Utshovঅধ্যায় 99
99.1
সংজয় উবাচ
ততো দুঃশাসনো রাজঞ্শৈনেয়ং সমুপাদ্রবৎ
কিরঞ্শরসহস্রাণি পর্জন্য ইব বৃষ্টিমান্
99.2
স বিদ্ধ্বা সাত্যকিং ষষ্ট্যা তথা ষোডশভিঃ শরৈঃ
নাকম্পয়ত্স্থিতং যুদ্ধে মৈনাকমিব পর্বতম্
99.3
স তু দুঃশাসনং বীরঃ সায়কৈরাবৃণোদ্ভৃশম্
মশকং সমনুপ্রাপ্তমূর্ণনাভিরিবোর্ণয়া
99.4
দৃষ্ট্বা দুঃশাসনং রাজা তথা শরশতাচিতম্
ত্রিগর্তাংশ্চোদয়ামাস যুয়ুধানরথং প্রতি
99.5
তেঽগচ্ছন্যুয়ুধানস্য সমীপং ক্রূরকারিণঃ
ত্রিগর্তানাং ত্রিসাহস্রা রথা যুদ্ধবিশারদাঃ
99.6
তে তু তং রথবংশেন মহতা পর্যবারয়ন্
স্থিরাং কৃত্বা মতিং যুদ্ধে ভূত্বা সংশপ্তকা মিথঃ
99.7
তেষাং প্রয়ততাং যুদ্ধে শরবর্ষাণি মুঞ্চতাম্
যোধান্পঞ্চশতান্মুখ্যানগ্রানীকে ব্যপোথয়ৎ
99.8
তেঽপতন্ত হতাস্তূর্ণং শিনিপ্রবরসায়কৈঃ
মহামারুতবেগেন রুগ্ণা ইব মহাদ্রুমাঃ
99.9
রথৈশ্চ বহুধা ছিন্নৈর্ধ্বজৈশ্চৈব বিশাং পতে
হয়ৈশ্চ কনকাপীডৈঃ পতিতৈস্তত্র মেদিনী
99.10
শৈনেয়শরসংকৃত্তৈঃ শোণিতৌঘপরিপ্লুতৈঃ
অশোভত মহারাজ কিংশুকৈরিব পুষ্পিতৈঃ
99.11
তে বধ্যমানাঃ সমরে যুয়ুধানেন তাবকাঃ
ত্রাতারং নাধ্যগচ্ছন্ত পঙ্কমগ্না ইব দ্বিপাঃ
99.12
ততস্তে পর্যবর্তন্ত সর্বে দ্রোণরথং প্রতি
ভয়াত্পতগরাজস্য গর্তানীব মহোরগাঃ
99.13
হত্বা পঞ্চশতান্যোধাঞ্শরৈরাশীবিষোপমৈঃ
প্রায়াত্স শনকৈর্বীরো ধনংজয়রথং প্রতি
99.14
তং প্রয়ান্তং নরশ্রেষ্ঠং পুত্রো দুঃশাসনস্তব
বিব্যাধ নবভিস্তূর্ণং শরৈঃ সংনতপর্বভিঃ
99.15
স তু তং প্রতিবিব্যাধ পঞ্চভির্নিশিতৈঃ শরৈঃ
রুক্মপুঙ্খৈর্মহেষ্বাসো গার্ধ্রপত্রৈরজিহ্মগৈঃ
99.16
সাত্যকিং তু মহারাজ প্রহসন্নিব ভারত
দুঃশাসনস্ত্রিভির্বিদ্ধ্বা পুনর্বিব্যাধ পঞ্চভিঃ
99.17
শৈনেয়স্তব পুত্রং তু বিদ্ধ্বা পঞ্চভিরাশুগৈঃ
ধনুশ্চাস্য রণে ছিত্ত্বা বিস্ময়ন্নর্জুনং যয়ৌ
99.18
ততো দুঃশাসনঃ ক্রুদ্ধো বৃষ্ণিবীরায় গচ্ছতে
সর্বপারশবীং শক্তিং বিসসর্জ জিঘাংসয়া
99.19
তাং তু শক্তিং তদা ঘোরাং তব পুত্রস্য সাত্যকিঃ
চিচ্ছেদ শতধা রাজন্নিশিতৈঃ কঙ্কপত্রিভিঃ
99.20
অথান্যদ্ধনুরাদায় পুত্রস্তব জনেশ্বর
সাত্যকিং দশভির্বিদ্ধ্বা সিংহনাদং ননাদ হ
99.21
সাত্যকিস্তু রণে ক্রুদ্ধো মোহয়িত্বা সুতং তব
শরৈরগ্নিশিখাকারৈরাজঘান স্তনান্তরে
সর্বায়সৈস্তীক্ষ্ণবক্ত্রৈরষ্টাভির্বিব্যধে পুনঃ
99.22
দুঃশাসনস্তু বিংশত্যা সাত্যকিং প্রত্যবিধ্যত
সাত্বতোঽপি মহারাজ তং বিব্যাধ স্তনান্তরে
ত্রিভিরেব মহাবেগৈঃ শরৈঃ সংনতপর্বভিঃ
99.23
ততোঽস্য বাহান্নিশিতৈঃ শরৈর্জঘ্নে মহারথঃ
সারথিং চ সুসংক্রুদ্ধঃ শরৈঃ সংনতপর্বভিঃ
99.24
ধনুরেকেন ভল্লেন হস্তাবাপং চ পঞ্চভিঃ
ধ্বজং চ রথশক্তিং চ ভল্লাভ্যাং পরমাস্ত্রবিৎ
চিচ্ছেদ বিশিখৈস্তীক্ষ্ণৈস্তথোভৌ পার্ষ্ণিসারথী
99.25
স ছিন্নধন্বা বিরথো হতাশ্বো হতসারথিঃ
ত্রিগর্তসেনাপতিনা স্বরথেনাপবাহিতঃ
99.26
তমভিদ্রুত্য শৈনেয়ো মুহূর্তমিব ভারত
ন জঘান মহাবাহুর্ভীমসেনবচঃ স্মরন্
99.27
ভীমসেনেন হি বধঃ সুতানাং তব ভারত
প্রতিজ্ঞাতঃ সভামধ্যে সর্বেষামেব সংয়ুগে
99.28
তথা দুঃশাসনং জিত্বা সাত্যকিঃ সংয়ুগে প্রভো
জগাম ত্বরিতো রাজন্যেন যাতো ধনংজয়ঃ