Utshovঅধ্যায় 98
98.1
সংজয় উবাচ
দুঃশাসনরথং দৃষ্ট্বা সমীপে পর্যবস্থিতম্
ভারদ্বাজস্ততো বাক্যং দুঃশাসনমথাব্রবীৎ
98.2
দুঃশাসন রথাঃ সর্বে কস্মাদেতে প্রবিদ্রুতাঃ
কচ্চিত্ক্ষেমং তু নৃপতেঃ কচ্চিজ্জীবতি সৈন্ধবঃ
98.3
রাজপুত্রো ভবানত্র রাজভ্রাতা মহারথঃ
কিমর্থং দ্রবসে যুদ্ধে যৌবরাজ্যমবাপ্য হি
98.4
স্বয়ং বৈরং মহত্কৃত্বা পাঞ্চালৈঃ পাণ্ডবৈঃ সহ
একং সাত্যকিমাসাদ্য কথং ভীতোঽসি সংয়ুগে
98.5
ন জানীষে পুরা ত্বং তু গৃহ্ণন্নক্ষান্দুরোদরে
শরা হ্যেতে ভবিষ্যন্তি দারুণাশীবিষোপমাঃ
98.6
অপ্রিয়াণাং চ বচনং পাণ্ডবেষু বিশেষতঃ
দ্রৌপদ্যাশ্চ পরিক্লেশস্ত্বন্মূলো হ্যভবত্পুরা
98.7
ক্ব তে মানশ্চ দর্পশ্চ ক্ব চ তদ্বীর গর্জিতম্
আশীবিষসমান্পার্থান্কোপয়িত্বা ক্ব যাস্যসি
98.8
শোচ্যেয়ং ভারতী সেনা রাজা চৈব সুয়োধনঃ
যস্য ত্বং কর্কশো ভ্রাতা পলায়নপরায়ণঃ
98.9
ননু নাম ত্বয়া বীর দীর্যমাণা ভয়ার্দিতা
স্ববাহুবলমাস্থায় রক্ষিতব্যা হ্যনীকিনী
স ত্বমদ্য রণং ত্যক্ত্বা ভীতো হর্ষয়সে পরান্
98.10
বিদ্রুতে ত্বয়ি সৈন্যস্য নায়কে শত্রুসূদন
কোঽন্যঃ স্থাস্যতি সংগ্রামে ভীতো ভীতে ব্যপাশ্রয়ে
98.11
একেন সাত্বতেনাদ্য যুধ্যমানস্য চানঘ
পলায়নে তব মতিঃ সংগ্রামাদ্ধি প্রবর্ততে
98.12
যদা গাণ্ডীবধন্বানং ভীমসেনং চ কৌরব
যমৌ চ যুধি দ্রষ্টাসি তদা ত্বং কিং করিষ্যসি
98.13
যুধি ফল্গুনবাণানাং সূর্যাগ্নিসমতেজসাম্
ন তুল্যাঃ সাত্যকিশরা যেষাং ভীতঃ পলায়সে
98.14
যদি তাবত্কৃতা বুদ্ধিঃ পলায়নপরায়ণা
পৃথিবী ধর্মরাজস্য শমেনৈব প্রদীয়তাম্
98.15
যাবত্ফল্গুননারাচা নির্মুক্তোরগসংনিভাঃ
নাবিশন্তি শরীরং তে তাবত্সংশাম্য পাণ্ডবৈঃ
98.16
যাবত্তে পৃথিবীং পার্থা হত্বা ভ্রাতৃশতং রণে
নাক্ষিপন্তি মহাত্মানস্তাবত্সংশাম্য পাণ্ডবৈঃ
98.17
যাবন্ন ক্রুধ্যতে রাজা ধর্মপুত্রো যুধিষ্ঠিরঃ
কৃষ্ণশ্চ সমরশ্লাঘী তাবত্সংশাম্য পাণ্ডবৈঃ
98.18
যাবদ্ভীমো মহাবাহুর্বিগাহ্য মহতীং চমূম্
সোদরাংস্তে ন মৃদ্নাতি তাবত্সংশাম্য পাণ্ডবৈঃ
98.19
পূর্বমুক্তশ্চ তে ভ্রাতা ভীষ্মেণ স সুয়োধনঃ
অজেয়াঃ পাণ্ডবাঃ সংখ্যে সৌম্য সংশাম্য পাণ্ডবৈঃ
ন চ তত্কৃতবান্মন্দস্তব ভ্রাতা সুয়োধনঃ
98.20
স যুদ্ধে ধৃতিমাস্থায় যত্তো যুধ্যস্ব পাণ্ডবৈঃ
গচ্ছ তূর্ণং রথেনৈব তত্র তিষ্ঠতি সাত্যকিঃ
98.21
ত্বয়া হীনং বলং হ্যেতদ্বিদ্রবিষ্যতি ভারত
আত্মার্থং যোধয় রণে সাত্যকিং সত্যবিক্রমম্
98.22
এবমুক্তস্তব সুতো নাব্রবীত্কিংচিদপ্যসৌ
শ্রুতং চাশ্রুতবত্কৃত্বা প্রায়াদ্যেন স সাত্যকিঃ
98.23
সৈন্যেন মহতা যুক্তো ম্লেচ্ছানামনিবর্তিনাম্
আসাদ্য চ রণে যত্তো যুয়ুধানময়োধয়ৎ
98.24
দ্রোণোঽপি রথিনাং শ্রেষ্ঠঃ পাঞ্চালান্পাণ্ডবাংস্তথা
অভ্যদ্রবত সংক্রুদ্ধো জবমাস্থায় মধ্যমম্
98.25
প্রবিশ্য চ রণে দ্রোণঃ পাঞ্চালানাং বরূথিনীম্
দ্রাবয়ামাস যোধান্বৈ শতশোঽথ সহস্রশঃ
98.26
ততো দ্রোণো মহারাজ নাম বিশ্রাব্য সংয়ুগে
পাণ্ডুপাঞ্চালমত্স্যানাং প্রচক্রে কদনং মহৎ
98.27
তং জয়ন্তমনীকানি ভারদ্বাজং ততস্ততঃ
পাঞ্চালপুত্রো দ্যুতিমান্বীরকেতুঃ সমভ্যয়াৎ
98.28
স দ্রোণং পঞ্চভির্বিদ্ধ্বা শরৈঃ সংনতপর্বভিঃ
ধ্বজমেকেন বিব্যাধ সারথিং চাস্য সপ্তভিঃ
98.29
তত্রাদ্ভুতং মহারাজ দৃষ্টবানস্মি সংয়ুগে
যদ্দ্রোণো রভসং যুদ্ধে পাঞ্চাল্যং নাভ্যবর্তত
98.30
সংনিরুদ্ধং রণে দ্রোণং পাঞ্চালা বীক্ষ্য মারিষ
আবব্রুঃ সর্বতো রাজন্ধর্মপুত্রজয়ৈষিণঃ
98.31
তে শরৈরগ্নিসংকাশৈস্তোমরৈশ্চ মহাধনৈঃ
শস্ত্রৈশ্চ বিবিধৈ রাজন্দ্রোণমেকমবাকিরন্
98.32
নিহত্য তান্বাণগণান্দ্রোণো রাজন্সমন্ততঃ
মহাজলধরান্ব্যোম্নি মাতরিশ্বা বিবানিব
98.33
ততঃ শরং মহাঘোরং সূর্যপাবকসংনিভম্
সংদধে পরবীরঘ্নো বীরকেতুরথং প্রতি
98.34
স ভিত্ত্বা তু শরো রাজন্পাঞ্চাল্যং কুলনন্দনম্
অভ্যগাদ্ধরণীং তূর্ণং লোহিতার্দ্রো জ্বলন্নিব
98.35
ততোঽপতদ্রথাত্তূর্ণং পাঞ্চাল্যঃ কুলনন্দনঃ
পর্বতাগ্রাদিব মহাংশ্চম্পকো বায়ুপীডিতঃ
98.36
তস্মিন্হতে মহেষ্বাসে রাজপুত্রে মহাবলে
পাঞ্চালাস্ত্বরিতা দ্রোণং সমন্তাত্পর্যবারয়ন্
98.37
চিত্রকেতুঃ সুধন্বা চ চিত্রবর্মা চ ভারত
তথা চিত্ররথশ্চৈব ভ্রাতৃব্যসনকর্ষিতাঃ
98.38
অভ্যদ্রবন্ত সহিতা ভারদ্বাজং যুয়ুত্সবঃ
মুঞ্চন্তঃ শরবর্ষাণি তপান্তে জলদা ইব
98.39
স বধ্যমানো বহুধা রাজপুত্রৈর্মহারথৈঃ
ব্যশ্বসূতরথাংশ্চক্রে কুমারান্কুপিতো রণে
98.40
তথাপরৈঃ সুনিশিতৈর্ভল্লৈস্তেষাং মহায়শাঃ
পুষ্পাণীব বিচিন্বন্হি সোত্তমাঙ্গান্যপাতয়ৎ
98.41
তে রথেভ্যো হতাঃ পেতুঃ ক্ষিতৌ রাজন্সুবর্চসঃ
দেবাসুরে পুরা যুদ্ধে যথা দৈতেয়দানবাঃ
98.42
তান্নিহত্য রণে রাজন্ভারদ্বাজঃ প্রতাপবান্
কার্মুকং ভ্রাময়ামাস হেমপৃষ্ঠং দুরাসদম্
98.43
পাঞ্চালান্নিহতান্দৃষ্ট্বা দেবকল্পান্মহারথান্
ধৃষ্টদ্যুম্নো ভৃশং ক্রুদ্ধো নেত্রাভ্যাং পাতয়ঞ্জলম্
অভ্যবর্তত সংগ্রামে ক্রুদ্ধো দ্রোণরথং প্রতি
98.44
ততো হা হেতি সহসা নাদঃ সমভবন্নৃপ
পাঞ্চাল্যেন রণে দৃষ্ট্বা দ্রোণমাবারিতং শরৈঃ
98.45
সংছাদ্যমানো বহুধা পার্ষতেন মহাত্মনা
ন বিব্যথে ততো দ্রোণঃ স্ময়ন্নেবান্বয়ুধ্যত
98.46
ততো দ্রোণং মহারাজ পাঞ্চাল্যঃ ক্রোধমূর্ছিতঃ
আজঘানোরসি ক্রুদ্ধো নবত্যা নতপর্বণাম্
98.47
স গাঢবিদ্ধো বলিনা ভারদ্বাজো মহায়শাঃ
নিষসাদ রথোপস্থে কশ্মলং চ জগাম হ
98.48
তং বৈ তথাগতং দৃষ্ট্বা ধৃষ্টদ্যুম্নঃ পরাক্রমী
সমুত্সৃজ্য ধনুস্তূর্ণমসিং জগ্রাহ বীর্যবান্
98.49
অবপ্লুত্য রথাচ্চাপি ত্বরিতঃ স মহারথঃ
আরুরোহ রথং তূর্ণং ভারদ্বাজস্য মারিষ
হর্তুমৈচ্ছচ্ছিরঃ কায়াত্ক্রোধসংরক্তলোচনঃ
98.50
প্রত্যাশ্বস্তস্ততো দ্রোণো ধনুর্গৃহ্য মহাবলঃ
শরৈর্বৈতস্তিকৈ রাজন্নিত্যমাসন্নয়োধিভিঃ
যোধয়ামাস সমরে ধৃষ্টদ্যুম্নং মহারথম্
98.51
তে হি বৈতস্তিকা নাম শরা আসন্নয়োধিনঃ
দ্রোণস্য বিদিতা রাজন্ধৃষ্টদ্যুম্নমবাক্ষিপন্
98.52
স বধ্যমানো বহুভিঃ সায়কৈস্তৈর্মহাবলঃ
অবপ্লুত্য রথাত্তূর্ণং ভগ্নবেগঃ পরাক্রমী
98.53
আরুহ্য স্বরথং বীরঃ প্রগৃহ্য চ মহদ্ধনুঃ
বিব্যাধ সমরে দ্রোণং ধৃষ্টদ্যুম্নো মহারথঃ
98.54
তদদ্ভুতং তয়োর্যুদ্ধং ভূতসংঘা হ্যপূজয়ন্
ক্ষত্রিয়াশ্চ মহারাজ যে চান্যে তত্র সৈনিকাঃ
98.55
অবশ্যং সমরে দ্রোণো ধৃষ্টদ্যুম্নেন সংগতঃ
বশমেষ্যতি নো রাজ্ঞঃ পাঞ্চালা ইতি চুক্রুশুঃ
98.56
দ্রোণস্তু ত্বরিতো যুদ্ধে ধৃষ্টদ্যুম্নস্য সারথেঃ
শিরঃ প্রচ্যাবয়ামাস ফলং পক্বং তরোরিব
ততস্তে প্রদ্রুতা বাহা রাজংস্তস্য মহাত্মনঃ
98.57
তেষু প্রদ্রবমাণেষু পাঞ্চালান্সৃঞ্জয়াংস্তথা
ব্যদ্রাবয়দ্রণে দ্রোণস্তত্র তত্র পরাক্রমী
98.58
বিজিত্য পাণ্ডুপাঞ্চালান্ভারদ্বাজঃ প্রতাপবান্
স্বং ব্যূহং পুনরাস্থায় স্থিরোঽভবদরিংদমঃ
ন চৈনং পাণ্ডবা যুদ্ধে জেতুমুত্সহিরে প্রভো