Utshovঅধ্যায় 100
100.1
ধৃতরাষ্ট্র উবাচ
কিং তস্যাং মম সেনায়াং নাসন্কেচিন্মহারথাঃ
যে তথা সাত্যকিং যান্তং নৈবাঘ্নন্নাপ্যবারয়ন্
100.2
একো হি সমরে কর্ম কৃতবান্সত্যবিক্রমঃ
শক্রতুল্যবলো যুদ্ধে মহেন্দ্রো দানবেষ্বিব
100.3
অথ বা শূন্যমাসীত্তদ্যেন যাতঃ স সাত্যকিঃ
একো বৈ বহুলাঃ সেনাঃ প্রমৃদ্নন্পুরুষর্ষভঃ
100.4
কথং চ যুধ্যমানানামপক্রান্তো মহাত্মনাম্
একো বহূনাং শৈনেয়স্তন্মমাচক্ষ্ব সংজয়
100.5
সংজয় উবাচ
রাজন্সেনাসমুদ্যোগো রথনাগাশ্বপত্তিমান্
তুমুলস্তব সৈন্যানাং যুগান্তসদৃশোঽভবৎ
100.6
আহ্ণিকেষু সমূহেষু তব সৈন্যস্য মানদ
নাস্তি লোকে সমঃ কশ্চিত্সমূহ ইতি মে মতিঃ
100.7
তত্র দেবাঃ স্ম ভাষন্তে চারণাশ্চ সমাগতাঃ
এতদন্তাঃ সমূহা বৈ ভবিষ্যন্তি মহীতলে
100.8
ন চৈব তাদৃশঃ কশ্চিদ্ব্যূহ আসীদ্বিশাং পতে
যাদৃগ্জয়দ্রথবধে দ্রোণেন বিহিতোঽভবৎ
100.9
চণ্ডবাতাভিপন্নানাং সমুদ্রাণামিব স্বনঃ
রণেঽভবদ্বলৌঘানামন্যোন্যমভিধাবতাম্
100.10
পার্থিবানাং সমেতানাং বহূন্যাসন্নরোত্তম
ত্বদ্বলে পাণ্ডবানাং চ সহস্রাণি শতানি চ
100.11
সংরব্ধানাং প্রবীরাণাং সমরে দৃঢকর্মণাম্
তত্রাসীত্সুমহাঞ্শব্দস্তুমুলো লোমহর্ষণঃ
100.12
অথাক্রন্দদ্ভীমসেনো ধৃষ্টদ্যুম্নশ্চ মারিষ
নকুলঃ সহদেবশ্চ ধর্মরাজশ্চ পাণ্ডবঃ
100.13
আগচ্ছত প্রহরত বলবত্পরিধাবত
প্রবিষ্টাবরিসেনাং হি বীরৌ মাধবপাণ্ডবৌ
100.14
যথা সুখেন গচ্ছেতাং জয়দ্রথবধং প্রতি
তথা প্রকুরুত ক্ষিপ্রমিতি সৈন্যান্যচোদয়ৎ
তয়োরভাবে কুরবঃ কৃতার্থাঃ স্যুর্বয়ং জিতাঃ
100.15
তে যূয়ং সহিতা ভূত্বা তূর্ণমেব বলার্ণবম্
ক্ষোভয়ধ্বং মহাবেগাঃ পবনাঃ সাগরং যথা
100.16
ভীমসেনেন তে রাজন্পাঞ্চাল্যেন চ চোদিতাঃ
আজঘ্নুঃ কৌরবান্সংখ্যে ত্যক্ত্বাসূনাত্মনঃ প্রিয়ান্
100.17
ইচ্ছন্তো নিধনং যুদ্ধে শস্ত্রৈরুত্তমতেজসঃ
স্বর্গার্থং মিত্রকার্যার্থং নাভ্যরক্ষন্ত জীবিতম্
100.18
তথৈব তাবকা রাজন্প্রার্থয়ন্তো মহদ্যশঃ
আর্যাং যুদ্ধে মতিং কৃত্বা যুদ্ধায়ৈবোপতস্থিরে
100.19
তস্মিংস্তু তুমুলে যুদ্ধে বর্তমানে মহাভয়ে
হত্বা সর্বাণি সৈন্যানি প্রায়াত্সাত্যকিরর্জুনম্
100.20
কবচানাং প্রভাস্তত্র সূর্যরশ্মিবিচিত্রিতাঃ
দৃষ্টীঃ সংখ্যে সৈনিকানাং প্রতিজঘ্নুঃ সমন্ততঃ
100.21
তথা প্রয়তমানেষু পাণ্ডবেয়েষু নির্ভয়ঃ
দুর্যোধনো মহারাজ ব্যগাহত মহদ্বলম্
100.22
স সংনিপাতস্তুমুলস্তেষাং তস্য চ ভারত
অভবত্সর্বসৈন্যানামভাবকরণো মহান্
100.23
ধৃতরাষ্ট্র উবাচ
তথা গতেষু সৈন্যেষু তথা কৃচ্ছ্রগতঃ স্বয়ম্
কচ্চিদ্দুর্যোধনঃ সূত নাকার্ষীত্পৃষ্ঠতো রণম্
100.24
একস্য চ বহূনাং চ সংনিপাতো মহাহবে
বিশেষতো নৃপতিনা বিষমঃ প্রতিভাতি মে
100.25
সোঽত্যন্তসুখসংবৃদ্ধো লক্ষ্ম্যা লোকস্য চেশ্বরঃ
একো বহূন্সমাসাদ্য কচ্চিন্নাসীত্পরাঙ্মুখঃ
100.26
সংজয় উবাচ
রাজন্সংগ্রামমাশ্চর্যং তব পুত্রস্য ভারত
একস্য চ বহূনাং চ শৃণুষ্ব গদতোঽদ্ভুতম্
100.27
দুর্যোধনেন সহসা পাণ্ডবী পৃতনা রণে
নলিনী দ্বিরদেনেব সমন্তাদ্বিপ্রলোডিতা
100.28
তথা সেনাং কৃতাং দৃষ্ট্বা তব পুত্রেণ কৌরব
ভীমসেনপুরোগাস্তং পাঞ্চালাঃ সমুপাদ্রবন্
100.29
স ভীমসেনং দশভির্মাদ্রীপুত্রৌ ত্রিভিস্ত্রিভিঃ
বিরাটদ্রুপদৌ ষড্ভিঃ শতেন চ শিখণ্ডিনম্
100.30
ধৃষ্টদ্যুম্নং চ বিংশত্যা ধর্মপুত্রং চ সপ্তভিঃ
কেকয়ান্দশভির্বিদ্ধ্বা দ্রৌপদেয়াংস্ত্রিভিস্ত্রিভিঃ
100.31
শতশশ্চাপরান্যোধান্সদ্বিপাংশ্চ রথান্রণে
শরৈরবচকর্তোগ্রৈঃ ক্রুদ্ধোঽন্তক ইব প্রজাঃ
100.32
ন সংদধন্বিমুঞ্চন্বা মণ্ডলীকৃতকার্মুকঃ
অদৃশ্যত রিপূন্নিঘ্নঞ্শিক্ষয়াস্ত্রবলেন চ
100.33
তস্য তান্নিঘ্নতঃ শত্রূন্হেমপৃষ্ঠং মহদ্ধনুঃ
ভল্লাভ্যাং পাণ্ডবো জ্যেষ্ঠস্ত্রিধা চিচ্ছেদ মারিষ
100.34
বিব্যাধ চৈনং বহুভিঃ সম্যগস্তৈঃ শিতৈঃ শরৈঃ
বর্মাণ্যাশু সমাসাদ্য তে ভগ্নাঃ ক্ষিতিমাবিশন্
100.35
ততঃ প্রমুদিতাঃ পার্থাঃ পরিবব্রুর্যুধিষ্ঠিরম্
যথা বৃত্রবধে দেবা মুদা শক্রং মহর্ষিভিঃ
100.36
অথ দুর্যোধনো রাজা দৃঢমাদায় কার্মুকম্
তিষ্ঠ তিষ্ঠেতি রাজানং ব্রুবন্পাণ্ডবমভ্যয়াৎ
100.37
তং তথা বাদিনং রাজংস্তব পুত্রং মহারথম্
প্রত্যুদ্যয়ুঃ প্রমুদিতাঃ পাঞ্চালা জয়গৃদ্ধিনঃ
100.38
তান্দ্রোণঃ প্রতিজগ্রাহ পরীপ্সন্যুধি পাণ্ডবম্
চণ্ডবাতোদ্ধুতান্মেঘান্সজলানচলো যথা
100.39
তত্র রাজন্মহানাসীত্সংগ্রামো ভূরিবর্ধনঃ
রুদ্রস্যাক্রীডসংকাশঃ সংহারঃ সর্বদেহিনাম্