Utshovঅধ্যায় 101
101.1
সংজয় উবাচ
অপরাহ্ণে মহারাজ সংগ্রামঃ সমপদ্যত
পর্জন্যসমনির্ঘোষঃ পুনর্দ্রোণস্য সোমকৈঃ
101.2
শোণাশ্বং রথমাস্থায় নরবীরঃ সমাহিতঃ
সমরেঽভ্যদ্রবত্পাণ্ডূঞ্জবমাস্থায় মধ্যমম্
101.3
তব প্রিয়হিতে যুক্তো মহেষ্বাসো মহাবলঃ
চিত্রপুঙ্খৈঃ শিতৈর্বাণৈঃ কলশোত্তমসংভবঃ
101.4
বরান্বরান্হি যোধানাং বিচিন্বন্নিব ভারত
অক্রীডত রণে রাজন্ভারদ্বাজঃ প্রতাপবান্
101.5
তমভ্যয়াদ্বৃহত্ক্ষত্রঃ কেকয়ানাং মহারথঃ
ভ্রাতৄণাং বীরপঞ্চানাং জ্যেষ্ঠঃ সমরকর্কশঃ
101.6
বিমুঞ্চন্বিশিখাংস্তীক্ষ্ণানাচার্যং ছাদয়ন্ভৃশম্
মহামেঘো যথা বর্ষং বিমুঞ্চন্গন্ধমাদনে
101.7
তস্য দ্রোণো মহারাজ স্বর্ণপুঙ্খাঞ্শিলাশিতান্
প্রেষয়ামাস সংক্রুদ্ধঃ সায়কান্দশ সপ্ত চ
101.8
তাংস্তু দ্রোণধনুর্মুক্তান্ঘোরানাশীবিষোপমান্
একৈকং দশভির্বাণৈর্যুধি চিচ্ছেদ হৃষ্টবৎ
101.9
তস্য তল্লাঘবং দৃষ্ট্বা প্রহসন্দ্বিজসত্তমঃ
প্রেষয়ামাস বিশিখানষ্টৌ সংনতপর্বণঃ
101.10
তান্দৃষ্ট্বা পততঃ শীঘ্রং দ্রোণচাপচ্যুতাঞ্শরান্
অবারয়চ্ছরৈরেব তাবদ্ভির্নিশিতৈর্দৃঢৈঃ
101.11
ততোঽভবন্মহারাজ তব সৈন্যস্য বিস্ময়ঃ
বৃহত্ক্ষত্রেণ তত্কর্ম কৃতং দৃষ্ট্বা সুদুষ্করম্
101.12
ততো দ্রোণো মহারাজ কেকয়ং বৈ বিশেষয়ন্
প্রাদুশ্চক্রে রণে দিব্যং ব্রাহ্মমস্ত্রং মহাতপাঃ
101.13
তদস্য রাজন্কৈকেয়ঃ প্রত্যবারয়দচ্যুতঃ
ব্রাহ্মেণৈব মহাবাহুরাহবে সমুদীরিতম্
101.14
প্রতিহন্য তদস্ত্রং তু ভারদ্বাজস্য সংয়ুগে
বিব্যাধ ব্রাহ্মণং ষষ্ট্যা স্বর্ণপুঙ্খৈঃ শিলাশিতৈঃ
101.15
তং দ্রোণো দ্বিপদাং শ্রেষ্ঠো নারাচেন সমর্পয়ৎ
স তস্য কবচং ভিত্ত্বা প্রাবিশদ্ধরণীতলম্
101.16
কৃষ্ণসর্পো যথা মুক্তো বল্মীকং নৃপসত্তম
তথাভ্যগান্মহীং বাণো ভিত্ত্বা কৈকেয়মাহবে
101.17
সোঽতিবিদ্ধো মহারাজ দ্রোণেনাস্ত্রবিদা ভৃশম্
ক্রোধেন মহতাবিষ্টো ব্যাবৃত্য নয়নে শুভে
101.18
দ্রোণং বিব্যাধ সপ্তত্যা স্বর্ণপুঙ্খৈঃ শিলাশিতৈঃ
সারথিং চাস্য ভল্লেন বাহ্বোরুরসি চার্পয়ৎ
101.19
দ্রোণস্তু বহুধা বিদ্ধো বৃহত্ক্ষত্রেণ মারিষ
অসৃজদ্বিশিখাংস্তীক্ষ্ণান্কেকয়স্য রথং প্রতি
101.20
ব্যাকুলীকৃত্য তং দ্রোণো বৃহত্ক্ষত্রং মহারথম্
ব্যসৃজত্সায়কং তীক্ষ্ণং কেকয়ং প্রতি ভারত
101.21
স গাঢবিদ্ধস্তেনাশু মহারাজ স্তনান্তরে
রথাত্পুরুষশার্দূলঃ সংভিন্নহৃদয়োঽপতৎ
101.22
বৃহত্ক্ষত্রে হতে রাজন্কেকয়ানাং মহারথে
শৈশুপালিঃ সুসংক্রুদ্ধো যন্তারমিদমব্রবীৎ
101.23
সারথে যাহি যত্রৈষ দ্রোণস্তিষ্ঠতি দংশিতঃ
বিনিঘ্নন্কেকয়ান্সর্বান্পাঞ্চালানাং চ বাহিনীম্
101.24
তস্য তদ্বচনং শ্রুত্বা সারথী রথিনাং বরম্
দ্রোণায় প্রাপয়ামাস কাম্বোজৈর্জবনৈর্হয়ৈঃ
101.25
ধৃষ্টকেতুশ্চ চেদীনামৃষভোঽতিবলোদিতঃ
সহসা প্রাপতদ্দ্রোণং পতংগ ইব পাবকম্
101.26
সোঽভ্যবিধ্যত্ততো দ্রোণং ষষ্ট্যা সাশ্বরথধ্বজম্
পুনশ্চান্যৈঃ শরৈস্তীক্ষ্ণৈঃ সুপ্তং ব্যাঘ্রং তুদন্নিব
101.27
তস্য দ্রোণো ধনুর্মধ্যে ক্ষুরপ্রেণ শিতেন হ
চিচ্ছেদ রাজ্ঞো বলিনো যতমানস্য সংয়ুগে
101.28
অথান্যদ্ধনুরাদায় শৈশুপালির্মহারথঃ
বিব্যাধ সায়কৈর্দ্রোণং পুনঃ সুনিশিতৈর্দৃঢৈঃ
101.29
তস্য দ্রোণো হয়ান্হত্বা সারথিং চ মহাবলঃ
অথৈনং পঞ্চবিংশত্যা সায়কানাং সমার্পয়ৎ
101.30
বিরথো বিধনুষ্কশ্চ চেদিরাজোঽপি সংয়ুগে
গদাং চিক্ষেপ সংক্রুদ্ধো ভারদ্বাজরথং প্রতি
101.31
তামাপতন্তীং সহসা ঘোররূপাং ভয়াবহাম্
অশ্মসারময়ীং গুর্বীং তপনীয়বিভূষিতাম্
শরৈরনেকসাহস্রৈর্ভারদ্বাজো ন্যপাতয়ৎ
101.32
সা পপাত গদা ভূমৌ ভারদ্বাজেন সাদিতা
রক্তমাল্যাম্বরধরা তারেব নভসস্তলাৎ
101.33
গদাং বিনিহতাং দৃষ্ট্বা ধৃষ্টকেতুরমর্ষণঃ
তোমরং ব্যসৃজত্তূর্ণং শক্তিং চ কনকোজ্জ্বলাম্
101.34
তোমরং তু ত্রিভির্বাণৈর্দ্রোণশ্ছিত্ত্বা মহামৃধে
শক্তিং চিচ্ছেদ সহসা কৃতহস্তো মহাবলঃ
101.35
ততোঽস্য বিশিখং তীক্ষ্ণং বধার্থং বধকাঙ্ক্ষিণঃ
প্রেষয়ামাস সমরে ভারদ্বাজঃ প্রতাপবান্
101.36
স তস্য কবচং ভিত্ত্বা হৃদয়ং চামিতৌজসঃ
অভ্যগাদ্ধরণীং বাণো হংসঃ পদ্মসরো যথা
101.37
পতংগং হি গ্রসেচ্চাষো যথা রাজন্বুভুক্ষিতঃ
তথা দ্রোণোঽগ্রসচ্ছূরো ধৃষ্টকেতুং মহামৃধে
101.38
নিহতে চেদিরাজে তু তত্খণ্ডং পিত্র্যমাবিশৎ
অমর্ষবশমাপন্নঃ পুত্রোঽস্য পরমাস্ত্রবিৎ
101.39
তমপি প্রহসন্দ্রোণঃ শরৈর্নিন্যে যমক্ষয়ম্
মহাব্যাঘ্রো মহারণ্যে মৃগশাবং যথা বলী
101.40
তেষু প্রক্ষীয়মাণেষু পাণ্ডবেয়েষু ভারত
জরাসংধসুতো বীরঃ স্বয়ং দ্রোণমুপাদ্রবৎ
101.41
স তু দ্রোণং মহারাজ ছাদয়ন্সায়কৈঃ শিতৈঃ
অদৃশ্যমকরোত্তূর্ণং জলদো ভাস্করং যথা
101.42
তস্য তল্লাঘবং দৃষ্ট্বা দ্রোণঃ ক্ষত্রিয়মর্দনঃ
ব্যসৃজত্সায়কাংস্তূর্ণং শতশোঽথ সহস্রশঃ
101.43
ছাদয়িত্বা রণে দ্রোণো রথস্থং রথিনাং বরম্
জারাসংধিমথো জঘ্নে মিষতাং সর্বধন্বিনাম্
101.44
যো যঃ স্ম লীয়তে দ্রোণং তং তং দ্রোণোঽন্তকোপমঃ
আদত্ত সর্বভূতানি প্রাপ্তে কালে যথান্তকঃ
101.45
ততো দ্রোণো মহেষ্বাসো নাম বিশ্রাব্য সংয়ুগে
শরৈরনেকসাহস্রৈঃ পাণ্ডবেয়ান্ব্যমোহয়ৎ
101.46
ততো দ্রোণাঙ্কিতা বাণাঃ স্বর্ণপুঙ্খাঃ শিলাশিতাঃ
নরান্নাগান্হয়াংশ্চৈব নিজঘ্নুঃ সর্বতো রণে
101.47
তে বধ্যমানা দ্রোণেন শক্রেণেব মহাসুরাঃ
সমকম্পন্ত পাঞ্চালা গাবঃ শীতার্দিতা ইব
101.48
ততো নিষ্টানকো ঘোরঃ পাণ্ডবানামজায়ত
দ্রোণেন বধ্যমানেষু সৈন্যেষু ভরতর্ষভ
101.49
মোহিতাঃ শরবর্ষেণ ভারদ্বাজস্য সংয়ুগে
ঊরুগ্রাহগৃহীতা হি পাঞ্চালানাং মহারথাঃ
101.50
চেদয়শ্চ মহারাজ সৃঞ্জয়াঃ সোমকাস্তথা
অভ্যদ্রবন্ত সংহৃষ্টা ভারদ্বাজং যুয়ুত্সয়া
101.51
হত দ্রোণং হত দ্রোণমিতি তে দ্রোণমভ্যয়ুঃ
যতন্তঃ পুরুষব্যাঘ্রাঃ সর্বশক্ত্যা মহাদ্যুতিম্
নিনীষন্তো রণে দ্রোণং যমস্য সদনং প্রতি
101.52
যতমানাংস্তু তান্বীরান্ভারদ্বাজঃ শিলীমুখৈঃ
যমায় প্রেষয়ামাস চেদিমুখ্যান্বিশেষতঃ
101.53
তেষু প্রক্ষীয়মাণেষু চেদিমুখ্যেষু ভারত
পাঞ্চালাঃ সমকম্পন্ত দ্রোণসায়কপীডিতাঃ
101.54
প্রাক্রোশন্ভীমসেনং তে ধৃষ্টদ্যুম্নরথং প্রতি
দৃষ্ট্বা দ্রোণস্য কর্মাণি তথারূপাণি মারিষ
101.55
ব্রাহ্মণেন তপো নূনং চরিতং দুশ্চরং মহৎ
তথা হি যুধি বিক্রান্তো দহতি ক্ষত্রিয়র্ষভান্
101.56
ধর্মো যুদ্ধং ক্ষত্রিয়স্য ব্রাহ্মণস্য পরং তপঃ
তপস্বী কৃতবিদ্যশ্চ প্রেক্ষিতেনাপি নির্দহেৎ
101.57
দ্রোণাস্ত্রমগ্নিসংস্পর্শং প্রবিষ্টাঃ ক্ষত্রিয়র্ষভাঃ
বহবো দুস্তরং ঘোরং যত্রাদহ্যন্ত ভারত
101.58
যথাবলং যথোত্সাহং যথাসত্ত্বং মহাদ্যুতিঃ
মোহয়ন্সর্বভূতানি দ্রোণো হন্তি বলানি নঃ
101.59
তেষাং তদ্বচনং শ্রুত্বা ক্ষত্রধর্মা ব্যবস্থিতঃ
অর্ধচন্দ্রেণ চিচ্ছেদ দ্রোণস্য সশরং ধনুঃ
101.60
স সংরব্ধতরো ভূত্বা দ্রোণঃ ক্ষত্রিয়মর্দনঃ
অন্যত্কার্মুকমাদায় ভাস্বরং বেগবত্তরম্
101.61
তত্রাধায় শরং তীক্ষ্ণং ভারঘ্নং বিমলং দৃঢম্
আকর্ণপূর্ণমাচার্যো বলবানভ্যবাসৃজৎ
101.62
স হত্বা ক্ষত্রধর্মাণং জগাম ধরণীতলম্
স ভিন্নহৃদয়ো বাহাদপতন্মেদিনীতলে
101.63
ততঃ সৈন্যান্যকম্পন্ত ধৃষ্টদ্যুম্নসুতে হতে
অথ দ্রোণং সমারোহচ্চেকিতানো মহারথঃ
101.64
স দ্রোণং দশভির্বাণৈঃ প্রত্যবিধ্যত্স্তনান্তরে
চতুর্ভিঃ সারথিং চাস্য চতুর্ভিশ্চতুরো হয়ান্
101.65
তস্যাচার্যঃ ষোডশভিরবিধ্যদ্দক্ষিণং ভুজম্
ধ্বজং ষোডশভির্বাণৈর্যন্তারং চাস্য সপ্তভিঃ
101.66
তস্য সূতে হতে তেঽশ্বা রথমাদায় বিদ্রুতাঃ
সমরে শরসংবীতা ভারদ্বাজেন মারিষ
101.67
চেকিতানরথং দৃষ্ট্বা বিদ্রুতং হতসারথিম্
পাঞ্চালান্পাণ্ডবাংশ্চৈব মহদ্ভয়মথাবিশৎ
101.68
তান্সমেতান্রণে শূরাংশ্চেদিপাঞ্চালসৃঞ্জয়ান্
সমন্তাদ্দ্রাবয়ন্দ্রোণো বহ্বশোভত মারিষ
101.69
আকর্ণপলিতঃ শ্যামো বয়সাশীতিকাত্পরঃ
রণে পর্যচরদ্দ্রোণো বৃদ্ধঃ ষোডশবর্ষবৎ
101.70
অথ দ্রোণং মহারাজ বিচরন্তমভীতবৎ
বজ্রহস্তমমন্যন্ত শত্রবঃ শত্রুসূদনম্
101.71
ততোঽব্রবীন্মহারাজ দ্রুপদো বুদ্ধিমান্নৃপ
লুব্ধোঽয়ং ক্ষত্রিয়ান্হন্তি ব্যাঘ্রঃ ক্ষুদ্রমৃগানিব
101.72
কৃচ্ছ্রান্দুর্যোধনো লোকান্পাপঃ প্রাপ্স্যতি দুর্মতিঃ
যস্য লোভাদ্বিনিহতাঃ সমরে ক্ষত্রিয়র্ষভাঃ
101.73
শতশঃ শেরতে ভূমৌ নিকৃত্তা গোবৃষা ইব
রুধিরেণ পরীতাঙ্গাঃ শ্বসৃগালাদনীকৃতাঃ
101.74
এবমুক্ত্বা মহারাজ দ্রুপদোঽক্ষৌহিণীপতিঃ
পুরস্কৃত্য রণে পার্থান্দ্রোণমভ্যদ্রবদ্দ্রুতম্