ণশ্চ শলস্তথা
বিন্দানুবিন্দৌ সুমুখো দীর্ঘবাহুঃ সুদর্শনঃ
102.70
বৃন্দারকঃ সুহস্তশ্চ সুষেণো দীর্ঘলোচনঃ
অভয়ো রৌদ্রকর্মা চ সুবর্মা দুর্বিমোচনঃ
102.71
বিবিধৈ রথিনাং শ্রেষ্ঠাঃ সহ সৈন্যৈঃ সহানুগৈঃ
সংয়ত্তাঃ সমরে শূরা ভীমসেনমুপাদ্রবন্
102.72
তান্সমীক্ষ্য তু কৌন্তেয়ো ভীমসেনঃ পরাক্রমী
অভ্যবর্তত বেগেন সিংহঃ ক্ষুদ্রমৃগানিব
102.73
তে মহাস্ত্রাণি দিব্যানি তত্র বীরা অদর্শয়ন্
বারয়ন্তঃ শরৈর্ভীমং মেঘাঃ সূর্যমিবোদিতম্
102.74
স তানতীত্য বেগেন দ্রোণানীকমুপাদ্রবৎ
অগ্রতশ্চ গজানীকং শরবর্ষৈরবাকিরৎ
102.75
সোঽচিরেণৈব কালেন তদ্গজানীকমাশুগৈঃ
দিশঃ সর্বাঃ সমভ্যস্য ব্যধমত্পবনাত্মজঃ
102.76
ত্রাসিতাঃ শরভস্যেব গর্জিতেন বনে মৃগাঃ
প্রাদ্রবন্দ্বিরদাঃ সর্বে নদন্তো ভৈরবান্রবান্
102.77
পুনশ্চাতীত্য বেগেন দ্রোণানীকমুপাদ্রবৎ
তমবারয়দাচার্যো বেলেবোদ্বৃত্তমর্ণবম্
102.78
ললাটেঽতাডয়চ্চৈনং নারাচেন স্ময়ন্নিব
ঊর্ধ্বরশ্মিরিবাদিত্যো বিবভৌ তত্র পাণ্ডবঃ
102.79
স মন্যমানস্ত্বাচার্যো মমায়ং ফল্গুনো যথা
ভীমঃ করিষ্যতে পূজামিত্যুবাচ বৃকোদরম্
102.80
ভীমসেন ন তে শক্যং প্রবেষ্টুমরিবাহিনীম্
মামনির্জিত্য সমরে শত্রুমধ্যে মহাবল
102.81
যদি তে সোঽনুজঃ কৃষ্ণঃ প্রবিষ্টোঽনুমতে মম
অনীকং ন তু শক্যং ভোঃ প্রবেষ্টুমিহ বৈ ত্বয়া
102.82
অথ ভীমস্তু তচ্ছ্রুত্বা গুরোর্বাক্যমপেতভীঃ
ক্রুদ্ধঃ প্রোবাচ বৈ দ্রোণং রক্ততাম্রেক্ষণঃ শ্বসন্
102.83
তবার্জুনো নানুমতে ব্রহ্মবন্ধো রণাজিরম্
প্রবিষ্টঃ স হি দুর্ধর্ষঃ শক্রস্যাপি বিশেদ্বলম্
102.84
যেন বৈ পরমাং পূজাং কুর্বতা মানিতো হ্যসি
নার্জুনোঽহং ঘৃণী দ্রোণ ভীমসেনোঽস্মি তে রিপুঃ
102.85
পিতা নস্ত্বং গুরুর্বন্ধুস্তথা পুত্রা হি তে বয়ম্
ইতি মন্যামহে সর্বে ভবন্তং প্রণতাঃ স্থিতাঃ
102.86
অদ্য তদ্বিপরীতং তে বদতোঽস্মাসু দৃশ্যতে
যদি শত্রুং ত্বমাত্মানং মন্যসে তত্তথাস্ত্বিহ
এষ তে সদৃশং শত্রোঃ কর্ম ভীমঃ করোম্যহম্
102.87
অথোদ্ভ্রাম্য গদাং ভীমঃ কালদণ্ডমিবান্তকঃ
দ্রোণায়াবসৃজদ্রাজন্স রথাদবপুপ্লুবে
102.88
সাশ্বসূতধ্বজং যানং দ্রোণস্যাপোথয়ত্তদা
প্রামৃদ্নাচ্চ বহূন্যোধান্বায়ুর্বৃক্ষানিবৌজসা
102.89
তং পুনঃ পরিবব্রুস্তে তব পুত্রা রথোত্তমম্
অন্যং চ রথমাস্থায় দ্রোণঃ প্রহরতাং বরঃ
102.90
ততঃ ক্রুদ্ধো মহারাজ ভীমসেনঃ পরাক্রমী
অগ্রতঃ স্যন্দনানীকং শরবর্ষৈরবাকিরৎ
102.91
তে বধ্যমানাঃ সমরে তব পুত্রা মহারথাঃ
ভীমং ভীমবলং যুদ্ধেঽয়োধয়ংস্তু জয়ৈষিণঃ
102.92
ততো দুঃশাসনঃ ক্রুদ্ধো রথশক্তিং সমাক্ষিপৎ
সর্বপারশবীং তীক্ষ্ণাং জিঘাংসুঃ পাণ্ডুনন্দনম্
102.93
আপতন্তীং মহাশক্তিং তব পুত্রপ্রচোদিতাম্
দ্বিধা চিচ্ছেদ তাং ভীমস্তদদ্ভুতমিবাভবৎ
102.94
অথান্যৈর্নিশিতৈর্বাণৈঃ সংক্রুদ্ধঃ কুণ্ডভেদিনম্
সুষেণং দীর্ঘনেত্রং চ ত্রিভিস্ত্রীনবধীদ্বলী
102.95
ততো বৃন্দারকং বীরং কুরূণাং কীর্তিবর্ধনম্
পুত্রাণাং তব বীরাণাং যুধ্যতামবধীত্পুনঃ
102.96
অভয়ং রৌদ্রকর্মাণং দুর্বিমোচনমেব চ
ত্রিভিস্ত্রীনবধীদ্ভীমঃ পুনরেব সুতাংস্তব
102.97
বধ্যমানা মহারাজ পুত্রাস্তব বলীয়সা
ভীমং প্রহরতাং শ্রেষ্ঠং সমন্তাত্পর্যবারয়ন্
102.98
বিন্দানুবিন্দৌ সহিতৌ সুবর্মাণং চ তে সুতম্
প্রহসন্নিব কৌন্তেয়ঃ শরৈর্নিন্যে যমক্ষয়ম্
102.99
ততঃ সুদর্শনং বীরং পুত্রং তে ভরতর্ষভ
বিব্যাধ সমরে তূর্ণং স পপাত মমার চ
102.100
সোঽচিরেণৈব কালেন তদ্রথানীকমাশুগৈঃ
দিশঃ সর্বাঃ সমভ্যস্য ব্যধমত্পাণ্ডুনন্দনঃ
102.101
ততো বৈ রথঘোষেণ গর্জিতেন মৃগা ইব
বধ্যমানাশ্চ সমরে পুত্রাস্তব বিশাং পতে
প্রাদ্রবন্সরথাঃ সর্বে ভীমসেনভয়ার্দিতাঃ
102.102
অনুয়ায় তু কৌন্তেয়ঃ পুত্রাণাং তে মহদ্বলম্
বিব্যাধ সমরে রাজন্কৌরবেয়ান্সমন্ততঃ
102.103
বধ্যমানা মহারাজ ভীমসেনেন তাবকাঃ
ত্যক্ত্বা ভীমং রণে যান্তি চোদয়ন্তো হয়োত্তমান্
102.104
তাংস্তু নির্জিত্য সমরে ভীমসেনো মহাবলঃ
সিংহনাদরবং চক্রে বাহুশব্দং চ পাণ্ডবঃ
102.105
তলশব্দং চ সুমহত্কৃত্বা ভীমো মহাবলঃ
ব্যতীত্য রথিনশ্চাপি দ্রোণানীকমুপাদ্রবৎ